Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CUNGGUEK GUNGCANJDANGJ DAIH CIBBET GAIQ CUNGHYANGH VEIJYENZVEI DAIHROEK BAEZ DAENGXCUNGQ VEIYI VWNZGEN GYOEBBIEN

  
【Cihsaw Hung’iq : hung rauh iq】  Dajyaenq
      
 CUNGGUEK GUNGCANJDANGJ DAIH CIBBET GAIQCUNGHYANGH VEIJYENZVEI DAIHROEK BAEZ DAENGXCUNGQ VEIYI GUNGHBAU

(2016 nienz 10 nyied 27 hauh Cungguek Gungcanjdangj Daih Cibbet Gaiq Cunghyangh
        Veijyenzvei Daihroek Baez Daengxcungq Veiyi doenggvaq)

  Cungguek Gungcanjdangj Daih Cibbet Gaiq Cunghyangh Veijyenzvei Daihroek Baez Daengxcungq Veiyi, 2016 nienz 10 nyied 24 hauh daengz 27 hauh youq Baekging ciuhai.

  Gij vunz camgya baez cienzhoih neix, miz cunghyangh veijyenz 197 boux, houbuj cunghyangh veijyenz 151 boux. Cunghyangh Gijliz Genjcaz Veijyenzvei veijyenz caeuq mizgven fuengmienh boux fucwz dungzci de lezsiz le veiyi. Gij daibyauj Cibbet Daih aen dangj ndawde mbangj gihcwngz dungzci caeuq conhgyah yozcej hix lezsiz le veiyi.

  Cienzhoih youz Cunghyangh Cwngcigiz cujciz. Cunghyangh Veijyenzvei cungjsuhgi Siz Ginbingz guh le gangjvah youqgaenj.

  Cienzhoih dingqaeu caeuq yaenglwnh le faenh gunghcoz baugau Cunghyangh Cwngcigiz dakhawj Siz Ginbingz guh haenx, saemjlwnh doenggvaq le 《Gvendaengz Hingzseiq Moq Baihlaj Ndaw Dangj Cwngci Swnghhoz Mizgven Cunjcwz》 caeuq 《Cungguek Gungcanjdangj Ndaw Dangj Gamduk Diuzlaeh》, saemjlwnh doenggvaq le 《Aen Gezyi Gvendaengz Ciuhai Dangj Raeuz Daih Cibgouj Baez Daengx Guek Daibyauj Daihhoih》. Siz Ginbingz couh 《Cunjcwz (Daujlungauj)》 caeuq 《Diuzlae(Daujlungauj)》 yiengq cienzhoih guh le gangjmingz.

  Cienzhoih cungfaen haengjdingh le dangj raeuz Cibbet Gaiq Haj Cung Cienzhoih doxdaeuj Cunghyangh Cwngcigiz guh gij hong haenx. Doengzcaez nyinhnaeuz, najdoiq gij hingzsik fukcab ndaw guek rog guek, Cunghyangh Cwngcigiz yaengxsang mbaw geiz hungmbwk yiengh seveicujyi miz Cungguek daegsaek, genhciz aeu Majgwzswh Lezningzcujyi、 Mauzcwzdungh Swhsiengj、Dwng Siujbingz Lijlun、 “Sam Aen Daibyauj” Cung’yau Swhsiengj、 Gohyoz Fazcanjgvanh daeuj guh dazyinx, cienzmienh gvancez gij cingsaenz Cibbet Daih caeuq Cibbet Gaiq Sam Cung、Seiq Cung、Haj Cung cienzhoih, haeujlaeg gvancez gij cingsaenz Siz Ginbingz cungjsuhgi baenzroix gangjvah youqgaenj caeuq gij leixniemh moq swhsiengj moq canloz moq guenjleix guekgya haenx, dawzndei seizdaih byaijyiengq, hoizwngq sizcen iugouz, doxgiet daiqlingx daengx daengj daengx guek gak cuz yinzminz caez sim hab rengz、 haenq guh saed guh, dungjcouz doicaenh “haj yiengh gyoebbaenz aen cingjdaej ndeu” cungjdaej baijbouh caeuq hezdiuz doicaenh “seiq aen cienzmienh” canloz baijbouh, haiguh “song hag it guh” hagsib gyauyuz, doidoengh cienzmienh gyalaeg gaijgwz、 mbiengj gunghawj gezgousing gaijgwz、 gozfangz caeuq ginhdui gaijgwz byaijok yamqdin hungnaek, gak hangh hongsaeh dangj caeuq guekgya aeundaej cincanj hungnaek moq.

  Cienzhoih doiq gij cingzcik cienzmienh coengzyiemz ceih dangj bingzgyaq gig sang, nyinhnaeuz dangj raeuz Cibbet Daih doxdaeuj, aen dangj cunghyangh aeu Siz Ginbingz dungzci guh haedsim haenx caenndang haenqrengz guh、daiqdaeuz guh yienghndei, giendingh doicaenh cienzmienh coengzyiemz ceih dangj, genhciz swhsiengj laeb dangj caeuq cidu ceih dangj maedcaed giethab, doxgyoeb cwngjdun gij cozfungh aen dang, yiemzhaenq fadceih nduknaeuh, guhseuq gij cwngci swnghdai ndaw dangj, gij cwngsi swnghhoz ndaw dangj yienh’ok yienghsiengq moq, aeundaej le dangjsim minzsim, vih dangj caeuq guekgya haiok saednieb gizmen moq daezhawj le baujcwng youqgaenj.

  Cienzhoih cungjgez le gij lizsij gingniemh dangj raeuz baenzlawz haiguh ndaw dangj cwngci swnghhoz, faensik le gij hingzseiq caeuq yinvu cienzmienh coengzyiemz ceih dangj bungzdaengz haenx, nyinhnaeuz banh ndei gij saehcingz Cungguek, gvanhgen youq aen dangj, gvanhgen dwg dangj aeu guenj dangj、 coengzyiemz ceih dangj. Dangj aeu guenj dangj itdingh aeu daj gij cwngci swnghhoz ndaw dangj bae guenj, coengzyiemz ceih dangj itdingh aeu daj gij cwngci swnghhoz ndaw dangj hainduj yiemz. Vih engq ndei bae guh gij doucwngh hungmbwk miz haujlai lijsij daegdiemj moq haenx、doicaenh aen gunghcwngz hungmbwk moq aen dangj gensez、doicaenh aen saehnieb hungmbwk yiengh seveicujyi miz Cungguek daegsaek, gingsouh “seiq daih gaujniemh”、haekfug “seiq cungj yung’yiemj”, miz bizyau ceiqdingh bouh cunjcwz gvendaengz laj hingzseiq moq baenzlawz guh ndei ndaw dangj cwngci swnghhoz he.

  Cienzhoih giengzdiuh, youq hingzseiq moq baihlaj gyagiengz caeuq gveihfan gij cwngci swnghhoz ndaw dangj, itdingh aeu yungh dangjcangh guh goekgaen bae ciuqei, genhciz gij cwngci lohsienq、 swhsiengj lohsienq、cujciz lohsienq、ginzcung lohsienq dangj raeuz, roengzrengz demgiengz ndaw dangj cwngci swnghhoz gij cwngcising、 sizdaising、 yenzcwzsing、 candousing haenx, roengzrengz demgiengz gij naengzlig gag bienq seuq、gag guh ndei、 gag gaijmoq、 gag daezsang dangj raeuz, roengzrengz daezsang gij lingjdauj suijbingz caeuq gaemgienz suijbingz dangj raeuz、demgiengz gij naengzlig dingj nduknaeuh fuengz bienqcaet caeuq dingjdangj fungyiemj, roengzrengz henhoh gij gienzvi dangj cunghyangh、baujcwng dangj raeuz doxgiet doengjit、baujciz gij senhcinsing caeuq cunzgezsing dangj raeuz, roengzrengz youq daengx dangj cauhbaenz cungj cwngci gizmen youh miz cizcungh youh miz minzcuj、youh miz gijliz youh miz swyouz、 youh miz doengjit eiqceiq youh miz gak boux simcingz soengsat sengdoengh hozboz haenx.

  Cienzhoih giengzdiuh, youq hingzseiq moq baihlaj gyagiengz caeuq gveihfan gij cwngci swnghhoz ndaw dangj, cungdenj dwg gak gaep lingjdauj gihgvanh caeuq lingjdauj ganbu, gvanhgen dwg gauhgiz ganbu daegbied dwg doengh boux gapbaenz Cunghyangh Veijyenzvei、 Cunghyangh Cwngcigiz、Cunghyangh Cwngcigiz Cangzvu Veijyenzvei haenx. Gauhgiz ganbu daegbied dwg doengh boux gapbaenz caengz cunghyangh lingjdauj haenx itdingh aeu caenndang guh yienghndei, mozfan ciuqsouj dangjcangh dangjgveih, yiemzsouj gij cwngci gijliz caeuq cwngci gvigawj aen dangj, genhciz mbouj lumz gij simnyienh codaeuz、laebdaeb baenaj, genhciz daiqdaeuz guh yienghndei、aeu baihgwnz daiqdoengh baihlaj, vih daengx dangj daengx sevei guh ok sifan.

  Cienzhoih daezok, aen lijsiengj hunggyae gungcanjcujyi caeuq aen lijsiengj caezcaemh seveicujyi miz Cungguek daegsaek, dwg gij cingsaenz dingjdaemx caeuq gij cwngci lingzhoenz vunz Cungguek Gungcanjdangj, hix dwg gij swhsiengj giekdaej baujciz dangj ndaej doxgiet doengjit. Itdingh aeu dawz giendingh lijsiengj saenqniemh dangguh aen yinvu ceiq youqgaenj bae haiguh gij cwngci swnghhoz ndaw dangj. Daengx dangj dungzci itdingh aeu dawz sinyangj Majgwzswhcujyi、 siengsaenq seveicujyi caeuq gungcanjcujyi dangguh gij gyaepgouz baenz ciuhvunz, doiq yiengh seveicujyi miz Cungguek daegsaek haenx giendingh roenloh gagsaenq、lijlun gagsaenq、cidu gagsaenq、vwnzva gagsaenq. Lingjdauj ganbu daegbied dwg gauhgiz lingjdauj ganbu aeu yungh saedsaeh hengzdoengh hawj dangjyenz caeuq ginzcung roxnyinh daengz gij ligliengh hung’ak lijsiengj saenqniemh. Daengx dangj itdingh aeu mbouj doenghngauz saek di bae genhciz Majgwzswhcujyi cijdauj swhsiengj, gak gaep cujciz aen dangj itdingh aeu genhciz mbouj cuengqsoeng bae ca’ndei lijlun vujcangh, guengjdaih dangjyenz、ganbu daegbied dwg gauhgiz ganbu itdingh aeu gagrox ca’ndei hagsib、demgiengz dangjsing siuhyangj.

  Cienzhoih daezok, diuz gihbwnj lohsienq seveicujyi cogaep gaihdon aen dangj dwg diuzsienq sengmingh aen dangj caeuq guekgya、 diuzsienq vuenyungz yinzminz, hix dwg gij gaenbonj baujcwng ndaej cingqciengz bae gaihcanj gij cwngci swnghhoz ndaw dangj. Itdingh aeu cienzmienh gvancez caephengz diuz gihbwnj lohsienq aen dangj, dawz aeu ginghci gensez guh cungsim caeuq genhciz seiq hangh gihbwnj yenzcwz、genhciz gaijgwz hailangh song aen gihbwnjdenj neix doengjit youq gij sizcen hungmbwk seveicujyi miz Cungguek daegsaek, seiz lawz cungj mbouj ndaej miz saek di bienliz caeuq doenghngauz. Daengx dangj itdingh aeu dinghsim comzrengz ca’ndei fazcanj aen yinvu ceiq youqgaenj dangj raeuz gaemgienz hwngguek neix. Genhciz seiq hangh gihbwnj yenzcwz, gaenbonj dwg genhciz aen dangj lingjdauj, genhciz diuz roenloh seveicujyi miz Cungguek daegsaek、aen lijlun dijhi seveicujyi miz Cungguek daegsaek、aen cidu seveicujyi miz Cungguek daegsaek、gij vwnzva seveicujyi miz Cungguek daegsaek. Itdingh aeu gamj bae doicaenh lijlun cauhmoq、 sizcen cauhmoq、cidu cauhmoq、 vwnzva cauhmoq nem gizyawz gak fuengmienh cauhmoq, giendingh mbouj bienq bae saedhengz doiq rog hailangh gihbwnj gozcwz. Itdingh aeu dawz genhciz gij swhsiengj lohsienq aen dangj ronzdoeng daengz caephengz diuz gihbwnj lohsienq aen dangj daengx aen gocwngz bae, youq ndaw sizcen gienjniemh caenleix caeuq fazcanj caenleix, mboujduenh doicaenh Majgwzswhcujyi caeuq Cungguek saedsaeh doxgiethab. Gaujcaz nyinhdingh ganbu daegbied dwg gauhgiz ganbu, itdingh aeu sien yawj de dwg mbouj dwg giendingh mbouj bienq bae gvancez gij gihbwnj lohsienq aen dangj. Dangjyenz、 ganbu daegbied dwg gauhgiz ganbu, youq dangqnaj daih deng daih loeng mbouj ndaej daidu hamzhawz, mbouj ndaej doenghngauz gihbwnj cwngci laebciengz, mbouj ndaej deng vah loek baijbouh.

  Cienzhoih daezok, genhgez henhoh gij gienzvi dangj cunghyangh、 baujcwng daengx dangj yiemzgek caephengz faplingh, dwg gvanhaeh daengz gij cenzduz minghyinh aen dangj caeuq guekgya, dwg gij gaenbonj leih’ik daengx guek gak cuz yinzminz, hix dwg aen muzdiz youqgaenj gyagiengz caeuq gveihfan gij cwngci swnghhoz ndaw dangj. Genhciz aen dangj lingjdauj, sien dwg genhciz dangj cunghyangh guh cizcungh doengjit lingjdauj. Aen guekgya lawz、 aen cwngdangj lawz, gij lingjdauj haedsim de cungj youqgaenj dangqmaz. Daengx dangj itdingh aeu gagrox youq swhsiengj fuengmienh cwngci fuengmienh hengzdoengh fuengmienh caeuq dangj cunghyangh baujciz doxdoengz. Gak gaep dangj cujciz、daengxcungq dangjyenz daegbied dwg gauhgiz ganbu cungj aeu gaen hwnj dangj cunghyangh, gaen hwnj gij lijlun caeuq lohsienq fuengcim cwngcwz aen dangj, gaen hwnj gij gezcwz baijbouh dangj cunghyangh, guh daengz gij dangj cunghyangh daezok haenx genhgez yiengjwngq、gij dangj cunghyangh gietdingh haenx genhgez caephengz、 gij dangj cunghyangh gimq guh haenx genhgez mbouj guh.

  Cienzhoih daezok, gijliz yiemz dwg gij baujcang youqgaenj sawj daengx dangj doengjit eiqceiq、doengjit hengzdoengh、yamqdin doxdoengz baenaj haenx, dwg gij neiyungz youqgaenj cwngci swnghhoz ndaw dangj. Itdingh aeu yiemzmingz gij gijliz aen dangj, dawz gijliz cuengq youq baihnaj, yungh gij gijliz yiemzrwd bae coengzyiemz ceih dangj. Genhciz baihnaj gijliz itlwd bingzdaengj, ciuqsouj gijliz mbouj miz daeggienz, caephengz gijliz mbouj miz laehvaih, ndaw dangj baenzbaenz mbouj cinjhawj mizyouq aen cujciz daegbied caeuq boux dangjyenz daegbied mbouj souh gijliz gaemguenj haenx. Gak gaep dangj cujciz caeuq daengxcungq dangjyenz itdingh aeu doiq dangj cungsim lauxsaed、seuqseuq saksak, gangj vah lauxsaed、 banh saeh lauxsaed、 guh vunz lauxsaed, ciuqsaed yiengq dangj fanjyingj caeuq baugau cingzgvang, fanjdoiq guh liengjmenbai、guh “bouxvunz song mbiengj”, fanjdoiq loengh haw guh gyaj、hawbauq mauhbauq, fanjdoiq yaemmuenz cingzgvang saedsaeh、bauq ndei mbouj bauq rwix. Lingjdauj gihgvanh caeuq lingjdauj ganbu mbouj cinj aeu gijmaz leixyouz caeuq mingzdaeuz cuengqyungz、yoegcoi、daezsingj roxnaeuz giengzbik gaeplaj gangj vahgyaj. Ndaw dangj mbouj cinj duenghduengh ragrag、doxbungj doxbauq、bi rieng rod mumh. Senhconz boux lingjdauj seiz aeu ciuq saedsaeh bae gangj, gimqcij bungjbauq. Gak gaep dangj cujciz itdingh aeu rap hwnj gij cwzyin caephengz caeuq henhoh cwngci gijliz caeuq cwngci gvigawj, genhgez fuengzre caeuq niujcingq gij vwndiz mwh caephengz gijliz soengrwnh fwngzunq haenx.

  Cienzhoih daezok, dangj raeuz dwg daj ndaw yinzminz daeuj, mbouj miz yinzminz yungjhu caeuq cihciz, dangj couh yaek saetbae goekrag. Itdingh aeu dawz aen gaenbonj cunghcij genhciz itsim iteiq vih yinzminz fuzvu、 baujciz dangj caeuq yinzminz ginzcung gaenjmaed lienzhaeh neix dangguh gij gaenbonj iugouz bae gyagiengz caeuq gveihfan gij cwngci swnghhoz ndaw dangj. Daengx dangj itdingh aeu gvancez gij ginzcung lohsienq aen dangj, vih ginzcung banh saedsaeh、 gej nanzsaeh, dang ndei boux fugsaeh yinzminz. Genhciz cam yinzminz aeu genyi、 cam yinzminz siengj aeu gijmaz、 cam yinzminz aeu geiqmaeuz, itdingh mbouj ndaej youq dangqnaj ginzcung gag nyinhnaeuz guh ndaej deng、ndaengndiengq haep vunz, itdingh mbouj ndaej dangguen guh lauxyez、mbouj gvansim gij haemzhoj ginzcung, engqgya mbouj ndaej haephangz ginzcung、 sonjhaih caeuq ciemqaeu gij leih’ik ginzcung. Itdingh aeu genhgez fanjdoiq hingzsizcujyi、gvanhliuzcujyi、 yangjlozcujyi caeuq fungheiq saisaengq sajbaizciengz. Gak gaep lingjdauj ganbu itdingh aeu haeuj daengz saedsaeh bae、 haeuj daengz gihcwngz bae、 haeuj daengz ginzcung bae, lai baedaengz giz dieg diuzgen gannanz、 cingzgvang fukcab、 mauzdun doed’ok haenx gaijgez vwndiz, siengj caenh banhfap vih ginzcung siu you cawz hoj. Doiq sojmiz gij hingzveiz guh“hingzsieng gunghcwngz”caeuq “cwngciz gunghcwngz” sai rengz sai cienz haenx, aeu yiemzsuk bae cazdawz cwzyin caeuq gyaepcaz cwzyin, ciuq gijliz caeuq faplwd bae cawqleix.

  Cienzhoih daezok, minzcuj cizcunghci dwg gij gaenbonj cujciz yenzcwz aen dangj raeuz, dwg hangh cidu youqgaenj baujcang gij cwngci swnghhoz ndaw dangj ndaej cingqciengz bae guh haenx. Genhciz cizdij lingjdauj cidu, saedhengz cizdij lingjdauj caeuq goyinz faengoeng fucwz doxgiethab, dwg aen bouhfaenh youqgaenj gapbaenz minzcuj cizcunghci haenx, itdingh aeu daj gyaeuj daengz rieng bae genhciz, aen cujciz lawz roxnaeuz boux lawz youq gijmaz cingzgvang baihlaj cungj mbouj cinj yungh cungj leixyouz lawz boihfanj hangh cidu neix. Gak gaep dangjveij (dangjcuj) itdingh aeu genhciz cizdij lingjdauj cidu, lingjdauj banhswj cwngzyenz itdingh aeu demgiengz daengxbuenz gvanhnen caeuq cwzyin eiqsik, boux cujyau fucwz dungzci dangjveij (dangjcuj)itdingh aeu fazyangz minzcuj、 rox guh cizcungh、 gamj rapdawz cwzyin, lingjdauj banhswj cwngzyenz itdingh aeu genhgez caephengz gij gietdingh dangj cujciz.

  Cienzhoih daezok, ndaw dangj minzcuj dwg diuzmingh aen dangj, dwg gij cwngci swnghhoz ndaw dangj cizgiz gengangh aen giekdaej youqgaenj de. Ndaw dangj gezcwz、 caephengz、 gamduk daengj gunghcoz itdingh aeu caephengz gij minzcuj yenzcwz caeuq cwngzsi dangjcangh dangjgveih doekdingh haenx, aen dangj cujciz lawz caeuq boux vunz lawz, cungj mbouj ndaej gaemhnaenx gij minzcuj ndaw dangj, buqvaih gij minzcuj ndaw dangj. Cunghyangh Veijyenzvei、 Cunghyangh Cwngcigiz、 Cunghyangh Cwngcigiz Cangzvu Veijyenzvei caeuq aen dangj gak gaep veijyenzvei guh ok gezcwz baijbouh hungnaek, bietdingh aeu haeujlaeg bae guh diucaz yenzgiu, gvangqlangh dingqaeu gij yigen caeuq genyi gak fuengmienh. Bietdingh aeu aeueiq gij cawjdaej diegvih dangjyenz、 baujcang gij minzcuj gienzleih dangjyenz, lozsiz dangjyenz gij gienzleih rox cingzgvang、 gienzleih caeuqfaenh、 gienzleih senjgij、gienzleih gamduk de, baujcang daengxcungq dangjyenz bingzdaengj yiengjmiz gij gienzleih dangjyenz ndaw dangjcangh gvidingh、 hengzguh gij yivu dangjyenz ndaw dangjcangh gvidingh, genhciz cungj dungzci gvanhaeh ndaw dangj minzcuj bingzdaengj, aen dangj cujciz lawz caeuq boux dangjyenz lawz cungj mbouj ndaej ciemqhaih gij minzcuj gienzleih dangjyenz. Deudoeng diuz roenloh hawj dangjyenz camgya daujlun gij hongsaeh ndaw dangj, haigvangq diuz miengloh dangjyenz gangj ok yigen, cauh ok aen cwngci heiqfaenh ndaw dangj minzcuj yaenglwnh haenx. Dangjyenz miz gienz yiengq aen dangj ciuqsaed byoengqlaeuh、 genjgij doengh aen dangj cujciz caeuq boux dangjyenz miz gij saehsaed famh fap famh gijliz haenx, dizcang yungh mingzcoh caen guh gijbau.

  Cienzhoih daezok, genhciz aen daujyang cingqdeng bae genj vunz yungh vunz, dwg gij cujciz baujcwng yiemzsuk ndaw dangj cwngci swnghhoz. Genj yungh ganbu bietdingh aeu genhciz miz daek youh miz caiz、 aeu daek guh gonq, genhciz seiq fueng bet baih、 yawj caiz yungh vunz, genhciz aen byauhcunj ganbu ndei saenqniemh giendingh、 vih yinzminz fuzvu、 gaenx saehguek guh saedsaeh、 gamj rap cwzyin、 ndang cingq fwngz seuq. Gak gaep dangj cujciz itdingh aeu gagrox bae fuengzre caeuq niujcingq yungh vunz fuengmienh gij fungheiq mbouj cingq caeuq gak cungj bienyiengq. Gak gaep dangj cujciz aeu geizhauh sienmingz vih doengh boux ganbu gamj dangrap haenx rap cwzyin, vih doengh boux ganbu gamj fucwz haenx fucwz. Genhgez gimqcij buet guen aeu guen、 cawx guen gai guen, oetcienz rag senjbiuq daengj hingzveiz, genhgez gimqcij gij hingzveiz yiengq dangj iet fwngz aeu cizvu、 aeu mingzdaeuz、 aeu daiyi, genhgez gimqcij gij hingzveiz yiengq dangj cujciz gangj gyaqcienz、 mbouj fugcoengz cujciz gietdingh haenx. Mboujlwnh boux vunz lawz cungj mbouj ndaej dawz gij ganbu aen dangj dangguh gij caizcanj seivunz, ndaw dangj mbouj cinj guh cungj gvanhaeh ndangvunz bengxfouq. Gveihfan caeuq guhseuq ndaw dangj dungzci caeuq dungzci baedauq, lingjdauj ganbu doiq dangjyenz mbouj ndaej bak coi fwngz vix, dangjyenz doiq lingjdauj ganbu mbouj ndaej bi rieng rod mumh. Laebhwnj gij gihci hawj loek gaij loek、 bauyungz gij saetloeng ganbu youq ndaw gunghcoz daegbied dwg ndaw gaijgwz cauhmoq miz ok haenx.

  Cienzhoih daezok, gij cujciz swnghhoz aen dangj dwg gij neiyungz caeuq caidij youqgaenj ndaw dangj cwngci swnghhoz, dwg cungj hingzsik youqgaenj dangj cujciz doiq dangjyenz guh gyauyuz guenjleix gamduk. Itdingh aeu genhciz gak hangh cidu gij cujciz swnghhoz aen dangj, cauhmoq fuengsik fuengfap, demgiengz gij rengzhoengh cujciz swnghhoz aen dangj. Daengxcungq dangjyenz、 ganbu daegbied dwg gauhgiz ganbu itdingh aeu demgiengz gij eiqsik aen dangj, seizseiz geiqmaenh swhgeij aen ndangfaenh daih’it dwg dangjyenz. Aeu genhciz hangh cidu“sam aen hoih dangz goq ndeu”, genhciz hangh cidu minzcuj swnghhozvei caeuq cujciz swnghhozvei, genhciz hangh cidu gangjgoj gyausim, genhciz doiq dangjyenz guh minzcuj bingzyi. Lingjdauj ganbu bietdingh aeu gyagiengz cujciz gvanhnen, gij vwndiz hungnaek ndaw gunghcoz caeuq gij saehhangh mizgven goyinz itdingh aeu ciuq gvidingh ciuq cwngzsi yiengq cujciz cingjsi baugau.

  Cienzhoih daezok, bihbingz caeuq gag guh bihbingz dwg cungj vujgi raehrub dangj raeuz cangq ndang yw bingh、 baujciz ndangdaej cangqmaenh, hix dwg gij soujduenh youqgaenj gyagiengz caeuq gveihfan ndaw dangj cwngci swnghhoz haenx, itdingh aeu genhciz mbouj cuengqsoeng bae yungh ndei aen vujgi bihbingz caeuq gag guh bihbingz neix. Bihbingz caeuq gag guh bihbingz itdingh aeu genhciz ciuq saedsaeh bae guh, gangj dangjsing mbouj gangj seicingz、 gangj caenleix mbouj gangj cingzmienh. Dangjyenz、 ganbu itdingh aeu dawzyiemz faencek swhgeij, doiq gij vwndiz raen okdaeuj haenx aeu haeujlaeg faensik yienzaen, nyinhcaen cingjgaij. Gij lingjdauj gihgvanh caeuq lingjdauj ganbu aen dangj doiq gak cungj yigen mbouj doengz cungj itdingh dingqaeu, lingjdauj ganbu daegbied dwg gauhgiz ganbu itdingh aeu daiqdaeuz ciepsouh gak cungj vahgienq、 gamj gangj vahcaen.

  Cienzhoih daezok, gamduk dwg gij gaenbonj baujcwng sawj gienzlig ndaej cingqdeng yinhhengz, dwg aen banhfap youqgaenj gyagiengz caeuq gveihfan ndaw dangj cwngci swnghhoz. Bietdingh aeu gyagiengz doiq lingjdauj ganbu guh gamduk, ndaw dangj mbouj cinjhawj miz gij gienzlig mbouj souh hanhhaed haenx, hix mbouj cinjhawj miz boux dangjyenz daegbied mbouj souh gamduk haenx. Aeu laeb caezcienz aen gihci hanhhaed caeuq gamduk gienzlig yinhhengz, cauxbaenz gij cidu anbaiz miz gienz bietdingh miz cwzyin、 yungh gienz bietdingh aeu rap cwzyin、 luenh yungh gienz bietdingh aeu gyaepcaz cwzyin. Gak gaep cujciz caeuq lingjdauj ganbu dangj raeuz bietdingh aeu youq aen fanveiz yenfaz caeuq faplwd ndawde hozdung, baenzmaz cungj mbouj ndaej aeu vah dingj fap、 aeu gienz at fap、 vih seicingz uengjfap. Doiq gij gijbau nanangq daengz hingzveiz famh gijliz famh fap haenx, doiq gij vwndiz dangjyenz fanjyingj haenx, aen dangj cujciz lawz caeuq boux lingjdauj ganbu lawz cungj mbouj ndaej yaemmuenz mbouj bauq、 ngaiznyed mbouj banh. Boux lingjdauj ganbu nangq daengz gij vwndiz soj fanjyingj haenx wnggai baexveq, mbouj cinj camguenj roxnaeuz capfwngz cujciz diucaz.

  Cienzhoih daezok, hwnqguh yiengh cwngci seuqcengh, genhgez fanjdui nduknaeuh, dwg aen yinvu youqgaenj gyagiengz caeuq gveihfan ndaw dangj cwngci swnghhoz. Bietdingh aeu cuk maenh diuz swhsiengj fuengzsienq caeuq cidu fuengzsienq dingj nduknaeuh fuengz bienqcaet, roengzrengz cauhlaeb cungj dijci gihci mbouj gamj nduknaeuh、 mbouj ndaej nduknaeuh、 mbouj siengj nduknaeuh. Lingjdauj ganbu daegbied dwg gauhgiz ganbu itdingh aeu daiqdaeuz saedhengz seveicujyi haedsim gyacizgvanh, gangj siuhyangj、 gangj daudwz、 gangj lauxsaed souj saenqyungh、 gangj cinghseuq rox saetnaj. Gak gaep lingjdauj ganbu dwg boux fugsaeh yinzminz, mbouj miz gienzleih hengz daegbied, aeu daiqdaeuz caephengz lenzgez gaghaed cinjcwz, gagrox caeuq daeggienz swhsiengj caeuq daeggienz yienhsiengq guh doucwngh, yawjnaek gyahdingz、 gyahgyau、 gyahfungh, gyauyuz guenjleix ndei gij vunz ndaw ranz caeuq gij gunghcoz yinzyenz henzndang. Gimqcij leihyungh cizgenz roxnaeuz gij rengzlig yingjyangj bonjfaenh vih vunz ndaw ranz caeuq caencik baengzyoux maeuzaeu daegbied ciuqgoq, gimqcij gij vunz ndaw ranz caeuq caencik baengzyoux lingjdauj ganbu capfwngz gij gunghcoz ndaw cizgenz fanveiz lingjdauj ganbu、 capfwngz yinzsw anbaiz. Aeu genhciz miz nduknaeuh bietdingh aeu fanj、 miz dam’aeu bietdingh aeu cawz, genhciz mbouj miz giz gimqgeih、 gizgiz cungj guenj daengz、 mbouj yungznyaenx saek di, ndaw dangj baenzbaenz mbouj cinjhawj boux nduknaeuh miz giz ndoj ndang.

  Cienzhoih giengzdiuh, ndaw dangj gamduk aeu yungh Majgwzswh Lezningzcujyi、 Mauz Cwzdungh Swhsiengj、 Dwng Siujbingz Lijlun, “Sam Aen Daibyauj” Cung’yau Swhsiengj, Gohyoz Fazcanjgvanh guh cijdauj, haeujlaeg gvancez gij cingsaenz Siz Ginbingz cungjsuhgi baenzroix gangjvah youqgaenj, hopheux dungjcouz doicaenh “haj yiengh gyoebbaenz aen cingjdaej ndeu” cungjdaej baijbouh caeuq hezdiuz doicaenh “seiq aen cienzmienh” canloz baijbouh, gingqcungh dangjcangh, ciuq gveihcangh ceih dangj, genhciz ndaw dangj gamduk caeuq yinzminz ginzcung gamduk giethab hwnjdaeuj, demgiengz gij naengzlig dangj youq ciengzgeiz gaemgienz diuzgen lajde gag bienq seuq、 gag caezcienz、 gag gaijmoq、 gag daezsang haenx.

  Cienzhoih ceijok, ndaw dangj gamduk mbouj miz giz gimqgeih, mbouj miz laehvaih. Gak gaep dangj cujciz wngdang dawz saenqnyaemh gikleih caeuq yiemzgek gamduk giethab hwnjdaeuj, coisawj gij lingjdauj ganbu aen dangj guh daengz miz gienz bietdingh aeu miz cwzyin、 miz cwzyin aeu rapdawz、 yungh gienz deng gamduk, mbouj caenh cwzyin bietdingh aeu cazdawz. Ndaw dangj gamduk aeu gvancez minzcuj cizcunghci, ciuq gveihcangh ciuq gijliz bae guh, giengzvaq gij cujciz gamduk daj gwnz daengz laj, gaijndei gij minzcuj gamduk daj laj daengz gwnz, fazveih cungj cozyung doengz gaep dox gamduk.

  Cienzhoih giengzdiuh, gij yinvu ndaw dangj gamduk dwg saedbauj dangjcangh dangjgveih dangjgij ndaej youq daengx dangj mizyauq caephengz, henhoh aen dangj doxgiet doengjit, cungdenj gaijgez gij vwndiz aen dangj lingjdauj bienq nyieg、 aen dangj gensez giepnoix、 cienzmienh coengzyiemz ceih dangj mbouj rengz, gvanhnen aen dangj bienq damh、 cujciz nyaihsanq、 gijliz soengrungq, guenj dangj ceih dangj soengrwnh fwngzunq, baujcwng dangj cujciz ndaej cungfaen hengzguh ciznwngz、 fazveih haedsim cozyung, baujcwng daengxcungq dangjyenz fazveih senhfungh mozfan cozyung, baujcwng gij lingjdauj ganbu aen dangj cungcig cinghseuq dangnyaemh. Gij cujyau neiyungz ndaw dangj gamduk dwg ciuqsouj dangjcangh dangjgveih caeuq guekgya yenfaz faplwd, henhoh dangj cunghyangh cizcungh doengjit lingjdauj, genhciz minzcuj cizcunghci, lozsiz gij cwzyin cienzmienh coengzyiemz ceih dangj, lozsiz gij cingsaenz bet hangh gvidingh cunghyangh, genhciz gij ganbu byauhcunj aen dangj, cinghseuq gag haed、 goengcingq yungh gienz, guhbaenz gij yinvu dangj cunghyangh caeuq dangj cujciz gaepgwnz baijbouh daengj cingzgvang.

  Cienzhoih ceijok, gij cungdenj duisieng ndaw dangj gamduk dwg doengh aen lingjdauj gihgvanh caeuq doengh boux lingjdauj ganbu daegbied dwg doengh boux cujyau lingjdauj ganbu aen dangj. Aeu laebhwnj laeb caezcienz aen gamduk dijhi dangj cunghyangh doengjit lingjdauj, dangjveij (dangjcuj) cienzmienh gamduk, gijliz genjcaz gihgvanh cienmonz fucwz gamduk, gij gunghcoz bumwnz aen dangj guh ciznwngz gamduk, gij gihcwngz cujciz aen dangj ngoenznaengz gamduk, dangjyenz minzcuj gamduk haenx.

  Cienzhoih giengzdiuh, aen Cunghyangh Veijyenzvei、 Cunghyangh Cwngcigiz、 Cunghyangh Cwngcigiz Cangzvu Veijyenzvei aen dangj cienzmienh lingjdauj gij gunghcoz ndaw dangj gamduk. Dangjveij (dangjcuj) youq ndaw dangj gamduk ndawde rapdawz cawjdaej cwzyin, suhgi dwg boux cwzyin daih’it, dangjveij cangzveijvei veijyenz (dangjcuj cwngzyenz) caeuq dangjveij veijyenz youq ndaw cizcwz fanveiz hengzguh gij cizcwz gamduk. Ndaw dangj gak gaep gijliz genjcaz veijyenzvei aeu hengzguh gij cizcwz gamduk caephengz gijliz cazra cwzyin. Gij gunghcoz bumwnz aen dangj aeu gyagiengz gij hong gamduk dwg cizcwz gyauhawj de. Gij gihcwngz cujciz aen dangj aeu gamduk dangjyenz cietsaed hengzguh yivu, henhoh caeuq caephengz gij gijliz aen dangj. Dangjyenz aeu cizgiz hengzsawj gij gienzleih dangjyenz, gyagiengz doiq boux lingjdauj ganbu aen dangj guh minzcuj gamduk.

  Cienzhoih giengzdiuh, gak gaep dangjveij wngdang cihciz caeuq baujcwng doengzgaep yinzda、 cwngfuj、 genhcaz gihgvanh、 swhfaz gihgvanh daengj, doiq guekgya gihgvanh caeuq gunghciz yinzyenz ciuqfap bae guh gamduk, yinzminz cwnghez ciuq canghcwngz guh minzcuj gamduk, saemjgeiq gihgvanh ciuqfap bae guh saemjgeiq gamduk. Aeu cihciz minzcuj dangjbai hengzguh gamduk ciznwngz, yawjnaek gij yigen、 bihbingz、 genyi minzcuj dangjbai caeuq vuzdangjbai yinzsw daezok haenx. Aeu nyinhcaen doiqdaih、 gagrox ciepsouh sevei gamduk.

  Cienzhoih giengzdiuh, gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk dwg gij yinvu caezcaemh daengx dangj, bietdingh aeu daengx dangj itheij doenghfwngz. Gak gaep dangjveij (dangjcuj) aeu cienzmienh hengzguh lingjdauj cwzyin, roengzrengz gaijgez gij vwndiz doedyienh haenx, dawz gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk gak hangh yinvu lozsiz daengz dieg.

  Cienzhoih gietdingh, Cungguek Gungcanjdangj Daih Cibgouj Baez Daengx Guek Daibyauj Daihhoih youq 2017 nienz buenq bi laeng youq Baekging ciuhai. Cienzhoih nyinhnaeuz, ciuhai dangj raeuz Cibgouj Daih dwg dangj caeuq guekgya cwngci swnghhoz ndawde gienh saeh hung ndeu, daengx dangj aeu cienzmienh gvancez gij cingsaenz Cibbet Daih caeuq Cibbet Gaiq Sam Cung、 Seiq Cung、 Haj Cung、 Roek Cung cienzhoih, doxgiet daiqlingx daengx guek gak cuz yinzminz, giendingh saenqsim, haenqrengz baenaj, caenh’itbouh guh ndei dangj caeuq guekgya gak hangh gunghcoz, daegbied dwg aeu cietsaed guh ndei gij hong swhsiengj lijlun caepcawq、 gij hong cujciz caepcawq、 gij hong ginghci sevei fazcanj、 gij hong eiqsik hingzdai, cietsaed henhoh sevei huzndei onjdingh, aeu gij cingzcik daegbied maenhndei bae ciepcoux dangj raeuz ciuhai Cibgouj Daih.

  Cienzhoih ciuq dangjcangh gvidingh, gietdingh swnjbouj cunghyangh veijyenzvei houbuj veijyenz Cau Yengwngh、 Hanz Veih guh cunghyangh veijyenzvei veijyenz.

  Cienzhoih saemjlwnh caemhcaiq doenggvaq le Cunghgung Cunghyangh Gijliz Genjcaz Veijyenvei aen saemjcaz baugau gvendaengz gij vwndiz Vangz Minz、 Lij Sizvwnz famh gijliz youqgaenj, saemjlwnh caemhcaiq doenggvaq le Cunghgung Cunghyangh Ginhsw Veijyenzvei aen saemjcaz baugau gvendaengz gij vwndiz Fan Cangzmi、 Niuz Cicungh famh gijliz youqgaenj, nyinhdingh aen cujfwnh hawj Vangz Minz、 Lij Sizvwnz、 Fan Cangzmi、 Niuz Cicungh haicawz dangjciz Cunghyangh Cwngcigiz gaxgonq guh’ok haenx.

  Cienzhoih haucauh, daengx dangj dungzci gaenjmaed doxgiet youq seiqhenz aen dangj cunghyangh aeu Siz Ginbingz dungzci guh haedsim haenx, cienzmienh haeujlaeg gvancez gij cingsaenz baez cienzhoih neix, laeb maenh cwngci eiqsik、 daihbuenz eiqsik、 haedsim eiqsik、 gaen hwnj eiqsik, giendingh mbouj bienq bae henhoh gij gienzvi dangj cunghyangh caeuq dangj cunghyangh cizcungh doengjit lingjdauj, laebdaeb doicaenh cienzmienh coengzyiemz ceih dangj, doengzcaez cauh ok yiengh cwngci swnghdai rumz seuq heiq cingq, saedbauj dangj raeuz comzgiet daiqlingx yinzminz mboujduenh haicauh aen gizmen moq seveicujyi saehnieb miz Cungguek daegsaek.

 Gvendaengz Hingzseiq Moq Baihlaj Ndaw Dangj Cwngci Swnghhoz Mizgven Cunjcwz

(2016 nienz 10 nyied 27 hauh Cungguek Gungcanjdangj Daih Cibbet Gaiq Cunghyangh
     Veijyenzvei Daihroek Baez Daengxcungq Veiyi doenggvaq)

  Yaek banhndei gij saehcingz Cungguek, ceiq youqgaenj dwg youq laeng dangj raeuz, ceiq youqgaenj dwg youq laeng dangj aeu guenj dangj、 coengzyiemz ceih dangj. Dangj aeu guenj dangj itdingh aeu daj gij cwngci swnghhoz ndaw dangj bae guenj, coengzyiemz ceih dangj itdingh aeu daj gij cwngci swnghhoz ndaw dangj hainduj yiemz.

  Haiguh yiengh cwngci swnghhoz ndaw dangj yiemzsuk nyinhcaen, dwg cungj conzdungj gig ndei caeuq cwngci youhsi dangj raeuz. Youq ndaw duenh seizgan raezrangh, dangj raeuz genhciz guh gij cwngci swnghhoz ndaw dangj yiemzsuk nyinhcaen, aeu neix dangguh gij yinvu youqgaenj gensez aen dangj daeuj cadawz, youq dangj raeuz cwngci swnghhoz ndawde guhbaenz cungj gihbwnj gveihfan aeu gangjgouz saedsaeh、 lijlun lienzhaeh saedsaeh、 maedciet lienzhaeh ginzcung、 bihbingz caeuq gag bihbingz、 minzcuj cizcunghci、 yiemzmingz gijliz dangj raeuz daengj guh cujyau neiyungz, vih gyamaenh ndaw dangj doxgiet caeuq cizcungh doengjit、 baujciz gij senhcinsing caeuq cunzgezsing dangj raeuz、 demgiengz senggei vuedlig dangj raeuz rom ndaej le gig lai gingniemh, vih baujcwng guhbaenz gij cungsim yinvu dangj youq gak aen lizsij seizgeiz fazveih ok cozyungh youqgaenj.

  1980 nienz, dangj raeuz Cib’it Gaiq Haj Cung Cienzhoih gvaqlaeg cungjgez le lizsij gingniemh, daegbied dwg baez deng hit “Vwnzva Dagwzming”, ceiqdingh ok 《Doengh Aen Cunjcwz Gvendaengz Ndaw Dangj Cwngci Swnghhoz》, vih buedluenh fanjcingq、 dauqfuk caeuq laebcienz ndaw dangj cwngci swnghhoz、 doicaenh aen dangj gensez fazveih le cozyungh youqgaenj, gij cujyau yenzcwz caeuq gvidingh de daengz ngoenzneix vanzlij habyungh, aeu laebdaeb saedhengz.

  Youq baihlaj hingzseiq moq, ndaw dangj cwngci swnghhoz cungjdaej cix gig ndei. Doengzseiz, aen seizgeiz ndeu daeuj, ndaw dangj cwngci swnghhoz hix raen miz saekdi vwndiz yienhda okdaeuj, cujyau dwg:Youq ndaw di dangjyenz、 ganbu ndeu baudaengz gauhgiz ganbu, lijsiengj saenqniemh mbouj giendingh、 doiq dangj mbouj cungcig、 gijliz soengrwnh、 duetliz vunzlai、 gag dingh cix gaemh vunz ciuq hengz、 loengh haw guh gyaj、 gikgyangq mbouj banhsaeh, gag goq bonjfaenh、 faensanq gag hengz、 siengj guh maz couh guh maz、 byawz hix mbouj daekcoih、 giet gyoengq gap bang、 yienghyiengh vihliux cienzngaenz daengj mbouj doengz cingzdoh mizyouq, gij vwndiz dan yawjnaek hingzsik、 dang guen guh lauxyez、 damdoz youqlag caeuq cungj fungheiq saisaengq baizciengz doedyienh, gij yienhsiengq yawj caen yungh vunz、 buet guen aeu guen、 gai guen cawx guen、 rag biuq oet sienj gimq cungj mbouj raeg, gij yienhsiengq luenh yungh gienzlig、 dam’aeu gwn’oet、 nduknaeuh bienq vaih、 famhfap famh gijliz daengj didmaj banhraih. Daegbied dwg gauhgiz ganbu ndawde gig siujsoq vunz cwngci simgoeg bongqgawh、 sim maez gienzlig, gauj cwngci yaemmaeuz hozdung, lumjbaenz dangqnaj gingq baihlaeng dingj、 gap bang maeuz seileih、 comz bang giet baiq、 maeuzaeu gienzvih daengj. Doenghgij vwndiz neix, cimqmyaex dangj raeuz swhsiengj daudwz giekdaej cingzdoh youqgaenj, buqvaih dangj raeuz doxgiet caeuq cizcungh doengjit cingzdoh youqgaenj, sonjhaih ndaw dangj cwngci swnghdai caeuq dangj raeuz hingzsiengq cingzdoh youqgaenj, yingjyangj dangj caeuq yinzminz saehnieb fazcanj cingzdoh youqgaenj. Neix couh iugouz raeuz bietdingh aeu laebdaeb yungh gaijgwz cauhmoq cingsaenz gyagiengz gensez aen dangj, gyagiengz caeuq gveihfan gij cwngci swnghhoz ndaw dangj, cienzmienh daezsang aen dangj gensez gohyozva suijbingz.

  Dangj raeuz Cibbet Daih doxdaeuj, aen dangj cunghyangh aeu Siz Ginbingz dungzci guh haedsim haenx caenndang haenqrengz guh、 daiqdaeuz guh yienghndei, giendingh doicaenh cienzmienh coengz yiemz ceih dangj, genhciz swhsiengj laeb dangj caeuq cidu ceih dangj maedcaed giethab, doxgyoeb cwngjdun gij cozfungh aen dangj, yiemzhaenq fadceih nduknaeuh, guhseuq gij cwngci swnghdai ndaw dangj, gij cwngci swnghhoz ndaw dangj yienh’ok yienghsiengq moq, aeundaej le dangjsim minzsim, vih dangj caeuq guekgya haiok saednieb gizmen moq daezhawj le baujcwng youqgaenj.

  Lizsij gingniemh cwngmingz, dangj raeuz dangguh aen cwngdangj Majgwzswhcujyi, bietdingh aeu geizhauh singjsag bae gangj cwngci, yiemzsuk nyinhcaen bae haiguh ndaw dangj cwngci swnghhoz. Vihliux engq ndei bae guh aen doucwngh hungmbwk miz haujlai lizsij daegdiemj moq haenx、 doicaenh hangh gunghcwngz hungmbwk moq gensez aen dangj、 doicaenh gij saehnieb hungmbwk yiengh seveicujyi miz daegsaek Cungguek, gingsouh ndaej “seiq daih gaujniemh”、 haekfug “seiq cungj yung’yiemj”, miz bizyau ceiqdingh bouh cunjcwz gvendaengz laj hingzseiq moq baenzlawz guh ndei ndaw dangj cwngci swnghhoz he.

  Youq hingzseiq moq baihlaj gyagiengz caeuq gveihfan gij cwngci swnghhoz ndaw dangj, itdingh aeu yungh dangjcangh guh goekgaen bae ciuqei, genhciz gij cwngci lohsienq、 swhsiengj lohsienq、 cujciz lohsienq、 ginzcung lohsienq dangj raeuz, roengzrengz demgiengz ndaw dangj cwngci swnghhoz gij cwngcising、 sizdaising、 yenzcwzsing、 candousing haenx, roengzrengz demgiengz gij naengzlig gag bienq seuq、 gag guh ndei、 gag gaijmoq、 gag daezsang dangj raeuz, roengzrengz daezsang gij lingjdauj suijbingz caeuq gaemgienz suijbingz dangj raeuz、 demgiengz gij naengzlig dingj nduknaeuh fuengz bienqcaet caeuq dingjdangj fungyiemj, roengzrengz henhoh gij gienzvi dangj cunghyangh、 baujcwng dangj raeuz doxgiet doengjit、 baujciz gij senhcinsing caeuq cunzgezsing dangj raeuz, roengzrengz youq daengx dangj cauhbaenz cungj cwngci gizmen youh miz cizcungh youh miz minzcuj、 youh miz gijliz youh miz swyouz、 youh miz doengjit eiqceiq youh miz gak boux simcingz soengsat sengdoengh hozboz haenx.

  Youq hingzseiq moq baihlaj gyagiengz caeuq gveihfan gij cwngci swnghhoz ndaw dangj, cungdenj dwg gak gaep lingjdauj gihgvanh caeuq lingjdauj ganbu, gvanhgen dwg gauhgiz ganbu daegbied dwg doengh boux gapbaenz Cunghyangh Veijyenzvei、 Cunghyangh Cwngcigiz、 Cunghyangh Cwngcigiz Cangzvu Veijyenzvei haenx. Gauhgiz ganbu daegbied dwg doengh boux gapbaenz caengz cunghyangh lingjdauj haenx itdingh aeu caenndang guh yienghndei, mozfan ciuqsouj dangjcangh dangjgveih, yiemzsouj gij cwngci gijliz caeuq cwngci gvigawj dangj raeuz, genhciz mbouj lumz gij simnyienh codaeuz、 laebdaeb baenaj, genhciz daiqdaeuz guh yienghndei、 aeu baihgwnz daiqdoengh baihlaj, vih daengx dangj daengx sevei guh ok sifan.

  It、 Giendingh Lijsiengj Saenqniemh

  Aen lijsiengj hunggyae gungcanjcujyi caeuq aen lijsiengj caezcaemh seveicujyi miz Cungguek daegsaek, dwg gij cingsaenz dingjdaemx caeuq gij cwngci lingzhoenz vunz Cungguek Gungcanjdangj, hix dwg gij swhsiengj giekdaej baujciz dangj ndaej doxgiet doengjit. Bietdingh aeu cibfaen yawjnaek guh swhsiengj cwngci gensez, dawz giendingh lijsiengj saenqniemh dangguh ndaw dangj cwngci swnghhoz aen yinvu daih’it de.

  Lijsiengj saenqniemh doenghngauz dwg gij doenghngauz ceiq yung’yiemj, lijsiengj saenqniemh doekgyod dwg cungj doekgyod ceiq yung’yiemj. Daengx dangj dungzci itdingh aeu dawz sinyangj Majgwzswhcujyi、 siengsaenq seveicujyi caeuq gungcanjcujyi dangguh gij gyaepgouz baenz ciuhvunz, gaijcauh gwzgvanh seiqgyaiq, doengzseiz mboujduenh gaijcauh cujgvanh seiqgyaiq, gaijgez ndei sigaigvanh、 yinzswnghgvanh、gyacizgvanh aen “cungjhaigven” vwndiz neix, mboujduenh demgiengz cwngci dinghlig, gag guhbaenz boux giendingh bae saenqngiengx caeuq cungsaed bae hengzguh aen lijsiengj gyaehung gungcanjcujyi caeuq aen lijsiengj caezcaemh yiengh seveicujyi miz Cungguek daegsaek; bietdingh aeu giendingh siengsaenq diuz roenloh、 cungj lijlun、 aen cidu、 yiengh vwnzva seveicujyi miz Cungguek daegsaek. Lingjdauj ganbu daegbied dwg gauhgiz lingjdauj ganbu aeu yungh saedsaeh hengzdoengh hawj dangjyenz caeuq ginzcung roxnyinh daengz lijsiengj saenqniemh miz ligliengh giengzdaih.

  Daengxcungq dangjyenz itdingh aeu ciengzlwenx baujciz vunz Cungguek Gungcanjdangj youq mwh laeb dangj seiz cungj buekguh cingsaenz de, dawz giendingh lijsiengj saenqniemh daiq haeuj ndaw gunghcoz bonjfaenh bae, gagrox vih doicaenh hangh saehnieb yiengh seveicujyi miz Cungguek daegsaek bae haenqrengz guh saedcaiq guh, mwh hingz mwh swnh mbouj dasang mbouj ndaenggon, mwh nanz mwh mbouj swnh mbouj doeknaiq mbouj doenghngauz, naih ndaej gak cungj haenh gak cungj yaeuhlox, gingsouh ndaej gak cungj fung’yiemj caeuq diuhcan, ciengzlwenx baujciz cwngci bonjsaek boux vunz gungcanjdangj.

  Giendingh lijsiengj saenqniemh, itdingh aeu lai hagsib. Youq gwnz swhsiengj lijlun giendingh singjsag dwg gij cenzdiz cwngci giendingh. Daengx dangj itdingh aeu di ndeu cungj mbouj doenghngauz bae genhciz aeu Majgwzswhcujyi daeuj cijdauj swhsiengj, gak gaep dangj cujciz itdingh aeu genhciz gaemmaenh ca ndei lijlun vujcangh, gyoengq dangjyenz、 ganbu daegbied dwg gauhgiz ganbu itdingh aeu gagrox ca ndei yozsiz、 demgiengz dangjsing siuhyangj. Dawz Majgwzswhcujyi lijlun dangguh monz goq itdingh aeu hag ndeu, nyinhcaen hagsib Majgwzswh Lezningzcujyi、 Mauz Cwzdungh Swhsiengj、 Dwng Siujbingz Lijlun、 “Sam Aen Daibyauj” Cung’yau Swhsiengj、 Gohyoz Fazcanjgvanh, nyinhcaen bae hagsib gij cingsaenz youqgaenj baenzroix gangjvah Siz Ginbingz cungjsuhgi, nyinhcaen bae hagsib dangjcangh dangjgveih, mboujduenh daezsang Majgwzswhcujyi swhsiengj gyozvu caeuq lijlun suijbingz. Hidungj dawzndei aen gihbwnj yenzlij Majgwzswhcujyi, hagrox yungh gij lizcangz、 gvanhdenj、 fuengfap Majgwzswhcujyi bae gvanhcaz vwndiz、 faencek vwndiz、 gaijgez vwndiz, daegbied dwg aeu cimyawj yienhsaed vwndiz, mboujduenh gyalaeg yinsiz gij gvilwd gungcanjdangj baenzlawz gaemgienz、 gij gvilwd baenzlawz gensez seveicujyi、gij gvilwd vunzloih sevei baenzlawz fazcanj. Hab’wngq seizdaih cinbu caeuq saehnieb fazcanj iugouz, gvangqlangh bae hagsib gij cihsiz ginghci、 cwngci、 vwnzva、 sevei、 swnghdai vwnzmingz caeuq cezyoz、 lizsij、 fazliz、gohgi、gozfangz、 gozci daengj fuengmienh, daezsang gij naengzlig gig rox daj gwnz canloz、 cauhmoq、 bencwng、 fazci、 daejsienq bae ngeixnaemj, daezsang lingjdauj naengzlig conhyezva suijbingz.

  Genhciz caeuq cauhmoq aen yozsiz cidu ndaw dangj. Aeu dangjveij (dangjcuj) cungsimcuj yozsiz daengj cidu guh cujyau fuengfap, gak gaep dangj cujciz aeu dinghgeiz cizdij caez hag. Dangjyenz、 ganbu bi bi aeu guh liux gvidingh yozsiz yinvu, lingjdauj ganbu aeu dinghgeiz bae dangjyau yozsiz. Genhciz youq ndaw dangj guh cizcungh yozsiz gyauyuz. Gak gaep dangj cujciz aeu gyagiengz dukcoi genjcaz, dawz yozsiz cingzgvang dangguh lingjdauj banhswj caeuq lingjdauj ganbu gaujhwz aen neiyungz youqgaenj ndeu. Genhciz aen cidu cunghyangh lingjdauj dungzci guh ciendaez baugau. Laebcienz aen cidu youq ndaw dangj doiq gij swhsiengj lijlun vwndiz hungloet guh faensik yenzgiu caeuq cingzgvang doengbauq, gya haenq doiq hulenzvangj guh swhsiengj lijlun dazyinx, gangj cingcuj doenghgij swhsiengj lijlun vwndiz yaemndoj de, bangcoh dangjyenz、 ganbu ndwn maenh cwngci lizcangz, faencing dengloek, giengiet mbouj hawj gij swhsiengj loekcak ciemq haih. 

  Ngeih、 Genhciz Diuz Gihbwnj Lohsienq Dangj Raeuz

  Diuz gihbwnj lohsienq seveicujyi cogaep gaihdon dangj raeuz dwg diuzsienq sengmingh aen dangj caeuq guekgya、 diuzsienq vuenyungz yinzminz, hix dwg gij gaenbonj baujcwng ndaej cingqciengz bae gaihcanj gij cwngci swnghhoz ndaw dangj. Itdingh aeu cienzmienh gvancez caephengz diuz gihbwnj lohsienq dangj raeuz, dawz aeu ginghci gensez guh cungsim caeuq genhciz seiq hangh gihbwnj yenzcwz、 genhciz gaijgwz hailangh song aen gihbwnjdenj neix doengjit youq gij sizcen hungmbwk seveicujyi miz Cungguek daegsaek, seiz lawz cungj mbouj ndaej miz saek di bienliz caeuq doenghngauz.

  Daengx dangj itdingh aeu genhciz dawz ginghci gensez guh cungsim di he hix mbouj doenghngauz, dinghsim comzrengz ca’ndei fazcanj aen yinvu ceiq youqgaenj dangj raeuz gaemgienz hwngguek neix, genhciz aen fazcanj swhsiengj aeu yinzminz guh cungsim, doicaenh “haj yiengh gyoebbaenz aen cingjdaej ndeu” cungjdaej baijbouh caeuq hezdiuz doicaenh “seiq aen cienzmienh” canloz baijbouh, genhciz aen fazcanj leixniemh cauhmoq、 hezdiuz、 loegsaek、 hailangh、 caezyiengj, roengzrengz daezsang fazcanj cizlieng caeuq yauyiz, mboujduenh daezsang yinzminz swnghhoz suijbingz, vih saedyienh “song aen bak bi” fwndou muzbyauh、 saedyienh aen loqsiengj Cungguek--Cunghvaz Minzcuz fukhwng hungmbwk dwk roengz vuzciz giekdaej maenhsaed.

  Daengx dangj itdingh aeu genhciz seiq hangh gihbwnj yenzcwz di he hix mbouj doenghngauz, gaenbonj dwg genhciz aeu dangj lingjdauj, genhciz diuz roenloh seveicujyi miz Cungguek daegsaek、 aen lijlun dijhi seveicujyi miz Cungguek daegsaek、 aen cidu seveicujyi miz Cungguek daegsaek、 gij vwnzva seveicujyi miz Cungguek daegsaek, guh daengz ukgyaeuj singjsad、 lizcangz ndi ning, nyenghdingh genhciz caeuq fazcanj seveicujyi miz Cungguek daegsaek.

  Daengx dangj itdingh aeu di ndeu cungj mbouj doenghngauz bae genhciz gaijgwz hailangh, fazveih ginzcung sien caux cingsaenz, daihdamj gaijcauh swhgeij, daihdamj bae doicaenh lijlun cauhmoq、 sizcen cauhmoq、 cidu cauhmoq、 vwnzva cauhmoq nem gizyawz gak fuengmienh cauhmoq, giendingh mbouj bienq bae saedhengz doiq rog hailangh gihbwnj gozcwz, nyengh mbouj ndaej onjdup youq yienhsaed、 gwq souj gij gaeuq. Youq laj hingzseiq moq, dangj lingjdauj yinzminz cienzmienh haeujlaeg gaijgwz, dwg vihliux doidoengh aen cidu seveicujyi miz Cungguek daegsaek ndaej gag guhcaez caeuq fazcanj, doicaenh guekgya ceihleix dijhi caeuq ceihleix naengzlig yendaiva, geiq mbouj byaij diuz loh gaeuq gyaengjbanj、 hix mbouj byaij diuz lohloek gaij roen vuenh yiengq.

  Daengx dangj itdingh aeu dawz genhciz gij swhsiengj lohsienq dangj raeuz ronzdoeng daengz caephengz diuz gihbwnj lohsienq dangj raeuz daengx aen gocwngz bae, genhciz gaijfang swhsiengj、 gangjgouz saedsaeh、 caeuq seizdaih caez baenaj、 gouz caen guh saed, genhciz lijlun lienzhaeh saedsaeh, mboujlwnh gijmaz cungj aeu daj saedsaeh hwnjdin, youq ndaw sizcen gienjniemh caenleix caeuq fazcanj caenleix, geiq fanjdoiq gak cungj mbouj nyinh Majgwzswhcujyi cungj baijyiengq loekloeng neix, youh buqcawz swjbanj lijgaij Majgwzswhcujyi. Genhciz daj guek raeuz lij youq caemhcaiq yaek ciengzgeiz youq seveicujyi cogaep gaihdon aen gihbwnj guekcingz neix guhhwnj, mboujduenh yenzgiu cingzgvang moq、 cungjgez gingniemh moq、 gaijgez vwndiz moq, mboujduenh doicaenh Majgwzswhcujyi bienqbaenz yiengh Majgwzswhcujyi Cungguek.

  Daengx dangj itdingh aeu giengiet henhoh diuz gihbwnj lohsienq dangj raeuz, doiq gij gangjvah caeuq hengzdoengh foujdingh dangj raeuz lingjdauj、 foujdingh seveicujyi cidu guek raeuz、 foujdingh gaijgwz hailangh, doiq gij gangjvah caeuq hengzdoengh mbitmbeuj、 coujva、 foujdingh yiengh seveicujyi miz Cungguek daegsaek, doiq gij gangjvah caeuq hengzdoengh mbitmbeuj、 coujva、 foujdingh gij lizsij dangj raeuz、 gij lizsij Cunghvaz Yinzminz Gunghozgoz、 gij lizsij yinzminz ginhdui, doiq gij gangjvah caeuq hengzdoengh mbitmbeuj、 coujva、 foujdingh bouxdaeuz dangj raeuz caeuq yinghyungz mozfan, doiq sojmiz doenghgij gangjvah caeuq hengzdoengh boihfamh、 mbitmbeuj、 foujdingh gij gihbwnj lohsienq dangj raeuz, itdingh aeu lizcangz singjsak bae fanjdoiq caeuq daeqceih de.

  Gaujcaz nyinhdingh ganbu daegbied dwg gauhgiz ganbu, itdingh aeu sien yawj de dwg mbouj dwg giendingh mbouj bienq bae gvancez gij gihbwnj lohsienq dangj raeuz. Dangjyenz、 ganbu daegbied dwg gauhgiz ganbu, youq dangqnaj daih deng daih loeng mbouj ndaej daidu hamzhawz, mbouj ndaej doenghngauz gihbwnj cwngci laebciengz, mbouj ndaej deng vah loek baijbouh. Youq mwh gij leih’ik yinzminz deng sonjhaih、 gij yienghsiengq dangj caeuq guekgya deng buqvaih、 dangj raeuz gaemgienz deng haepha, aeu daihdamj yat okdaeuj、 gangj mingz daidu, gagrox giengiet bae guh doucwngh. Doiq doengh boux doiq daih deng daih loeng vwndiz mbouj miz lizcangz、 mbouj miz daidu、 mbouj leix mbouj langh、 yut din buet deuz, najdoiq doengh gij gangjvah caeuq hengzdoengh loekcak cix mbouj daeqceih、 mbouj doucwngh, ndoj saeh bauj cawj、 gwq dang vunzndei daengj cwngci mbouj habgek de, itdingh mbouj ndaej nyaemhyungh, gaenq naengh youq gwnz daiz dang lingjdauj, hix itdingh aeu diuh bae, danghnaeuz cingzcez yenzcung, aeu yiemzsuk cawqleix. 

  Sam、 Giengiet Henhoh Gij Gienzvi Dangj Cunghyangh

  Giengiet henhoh gij gienzvi dangj cunghyangh、 baujcwng daengx dangj yiemzgek caephengz faplingh, dwg gvanhaeh daengz gij cenzduz minghyinh dangj caeuq guekgya, dwg gij gaenbonj leih’ik daengx guek gak cuz yinzminz, hix dwg aen muzdiz youqgaenj gyagiengz caeuq gveihfan gij cwngci swnghhoz ndaw dangj. Itdingh aeu genhciz dangjyenz bouxdog fugcoengz dangj cujciz, vunzsiuj fugcoengz vunzlai, baihlaj cujciz fugcoengz baihgwnz cujciz, daengx dangj gak aen cujciz caeuq daengxcungq dangjyenz fugcoengz dangj raeuz daengx guek daibyauj daihhoih caeuq cunghyangh veijyenzvei, haedsim dwg daengx dangj gak aen cujciz caeuq daengxcungq dangjyenz fugcoengz dangj raeuz daengx guek daibyauj daihhoih caeuq cunghyangh veijyenzvei.

  Genhciz aeu dangj lingjdauj, sien dwg genhciz dangj cunghyangh guh cizcungh doengjit lingjdauj. Aen guekgya lawz、 aen cwngdangj lawz, gij lingjdauj haedsim de cungj youqgaenj dangqmaz.

  Daengx dangj itdingh aeu laebhwnj cwngci eiqsik、 daengxbuenz eiqsik、 haedsim eiqsik、 gaen hwnj eiqsik maenhmaenh bae, gagrox youq swhsiengj fuengmienh cwngci fuengmienh hengzdoengh fuengmienh caeuq dangj cunghyangh baujciz doxdoengz. Gak gaep dangj cujciz、 daengxcungq dangjyenz daegbied dwg gauhgiz ganbu cungj aeu gaen hwnj dangj cunghyangh, gaen hwnj gij lijlun caeuq lohsienq fuengcim cwngcwz aen dangj, gaen hwnj gij gezcwz baijbouh dangj cunghyangh, guh daengz gij dangj cunghyangh daezok haenx giengiet yiengjwngq、 gij dangj cunghyangh gietdingh haenx giengiet caephengz、 gij dangj cunghyangh gimq guh haenx giengiet mbouj guh.

  Doenghgij fuengcim cwngcwz vwndiz hungloet nangqdaengz daengx dangj daengx guek haenx, cij miz dangj cunghyangh miz gienz guh gietdingh caeuq cekgej. Gak bumwnz gak dieg dangj cujciz caeuq dangjyenz lingjdauj ganbu ndaej daez genyi hawj dangj cunghyangh, danhseih mbouj ndaej gag luenh guh’ok gietdingh caeuq doiq rog fatbiuj cawjcieng. Danghnaeuz doiq dangj cunghyangh gij gezyi caeuq cwngcwz de miz mbouj doengz yigen, youq baihlaj aen cenzdiz giengiet caephengz, ndaej yiengq dangj cujciz daezok baujlouz yigen, hix ndaej ciuq cujciz cwngzsi daezok gij yigen swhgeij hawj gaepgwnz dangj cujciz cigdaengz dangj cunghyangh.

  Daengx dangj itdingh aeu gagrox fugcoengz dangj cunghyangh lingjdauj. Daengx Guek Yinzda、 Gozvuyen、 Daengx Guek Cwnghez, Cunghyangh Gijliz Genjcaz Veijyenzvei, Ceiqgauh Yinzminz Fazyen、 Ceiqgauh Yinzminz Genjcazyen, cunghyangh caeuq guekgya gihgvanh gak aen bumwnz, yinzminz ginhdui, gak aen yinzminz donzdij, gak aen deihfueng, gak aen giyez swyez danhvei、 sevei cujciz, doenghgij dangj cujciz neix cungj aeu caezcaezcienzcienz bae caephengz gij gezcwz baijbouh dangj cunghyangh.

  Daengx dangj itdingh aeu yiemzgek caephengz aen cidu doiq gij vwndiz hungmbwk aeu guh cingjsi baugau. Daengx Guek Yinzda Cangzveijvei、 Gozvuyen、 Daengx Guek Cwnghez, Cunghyangh Gijliz Genjcaz Veijyenzvei, Ceiqgauh Yinzminz Fazyen、 Ceiqgauh Yinzminz Genjcazyen, cunghyangh caeuq guekgya gihgvanh gak aen bumwnz, gak aen yinzminz donzdij, gak aen swngj、 swcigih、 cizyazsi, doengh aen dangj cujciz de aeu dinghgeiz baugau gunghcoz hawj dangj cunghyangh. Yenzgiu gij saehhangh hungloet roxnaeuz guh’ok gij gietdingh hungloet nangqdaengz daengxbuenz haenx, aeu gibseiz cingjsi baugau dangj cunghyangh, gij cingzgvang caephengz dangj cunghyangh doengh aen gietdingh hungnaek baenzlawz yiengh aeu guh ciendaez baugau. Bungzdaengz gij vwndiz hungloet fwtfat haenx caeuq gij vwndiz hungloet ndaw gunghcoz, aeu gibseiz cingjsi baugau dangj cunghyangh, danghnaeuz cingzgvang gaenjgip itdingh aeu dangciengz cawqleix, aeu caenh cizcwz caenh rengz guh hong ndei bae, caemhcaiq sikhaek baugau.

  Swngj、 swcigih、 cizyazsi dangjveij youq dangj cunghyangh lingjdauj baihlaj mbe guh gunghcoz, doengh aen dangj cujciz caeuq doenghboux lingjdauj ganbu gak aen cujciz doengz gaep aeu gag ciepsouh doengz gaep dangjveij lingjdauj、 yiengq doengz gaep dangjveij fucwz, saehhangh hungloet caeuq cingzgvang youqgaenj aeu gibseiz yiengq doengz gaep dangjveij cingjsi baugau.

  Daengx dangj itdingh aeu gagrox fuengzre caeuq fanjdoiq goyinzcujyi、 faensanqcujyi、 swyouzcujyi、 bwnjveicujyi. Doiq gij gezcwz baijbouh dangj cunghyangh, mboujguenj aen dangj cujciz lawz caeuq boux dangjyenz lawz cungj mbouj ndaej habhoz cix guh、 mbouj habhoz cix mbouj guh, mbouj cinj sien guh caiq gangj, engq mbouj ndaej gangj yiengh guh yiengh、 naj dauq he laeng dauq he. Gij gunghcoz baijbouh gvi bumwnz caeuq deihfueng cizgenz fanveiz de, aeu gvancez gezcwz baijbouh dangj cunghyangh guh cenzdiz, fazveih cizgizsing、 cujdungsing、 cangcausing, danhseih nyengh mbouj cinj swhgeij siengj yawz guh couh yawz guh、 gag boux gag guh, nyengh mbouj cinj miz lingh mbouj guh、 miz gimq mbouj dingz, nyengh mbouj cinj guh gwnz miz cwngcwz、 laj miz fap doiq.

  Seiq、 Dawzyiemz Dangj Raeuz Cwngci Gijliz

  Dawzyiemz gijliz dwg daengx dangj doengjit eiqceiq、 doengjit hengzdoengh、doengzcaez yamqdin byaij baenaj aen baujcang youqgaenj he, dwg gij neiyungz youqgaenj ndaw dangj cwngci swnghhoz. Itdingh aeu dawzyiemz ndaw dangj cwngci swnghhoz gijliz, dawz gijliz dingj youq najbak, aeu gij gijliz ndongj lumj diet nei bae coengzyiemz ceih dangj.

  Genhciz youq baihnaj gijliz bouxboux bingzdaengj, ciuqsouj gijliz mbouj miz daeggienz, caephengz gijliz mbouj miz laehvaih, ndaw dangj nyengh mbouj cinj miz gij daegbied cujciz caeuq daegbied dangjyenz mbouj deng gijliz hanhhaed. Moix boux dangjyenz cungj aeu lauyup、 yiemz souj gijliz dangj raeuz, seizlawz cungj cingzgvang lawz cungj mbouj ndaej boihfanj gijliz. Gak gaep dangj cujciz caeuq daengxcungq dangjyenz cungj aeu giengiet bae fanjdui doengh gij hingzveiz boihfamh gijliz dangj raeuz.

  Cwngci gijliz dwg ndaw dangj gij gijliz ceiq gaenbonj、 ceiq youqgaenj de, eiqsouj cwngci gijliz dwg gij giekdaej eiqsouj cienzbouh gijliz dangj raeuz. Daengx dangj daegbied dwg gauhgiz ganbu itdingh aeu yiemzgek eiqsouj cwngci gijliz caeuq cwngci gvigawj dangj raeuz. Dangjyenz mbouj cinj cienzboq gij vah boihfamh lijlun caeuq lohsienq fuengcim cwngcwz dangj raeuz, mbouj cinj goenghai gangj gij vah boihfamh dangj cunghyangh gietdingh, mbouj cinj laeuh gij mimiz dangj caeuq guekgya okbae, mbouj cinj camgya gij cujciz mbouj habfap caeuq gij hozdung mbouj habfap, mbouj cinj biencaux、 cienzboq cwngci yauzyenz caeuq gangj gij vah coujva dangj caeuq guekgya hingzsieng. Dangjyenz mbouj cinj gauj funghgen maezsaenq, mbouj cinj saenqngiengx cunghgyau, mbouj cinj camgya sezgyau, mbouj cinj yungzhawj caeuq cihciz cunghgyau gizdonh seiqlig、 minzcuz faenmbek seiqlig、 bauliz gungjbu seiqlig caeuq doenghgij hozdung de.

  Dangjyenz、 ganbu daegbied dwg gauhgiz ganbu mbouj cinj youq ndaw dangj lingh laeb bouxdaeuz、 comz gvaengx vunz he、 rag bang vunz he, yiemzgimq youq ndaw dangj rag seivunz gvanhaeh、 ganq goyinz seiqlig、 giet baenz leih’ik cizdonz. Doiq doenghboux swngzgei maeuzleih、 rag vunz guh baiq、 gapbang baenz gyoengq, aeu yiemzgek fuengzre, ciuq gijliz ciuq gvidingh cawqleix. Giengiet fuengzre ndaeksimmaeuz、 ndaekyaemmaeuz caeg’aeu dangj caeuq guekgya gienzlig.

  Ndaw dangj gak gaep cujciz caeuq daengxcungq dangjyenz doiq dangj itdingh aeu cungsim lauxsaed、 banhsaeh goengdauh, gangj vah soh、 banh saeh saed、 guh vunz soh, ciuq saedsaeh yiengq dangj fanjying caeuq baugau cingzgvang, fanjdoiq gauj duzngwz songgyaeuj、 guh “bouxvunz miz song aen naj”, fanjdoiq loengh haw guh gyaj、 gyaj bauq cej laux, fanjdoiq yaemmuenz saedcingz、 bauq ndei mbouj bauq rwix. Lingjdauj gihgvanh caeuq lingjdauj ganbu mbouj cinj aeu gijmaz leixyouz caeuq mingzdaeuz bae yungzhawj、 yoegyon、 amqnaeuz roxnaeuz giengzbik gaeplaj gangj vahgyaj. Fanzdwg aenvih loengh haw guhgyaj、 yaemmuenz saedcingz cix cauhbaenz sawj dangj caeuq yinzminz saehnieb sonjsaet hungloet, fanzdwg aenvih loengh haw guhgyaj、 yaemmuenz saedcingz cix yaeuh’ndaej mingzdaeuz、 diegvih、 ciengjli roxnaeuz gizyawz leih’ik, fanzdwg aenvih yungzhawj、 yoegyon、 amqnaeuz roxnaeuz giengzbik gaeplaj gangj vahgyaj、 yaemmuenz saedcingz, cungj aeu ciuq gijliz ciuq gvidingh bae yiemzsuk gyaepcaz cwzyin. Doiq doenghboux dungzci genhciz yenzcwz、 gamj gangj vahcaen de, aeu cihciz、 baujhoh、 gujli de.

  Ndaw dangj mbouj cinj duenghduengh ragrag、 doxbungj doxbauq、 bi rieng rod mumh. Senhconz boux lingjdauj seiz aeu ciuq saedsaeh bae gangj, gimqcij bungjbauq. Senhconz lingjdauj aeu caensaed, mbouj cinj cej bungj, mbouj cinj guhsouh、 soengqlaex、 fat dienh goenghoh hawj lingjdauj, mbouj cinj lingjdauj ganbu youq ndawguek gaujcaz gunghcoz seiz, cujciz coux soengq、 nem byauhyij、 roq gyong roq laz、 bu damj hoengz、 guhlaeuj daengj.

  Gak gaep dangj cujciz itdingh aeu rap hwnj gij cwzyin caephengz caeuq henhoh cwngci gijliz caeuq cwngci gvigawj, doiq gij hingzveiz famhfanj cwngci gijliz aeu giengiet bihbingz hatdingz, mbouj ndaej youzcaih de guh. Gak gaep dangj cujciz caeuq gijliz genjcaz gihgvanh aeu gyagiengz gamduk caeuq genjcaz gijliz caephengz cingzgvang, giengiet fuengzre caeuq niujcingq gij vwndiz mwh caephengz gijliz soengrwnh fwngzunq haenx.

  Haj、 Baujciz Dangj Caeuq Yinzminz Ginzcung Cungj Lwednoh Lienzhaeh De

  Gij lizcangz yinzminz couh dwg gij gaenbonj cwngci lizcangz aen dangj raeuz, yinzminz ginzcung dwg giz goekmboq dangj raeuz aeundaej ligliengh haenx. Dangj raeuz dwg daj ndaw yinzminz daeuj, mbouj miz yinzminz yungjhu caeuq cihciz, dangj couh yaek saetbae goekrag. Itdingh aeu dawz aen gaenbonj cunghcij genhciz itsim iteiq vih yinzminz fuzvu、 baujciz dangj caeuq yinzminz ginzcung lwed noh lienzhaeh dangguh gaenbonj iugouz bae gyagiengz caeuq gveihfan gij cwngci swnghhoz ndaw dangj.

  Daengx dangj itdingh aeu laebhwnj aen lizsij veizvuzcujyi gvanhdenj yinzminz ginzcung dwg boux dajcauh lizsij neix maenhmaenh bae, ndwn’onj ginzcung lizcangz, gyalaeg ginzcung ganjcingz. Gak caengz dangj cujciz、 daengxcungq dangjyenz daegbied dwg gak gaep lingjdauj gihgvanh dem lingjdauj ganbu aeu gvancez gij ginzcung lohsienq aen dangj, guh daengz guhmaz cungj vih ginzcung, guhmaz cungj baengh ginzcung, daj ndaw ginzcung daeuj, haeuj ndaw ginzcung bae, vih ginzcung banh saedsaeh、 gej nanzsaeh, dang ndei boux fugsaeh yinzminz. Genhciz cam yinzminz aeu genyi、 cam yinzminz siengj aeu gijmaz、 cam yinzminz aeu geiqmaeuz, itdingh mbouj ndaej youq dangqnaj ginzcung gag nyinhnaeuz guh ndaej deng、 ndaengndiengq haep vunz, itdingh mbouj ndaej dangguen guh lauxyez、 mbouj gvansim gij haemzhoj ginzcung, engqgya mbouj ndaej haephangz ginzcung、 sonjhaih caeuq ciemqaeu gij leih’ik ginzcung. Gaijndei caeuq cauhmoq gij fuengfap lienzhaeh ginzcung, laebhwnj caeuq guhcaez minzyi diucaz daengj cidu, yungh conzdungj meizdij caeuq hulenzvangj daengj gak cungj miengloh bae liujgaij gij cingzgvang gwnz biengz、 gij siengjfap yinzminz, dingqyawj ginzcung heuh aeu gijmaz, maedciet dangj nem ginzcung gvanhaeh、 ganbu nem ginzcung gvanhaeh, doiq gwnz fucwz caeuq doiq laj fucwz doengzcaez guh hwnjdaeuj, roengzrengz saedyienh ndei、 henhoh ndei、 fazcanj ndei gij gaenbonj leih’ik ceiq guengjdaih yinzminz.

  Daengx dangj itdingh aeu giengiet fanjdoiq hingzsicujyi、 gvanhliuzcujyi、 yangjlozcujyi caeuq gij fungheiq saisaengq sajbaizciengz, lingjdauj ganbu daegbied dwg gauhgiz ganbu aeu caenndang guh yienghndei. Fanjdoiq hingzsicujyi, cujyau dwg gaijgez cozfungh fouzfeuz、 gunghcoz mbouj saed, vwnzgen baenz ndoi hoih lai baenz haij、 guh yiengh hawj vunz yawj, dam mingz lienh leih、 loengh haw guhgyaj daengj vwndiz. Fanjdoiq gvanhliuzcujyi, cujyau dwg gaijgez duetliz saedsaeh、 duetliz ginzcung, siuhgiz wngqdoiq、 doi bae doi dauq, guhsaeh mbouj gangj leix、 maezlienh daeggienz daengj vwndiz. Fanjdoiq yangjlozcujyi, cujyau dwg gaijgez gyaep mingz gyaep leih、 dam yiengjsouh, gangj baizcangz、 lauh huq lumz ceiq daengj vwndiz. Fanjdoiq gij fungheiq saisaengq sajbaizciengz, cujyau dwg gaijgez saisaengq lanhyungh、 daihsaengq fouz doh, lanh sai guhndauq、 nduknaeuh doekbaih daengj vwndiz. Genhciz ca bingzciengz、 ca sijsaeq、 ca ciengzgeiz, daegbied dwg aeu fuengzre caeuq cazcawq gak cungj “swfungh vwndiz” gaenq ndumjyo、 bienqyiengh de, cingqciengz、 ciengzgeiz dawz cunghyangh bet hangh gvidingh cingsaenz guh saed bae.

  Gak gaep dangj cujciz、 daengxcungq dangjyenz daegbied dwg lingjdauj ganbu itdingh aeu daezsang gij naengzlig guh ginzcung gunghcoz, geiq fugsaeh ginzcung youh daiqlingx ginzcung giendingh mbouj bienq bae gvancez lozsiz gij lijlun caeuq lohsienq fuengcim cwngcwz dangj raeuz, sawj dangj raeuz cujcangh bienqbaenz gij hengzdoengh ginzcung gagnyienh bae guh, dazyinx ginzcung dingq dangj gangj、 riengz dangj byaij. Giengiet fanjdoiq minglingcujyi, giengiet fanjdoiq “veijbahcujyi”, mbouj cinj vihliux cwngci cingzcik、 biuqsoq caeuq hingzsiengq goyinz cix duetliz saedsaeh seizbienh gezcwz、 seizbienh wngqcingz.

  Genhciz gij cidu lingjdauj ganbu guh diucaz yenzgiu、 dinghgeiz ciepraen ginzcung daeuj cunz、 caeuq ganbu ginzcung gyausim gangjgoj、 ginzcung habhoz cingzdoh bingzdingh daengj. Gak gaep lingjdauj ganbu itdingh aeu haeuj daengz saedsaeh bae、 haeuj daengz gihcwngz bae、 haeuj daengz ginzcung bae, lai baedaengz giz dieg diuzgen gannanz、 cingzgvang fukcab、 mauzdun doedyienh haenx gaijgez vwndiz, siengj caenh banhfap vih ginzcung siu you cawz hoj. Lingjdauj ganbu roengz gihcwngz aeu depgaenh beksingq, mbouj aeu buenx soengq, liujgaij saedsaeh cingzgvang, dukcaz lozsiz, gaijgez vwndiz, giengiet fanjdoiq guh yiengh、 gangjboq yaeuh’aeu sim’angq. Doiq sojmiz gij hingzveiz guh“hingzsieng gunghcwngz”caeuq “cwngciz gunghcwngz” sai rengz sai cienz haenx, aeu yiemzsuk bae cazdawz cwzyin caeuq gyaepcaz cwzyin, ciuq gijliz caeuq faplwd bae cawqleix. Youq wngqdoiq ancienz saehhux hungloet、 fwtfat saehgienh hungloet、 swyenz caihaih saehgienh hungloet daengj doenghgij saehgienh neix, lingjdauj ganbu itdingh aeu bae daengz itsienq、 haeuj daengz baihnaj bae cijveih, gibseiz hezdiuz gaijgez gij vwndiz doekyienh de, gibseiz hoizwngq sevei gvensim.

  Dangjyenz、 ganbu itdingh aeu ciuqgoq daengxbuenz, gagrox henhoh sevei huzndei onjdingh, bungzdaengz gij vwndiz nangqdaengz leih’ik bonjfaenh caeuq gizbu leih’ik, wnggai doenggvaq cingqciengz miengloh fanjying hawj baihgwnz, cizgiz cujdung guh ndei vaqgej sevei mauzdun、 fangzgung sevei fung’yiemj gunghcoz, mbouj cinj cujciz、 camgya、 yungzhawj doenghgij hozdung mbouj habfap de gauj luenh sevei cizsi.

  Roek、 Genhciz Minzcuj Cizcunghci Yenzcwz

  Minzcuj cizcunghci dwg gij gaenbonj cujciz yenzcwz aen dangj raeuz, dwg hangh cidu youqgaenj baujcang gij cwngci swnghhoz ndaw dangj ndaej cingqciengz bae guh haenx. Genhciz cizdij lingjdauj cidu, saedhengz cizdij lingjdauj caeuq goyinz faengoeng fucwz doxgiethab, dwg aen bouhfaenh youqgaenj gapbaenz minzcuj cizcunghci haenx, itdingh aeu daj gyaeuj daengz rieng bae genhciz, aen cujciz lawz roxnaeuz boux lawz youq gijmaz cingzgvang baihlaj cungj mbouj cinj yungh cungj leixyouz lawz boihfanj hangh cidu neix.

  Gak gaep dangjveij (dangjcuj) itdingh aeu genhciz cizdij lingjdauj cidu. Fanzdwg gij vwndiz hungnaek, aeu ciuq gij yenzcwz cizdij lingjdauj、 minzcuj cizcungh、 lengq boux gag naemj、 veiyi gietdingh, youz cizdij daujlun、 ciuq vunzsiuj fugcoengz vunzlai guh’ok gietdingh, mbouj cinj yungh gizyawz hingzsik dingjlawh dangjveij nem cangzveijvei (roxnaeuz dangjcuj) daeuj guh lingjdauj. Lozsiz dangjveij cangzveijvei (roxnaeuz dangjcuj) lwnhsaeh gveihcwz caeuq gezcwz cwngzsi, laebcienz aen cidu cangzveijvei yiengq cenzveijvei dinghgeiz baugau gunghcoz caiqlij ciepsouh cenzveijvei gamduk, giengiet fanjdoiq caeuq fuengzre gag dingh cix gaemh vun ciuq hengz roxnaeuz dan guenj swhgeij mbouj aeu gaepgwnz, giengiet fanjdoiq caeuq fuengzre ngeixlwnh daengzndwi mbouj guh gietdingh、 gietdingh daengzndwi mbouj bae caephengz、 caephengz daengzndw mbouj gangj saedyauq, giengiet fanjdoiq caeuq fuengzre aeu gij mingzdaeuz dangjveij cizdij gezcwz daeuj itheij famhfap. Gak gaep dangjveij (dangjcuj) aeu rox yawj daihseiq、 gaem daihsaeh、 guenj daengxbuenz, gibseiz yawjraen caeuq gaijgez mauzdun nem nanzdaez, mbouj dawz cwzyin doihawj baihgwnz nyoengx hawj baihlaj, mbouj louz vwndiz hawj boux baihlaeng. Laebhwnj aen cidu gaepgwnz cujciz youq mwh yaek guh’ok gij gezcwz youqgaenj mizgven gaeplaj cujciz couh sien cam aeu gij yigen gaeplaj cujciz.

  Boux lingjdauj banhswj cwngzyenz itdingh aeu demgiengz daengxbuenz gvanhnen caeuq cwzyin eiqsik, youq mwh yenzgiu gunghcoz aeu cungfaen fatbiuj yigen, gezcwz guhbaenz le baez ca couh ca daengzdaej, mbouj ndaej boihfamh gij gietdingh cizdij cix lingh guh cawjcieng、 gag bae guh gij bonjfaenh laihnaeuz dwg deng haenx. Giengiet fanjdoiq caeuq gaijcingq gij hingzveiz loengloek lumjbaenz dangqnaj mbouj gangj、 baihlaeng luenh gangj, gwnz hoih mbouj gangj、 laeng hoih luenh gangj, dangqnaj guh yiengh ndeu、 baihlaeng guh lingh yiengh daengj. Genhciz gangj yenzcwz、 gangj gvigawj, doengzcaez henhoh gij doxhuz youq gwnz giekdaej genhciz dangjsing yenzcwz de.

  Boux cujyau fucwz dungzci dangjveij (dangjcuj)itdingh aeu fazyangz minzcuj、 rox guh cizcungh、 gamj rapdawz cwzyin. Youq mwh yenzgiu daujlun vwndiz aeu dawz swhgeij dangguh ndaw banhswj boux cwngzyenz bingzdaengj ndeu, cungfaen fazyangz minzcuj, yiemzgek ciuq cwngzsi gezcwz、 ciuq gvigawj banhsaeh, louzsim dingqaeu gij yigen mboujdoengz, cingqdeng bae doiqdaih gij yigen gyoengq vunz noix, mbouj ndaej gauj aen cidu youz bouxvunz ndeu gangj le suenqsoq engqlij gauj gyahcangjci dem. Cihciz banhswj cwngzyenz youq ndaw cizcwz fanveiz doglaeb fucwz guh hong, giengiet fuengzre caeuq haekfug mingzdaeuz dwg cizdij lingjdauj、 saedsaeh dwg youz boux dog roxnaeuz gij vunz noixsiuj gangj le suenqsoq, giengiet fuengzre caeuq haekfug mingzdaeuz dwg cizdij fucwz、 saedsaeh dwg mbouj miz vunz fucwz.

  Boux lingjdauj banhswj cwngzyenz itdingh aeu giengiet caephengz gij gietdingh dangj cujciz, danghnaeuz miz yigen mboujdoengz, ndaej baujlouz roxnaeuz yiengq aen dangj cujciz gaepgwnz daezok, hoeng youq aen dangj cujciz gaepgwnz roxnaeuz bonjgaep mboujcaengz gaijbienq gietdingh gaxgonq, cawzliux caephengz gietdingh yaek sikhaek yinxhwnj hougoj yiemzcungh daengj gaenjgaep cingzgvang okdaeuj, itdingh aeu mbouj miz diuzgienh bae caephengz gij gietdingh dangj cujciz gaenq guh’ok de.

  Lingjdauj banhswj cwngzyenz faengoeng ciuq gvidingh yiengq gaepgwnz dangjveij bauqbwh, mbouj miz leixyouz cingqdangq、 caengz yiengq gaepgwnz dangjveij bauqbwh gvaq mbouj ndaej diuzcingj. Lingjdauj ganbu aeu gagrox fugcoengz cujciz faengoeng anbaiz, mboujlwnh bouxlawz cungj mbouj ndaej yiengq cujciz gangjgyaq、 mbouj fugcoengz cujciz anbaiz. Lingjdauj ganbu mbouj cinj dawz gij hong de faenguenj、 gij lingjyiz caeuq deihfueng de faenguenj dangguh “gij dieglingx seivunz”, mbouj cinj gag dingh cix gaemh vun ciuq hengz.

  Youq dangj raeuz gunghcoz caeuq hozdung ndawde, giz wnggai aeu aen mingzdaeuz cujciz oknaj couh mbouj ndaej aeu aen mingzdaeuz goyinz, wnggai youz cizdij yenzgiu couh mbouj ndaej goyinz gag byaujdai, mbouj cinjhawj yungh gij cawjcieng goyinz dingjlawh gij cawjcieng dangj cujciz、 yungh gij gietdingh goyinz dingjlawh gij gietdingh dangj cujciz.

  Caet、 Fazyangz Ndaw Dangj Minzcuj Caeuq Baujcang Dangjyenz Gienzleih

  Ndaw dangj minzcuj dwg diuzmingh aen dangj raeuz, dwg gij cwngci swnghhoz ndaw dangj cizgiz gengangh aen giekdaej youqgaenj de. Aeu genhciz caeuq guhcaez ndaw dangj minzcuj gak hangh cidu, daezsang gij caetliengh ndaw dangj minzcuj, ndaw dangj gezcwz、 caephengz、 gamduk daengj gunghcoz itdingh aeu caephengz gij minzcuj yenzcwz caeuq cwngzsi dangjcangh dangjgveih doekdingh haenx, aen dangj cujciz lawz caeuq boux vunz lawz, cungj mbouj ndaej gaemhnaenx gij minzcuj ndaw dangj, buqvaih gij minzcuj ndaw dangj.

  Cunghyangh Veijyenzvei、 Cunghyangh Cwngcigiz、 Cunghyangh Cwngcigiz Cangzvu Veijyenzvei caeuq aen dangj gak gaep veijyenzvei guh ok gezcwz baijbouh hungnaek, bietdingh aeu haeujlaeg bae guh diucaz yenzgiu, gvangqlangh dingqaeu gij yigen caeuq genyi gak fuengmienh, gietcomz gij dungxcaiz caeuq ligliengh vunzlai, guh daengz gohyoz gezcwz、 minzcuj gezcwz、 eifap gezcwz.

  Bietdingh aeu aeueiq gij cawjdaej diegvih dangjyenz、 baujcang gij minzcuj gienzleih dangjyenz, lozsiz dangjyenz gij gienzleih rox cingzgvang、 gienzleih caeuqfaenh、 gienzleih senjgij、 gienzleih gamduk de, baujcang daengxcungq dangjyenz bingzdaengj yiengjmiz gij gienzleih dangjyenz ndaw dangjcangh gvidingh、 hengzguh gij yivu dangjyenz ndaw dangjcangh gvidingh, genhciz cungj dungzci gvanhaeh ndaw dangj minzcuj bingzdaengj, ndaw dangj itlwd heuh dungzci. Aen dangj cujciz lawz caeuq boux dangjyenz lawz cungj mbouj ndaej ciemqhaih gij minzcuj gienzleih dangjyenz.

  Deudoeng diuz roenloh hawj dangjyenz camgya daujlun gij hongsaeh ndaw dangj, haigvangq diuz miengloh dangjyenz gangj ok yigen, cauh ok aen cwngci heiqfaenh ndaw dangj minzcuj yaenglwnh haenx. Laebcaez ndaw dangj gezcwz hungnaek lwnhcingq bingzguj caeuq cam’aeu yigen daengj cidu. Gak gaep dangj cujciz doiq doengh aen gezcwz hungnaek caeuq vwndiz hungnaek de wnggai yungh lai cungj fuengsik cam’aeu gij yigen dangjyenz, dangjyenz miz gienz youq gwnz dangjhoih fatbiuj yigen mboujdoengz, doiq gij gezyi caeuq cwngcwz aen dangj danghnaeuz miz yigen mbouj doengz, youq laj cenzdiz giengiet caephengz, ndaej singhmingz baujlouz, doengzseiz ndaej dawz gij yigen swhgeij yiengq gaepgwnz cujciz cigdaengz dangj cunghyangh daezok. Doicaenh dangjvu goenghai, fazcanj caeuq yungh ndei gij hingzsik moq dangjvu goenghai, hawj dangjyenz engq ndei liujgaij caeuq caeuqfaenh gij saehfaed ndaw dangj.

  Ndaw dangj senjgij bietdingh aeu daejyienh gij eiqceiq bouxsenjgij, gveihfan caeuq guhcienz senjgij cidu gveihcwz. Mboujguenj ndaw dangj aen cujciz lawz caeuq boux goyinz lawz cungj mbouj ndaej yungh yiengh fuengsik lawz bae gazngaih bouxsenjgij ciuq gvidingh gag guhcawj hengzsawj senjgijgenz, giengiet fanjdoiq caeuq fuengzre gij yienhsiengq ciemqfamh gij gienzleih senjgij caeuq gij gienzleih deng senjgij boux dangjyenz, giengiet fuengzre caeuq cazcawq hingzveiz rag biuq oeteiq senjgij daengj.

  Genhciz gij daibyauj daihhoih cidu aen dangj raeuz. Mbouj ginggvaq baecinj mbouj ndaej daezgonq roxnaeuz nguhlaeng ciuhai dangj daibyauj daihhoih. Lozsiz aen yaemhgeiz cidu bouxdaibyauj camgya dangj daibyaij daihhoih de, saedhengz daibyauj dizanci, laebcaez gij cidu lumjbaenz daibyauj caeuqfaenh gezcwz hungloet、 camgya doigawj gij ganbu youqgaenj caeuq minzcuj bingzyi、 lezsiz dangjveij mizgven veiyi、 lienzhaeh dangjyenz ginzcung daengj. Engq ndei fazveih gij cozyung deihfueng gak gaep dangjveij caeuq veijyenz. Laebcaez ndaw dangj cingzgvang doengbau cidu、 cingzgvang fanjyingj cidu, deudoeng diuz miengloh dangjyenz biujdab yigen、 iugouz lawhvuenh ndaw gihcwngz dangj cujciz lingjdauj banhswj boux guh hong mbouj ndei de. Ciuqgeiz vuenhgaiq gihcwngz dangjveij、 cungjcihbu caeuq cihbu veijyenzvei.

  Dangjyenz miz gienz yiengq dangj miz gaengawq bae biengjloh、 genjgij gij saehsaed famh gijliz famhfap dangj raeuz aen cujciz lawz caeuq boux dangjyenz lawz, dizcang saedmingz gawjbauq. Dangjyenz miz gienz youq gwnz dangjhoih miz gaengawq bae bihbingz aen cujciz lawz caeuq boux dangjyenz lawz. Dangj cujciz gawq aeu yiemzsuk cawqleix gij hingzveiz yawjsiuj、 diuqnanz、 atnaenx bouxgawjbauq daegbied dwg gij hingzveiz dwkceih boizhaemz, youh aeu yiemzsuk gyaepcaz cawqleix gij hingzveiz bangjgauq haih vunz. Doiq boux dangjyenz deng bangjlaih、 bangjgauq、 gawjbauq saehcingz yiemzcungh mbouj caensaed de, dangj cujciz aeu gibseiz vih de gangj cingcuj caeuq hoizfuk mingzdaeuz. Aeu baujcang dangjyenz gienz baijleix、 gienz sinhsu daengj gienzleih. Doiq mwh caephengz gijliz miz gij loengloek roxnaeuz veizgij hingzveiz de, aeu ciuqgvi gibseiz gaijcingq、 siucawz yingjyangj doengzseiz gyaepcaz gij cwzyin mizgven cujciz caeuq yinzyenz.

  Bet、 Genhciz Aen Daujyang Cingqdeng Bae Genj Vunz Yungh Vunz

  Genhciz genhciz aen daujyang cingqdeng bae genj vunz yungh vunz, dwg yiemzsuk ndaw dangj cwngci swnghhoz gij cujciz baujcwng de. Bietdingh aeu yiemzgek biucinj、 laebcaez cidu、 guhcienz cwngcwz、 gveihfan cwngzsi, sawj gij ganbu genj okdaeuj de cujciz cuengqsim、 ginzcung habhoz、 ganbu fugheiq.

  Genj yungh ganbu bietdingh aeu genhciz gij ganbu diuzgienh ndaw dangjcangh gvidingh de, genhciz miz daek youh miz caiz、 aeu daek guh gonq, genhciz seiq fueng bet baih、 yawj caiz yungh vunz, genhciz aen byauhcunj ganbu ndei saenqniemh giendingh、 vih yinzminz fuzvu、 gaenx saehguek guh saedsaeh、 gamj rap cwzyin、 ndang cingq fwngz seuq. Dawz goengdauh cingqbaiq dangguh ganbu gunghcoz haedsim leixniemh ronzdoeng gvaq genj vunz yungh vunz daengx aen gocwngz bae, guh daengz goengdauh doiqdaih ganbu、 goengbingz bingzgyaq ganbu、 goengcingq sawjyungh ganbu.

  Genj vunz yungh vunz bietdingh aeu giengzvaq dangj cujciz lingjdauj caeuq bajgvan cozyung, lozsiz aen cidu ciuqsaed geiqloeg gij hong genj yungh ganbu, saedbauj moix aen hothoh cungj guh ndaej gveihfan. Cujciz bumwnz aeu yiemzgek ciuq cwngcwz、 yenzcwz、 cidu banhsaeh, saedsaeh gouz dwg gaujcaz bingzgyaq ganbu, gamj vih ganbu gangj coenzvah goengdauh, gamj bae daeqceih mwh genj vunz yungh vunz gij veizgveih hingzveiz de, cauhbaenz boux ak ndaej hwnj、 boux yaez roengzdaiz、 boux yak vutvak gij genj vunz yungh vunz daujyang neix. Gyagiengz gamduk cazcam gij cwzyin genj vunz yungh vunz, yungh vunz mbouj gaujcaz ndei yungh vunz loengloek aeu yiemzsuk gyaepcaz cwzyin.

  Gak gaep dangj cujciz itdingh aeu gagrox bae fuengzre caeuq niujcingq yungh vunz fuengmienh gij fungheiq mbouj cingq caeuq gak cungj bienyiengq. Giengiet gimqcij buet guen aeu guen、 cawx guen gai guen, oetcienz rag senjbiuq daengj hingzveiz, giengiet gimqcij gij hingzveiz yiengq dangj iet fwngz aeu cizvu、 aeu mingzdaeuz、 aeu daiyi, giengiet gimqcij gij hingzveiz yiengq dangj cujciz gangj gyaqcienz、 mbouj fugcoengz cujciz gietdingh haenx. Giengiet gaijcingq gij bienyiengq dandan yawj biuqsoq、 yawj faensoq、 yawj swnghcanj cungjciz、 yawj nienzlingz daengj aeu vunz, giengiet haekfug gij byaijyiengq youz siujsoq vunz youq ndaw vunz siujsoq genj vunz. Lingjdauj ganbu aeu daiqdaeuz caephengz gij ganbu cwngcwz dangj raeuz, mbouj cinj yungh vunz dan yungh boux caengaenh swhgeij、 gauj boux caen boux gyae, mbouj cinj yungh mingzleih diegvih daeuj yaeuhlox bouxwnq、 luenh loh siusik hawj bouxwnq、 soucawx simvunz, mbouj cinj goyinz vih ganbu dizbaz nyaemhyungh dox dongx、 ndenq saenq. Lingjdauj ganbu mbouj ndaej cabfwngz gij hong senjbaz nyaemhyungh ganbu giz gunghcoz swnghhoz gvaq de、 aen danhvei guh hong gvaq de caeuq aen lingjyiz mbouj gvihaeuj swhgeij faenguenj de, mizgven deihfueng caeuq danhvei dangj cujciz aeu daeqceih cungj hingzveiz veizfanj cujciz yenzcwz aen dangj neix.

  Gijmaz vunz cungj mbouj cinj dawz gij ganbu aen dangj dangguh caizcanj seimiz, ndaw dangj mbouj cinj gauj ndang vunz baenghgauq gvanhaeh. Lingjdauj ganbu daegbied dwg gauhgiz ganbu mbouj ndaej gauj gyahcangjci, iugouz bouxwnq vanzcienz dingqcoengz minghlingh, daegbied dwg mbouj ndaej iugouz gaeplaj guh gij saeh veizfanj dangjgij guekfap de; gaeplaj wnggai daeqceih gaepgwnz lingjdauj ganbu cungj iugouz neix doengzseiz baugau hawj gaepgwnz dangj cujciz cigdaengz dangj cunghyangh bae, mbouj wnggai doiq gaepgwnz lingjdauj ganbu mbouj miz yenzcwz dwk fugcoengz. Gveihfan caeuq guhseuq ndaw dangj dungzci caeuq dungzci baedauq, lingjdauj ganbu doiq dangjyenz mbouj ndaej bak coi fwngz vix, dangjyenz doiq lingjdauj ganbu mbouj ndaej bi rieng rod mumh.

  Ganbu dwg gij caizfouq dijbauj dangj raeuz, bietdingh aeu gawq yiemzgek gyauyuz、 yiemzgek guenjleix、 yiemzgek gamduk, youh aeu youq cwngci fuengmienh、 swhsiengj fuengmienh、 gunghcoz fuengmienh、 swnghhoz fuengmienh caensim gvansim, gujli ganbu guh saeh cauh nieb、 daihdamj guh saeh.

  Laebhwnj gij gihci hawj loek gaij loek、 bauyungz gij saetloeng ganbu youq ndaw gunghcoz daegbied dwg ndaw gaijgwz cauhmoq miz ok haenx. Genhciz ceih gonq re laeng、 yw bingh gouq vunz, cingqdeng doiqdaih gij ganbu famh loengloek de, bangcoengh de nyinhrox caeuq gaijcingq loengloek. Mbouj ndaej gyoeggyaux gij singqcaet ganbu soj famh loengloek de roxnaeuz mauhgangj loengloek cingzdoh doiq ganbu guh’ok cawqleix mbouj habdangq, mbouj ndaej leihyungh ganbu soj famh loengloek vih swhgeij okheiq、 dwkceih boizhaemz.

  Gak gaep dangj cujciz caeuq lingjdauj ganbu itdingh aeu geiqmaenh gangjhoengq nguh guek、saedguh hwng guek, hengzguh gij cwngcizgvanh dengcingq, fazyangz gij cingsaenz maeh lumj diuz ding, roengzrengz mbouj gangjhoengq, caz saedcingz、 ok saed geiq、 guh saeh saed、 gouz saedyauq, guh daengz souj maenh gij cizcwz bonjfaenh. Gak gaep lingjdauj ganbu aeu fouzsei mbouj lau, guh daengz najdoiq mauzdun gamj diuhcan gunnanz, najdoiq yung’yiemj gamj ndwn okdaeuj, najdoiq loengloek gamj rapdawz cwzyin.

  Gak gaep dangj cujciz aeu geizhauh sienmingz vih doengh boux ganbu gamj dangrap haenx rap cwzyin, vih doengh boux ganbu gamj fucwz haenx fucwz. Doiq gij ganbu mbouj dangrap、 mbouj guh saeh、 rubrab doi cwzyin de aeu yiemzsuk bihbingz, mwh miz bizyau de guh cujciz cawqleix roxnaeuz dangjgij cawqfaen; doiq gij guh hong mbouj nyinhcaen mbouj caenh cizcwz de aeu yiemzsuk cazdawz cwzyin, danghnaeuz cauhbaenz hougoj yenzcung couh aeu yiemzsuk gyaepcaz cwzyin, eiciuq gijliz eifap cawqleix.

  Gouj、 Yiemzgek Caephengz Dangj Raeuz Cujciz Swnghhoz Cidu

  Gij cujciz swnghhoz aen dangj dwg gij neiyungz caeuq caidij youqgaenj ndaw dangj cwngci swnghhoz, dwg cungj hingzsik youqgaenj dangj cujciz doiq dangjyenz guh gyauyuz guenjleix gamduk. Itdingh aeu genhciz gak hangh cidu gij cujciz swnghhoz aen dangj, cauhmoq fuengsik fuengfap, demgiengz gij rengzhoengh cujciz swnghhoz aen dangj.

  Daengxcungq dangjyenz、 ganbu daegbied dwg gauhgiz ganbu itdingh aeu demgiengz gij eiqsik aen dangj, seizseiz geiqmaenh swhgeij aen ndangfaenh daih’it dwg dangjyenz. Mboujlwnh boux dangjyenz lawz cungj mbouj ndaej youzliz youq baihrog dangj cujciz, engqgya mbouj ndaej ak gvaq dangj cujciz bae. Moix boux dangjyenz mboujlwnh cizvu sang daemq, cungj aeu camgya gij cujciz swnghhoz aen dangj. Dangj cujciz aeu yiemzgek caephengz cujciz swnghhoz cidu, saedbauj gij cujciz swnghhoz aen dangj raeuz ciengzseiz、 nyinhcaen、 yiemzsuk.

  Genhciz hangh cidu cidu“sam aen hoih dangz goq ndeu”. Dangjyenz bietdingh aeu camgya dangjyenz daihhoih、 dangj siujcuj hoih caeuq hwnj dangjgoq, dangjcihbu aeu dinghgeiz ciuhai cihbu veijyenzvei veiyi. “Sam aen hoih dangz goq ndeu” aeu doed’ok cwngci hagsib caeuq gyauyuz, doed’ok dangjsing donlen, giengiet fuengzre guh baenz biujmienh、 hingzsik、 lumj guh’angq、 yungzsug. Lingjdauj ganbu aeu yungh bujdungh dangjyenz sinhfwn camgya gij cujciz swnghhoz de soj youq aen dangjcihbu roxnaeuz dangjsiujcuj de, genhciz aen cidu dangjyenz lingjdauj ganbu gangj dangjgoq. Moix boux dangjyenz cungj aeu ciuq gvidingh gagrox gyaunab dangjfei, dangjfei sawjyungh caeuq guenjleix aeu goenghai ronghcingx.

  Genhciz minzcuj swnghhozvei caeuq cujciz swnghhozvei cidu. Hai hoih gaxgonq aeu gvangqlangh dingqaeu yigen, haeujlaeg damz sim gyau sim, gwnz hoih aeu nyinhcaen caz baij vwndiz、 laegdaeuq buqcek goekgaen、 doekdingh aen fueng’yiengq cingjgaij, sat hoih le aeu cug gaiq cingjgaij lozsiz. Boux cwngzyenz aen lingjdauj banhswj gaepgwnz dangj cujciz aeu dinghgeiz、 swyouz camgya gij minzcuj swnghhozvei caeuq cujciz swnghhozvei aen lingjdauj banhswj gaeplaj dangj cujciz, fatyienh vwndiz gibseiz gaijcingq. Cunghyangh cwngcigiz daiqdaeuz hai ndei minzcuj swnghhozvei.

  Genhciz aen cidu damz sim damz vah. Ndawgyang gyoengq cwngzyenz aen lingjdauj banhswj dangj cujciz、 ndawgyang banhswj cwngzyenz caeuq dangjyenz、 ndawgyang dangjyenz caeuq dangjyenz aeu ciengzseiz guh damz sim damz vah, caensim doxgyau, gyaulouz swhsiengj, gyauvuenh yigen. Lingjdauj ganbu aeu daiqdaeuz bae damzvah, caemh aeu ciepsouh dangjyenz、 ganbu iekdamz.

  Genhciz doiq dangjyenz guh minzcuj bingzyi. Dukcoi dangjyenz doiqciuq gij dangjyenz biucinj dangjcangh gvidingh de、 doiqciuq gij vahbau haeujdangj、 lienzhaeh goyinz saedceiq guh dangjsing faensik, giengzvaq gij eiqsik dangjyenz、 demgiengz gij gvanhnen aen dangj、 daezsang dangjsing siuhyangj. Doiq gij dangjyenz dangjsing mbouj giengz de, gibseiz guh bihbingz gyauyuz, hanh seizgan gaijcingq; danghnaeuz ginggvaq gyauyuz vanzlij mbouj miz cienjbienq, wngdang gienqnaeuz de doiq dangj roxnaeuz cawzmingz bae.

  Lingjdauj ganbu bietdingh aeu giengzvaq cujciz gvanhnen, gij vwndiz hungloet ndaw gunghcoz caeuq gij saehhangh mizgven goyinz bietdingh aeu ciuq gvidingh ciuq cwngzsi yiengq cujciz cingjsiq baugau, lizhai gangjvei roxnaeuz mwnq dieg gunghcoz aeu sien yiengq cujciz cingjsiq baugau. Doiq gij mbouj miz cingqdangq leixyouz mbouj ciuqseiz baugau、 mbouj ciuqsaed baugau roxnaeuz muenzlumx mbouj bauq de, aeu yiemzsuk cawqleix.

  Cib、 Haiguh Bihbingz Caeuq Gag Bihbingz

  Bihbingz caeuq gag guh bihbingz dwg cungj vujgi raehrub dangj raeuz cangq ndang yw bingh、 baujciz ndangdaej cangqmaenh, hix dwg gij soujduenh youqgaenj gyagiengz caeuq gveihfan ndaw dangj cwngci swnghhoz haenx, itdingh aeu genhciz mbouj cuengqsoeng bae yungh ndei aen vujgi bihbingz caeuq gag guh bihbingz neix.

  Bihbingz caeuq gag guh bihbingz itdingh aeu genhciz ciuq saedsaeh bae guh, gangj dangjsing mbouj gangj seicingz、 gangj caenleix mbouj gangj cingzmienh, genhciz “doxgiet-bihbingz-doxgiet”, ciuq gij iugouz “ciuq aen gingq、 coih buhvaq、 swiq swiq ndang、 yw yw bingh”, yiemzsuk nyinhcaen daez yigen, cungmuenx yezcingz bae bang dungzci, giengiet mbouj ndaej dawz gag bihbingz bienqbaenz gag biujyangz、dawz dox bihbingz bienqbaenz dox bungjbauq.

  Dangjyenz、 ganbu itdingh aeu dawzyiemz faencek swhgeij, doiq gij vwndiz raen okdaeuj haenx aeu haeujlaeg faensik yienzaen, nyinhcaen cingjgaij. Doiqdaih bihbingz aeu miz couh gaij、 mbouj miz couh yienqmienx swhgeij, mbouj ndaej gauj gij doxceng mbouj miz yenzcwz de.

  Bihbingz bietdingh dwg vihliux goengcingq, mbouj ndaej cujgvanh moegloet, mbouj dwg vih swhgeij okheiq. Giengiet fanjdoiq gij yungzsug cezyoz caeuq vunzndeicujyi lumjbaenz gij saehcingz mbouj gven daengz swhgeij, couh mbouj leix mbouj langh; mingz rox mbouj deng, cix nyinhnaeuz noix gangj dwg ndei, giengiet haekfug yungh vah ndei daeuj lumx gij loengloek swhgeij、 rox loek hoeng mbouj gaij daengj gij baijyiengq loengloek de.

  Gij lingjdauj gihgvanh caeuq lingjdauj ganbu aen dangj doiq gak cungj yigen mbouj doengz cungj itdingh dingqaeu, gujli gaeplaj caensaed fanjying cingzgvang. Gij baugau、 gangjvah ndaw dangj gunghcoz veiyi nem gak loih gunghcoz cungjgez, gaepgwnz gihgvanh caeuq lingjdauj ganbu genjcaz cijdauj gunghcoz, gawq aeu gangj cingzcik caeuq gingniemh, youh aeu gangj vwndiz caeuq giz guh mbouj ndei de; gawq aeu yawjnaek gaijgez vwndiz, youh aeu daj ndaw vwndiz fanjngeix gij hongsaeh bonjndang caeuq gij cwzyin lingjdauj.

  Lingjdauj ganbu daegbied dwg gauhgiz ganbu itdingh aeu daiqdaeuz ciepsouh gak cungj vahgienq、 gamj gangj vahcaen, aeu gij sifan hengzdoengh bihbingz caeuq gag bihbingz dazyinx dangjyenz、 ganbu siubae gij heiqlau ndaw sim lumjbaenz gag bihbingz lau saetnaj、 bihbingz gaepgwnz lau deng boizhaemz、 bihbingz doengzgaep lau sieng huzheiq、 bihbingz gaeplaj lau noix senjbyau daengj. Dawz gij naengzlig fatyienh caeuq gaijgez vwndiz bonjndang dangguh gij baengzgawq youqgaenj gaujhaed bingzgyaq lingjdauj banhswj.

  Cib’it、 Gyagiengz Hanhhaed Caeuq Gamduk Gienzlig Yinhhengz

  Gamduk dwg gij gaenbonj baujcwng sawj gienzlig ndaej cingqdeng yinhhengz, dwg aen banhfap youqgaenj gyagiengz caeuq gveihfan ndaw dangj cwngci swnghhoz. Bietdingh aeu gyagiengz doiq lingjdauj ganbu guh gamduk, ndaw dangj mbouj cinjhawj miz gij gienzlig mbouj souh hanhhaed haenx, hix mbouj cinjhawj miz boux dangjyenz daegbied mbouj souh gamduk haenx.

  Aeu laeb caezcienz aen gihci hanhhaed caeuq gamduk gienzlig yinhhengz, cauxbaenz gij cidu anbaiz miz gienz bietdingh miz cwzyin、 yungh gienz bietdingh aeu rap cwzyin、 luenh yungh gienz bietdingh aeu gyaepcaz cwzyin.

  Saedhengz hai lied mbaw dan gienzlig, goenghai gienzlig yinhhengz gocwngz caeuq gezgoj, laebcaez aen gihci cazcam mbouj habdangq sawjyungh gienzlig, dawz gienzlig gven haeuj aen loengz cidu bae, hawj gienzlig youq laj ndit yinhhengz.

  Gak gaep cujciz caeuq lingjdauj ganbu dangj raeuz bietdingh aeu youq aen fanveiz yenfaz caeuq faplwd ndawde hozdung, demgiengz fazci eiqsik、hungzyangz fazci cingsaenz, gagrox ciuq gij gienzhanh、 gveihcwz、 cwngzsi fapdingh bae banhsaeh, cieddoiq mbouj ndaej aeu gij vah bouxlawz daeuj dingjlawh faplwd、 aeu gienz at fap、 vih seicingz vuengjfap, cieddoiq mbouj ndaej veizgveih cabfwngz swhfaz.

  Cauhguh aen vanzging ndaw dangj minzcuj gamduk, hawj diuz miengloh minzcuj gamduk ndaw dangj doengrat. Gak gaep dangj cujciz caeuq daengxcungq dangjyenz aeu demgiengz gamduk eiqsik, gawq hengzguh gamduk cwzyin, youh ciepsouh gak fuengmienh gamduk.

  Ndaw dangj gamduk bietdingh aeu doed’ok gamduk dangj raeuz lingjdauj gihgvanh caeuq lingjdauj ganbu daegbied dwg cujyau lingjdauj ganbu. Lingjdauj ganbu aeu cingqdeng doiqdaih gamduk, cujdung ciepsouh gamduk, sibgvenq youq laj gamduk guh hong, cieddoiq mbouj ndaej dingjdoi mbouj hawj gamduk、 ndojbaex gamduk.

  Lingjdauj ganbu daegbied dwg gauhgiz ganbu bietdingh aeu gyagiengz gag haed、 siujsim doiqdaih mwh mbouj miz gamduk caeuq mwh banhsaeh saepsoiq, gagrox genjcaz caeuq gibseiz gaijcingq gij vwndiz youq ndaw hengzsawj gienzlig、 lenzcwng ginzcwng fuengmienh, guh daengz gij gienzlig ndaej hengzsawj de ciuq gveihcwz dengcingq hengzsawj, gij gienzlig wnggai youz gaepgwnz cujciz hengzsawj de gaeplaj cujciz mbouj ndaej hengzsawj, gij gienzlig wnggai youz lingjdauj banhswj cizdij hengzsawj de banhswj cwngzyenz goyinz mbouj ndaej gag hengzsawj, gij gienzlig mbouj wnggai youz swhgeij hengzsawj de cieddoiq mbouj ndaej hengzsawj.

  Doiq gij gawjbauq nangqdaengz veizgij veizfaz hingzveiz de, doiq gij vwndiz dangjyenz fanjying de, mboujlwnh aen dangj cujciz lawz caeuq boux lingjdauj ganbu lawz cungj mbouj cinj muenzlumx mbouj bauq、 ngaiznguh mbouj banh. Gij lingjdauj ganbu nangqdaengz soj fanjying vwndiz de wnggai ndojveq, mbouj cinj gauxca caeuq cabfwngz cujciz diucaz.

  Dangjyenz、 ganbu fanjying gij vwndiz bouxwnq, wnggai dwg vihliux dangjsing, doenggvaq diuz miengloh ndaw dangj cingqciengz saedmingz daeuj fanjyingj, mbouj cinj faenfat gij siusik mbouj cingqsik de, mbouj cinj sanqfat gij saenq gawjbauq mbouj sij coh de, mbouj cinj bangjgauq haih vunz daengj. Doiq gij dangjyenz doenggvaq diuz miengloh cingqciengz fanjying vwndiz de, aen cujciz lawz caeuq boux goyinz lawz cungj mbouj cinj dwkceih boizhaemz, mbouj cinj gag guh gyaepcaz, mbouj cinj yungh diuq ok gunghcoz ganghvei、 gyangqgwz sawjyungh daengj banhfap daeuj fadceih.

  Genhciz boux hawj gienz de aeu fucwz gamduk, yawjraen vwndiz aeu gibseiz cawqleix. Giengzvaq gaepgwnz cujciz gamduk gaeplaj cujciz daegbied dwg cujyau lingjdauj ganbu hengzsawj gienzlig, fuengzre gienzlig saetbae hanhhaed caeuq lanhyungh.

  Doiq dangj cujciz caeuq dangjyenz、 ganbu hengzsawj gienzlig guh gamduk, bietdingh aeu eiciuq gijliz eifap bae guh. Gijgenj genhcaz、 swhfaz gihgvanh yiemzgek eiciuq gijliz eifap ciuq cwngzsi doiq gij hingzveiz dengngeiz veizgij veizfaz yiemzcungh de guh diucaz. Aen cujciz lawz caeuq boux goyinz lawz cungj mbouj ndaej gag gietdingh roxnaeuz souh ceijbaij bae doiq dangjyenz、 ganbu guh gij diucaz soujduenh mbouj habfap de. Doiq gij veizfanj gvidingh de, aeu yiemzsuk cazdawz gijliz caeuq faplwd cwzyin.

  Cibngeih、 Baujciz Gij Cwngci Bonjsaek Goengcingq Seuqcengh

  Hwnqguh yiengh cwngci seuqcengh, giengiet fanjdui nduknaeuh, dwg aen yinvu youqgaenj gyagiengz caeuq gveihfan ndaw dangj cwngci swnghhoz. Bietdingh aeu cuk maenh diuz swhsiengj fuengzsienq caeuq cidu fuengzsienq dingj nduknaeuh fuengz bienqcaet, roengzrengz cauhlaeb cungj dijci gihci mbouj gamj nduknaeuh、mbouj ndaej nduknaeuh、 mbouj siengj nduknaeuh.

  Gak gaep lingjdauj ganbu itdingh aeu yiemzgek daezswng swhgeij、 yiemzgek yunghgienz、yiemzgek hanhhaed swhgeij, maeuzsaeh aeu saed、 cauhnieb aeu saed、guh vunz aeu saed, dingj ndaej hwnj gienzlig、 gimcienz、lwgsau gaujniemh, yungh gij gienzlig dangj caeuq yinzminz hawj de haenx bae fugsaeh yinzminz.

  Lingjdauj ganbu daegbied dwg gauhgiz ganbu itdingh aeu daiqdaeuz saedhengz seveicujyi haedsim gyacizgvanh, ciepswnj caeuq fazyangz gij cienzdoengj caeuq cozfungh ndei dangj raeuz, hungzyangz Cunghvaz Minzcuz cienzdoengj meijdwz, gangj siuhyangj、 gangj daudwz、 gangj lauxsaed souj saenqyungh、 gangj cinghseuq rox saetnaj, ganq ok vunz gungcanjdangj cungj binjgwz ndei ceiqheiq sang haenx, gagrox duetliz doengh gij mbouj sam mbouj seiq haenx bae.

  Gak gaep lingjdauj ganbu dwg boux fugsaeh yinzminz, mbouj miz gienzleih hengz daegbied, Cunghyangh Cwngcigiz aeu daiqdaeuz caephengz Cunghyangh Bet Hangh Gvidingh. Gak gaep lingjdauj ganbu daegbied dwg gauhgiz ganbu aeu genhciz laeb dangj vih vunzlai、 gaemgienz vih beksingq, genhciz goeng sei faenmingz、 sien goenggya caiq bonjfaenh、 haed gij seisim swhgeij vih vunzlai, daiqdaeuz baujciz gij cozfungh giemhaw、 siujsim、 mbouj ndaenggon、 mbouj simgaenj, baujciz gij cozfungh mbouj lau sinhoj haenqrengz buek guh, daiqdaeuz caephengz gij cunjcwz cinghseuq gag haed, gagrox caeuq daeggienz swhsiengj caeuq daeggienz yienhsiengq guh doucwngh, mbouj cinj leihyungh gienzlig vih swhgeij caeuq bouxwnq maeuzaeu leih’ik seivunz, gimqcij veizfanj caizgingh cidu bae hawj cienz bae hawj doxgaiq bae hawj hanghmoeg, gimqcij yungh gak cungj gyaijbak roxnaeuz luenh laeb mingzmoeg ciemqaeu、 saisaengq gij cienzhuq guekgya caeuq cizdij, gimqcij veizfanj gvidingh daezsang ganbu daiyi biucinj.

  Lingjdauj ganbu daegbied dwg gauhgiz ganbu itdingh aeu gyahdingz、 gyahgyau、 gyahfungh, gyauyuz guenjleix ndei gij vunz ndaw ranz caeuq gij gunghcoz yinzyenz henzndang.

  Yiemzgek caephengz aen cidu baugau lingjdauj ganbu goyinz mizgven saehhangh, caenh’itbouh gveihfan gij coengznieb hingzveiz goenggvan roxnaeuz mehyah nem bouxlwg lingjdauj ganbu. Gimqcij leihyungh cizgenz roxnaeuz gij rengzlig yingjyangj bonjfaenh vih vunz ndaw ranz caeuq caencik baengzyoux maeuzaeu daegbied ciuqgoq, gimqcij gij vunz ndaw ranz caeuq caencik baengzyoux lingjdauj ganbu capfwngz gij gunghcoz ndaw cizgenz fanveiz lingjdauj ganbu、 capfwngz yinzsw anbaiz. Gak gaep lingjdauj banhswj caeuq lingjdauj ganbu doiq gij hingzveiz caencik baengzyoux lingjdauj ganbu veizgveih gauxca de aeu giengiet daeqceih, caiqlij dawz mizgven cingzgvang baugau hawj dangj cujciz.

  Daengxcungq dangjyenz、 ganbu daegbied dwg gauhgiz ganbu bietdingh aeu dingjdangj ndaej nduknaeuh、 ciengzlwenx ndang mbouj gyuek, giengiet caeuq gij yienhsiengq siuhgiz nduknaeuh guh doucwngh, giengiet dingjceih gij gvigawj ndumjyaem, gagrox genj aeu aen gvaengx gyau youx、 gvaengx swnghhoz、gvaengx baengzyoux singjseuq, cieddoiq mbouj ndaej dawz dauq sanghbinj gyauvuenh guh seng’eiq haenx buen haeuj ndaw dangj cwngci swnghhoz caeuq ndaw gunghcoz daeuj. Gak gaep dangj cujciz aeu rapdawz gij cwzyin fanjdoiq nduknaeuh dizcang cinghseuq, genhciz miz nduknaeuh bietdingh aeu fanj、 miz dam’aeu bietdingh aeu cawz, genhciz “duzguk”、 “duznengznyaen” doengzcaez dwk, genhciz mbouj miz giz gimqgeih、gizgiz cungj guenj daengz、 mbouj yungznyaenx saek di, ndaw dangj baenzbaenz mbouj cinjhawj boux nduknaeuh miz giz ndoj ndang.

  Gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk dwg gij yinvu caezcaemh daengx dangj, bietdingh aeu daengx dangj itheij doenghfwngz. Gak gaep dangjveij (dangjcuj) aeu cienzmienh hengzguh lingjdauj cwzyin, roengzrengz gaijgez gij vwndiz doedyienh haenx, laebhwnj laebcaez ndaw dangj cwngci swnghhoz cidu dijhi, dawz gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk gak hangh yinvu lozsiz daengz dieg. Haeujlaeg senhconz gyauyuz ndaw dangj cwngci swnghhoz cunjcwz, dawz aen cunjcwz ndaw dangj cwngci swnghhoz lied haeuj dangjyenz、 ganbu gyauyuz beizyin gij neiyungz bietdingh aeu hag bae.

  Doeksaed dangjveij cawjdaej cwzyin caeuq gijveij gamduk cwzyin, gyagiengz cwzyin gyaepcaz. Boux cujyau fucwz dangjveij (dangjcuj) aeu nyinhcaen hengzguh gij cwzyin boux cwzyin daih’it de. Gak gaep dangj cujciz aeu doenggvaq gyagiengz genjcaz dukcoi doeksaed ndaw dangj cwngci swnghhoz cingzgvang, laebhwnj laebcaez aen gihci cazcam cwzyin, gaepgwnz dangj cujciz aeu gyagiengz doiq gaeplaj cujciz guh cijdauj gamduk genjcaz, gak gaep cujciz bumwnz caeuq gihgvanh dangj cujciz aeu gyagiengz ngoenznaengz guenjleix, gak gaep gijliz genjcaz gihgvanh aeu yiemzsuk cazcawq gak cungj hingzveiz veizfanj ndaw dangj cwngci swnghhoz cunjcwz.

  Gyagiengz caeuq gveihfan ndaw dangj cwngci swnghhoz, aeu daj Cunghyangh Veijyenzvei、 Cunghyangh Cwngcigiz、 Cunghyangh Cwngcigiz Cangzvu Veijyenzvei guhhwnj. Gauhgiz ganbu aeu cingsingj nyinhrox gangjvei swhgeij doiq dangj caeuq guekgya miz maz cung’yausing daegbied, cizvei yied sang yied aeu gagrox ciuq gij biucinj aen dangj daezok de yiemzgek iugouz swhgeij, yied aeu guh daengz dangjsing giengiengz、 dangjgij yiemzmingz, guh daengz doiq dangj itcig cungsim、 ciengzlwenx mbouj fanj dangj. Ceiqdingh aen hengzguh yigen gvendaengz gauhgiz ganbu baenzlawz gvancez lozsiz aen cunjcwz neix, cijdauj caeuq dukcoi gauhgiz ganbu youq ciuqsouj nem caephengz aen cunjcwz ndaw dangj cwngci swnghhoz fuengmienh guh yienghndei.

  Cienzmienh coengzyiemz ceih dangj ciengzlwenx cungj byaij youq gwnz roen. Daengx dangj aeu genhciz roengzrengz mbouj cuengqsoeng, doengzcaez dajcauh yiengh cwngci swnghdai fungheiq seuqcingh goengcingq de, saedbauj dangj raeuz itcig cungj baenz gij lingjdauj haedsim giengiengz aen saehnieb yiengh seveicujyi miz Cungguek daegsaek de.

         CUNGGUEK GUNGCANJDANGJ NDAW DANGJ GAMDUK DIUZLAEH

(2016 nienz 10 nyied 27 hauh Cungguek Gungcanjdangj aih Cibbet Gaiq Cunghyangh
      Veijyenzvei Daihroek Baez Daengxcungq Veiyi doenggvaq)

  Daih 1 Cieng Cungjcwz

  Daih 1 diuz Vih genhciz dangj raeuz lingjdaeuj, gyagiengz dangj raeuz gensez, cienzmienh coengzyiemz ceih dangj, gyagiengz ndaw dangj gamduk, baujciz dangj raeuz senhcin caeuq cinghseuq, gaengawq 《Cungguek Gungcanjdangj Canghcwngz》, ceiqdingh aen diuzlaeh neix.

  Daih 2 diuz Ndaw dangj gamduk aeu Majgwzswh Lezningz Cujyi、 Mauz Cwzdungh Swhsiengj、 Dwng Siujbingz Lijlun、 “Sam Aen Daibyauj”Cung’yau Swhsiengj、Gohyoz Fazcanjgvanh daeuj ceijyinx, haeujlaeg gvancez gij cingsaenz Siz Ginbingz cungjsuhgi baenzroix gangjvah youqgaenj, hopheux dungjcouz doicaenh “haj yiengh gyoebbaenz aen cingjdaej ndeu” cungjdaej baijbouh caeuq hezdiuz doicaenh “seiq aen cienzmienh” canloz baijbouh, gingqcungh dangjcangh, ciuq fapgvi ceih dangj, genhciz ndaw dangj gamduk caeuq daengxcungq yinzminz gamduk dox giethab, demgiengz gij naengzlig dangj raeuz youq laj diuzgen ciengzgeiz gaemgienz gag cinghseuq、 gag laebndei、 gag gaijmoq、gag daezsang, saedbauj dangj raeuz itcig cungj baenz aen cungsim giengiengz lingjdauj gij saehnieb yiengh sevei cujyi miz Cungguek daegsaek.

  Daih 3 diuz Ndaw dangj gamduk mboujmiz giz gimqgeih、 mboujmiz laehvaih. Saenqnyaemh dingjlawh mbouj ndaej gamduk. Gak gaep dangj cujciz wngdang dawz saenqnyaemh gikcoi caeuq yiemzgek gamduk giethab hwnjdaeuj, coisawj boux lingjdauj ganbu dangj raeuz guh daengz miz gienz bietdingh aeu miz cwzyin、 miz cwzyin aeu dangrap, yungh gienz ciepsouh gamduk、 mbouj caenh cwzyin bietdingh aeu gyaepcaz.

  Daih 4 diuz Ndaw dangj gamduk bietdingh aeu gvancez minzcuj cizcunghci, ciuq fapgvi ciuq gijliz bae guh, gyagiengz gij cujciz gamduk daj gwnz daengz laj, gaijcaenh gij minzcuj gamduk daj laj daengz gwnz, fazveih gij cozyung doengzgaep dox gamduk. Genhciz ceih gonq re laeng、 ywbingh gouq vunz, ca seiz caeux ca seiz iq、 fuengz saeh iq bienq hung.

  Daih 5 diuz Gij yinvu ndaw dangj gamduk dwg saedbauj dangjcangh dangjgveih dangjgij youq daengx dangj ndaej mizyauq caephengz, henhoh dangj raeuz doxgiet doengjit、 cungdenj gaijgez gij vwndiz dangj raeuz lingjdauj bienq nyieg、 dangj raeuz gensez guh mbouj dohdaengz, cienzmienh coengzyiemz ceih dangj mbouj rengz, aen dangj gvanhnen damhbueg、 cujciz lanxsanj、 gijliz soengrwnh, guenj dangj ceih dangj mbouj yiemz daengj, baujcingq gij cujciz dangj raeuz cungfaen hengzguh ciznwngz、 fazveih cozyung gyangsim, baujcingq daengxcungq dangjyenz fazveih gij cozyung daz byaij yiengh ndei, baujcingq boux lingjdauj ganbu dangj raeuz cungcig cinghseuq dangrap.

  Gij cujyau neiyungz ndaw dangj gamduk dwg:

 ?。?)Gij cingzgvang gvendaengz ciuqsouj dangjcangh dangjgveih, giendingh lijsiengj saenqniemh, hengzguh cunghcij dangj raeuz, guh yiengh ndei ciuqsouj fapgoek faplwd;

 ?。?)Gij cingzgvang gvendaengz henhoh dangj cunghyangh cizcungh doengjit lingjdauj, gaenjmaenh laebhwnj cwngci eiqsik、 daihbuenz eiqsik、 gyangsim eiqsik、 gaen hwnj eiqsik, gvancez doeksaed gij lijlun caeuq lohsienq fuengcim cwngcwz dangj raeuz, saedbauj daengx dangj yiemz hengz faplingh;

 ?。?)Gij cingzgvang gvendaengz genhciz gij yenzcwz minzcuj cizcunghci, yiemzsuk ndaw dangj cwngci swnghhoz, gvancez dangjyenz goyinz fugcoengz dangj cujciz, siujsoq fugcoengz laisoq, cujciz gaeplaj fugcoengz cujciz gaepgwnz, daengx dangj gak aen cujciz caeuq daengxcungq dangjyenz fugcoengz dangj raeuz Daengx Guek Daibyauj Daihhoih caeuq Cunghyangh Veijyenzvei;

 ?。?)Gij cingzgvang gvendaengz doeksaed cienzmienh coengzyiemz ceih dangj cwzyin, yiemzmingz dangj raeuz gijliz daegbied dwg cwngci gijliz caeuq cwngci gvigawj, doicaenh dangjfungh lenzcwng gensez caeuq fanj nduknaeuh gunghcoz;

 ?。?)Gij cingzgvang gvendaengz doeksaed cunghyangh bet hangh gvidingh cingsaenz, gyagiengz cozfungh gensez, maedcaed lienzhaeh cungqvunz, gyamaenh gij giekdaej gaemgienz dangj raeuz;

 ?。?)Gij cingzgvang gvendaengz genhciz dangj raeuz ganbu nyaemhyungh biucinj, laebhwnj gij fuengyiengq dazyinx cingqdeng senj vunz yungh vunz, caephengz gij gvidingh genjleh nyaemhyungh ganbu;

 ?。?)Gij cingzgvang gvendaengz cinghseuq gaghaed、 goengcingq yunghgienz;

 ?。?)Gij cingzgvang gvendaengz guhbaenz gij yinvu dangj cunghyangh caeuq gaepgwnz dangj cujciz anbaiz de.

  Daih 6 diuz Gij cungdenj doiqsiengq ndaw dangj gamduk dwg dangj raeuz lingjdauj gihgvanh caeuq lingjdauj ganbu daegbied dwg cujyau lingjdauj ganbu.

  Daih 7 diuz Ndaw dangj gamduk bietdingh aeu dingj gijliz youq baihnaj, yinhyungh gamduk ca gijliz “seiq cungj hingzdai”, ciengzseiz mbeguh bihbingz caeuq gag bihbingz、 iekdingh damzvah sij saenq cazcam, hawj “naj hoengz hanh conh” baenz ciengzseiz raen;dangjgij cawqfaen mbaeu、 cujciz diuzcingj bienqbaenz famh gijliz cawqleix ciemq dingzlai; dangjgij cawqfaen naek、diuzcingj cizvu hungnaek baenz siujsoq;famh gijliz deng ngeiz nangqdaengz famhfap laeb’anq saemjcaz baenz gig siujsoq.

  Daih 8 diuz Boux lingjdauj ganbu dangj raeuz wngdang gyagiengz gag hanhhaed bonjfaenh, ciengzseiz doiqciuq dangjcangh daeuj genhcaz gij gangjvah hengzdoengh bonjfaenh, gag ciuqsouj ndaw dangj cwngci swnghhoz cunjcwz、 cinghseuq gaghaed cunjcwz, gyagiengz dangjsing siuhyangj, dauzyej daudwz cingzcauh, ciengzlwenx baujciz gij cwngci bonjsaek boux vunz gungcanjdangj.

  Daih 9 diuz Laebhwnj laeb caezcienz aen dijhi guh ndaw dangj gamduk youz dangj cunghyangh doengjit lingjdauj, dangjveij (dangjcuj) cienzmienh gamduk, gijliz genjcaz gihgvanh cienmonz fucwz gamduk, ndaw dangj gunghcoz bouhmonz guh ciznwngz gamduk, ndaw dangj gihcwngz cujciz guh bingzciengz gamduk, dangjyenz guh minzcuj gamduk haenx.

  Daih 2 Cieng Gij Gamduk Ndaw Cunghyangh Cujciz Dangj Raeuz

  Daih 10 diuz Dangj raeuz Cunghyangh Veijyenzvei、 Cunghyangh Cwngcigiz、 Cunghyangh Cwngcigiz Cangzvu Veijyenzvei cienzmienh lingjdauj gij hong ndaw dangj gamduk. Cunghyangh Veijyenzvei Daengxcungq Veiyi moix bi dingqaeu aen gunghcoz baugau Cunghyangh Cwngcigiz, gamduk Cunghyangh Cwngcigiz gunghcoz, anbaiz gij yinvu hungnaek gyagiengz ndaw dangj gamduk.

  Daih 11 diuz Cunghyangh Cwngcigiz、 Cunghyangh Cwngcigiz Cangzvu Veijyenzvei dinghgeiz yenzgiu anbaiz youq daengx dangj mbeguh hagsib gyauyuz, aeu cwngjfungh cingsaenz bae ra vwndiz、 niujcingq bienca;dingqaeu caeuq saemjlwnh gij cingzgvang veibau daengx dangj doeksaed aen cingsaenz cunghyangh bet hangh gvidingh, gyagiengz gamduk genjcaz gij cingzgvang cozfungh gensez;dingqaeu aen gunghcoz veibau Cunghyangh Gijliz Genjcaz Veijyenzvei Cangzvu Veijyenzvei;dingqaeu aen cingzgvang veibau cunghyangh liebyawj, youq ndaw gaiq nyaemh geiz de saedyienh cunghyangh liebyawj cienzmienh cwgoemq. Cunghyangh Cwngcigiz moix bi ciuhai aen hoih minzcuj swnghhoz, bae guh doiqciuq genjcaz caeuq dangjsing faensik, yenzgiu gij guhfap gyagiengz bonjndang gensez.

  Daih 12 diuz Boux vunz gapbaenz Cunghyangh Veijyenzvei de bietdingh aeu yiemzgek ciuqsouj gij cwngci gijliz caeuq cwngci gvigawj dangj raeuz, fatyienh boux cwngzyenz wnq miz gij hingzveiz boihfamh dangjcangh、 boqvaih gijliz dangj raeuz、 sienghaih dangj raeuz doxgiet doengjit de wngdang genhgez daeqceih, caemhcaiq gibseiz bauq naeuz dangj cunghyangh nyi. Doiq Cunghyangh Cwngcigiz veijyenz miz yigen, ciem coh caensaed aeu aen hingzsik sij gwnz ceij roxnaeuz gizyawz hingzsik bauq hawj Cunghyangh Cwngcigiz Cangzvu Veijyenzvei roxnaeuz Cunghyangh Gijliz Genjcaz Veijyenzvei Cangzvu Veijyenzvei rox.

  Daih 13 diuz Boux veijyenz Cunghyangh Cwngcigiz wngdang gyagiengz gamduk gij dangj cujciz caeuq lingjdauj banhswj cwngzyenz aen bouhmonz、deihfueng、lingjyiz swhgeij cigsoh faenguenj de, dinghgeiz caeuq boux cujyau fucwz mizgven deihfueng nem bouhmonz cimdoiq hengzguh gij cwzyin cienzmienh coengzyiemz ceih dangj、 cinghseuq gaghaed daengj cingzgvang dox gyaudamz.

  Daih 14 diuz Boux veijyenz Cunghyangh Cwngcigiz wngdang yiemzgek caephengz cunghyangh bet hangh gvidingh, gagrox bae camgya song caengz cujciz swnghhoz, ciuq saed bauq goyinz saehhangh youqgaenj hawj dangj cunghyangh rox. Lingxdaeuz laebhwnj gyahfungh ndei, gyagiengz gyauyuz caeuq hanhhaed vunz ndaw ranz caeuq boux gunghcoz yinzyenz henz ndang bonjfaenh, yiemzgek iugouz mehyah (goenggvan)、 daeglwg dahlwg caeuq yah gvan gyoengqde mbouj ndaej famh gvidingh guh seng’eiq banh giyez, mbouj ndaej famh gvidingh dang saeh、 giemnyaemh heuh’aeu cienzhoizbauq.

  Daih 3 Cieng Gij Gamduk Dangjveij(Dangjcuj)

  Daih 15 diuz Dangjveij (dangjcuj) youq ndaw dangj gamduk rapmiz cawjdaej cwzyin, suhgi dwg bouxfucwz daih’it, dangjveij cangzveijvei veijyenz (dangjcuj cwngzyenz) caeuq dangjveij veijyenz youq ndaw gvaengh cizcwz de hengzguh gamduk cizcwz. Dangjveij (dangjcuj) hengzguh gij gamduk cizcwz lajneix:

 ?。?)Lingjdauj gij hong ndaw dangj gamduk bonj dieg bonj bouhmonz bonj danhvei, cujciz saedhengz gak hangh gamduk cidu, ca ndei dukcoi genjcaz;

 ?。?)Gyagiengz lingjdauj gij hong doengzgaep gijveij caeuq gij hong gijliz genjcaz ndaw dieg de guenj, genjcaz yiengh hong de gamduk caephengz gijliz cawqfaen caz dawz cwzyin cingzgvang;

 ?。?)Bae gamduk dangjveij cangzveijvei veijyenz (dangjcuj cwngzyenz)、 dangjveij veijyenz, aen lingjdauj banhswj caeuq gyoengq cwngzyenz doengzgaep gijveij、 aen dangj gunghcoz bouhmonz caeuq aen dangj cujciz cigsoh lingjdauj haenx;

 ?。?)Doiq gij hong gaepgwnz dangjveij、 gijveij daezok yigen caeuq genyi, mbeguh gamduk.

  Daih 16 diuz Gij gunghcoz bouhmonz dangj raeuz wngdang yiemzgek caephengz gak hangh gamduk cidu, gyagiengz gij hong ndaw gvaengh cizcwz guh ndaw dangj gamduk, gawq gyagiengz baihndaw gamduk bonj bouhmonz bonj danhvei, youh gyagiengz bingzciengz gamduk bonj hidungj.

  Daih 17 diuz Ndaw dangj gamduk bietdingh aeu gyagiengz gamduk boux cujyau fucwz dangj cujciz caeuq boux lingjdauj ganbu aen gang’vih ceiq youqgaenj de, cungdenj gamduk cwngci lizcangz、 gyagiengz dangj raeuz gensez、coengzyiemz ceih dangj, caephengz gij gezyi dangj raeuz, goengdauh cingqbaiq genj vunz yungh vunz, rapdawz cwzyin、 cinghseuq gaghaed, doeksaed eiqsik hingzdai gunghcoz cwzyinci cingzgvang.

  Gaepgwnz dangj cujciz daegbied dwg boux cujyau fucwz de, doiq boux cujyau fucwz gaeplaj dangj cujciz wngdang bingzseiz lai causim di, lai daezsingj di, fatyienh vwndiz gibseiz niujcingq. Boux vunz gapbaenz lingjdauj banhswj de fatyienh banhswj boux cujyau fucwz de miz vwndiz, wngdang gibseiz yiengq de daezok, mwh miz bizyau de ndaej cigsoh bauq naeuz gaepgwnz dangj cujciz rox.

  Dangj cujciz boux cujyau fucwz de goyinz mizgven saehhangh wngdang youq ndaw gvaengh daegdingh ndaw dangj goenghai, cawjdoengh ciepsouh gamduk.

  Daih 18 diuz Dangjveij (dangjcuj) wngdang gyagiengz ngoenznaengz guenjleix gamduk lingjdauj ganbu, sugrox yiengh swhsiengj、 gunghcoz、 cozfungh、 swnghhoz gyoengqde. Boux lingjdauj ganbu dangj raeuz wngdang ciengzseiz mbeguh bihbingz caeuq gag bihbingz, gamj bae nyinhcaen doiqdaih、 haeujlaeg faensik、 cawjdoengh gaijcingq gij loengcawq swhgeij;wngdang gamj bae vixok gij loengcawq doengzdoih, bang gyoengqde gaijndei.

  Daih 19 diuz Liebyawj dwg gij fuengsik youqgaenj ndaw dangj gamduk. Cunghyangh caeuq swngj、 swcigih、 cizyazsi dangjveij youq ndaw gaiq nyaemhgeiz de, cienzmienh liebyawj gij dangj cujciz giz dieg、 aen bouhmonz、 giyez swyez danhvei gyoengqde guenj haenx. Liebyawj gij cingzgvang dangj cujciz caeuq boux lingjdauj ganbu dangj raeuz gingqcungh dangjcangh、 dangj raeuz lingjdauj、 dangj raeuz gensez caeuq doeksaed gij lohsienq fuengcim cwngcwz dangj raeuz, hengzguh gij cwzyin cienzmienh coengzyiemz ceih dangj、 caephengz gijliz dangj raeuz、 doeksaed gij cingsaenz cunghyangh bet hangh gvidingh, dangjfungh lenzcwng gensez caeuq fanj nduknaeuh gunghcoz daiq lienz sienj vunz yungh vunz. Fatyienh vwndiz, cauxbaenz yieplau、 doidoengh gaijgwz、 coicaenh fazcanj, fazveih gij cozyung giemq raeh coengzyiemz ceih dangj.

  Cunghyangh liebyawj gunghcoz lingjdauj siujcuj wngdang gyagiengz dazlingx swngj、 swcigih、 cizyazsi dangjveij, cunghyangh mizgven buveij, cunghyangh guekgya gihgvanh bouhmonz dangjcuj (dangjveij) guh hong liebyawj. Swngj、 swcigih、 cizyazsi dangjveij wngdang doidoengh dangj raeuz doengh aen veijyenzvei ndaw si (di、 couh、 mungz) caeuq ndaw yen (si、 gih、 giz) laebhwnj cidu liebcaz, hawj coengzyiemz ceih dangj iet daengz gihcwngz bae.

  Daih 20 diuz Yiemzgek aen cidu dangj cujciz swnghhoz, wngdang ciengzseiz hai aen hoih minzcuj swnghhoz, bungzdaengz gij vwndiz youqgaenj roxnaeuz nangqdaengz mienh gvangq de wngdang gibseiz ciuhai. Aen hoih minzcuj swnghhoz cungdenj dwg gaijgez gij vwndiz doedyienh de, lingjdauj ganbu wngdang youq gwnz hoih gangj cingcuj、 gangj daeuq gangj laeg gij vwndiz cungqvunz fanjyingj、 hoizfuk liebyawj、 cujciz iekdingh damzvah sij saenq cazcam de, mbeguh bihbingz caeuq gag bihbingz, daezok guhfap cingjgaij, ciepsouh cujciz gamduk. Gaepgwnz dangj cujciz wngdang gyagiengz dazyinx caeuq gamduk aen hoih minzcuj swnghhoz gaeplaj lingjdauj banhswj, daezsang gij caetliengh aen hoih minzcuj swnghhoz.

  Daih 21 diuz Genhciz aen cidu ndaw dangj damzvah, nyinhcaen mbeguh daezsingj damzvah、 gienqnaeuz damzvah. Fatyienh lingjdauj ganbu youq swhsiengj、 cozfungh、 gijliz daengj fuengmienh di vwndiz ngamq didnyez、 ngeng yiengq mbouj ndei ndeu, boux fucwz mizgven dangj cujciz wngdang damzvah daezsingj de, fatyienh gij vwndiz famh gijliz loq mbaeu ne, boux fucwz gaepgwnz dangj cujciz wngdang doiq de gienqnaeuz damzvah, caemhcaiq youz bonjvunz de gangjmingz roxnaeuz guh genjdauj, ginggvaq boux cujyau fucwz aen dangj cujciz de ciemcoh le, bauq hawj gaepgwnz gijveij caeuq cujciz bouhmonz.

  Daih 22 diuz Yiemzgek caephengz aen cidu gaujcaz gaujhaed ganbu, cienzmienh gaujcaz binjdwz、 naengzlig、 guhhong、 niebcik、 cinghseuq daengj biujyienh, gawq yawjnaek cwngciz youh yawjnaek cwngdwz, cungdenj gaujcaz gvancez caephengz dangj cunghyangh caeuq gaepgwnz dangj cujciz gezcwz baijbouh biujyienh yiengh lawz, hengzguh guenj dangj ceih dangj cwzyin ndaej yiengh lawz, youq gwnz yenzcwz vwndiz hungnaek ndwnyouq aen lizcangz lawz, doiqdaih cungqvunz yinzminz ndei mbouj ndei, guh gij yinvu gaenj nanz yiemj naek de cingzgvang yiengh lawz. Ndaw gaujcaz gaujhaed boux cujyau fucwz dangj cujciz wngdang ciuq saed bae bingzgyaq banhswj cwngzyenz. Vahbingz gaujhaed hawj bonjvunz de yawj le cuengq haeuj ganbu dangjanq bae. Doeksaed boux cujyau fucwz dangj cujciz youq genjnyaemh、 gaujcaz、 doekdingh nyaemhyungh ganbu daengj hothoh gij cwzyin de, doiq gij dukcaz mbouj rengz mbouj caenh cwzyin de wngdang yiemzsuk gyaepcaz cwzyin.

  Daih 23 diuz Boux lingjdauj ganbu ndaw dangj wngdang moix bi youq gwnz aen hoih gya’gvangq dangjveij cangzveijvei (roxnaeuz dangjcuj) geqgangj hengzguh cizcwz caeuq cinghseuq cingzgvang, ciepsouh bingzgangj. Geqgangj hengzguh cizcwz caeuq cinghseuq cingzgvang cungdenj dwg gij cingzgvang caephengz cwngci gijliz caeuq cwngci gvigawj、 hengzguh guenj dangj ceih dangj cwzyin、 doicaenh dangjfungh lenzcwng gensez caeuq fanj nduknaeuh gunghcoz daiq lienz caephengz cinghseuq gijliz. Aen baugau geqgangj hengzguh cizcwz caeuq cinghseuq cingzgvang wngdang cuengq haeuj cinghseuq dangjanq bae, caemhcaiq youq ndaw gvaengh daegdingh goenghai.

  Daih 24 diuz Genhciz caeuq laeb caezcienz aen cidu lingjdauj ganbu bauq goyinz mizgven saehhangh, lingjdauj ganbu wngdang ciuq gvidingh ciuqsaed bauq goyinz mizgven saehhangh, gibseiz bauq gij cingzgvang hungnaek goyinz caeuq gyadingz, yawhsien cingjsi bauq naeuz lizhai aen gang’vih roxnaeuz giz dieg de gunghcoz youq haenx daengj. Mizgven bouhmonz wngdang gyagiengz coucaz haedsaed. Doiq boux daegdaengq gyaj bauq muenz bauq goyinz saehhangh hungnaek、 luenh gaij cauhgyaj goyinz dangjanq swhliu de, itlwd yiemzsuk cazcawq.

  Daih 25 diuz Laebhwnj laeb caezcienz aen cidu geiqloeg boux lingjdauj ganbu ndaw dangj capfwngz bae guenj saehhangh hungnaek, fatyienh gij vwndiz leihyungh cizvu bienhleih famh gvidingh capfwngz genj yungh ganbu、 gunghcwngz gensez、 caephengz dawzfap gijliz、 swhfaz hozdung daengj, wngdang gibseiz bauq naeuz gaepgwnz dangj cujciz rox.

  Daih 4 Cieng Gij Gamduk Aen Dangj Gijliz Genjcaz Veijyenzvei

  Daih 26 diuz Dangj raeuz gak gaep gijliz genjcaz veijyenzvei dwg aen gihgvanh cienmonz fucwz ndaw dangj gamduk, hengzguh gij cizcwz gamduk caephengz gijliz cawqfaen cazdawz cwzyin, gyagiengz gamduk genjcaz gij dangj cujciz caeuq boux lingjdauj ganbu ndaw gvaengh de guenj haenx ciuqsouj dangjcangh dangjgveih dangjgij、 gvancez caephengz dangj raeuz lohsienq fuengcim cwngcwz cingzgvang, rapdawz gij gidij yinvu lajneix:

 ?。?)Gyagiengz gamduk doengzgaep dangjveij daegbied dwg cangzveijvei veijyenz、 aen dangj gunghcoz bouhmonz caeuq aen dangj cujciz de cigsoh lingjdauj、 aen dangj lingjdauj ganbu hengzguh cizcwz、 hengzsawj gienzlig cingzgvang;

 ?。?) Doeksaed aen dijci song caengz lingjdauj gij hong gijliz genjcaz, gij hong saemjcaz caephengz gijliz cawqfaen aeu gaepgwnz gijveij lingjdauj guh goek, gij cingzgvang cawqleix rizsienq caeuq saemjcaz caephengz gijliz cawqfaen bauq naeuz doengzgaep dangjveij rox, doengzseiz bauq hawj gaepgwnz gijveij, daezmingz caeuq gaujcaz gak gaep gijveij suhgi、 fusuhgi aeu gaepgwnz gijveij lienzhab cujciz bouhmonz guh goek;

 ?。?)Gyagiengz gaepgwnz gijveij lingjdauj gaeplaj gijveij, gijveij fatyienh boux cujyau lingjdauj ganbu doengzgaep dangjveij miz vwndiz, ndaej cigsoh bauq naeuz gaepgwnz gijveij nyi;gaeplaj gijveij ceiqnoix moix buenq bi bauq naeuz gij hong de hawj gaepgwnz gijveij baez ndeu, moix bi yiengq gaepgwnz gijveij geqgangj hengzguh cizcwz cingzgvang.

  Daih 27 diuz Gijliz genjcaz gihgvanh bietdingh aeu dawz henhoh gij cwngci gijliz caeuq cwngci gvigawj dangj raeuz cuengq youq vih daih’it, genhgez gaijcingq caeuq cazcawq gij hingzveiz mbouj ndei de, lumjbaenz gwnz miz cwngcwz、laj miz banhfap wngqdoiq, miz minghlingh mbouj ciuqhengz、miz gimqlingh lij bae guh, bak van sim doeg、 dangqnaj gingq baihlaeng dingj, giet gyoengq baenz bang、 gap bang giet baiq, loxyaeuh cujciz、 doiqdingj cujciz daengj.

  Daih 28 diuz Aen gigenjcuj gijveij baijcap de doiq aen gihgvanh mbaibaij de fucwz, gyagiengz gamduk lingjdauj banhswj caeuq boux cwngzyenz aen danhvei deng gamduk、 gizyawz lingjdauj ganbu, fatyienh vwndiz wngdang gibseiz bauq naeuz aen gihgvanh mbaibaij de caeuq gij dangj cujciz aen danhvei deng gamduk de rox, nyinhcaen fucwz diucaz cawqceq, doiq gij aeu gyaepdawz cwzyin de daezok genyi.

  Aen gihgvanh mbaibaij de wngdang gyagiengz lingjdauj gij hong aen gigenjcuj baijcap, dinghgeiz iekdingh boux cujyau fucwz aen danhvei dangj cujciz deng gamduk、 boux cujcangj aen gigenjcuj baijcap de damzvah, dukcoi gyoengqde doeksaed aen cwzyin guenj dangj ceih dangj.

  Aen gijgenjcuj baijcap wngdang daiq saedceiq cingzgvang caeuq gidij vwndiz, dinghgeiz veibau gij hong de hawj aen gihgvanh mbaibaij rox, ceiqnoix moix buenq bi lienzhab gij dangj cujciz aen danhvei deng gamduk de ciendaez yenzgiu dangjfungh lenzcwng gensez caeuq fanj nduknaeuh gunghcoz baez ndeu. Doiq gij vwndiz wngdang ndaej fatyienh de cix mbouj fatyienh dwg mbouj caenh cizcwz, fatyienh vwndiz mbouj bauq、 mbouj cawqceq dwg mbouj caenh cizcwz, cungj bietdingh aeu yiemzsuk gyaepdawz cwzyin.

  Daih 29 diuz Nyinhcaen cawqleix saenqfangj gawjbauq, guhndei faenloih cawqceq vwndiz rizsienq, fatyienh caeux di bauq caeux di, gibseiz bauq gij cingzgvang boux lingjdauj ganbu ndawbiengz fanjyingj doedyienh、 cungqvunz bingzgyaq haemq yaez de, doiq gij genjgij saehhangh youqgaenj de wngdang cizdij yenzgiu. Dinghgeiz faensik yenzgiu duenhdingh saenqfangj gawjbauq cingzgvang, doiq gij vwndiz denjhingz、 nangqdaengz mienh gvangq saenqfangj fanjyingj de daezok cungj cawqceq yigen miz cimdoiqsingq haenx, dukcoi giz dieg caeuq bouhmonz saenqfangj gawjbauq haemq cizcungh haenx caz ra faensik yienzaen caemhcaiq nyinhcaen cingjgaij.

  Daih 30 diuz Yiemzgek dawzndei aen gvan genj yungh ganbu “dangjfungh cinghseuq yigen dapfuk”, gyoebhab gij cingzgvang ndaw hong bingzciengz gaemmiz, gyagiengz faensik yenzgiu duenhdingh, ciuq saed bingzgyaq ganbu cinghseuq cingzgvang, fuengzre “miz vwndiz cungj daezswng”、 “miz vwndiz hwnj gang’vih”.

  Daih 31 diuz Ciepdaengz fanjyingj ganbu miz gij vwndiz famh itbuen gijliz, wngdang gibseiz ra bonjvunz de haedsaed, damzvah daezsingj、 sij saenq iekdingh damzvah cazcam, hawj ganbu gangj cingcuj dwg gijmaz vwndiz. Iekdingh boux deng fanjyingj damzvah, ndaej caeuq boux cujyau fucwz aen dangj cujciz ndaw danhvei de itheij damzvah;boux deng fanjyingj doiq gij vwndiz sij saenq cazcam de guh gangjmingz, wngdang youz boux cujyau fucwz aen dangj cujciz ndaw danhvei de ciemcoh le bauq hawj gaepgwnz gijveij. Damzvah geiqloeg caeuq sij saenq dapfuk cazcam wngdang nyinhcaen haedsaed, cunzdangj bwh caz. Mbouj fatyienh vwndiz ne wngdang gangj cingcuj sat saeh, doiq gij mbouj ciuqsaed gangjmingz cingzgvang de yiemzsuk cawqleix.

  Daih 32 diuz Ciuq fapgvi ciuq gijliz bae saemjcaz caephengz gijliz cawqfaen, cungdenj saemjcaz gij lingjdauj ganbu mbouj souliemx mbouj sou fwngz, fanjyingj vwndiz rizsienq cizcungh、 cungqvunz fanjyingj haenq lai, seizneix youq gwnz gang’vih youqgaenj caemhcaiq aiq lij deng daezswng nyaemhyungh de, doengzseiz bwhmiz sam loih cingzgvang de dwg gij ceiq naek ceiq youqgaenj haenx. Saemjcaz caephengz gijliz cawqfaen wngdang caz cingcuj gij saehsaed famh gijliz, hawj boux deng saemjcaz daj hagsib dangjcangh roengzfwngz, daj lijsiengj saenqniemh cunghcij、 dangjsing yenzcwz、 cozfungh gijliz daengj fuengmienh genjcaz faensik swhgeij, saemjleix baugau wngdang saehsaed cingcuj、 dinghsingq dengcinj, fanjyingj gij swhsiengj yinsiz cingzgvang boux deng saemjcaz.

  Daih 33 diuz Doiq boux boihfamh cunghyangh bet hangh gvidingh cingsaenz de、 boux famh gijliz cingzdoh youqgaenj deng laeb’anq saemjcaz haicawz dangjciz de, boux mbouj caenh cizcwz mbouj caenh cwzyin deng gyaepdawz cwzyin de, caeuq gij fungheiq mbouj cingq dem nduknaeuh vwndiz fatseng youq henzndang cungqvunz、 yingjyangj yakrwix haenx, wngdang diemj mingz cwng coh doengbauq bihbingz

  Daih 34 diuz Gyagiengz gamduk gijliz genjcaz gihgvanh. Fatyienh gijliz genjcaz gihgvanh caeuq boux gunghcoz yinzyenz de miz boihfamh gijliz vwndiz ne, bietdingh aeu yiemzsuk cawqleix. Gak gaep gijliz genjcaz gihgvanh bietdingh aeu gyagiengz bonjndang gensez, laeb caezcienz aen gihci baihndaw gaemhanh, gagrox ciepsouh ndaw dangj gamduk、 ndawbiengz gamduk、 cungqvunz gamduk, saedbauj gienzlig deng yiemzgek hanhhaed. 

  Daih 5 Cieng Gij Gamduk Ndaw Dangj Gihcwngz Cujciz Caeuq Dangjyenz

  Daih 35 diuz Aen dangj gihcwngz cujciz wngdang fazveih gij cozyung genqmaenh ak guh, hengzguh gij gamduk cizcwz lajneix:

 ?。?)Yiemzgek gij cujciz swnghhoz ndaw dangj, mbeguh bihbingz caeuq gag bihbingz, gamduk dangjyenz cietsaed hengzguh yivu, baujcang gienzleih dangjyenz mbouj deng ciemqfamh;

 ?。?)Liujgaij dangjyenz、cungqvunz doiq ndaw dangj gunghcoz caeuq boux lingjdauj ganbu ndaw dangj miz maz yigen, baenzlawz bihbingz, dinghgeiz fanjyingj cingzgvang hawj gaepgwnz dangj cujciz, daezok yigen caeuq genyi;

 ?。?)Henhoh caeuq caephengz gijliz dangj raeuz, fatyienh gij vwndiz dangjyenz、ganbu boihfamh gijliz gibseiz gyauyuz roxnaeuz cawqleix, vwndiz youqgaenj ne wngdang bauq naeuz gaepgwnz dangj cujciz rox.

  Daih 36 diuz Dangjyenz wngdang ciuq cungj daidu doiq dangj caeuq yinzminz saehnieb gig fucwz, bae cizgiz hengzsawj dangjyenz gienzleih, hengzsawj gij gamduk yivu lajneix:

 ?。?)Gyagiengz doiq boux lingjdauj ganbu dangj raeuz guh minzcuj gamduk, gibseiz fanjyingj gij yigen caeuq iugouz cungqvunz hawj dangj cujciz;

 ?。?)Youq gwnz hoih aen dangj miz baengzgawq bae bihbingz dangj raeuz aen cujciz lawz caeuq boux dangjyenz lawz, biengjloh caeuq niujcingq gij loengcawq caeuq vwndiz ndaw gunghcoz miz;

 ?。?)Camgya gij hozdung bingzgangj lingjdauj ganbu dangj cujciz mbeguh de, gamj bungq mauzdun vwndiz、 ceijok loengcawq, doiq gij hengzdoengh gangjvah loekloeng de gamj bae baebuek、 gamj bae doucwngh;

 ?。?)Yiengq dangj miz gaengawq bae biengjloh、 genjgij gij saehsaed famh gijliz famhfap dangj raeuz aen cujciz lawz caeuq boux dangjyenz lawz, genhgez fanjdoiq sojmiz baiqbied hozdung caeuq siujcizdonz hozdung, caeuq yienhsiengq nduknaeuh guh genhgez doucwngh.

  Daih 6 Cieng Ndaw Dangj Gamduk Caeuq Baihrog Gamduk Dox Giethab

  Daih 37 diuz Gak gaep dangjveij wnggai haeujcoengh caeuq baujcingq doengzgaep yinzda、 cwngfuj、 genhcaz gihgvanh、 swhfaz gihgvanh daengj doiq guekgya gihgvanh caeuq gunghciz yinzyenz ciuqfap guh gamduk, yinzminz cwnghez ciuq canghcwngz guh minzcuj gamduk, saemjgeiq gihgvanh ciuqfap guh saemjgeiq gamduk. Mizgven guekgya gihgvanh fatyienh boux lingjdauj ganbu dangj raeuz boihfamh dangjgveih dangjgij、 yaek aeu dangj cujciz cawqleix ne, wngdang gibseiz bauq naeuz mizgven dangj cujciz nyi. Saemjgeiq gihgvanh fatyienh gij vwndiz rizsienq boux lingjdauj ganbu dangj raeuz nangqdaengz famh gijliz, wngdang bauq naeuz doengzgaep dangj cujciz nyi, mwh miz bizyau de bauq hawj gaepgwnz dangj cujciz, caemhcaiq ciuq gvidingh dawz vwndiz rizsienq senjsoengq aen gijliz genjcaz gihgvanh doxgven de cawqleix.

  Youq ndaw gijliz saemjcaz fatyienh boux lingjdauj ganbu dangj raeuz famh gijliz youqgaenj nangqdaengz famhfap famhcoih ne, wngdang sien guh’ok gietdingh dangjgij cawqfaen gonq, caiq senjsoengq hingzcwng gihgvanh、 swhfaz gihgvanh cawqleix. Caepfap gihgvanh caeuq swhfaz gihgvanh ciuqfap laeb’anq cazcawq gij anqgienh nangqdaengz lingjdauj ganbu dangj raeuz ne, wngdang doengbauq hawj doengzgaep dangjveij、 gijveij rox;aen dangj cujciz boux ganbu youq de wngdang gaengawq mizgven gvidingh, camhdingz gij dangjyenz gienzleih doxgven de;boux ciuqfap deng gyaepdawz hingzsaeh cwzyin, roxnaeuz yienznaeuz mbouj gapbaenz famhcoih hoeng nangqdaengz famh gijliz de, wngdang senjsoengq gijveij ciuq gijliz cawqleix.

  Daih 38 diuz Cungguek Gungcanjdangj caeuq gak minzcuj dangjbai ciengzgeiz caemhyouq、dox guh gamduk、simsaej doxrox、 caezcaemh yungz nyaenq. Gak gaep dangj cujciz wngdang haeujcoengh minzcuj dangjbai hengzguh gamduk ciznwngz, yawjnaek gij yigen、 bihbingz、 genyi minzcuj dangjbai caeuq boux vunz mizmingz mbouj camgya dangjbai de daezok, laeb caezcienz aen gihci rox cingzgvang、 gaeudoeng、 hoizfuk、 doeksaed daengj.

  Daih 39 diuz Gak gaep dangj cujciz caeuq boux lingjdauj ganbu dangj raeuz wngdang nyinhcaen doiqdaih、gagrox bae ciepsouh ndawbiengz gamduk, leihyungh hulenzvangj gisuz caeuq saenqsik soujduenh, doidoengh dangjvu goenghai、 gya’gvangq miengloh gamduk, hawsim ciepsouh cungqvunz bihbingz. Sinhvwnz meizdij wngdang genhciz dangjsing caeuq yinzminzsing dox doengjit, genhciz aen fuengyiengq dazyinx cingqdeng de, gyagiengz yizlun gamduk, bae faensik denjhingz anqlaeh, fazveih gij cozyung daezsingj de.

  Daih 7 Cieng Cingjgaij Caeuq Baujcang

  Daih 40 diuz Dangj cujciz wnggai ciuq saed geiqloeg、 gyoebcomz guenjleix gij vwndiz caeuq rizsienq ndaw dangj gamduk fatyienh haenx, gibseiz liujgaij haedsaed, guh’ok doxwngq cawqleix;gij mbouj gvihaeuj bonj gaep banhleix de wngdang senjsoengq aen dangj cujciz miz gienzhanh de cawqleix.

  Daih 41 diuz Dangj cujciz doiq gij vwndiz youq ndaw gamduk fatyienh de wngdang guh daengz moix diuz aeu cingjgaij、 moix gienh miz gezgoj. Cingjgaij gezgoj wngdang gibseiz bauq hawj gaepgwnz dangj cujciz, mwh miz bizyau de ndaej doengbauq hawj gaeplaj dangj cujciz caeuq dangjyenz rox, caemhcaiq yiengq ndawbiengz goenghai.

  Doiq gij vwndiz rizsienq famh gijliz gaepgwnz dangj cujciz gyaubanh caeuq liebyawj daengj senjsoengq de, wngdang gibseiz cawqleix, caemhcaiq youq ndaw 3 ndwen hoizfuk banhleix cingzgvang.

  Daih 42 diuz Dangjveij (dangjcuj)、 gijveij (gigenjcuj) wngdang gyagiengz gamduk genjcaz hengzguh ndaw dangj gamduk cwzyin caeuq cingjgaij doeksaed vwndiz cingzgvang, doiq gij mbouj hengzguh roxnaeuz mbouj cingqdeng hengzguh ndaw dangj gamduk cizcwz, daiq lienz gaijloek、 cingjgaij mbouj rengz de, ciuq 《Cungguek Gungcanjdangj Gijliz Cawqfaen Diuzlaeh》、 《Cungguek Gungcanjdangj Gyaepcaz Cwzyin Diuzlaeh》 daengj gvidingh cawqleix.

  Daih 43 diuz Dangj cujciz wngdang baujcang gij gienz rox cingzgvang caeuq gij gienz gamduk dangjyenz, gikcoi caeuq haeujcoengh dangjyenz youq ndaw dangj gamduk fazveih cizgiz cozyung. Dizcang ciem caen coh saed singq fanjyingj gij saehsaed famh gijliz, dangj cujciz wngdang vih boux genjgij gunggau yiemzgek baujmaed, caemhcaiq yungh fuengsik habdangq hoizfuk banhleix cingzgvang hawj de rox. Doiq gij gauxca gazngaih gamduk、 dwkceih boizhaemz boux gamduk de, ciuq gijliz yiemzsuk cawqleix.

  Daih 44 diuz  Dangj cujciz wngdang baujcang gij gienz baijleix、 gienz sinhsu daengj doxgven gienzleih boux deng gamduk. Ginggvaq diucaz, boux deng gamduk mboujmiz gij hingzveiz loengloek ne, wngdang goenghai gangj cingcuj coihcingj mingzdaeuz de. Doiq gij ciq aen mingzdaeuz gamduk guh ujyug、 bangjlaih、 gyahaih bouxwnq de, ciuq gijliz yiemzsuk cawqleix;nangqdaengz famhcoih ne, senjsoengq swhfaz gihgvanh cawqleix. Boux deng gamduk doiq cawqleix gietdingh mboujfug ne, ndaej ciuq dangjcangh gvidingh daezok sinhsu. Mizgven dangj cujciz wngdang nyinhcaen fuklwnh fukcaz, caemhcaiq guh’ok gietlwnh.

  Daih 8 Cieng Gveihcwz Bengxgya

  Daih 45 diuz Cunghyangh Ginhsw Veijyenzvei ndaej gaengawq aen diuzlaeh neix, ceiqdingh aen gvidingh doxgven de.

  Daih 46 diuz Aen diuzlaeh neix youz Cunghyangh Gijliz Genjcaz Veijyenzvei fucwz gejhoiz.

  Daih 47 diuz Aen diuzlaeh neix daj ngoenz fatbouh de hwnj saedhengz.

AEN GANGJMINGZ GVENDAENGZ 《GVENDAENGZHINGZSEIQ MOQ BAIHLAJ NDAW DANGJ CWNGCI SWNGHHOZ MIZGVEN CUNJCWZ》 CAEUQ 《CUNGGUEK GUNGCANJDANGJ NDAW DANGJ GAMDUK
                   DIUZLAEH》


                  Siz Ginbingz

  Cunghyangh Cwngcigiz dak gou, seizneix, gou cimdoiq 《Gvendaengz Hingzseiq Moq Baihlaj Ndaw Dangj Cwngci Swnghhoz Mizgven Cunjcwz》 caeuq 《Cungguek Gungcanjdangj Ndaw Dangj Gamduk Diuzlaeh》 dajgauj mizgven cingzgvang yiengq cienzhoih guh gangjmingz.

  Bineix 2 nyied, Cunghyangh Cwngcigiz gietdingh, dangj raeuz Cibbet Gaiq Roek Cung Cienzhoih ciendaez yenzgiu aen vwndiz cienzmienh coengzyiemz ceih dangj, ceiqdingh doengh aen cunjcwz gvendaengz laj hingzseiq moq ndaw dangj cwngci swnghhoz, coihdingh 《Cungguek Gungcanjdangj Ndaw Dangj Gamduk Diuzlaeh(Sawqhengz)》, laebbaenz aen cuj dajgauj vwnzgen, youz gou dang cujcangj, Liuz Yinzsanh、Vangz Gizsanh dungzci dang fucujcangj, mizgven bouhmonz caeuq deihfueng fucwz dungzci camgya, youz Cunghyangh Cwngcigiz Cangzveijvei lingjdauj bae guh hong dajgauj. 

  It、 Geij Diemj Ngeixnaemj Gvendaengz Sij Vwnzgengauj

  Youq ndaw mbe guh aen ginzcung lohsienq gyauyuz saedguh hozdung caeuq aen “sam yiemz sam saed” ciendaez gyauyuz dangj raeuz, haujlai dungzci genyi giethab hingzseiq moq, ceiqdingh aen vwnzgen gyagiengz caeuq gveihfan ndaw dangj cwngci swnghhoz.

  2014 nienz 1 nyied 12 hauh, gou youq ndaw baecih hawj Liuz Yinzsanh、 Vangz Gizsanh dungzci ceijok:“《Gvendaengz Ndaw Dangj Cwngci Swnghhoz Mizgven Cunjcwz》 1980 nienz ceiqdingh, doiq dangseiz hoizfuk caeuq laeb caezcienz ndaw dangj minzcuj、 henhoh dangj raeuz cizcungh doengjit、 yiemzsuk dangj raeuz gijliz、 coicaenh dangj raeuz doxgiet, youq cwngci、 swhsiengj、 cujciz、 cozfungh fuengmienh saedyienh buedluenh fanjcingq, saedyienh senjnod gij hong cungsim daengx dangj, fazveih le lizsij cozyung youqgaenj. Dangqnaj, 《Cunjcwz》 doiq raeuz yiemzsuk caeuq gveihfan gij cwngci swnghhoz ndaw dangj、 daihlig fazyangz gij cienzdoengj caeuq cozfungh ndei dangj raeuz, vanzlij miz yienhsaed cijdauj eiqngeih youqgaenj.”“30 lai bi daeuj, hingzseiq yinvu caeuq ndaw dangj cingzgvang fatseng le bienqvaq gig daih, aen dangj gensez gaenq cwkrom le daihliengh cwngzgoj moq gingniemh moq, youh bungzdaengz haujlai cingzgvang moq vwndiz moq. Cingj sou ngeixnaemj dwg mbouj dwg youq mwh seizgei habdangq youz cunghyangh doiq laj hingzseiq moq gyagiengz caeuq gveihfan ndaw dangj cwngci swnghhoz guh ok aen gietdingh ndeu, daezok iugouz moq.”

  《Cungguek Gungcanjdangj Ndaw Dangj Gamduk Diuzlaeh(Sawqhengz)》 daj 2003 nienz 12 nyied 31 hauh fatbouh saedhengz doxdaeuj, doiq gyagiengz ndaw dangj gamduk、 henhoh dangj raeuz doxgiet doengjit fazveih le cizgiz cozyung. Doengzseiz, gaenriengz hingzseiq yinvu fazcanj bienqvaq, gij vwndiz diuzlaeh caeuq saedguh moq iugouz moq mbouj dox hab’wngq de yienhloh okdaeuj. Hingzseiq fazcanj aeuyungh raeuz bae coihdingh diuzlaeh, hopheux cwzyin dajveh cidu、 hopheux cidu cauhlaeb dijhi, gyagiengz gaepgwnz dangj cujciz gamduk gaeplaj dangj cujciz caeuq lingjdauj ganbu, guh daengz cwzyin cingcuj、 cawjdaej mingzbeg doekdingh, cidu guenjyungh、 hengzguh mizyauq.

  Duenh seizgan ndeu doxdaeuj, hopheux ceiqdingh cunjcwz、 coihdingh diuzlaeh, mizgven fuengmienh guh le daihliengh hong. 2014 nienz, aen gunghcoz siujcuj youz mizgven fuengmienh dungzci camgya haenx doiq aen vwndiz gyagiengz ndaw dangj cwngci swnghhoz bae guh diucaz yenzgiu, guhbaenz le cwngzgoj cobouh. Gaengawq Cunghyangh Gijveij Haj Baez、 Roek Baez Cienzhoih gij iugouz gvendaengz laeb caezcienz ndaw dangj gamduk cidu, Cunghyangh Gijveij gihgvanh gonqlaeng ciuhai 7 baez hoih ciendaez, yenzgiu gij hong coihdingh aen diuzlaeh ndaw dangj gamduk.

  Doenghgij yenzgiu geizgonq neix guhbaenz le di cwngzgoj youqgaenj ndeu, Cunghyangh Cwngcigiz gyoebhab faensik, gietdingh yungh baez cunghyangh cienzhoih ndeu bae ciendaez yenzgiu aen vwndiz neix. Cujyau ngeixnaemj daengz geij aen fuengmienh lajneix.

  Daih’it, neix dwg laeb caezcienz “seiq aen cienzmienh” canloz baijbouh aeuyungh. Boiqhab habdangq dwk doicaenh “seiq aen cienzmienh” canloz baijbouh, dwg aen fuengcim cwzloz moq ceihleix saeh guek dangj raeuz Cibbet Daih doxdaeuj dangj cunghyangh daj canloz dohsang saedyienh aen muzbyauh buekguh “song aen bak bi”、 saedyienh aen loqsiengj Cungguek--Cunghvaz Minzcuz daih fukhwng, cingjdaej suenqveh ndaw guek rog guek song aen daihbuenz, dawzndei gij fazcanj daegcwng moq guek raeuz cix doekdingh haenx, dwg aen canloz genjdingh laj seizdaih diuzgen moq doicaenh gaijgwz hailangh caeuq sevei cujyi yendaiva gensez、 genhciz caeuq fazcanj yiengh sevei cujyi miz Cungguek daegsaek.

  Geij bi neix daeuj, dangj raeuz Cibbet Gaiq Sam Cung、 Seiq Cung、 Haj Cung Cienzhoih laebdaeb doiq cienzmienh gyalaeg gaijgwz、 cienzmienh ciuqfap ceih guek、cienzmienh hwnqbaenz aen biengz siujgangh guh le ciendaez yenzgiu, baez Roek Cung Cienzhoih neix caiq aeu ceiqdingh coihdingh song aen vwnzgengauj guh cungdenj ciendaez yenzgiu cienzmienh coengzyiemz ceih dangj, “seiq aen cienzmienh” canloz baijbouh couh cungj faenbied doenggvaq baez cunghyangh cienzhoih ndeu guh le yenzgiu caeuq baijbouh. Neix dwg dangj cunghyangh gaengawq “seiq aen cienzmienh” canloz baijbouh doiq cienzhoih lwnhdaez guh aen cingjdaej suenqveh ndeu.

  Daihngeih, neix dwg gyalaeg cienzmienh coengzyiemz ceih dangj aeuyungh. Cienzmienh coengzyiemz ceih dangj dwg aen cawjdaez sienmingz dangj raeuz Cibbet Daih doxdaeuj dangj cunghyangh ca aen dangj gensez. Yaek banhndei gij saehcingz Cungguek, ceiq youqgaenj dwg youq laeng dangj raeuz, ceiq youqgaenj dwg youq laeng dangj aeu guenj dangj、 coengzyiemz ceih dangj. Youq laj lizsij diuzgen moq, raeuz yaek engq ndei bae guh gij doucwngh hungmbwk miz haujlai lizsij daegdiemj moq de、 doicaenh aen saehnieb hungmbwk yiengh sevei cujyi miz Cungguek daegsaek, couh bietdingh aeu roengzrengz engq daih bae doicaenh aen gunghcwngz hungmbwk moq dangj raeuz gensez, giendingh mbouj bienq bae doicaenh cienzmienh coengzyiemz ceih dangj, cietsaed gensez ndei、 guenjleix ndei dangj raeuz, baujmaenh dangj raeuz senhcin caeuq cinghseuq, demgiengz gij rengzdajcauh、 rengzgietcomz、 rengzdwkhoenx dangj raeuz, daezsang gij lingjdauj suijbingz caeuq gaemgienz suijbingz dangj raeuz, saedbauj dangj raeuz itcig cungj baenz aen gyangsim giengiengz lingjdauj gij saehnieb yiengh sevei cujyi miz Cungguek daegsaek.

  Gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk, cungj dwg aen goqdaez gig youqgaenj laj hingzseiq moq gyagiengz aen dangj gensez, hix dwg giz roengzfwngz youqgaenj raeuz doicaenh cienzmienh coengzyiemz ceih dangj. Dangj raeuz ca aen dangj gensez, diuz gingniemh gig youqgaenj ndeu couh dwg aeu mboujduenh cungjgez gij gingniemh lizsij caeuq guhfap baenzgoeng dangj raeuz ciengzgeiz doxdaeuj guhbaenz haenx, caemhcaiq giethab gij hingzseiq yinvu caeuq saedguh iugouz moq caiq bae cauhmoq. Ndigah, aeu doenggvaq Roek Cung Cienzhoih, bae cungjgez gij lijlun caeuq saedguh coengzyiemz ceih dangj gaenh geij bi daeuj daegbied dwg dangj raeuz Cibbet Daih doxdaeuj, yawjyawj gijlawz ginggvaq saedguh gienjniemh dwg ndei, couh bietdingh aeu ciengzgeiz genhciz;gijlawz ndaej caenh’itbouh laeb ndei caemhcaiq swnghwnj baenz cidu gvidingh, couh aeu aen hingzsik fapgvi ndaw dangj dinghmaenh roengzdaeuj;gijlawz aeu giethab cingzgvang moq bae laebdaeb gyalaeg. Sojlaiz, dangj cunghyangh gietdingh doengzseiz ceiqdingh cunjcwz、 coihdingh diuzlaeh, neix dwg ngeixnaemj doicaenh cienzmienh coengzyiemz ceih dangj、 genhciz swhsiengj laeb dangj caeuq cidu ceih dangj dox giethab aen anbaiz youqgaenj ndeu.

  Daihsam, neix dwg gaijgez gij mauzdun caeuq vwndiz doedyienh ndaw dangj miz aeuyungh. Youq ndaw ciengzgeiz saedguh, ndaw dangj cwngci swnghhoz canggvang cungjdaej dwg ndei, hoeng aen seizgeiz ndeu doxdaeuj, hix miz ok le di mauzdun caeuq vwndiz doedyienh ndeu gaenjgip aeu gaijgez, cujyau dwg:Youq ndaw di dangjyenz、 ganbu ndeu baudaengz gauhgiz ganbu, lijsiengj saenqniemh mbouj giendingh、 doiq dangj mbouj cungcig、 gijliz soengrwnh、 duetliz vunzlai、 gag dingh cix hawj ciuq hengz、 loengh haw guh gyaj、 gikgyangq mbouj banhsaeh, gag goq bonjfaenh、 faensanq gag hengz、 siengj guh maz couh guh maz、 byawz hix mbouj daekcoih、 giet gyoengq gap bang、 yienghyiengh vihliux cienzngaenz daengj mbouj doengz cingzdoh mizyouq, gij vwndiz dan yaeknaek hingzsik、 dang guen guh lauxyez、 damdoz youqlag caeuq cungj fungheiq saisaengq baizciengz doedyienh, gij yienhsiengq yawj caen yungh vunz、 buet guen heuh aeu guen、 gai guen cawx guen、 rag biuq oet sienj gimq cungj mbouj raeg, gij yienhsiengq luenh yungh gienzlig、 dam’aeu gwn’oet、 nduknaeuh bienq vaih、 famhfap famh gijliz daengj didmaj banhraih. Daegbied dwg gauhgiz ganbu ndawde gig siujsoq vunz cwngci simgoeg bongqgawh、 sim maez gienzlig, gauj cwngci yaemmaeuz hozdung, lumjbaenz dangqnaj gingq baihlaeng dingj、 gap bang maeuz seileih、 comz bang giet baiq、 maeuzaeu gienzvih daengj. Doenghgij vwndiz neix, cimqmyaex dangj raeuz swhsiengj daudwz giekdaej cingzdoh youqgaenj, buqvaih dangj raeuz doxgiet caeuq cizcungh doengjit cingzdoh youqgaenj, sonjhaih ndaw dangj cwngci swnghdai caeuq dangj raeuz hingzsiengq cingzdoh youqgaenj, yingjyangj dangj caeuq yinzminz saehnieb fazcanj youqgaenj. Doengh aen anqgienh famh gijliz famh fap youqgaenj lumjbaenz Couh Yungjgangh、 Boz Hihlaiz、 Goz Bwzyungz、 Ciz Caizhou、 Ling Giva daengj, mboujdan laeuh ok gyoengqde youq ginghci fuengmienh miz vwndiz youqgaenj, caemhcaiq laeuh ok gyoengqde youq cwngci fuengmienh hix miz vwndiz youqgaenj, miz hit lailai. Neix couh sawj raeuz nyinhrox daengz, yaek gaijgez di mauzdun caeuq vwndiz doedyienh ndaw dangj miz ndeu, bietdingh aeu dawz gij swhsiengj cwngci gensez aen dangj baij youq vih daih’it, cauh ok aen cwngci swnghdai rumz seuq heiq cingq daeuj. Gou gangj gvaq:“Yaek guh ndei gak fuengmienh hong, bietdingh aeu miz aen cwngci swnghdai ndei ndeu. Cwngci swnghdai uekcuek, aen vanzging guh hongsaeh cwngfuj couh yakrwix;cwngci swnghdai cingmingz, aen vanzging guh hongsaeh cwngfuj couh ndei. Cwngci swnghdai caeuq swyenz swnghdai ityiengh, loq mbouj louzsim, couh gig yungzheih deng uqlah, saeklaeuq okyienh vwndiz, caiq siengj hoizfuk couh yaek yungh bae goengrengz gig daih.”

  Ndaw dangj gamduk dwg gij neiyungz youqgaenj aen dangj gensez, hix dwg gij baujcang youqgaenj cienzmienh coengzyiemz ceih dangj. Ciengzgeiz doxdaeuj, dangj cunghyangh gig yawjnaek ndaw dangj gamduk, yungh le guhfap miz rengz, aeundaej le cingzcik yienhda. Doengzseiz, hix miz ok di mauzdun caeuq vwndiz doedyienh ndeu, cujyau dwg di deihfueng caeuq bouhmonz ndeu dangj raeuz lingjdauj bienqnyieg、 aen dangj gensez guh mbouj dohdaengz、 cienzmienh coengzyiemz ceih dangj mbouj gaeuq rengz, di dangjyenz、 ganbu ndeu aen dangj gvanhnen damhbueg、 cujciz lanxsanj、 gijliz soengrwnh, di dangj cujciz caeuq dangjyenz、 ganbu ndeu mbouj yiemzgek caephengz dangjcangh, mbouj dawz cwngci gijliz haeuj rwz、 mbouj dawz cujciz yenzcwz haeuj da. Aen seizgeiz ndeu doxdaeuj ndaw dangj fatseng gak cungj gak yiengh vwndiz, caeuq guenj dangj ceih dangj soengrwnh miz gvanhaeh maedcaed. Yaek cienzmienh coengzyiemz ceih dangj, bietdingh aeu daj goekgaen bae gaijgez doenghgij vwndiz cawjdaej cwzyin noixned、 gamduk cwzyin mbouj daengz vih、 guenj dangj ceih dangj soengrwnh, dawz gyagiengz ndaw dangj gamduk dangguh aen giekdaej gunghcwngz youqgaenj aen dangj gensez, hawj gij cidu youhsi gamduk cungfaen cuengq okdaeuj.

  Dangj raeuz Cibbet Daih doxdaeuj, raeuz gaemndaet cienzmienh coengzyiemz ceih dangj mbouj cuengq, yungh baenzloix guhfap moq bae gyarengz guenj dangj ceih dangj, genhciz niujcingq fungheiq dawzyiemz gijliz、 ndaw rog giem ceih, yiemzmingz cwngci gijliz caeuq cwngci gvigawj, genhgez naenxhaed aen seiqdaeuz nduknaeuh banhraih, roengzrengz cauhlaeb aen dijci gihci mbouj gamj bienq vaih、 mbouj ndaej bienq vaih、 mbouj siengj bienq vaih haenx, cug caengz doeksaed gij cawjdaej cwzyin caeuq gamduk cwzyin cienzmienh coengzyiemz ceih dangj, roengzrengz gaijgez gij vwndiz doedyienh ndaw dangj miz haenx, ndaw dangj cwngci swnghhoz miz ok haujlai heiqsiengq moq, ndaw dangj cwngci swnghdai cienj ndei yienhda, daengx dangj daengx biengz nyinhdoengz gig sang.

  Doengzseiz, raeuz hix cingsingj dwk yawj daengz, yienznaeuz gij mauzdun caeuq vwndiz doedyienh ndaw dangj miz de haujlai ndaej daengz le mizyauq gaijgez, hoeng ciuqgaeuq lij miz saek di vwndiz, di vwndiz ndeu lij caengz ndaej gaijgez daengz daej, saek di vwndiz lij aiq caiq conh okdaeuj, bietdingh aeu laebdaeb roengzrengz, mboujduenh daj swhsiengj fuengmienh、 cwngci fuengmienh、 cujciz fuengmienh、 cozfungh fuengmienh、 cidu fuengmienh bae fuengzre caeuq gaijgez gij mauzdun nem vwndiz doedyienh ndaw dangj miz haenx. Daegbied dwg aeu yawj daengz, laj lizsij diuzgen moq, gij hingzseiq ndaw guek rog guek fatseng le bienqvaq gig daih, gij gaemgienz vanzging caeuq gaemgienz diuzgen dangj raeuz bungzdaengz fatseng le bienqvaq gig daih, doenghgij “seiq daih gaujniemh”、 “seiq cungj yungyiemj” dangj raeuz bungzdaengz de dwg ciengzgeiz、 fukcab、 yiemzhaenq. Yaek gaijgez ndei gij mauzdun caeuq vwndiz doedyienh ndaw dangj miz de, yaek mizyauq vaqgej gij nanzdaez caeuq yungyiemj hungnaek dangj raeuz bungzdaengz, diuz gig youqgaenj ndeu couh dwg aeu laeb ndei biucinj、 laeb ndei cidu, cugndaet aen loengz cidu, gawq sawj gij mauzdun caeuq vwndiz doedyienh gaenq fatseng de ndaej daengz engqgya haeujlaeg mizyauq gaijgez, youh mizyauq fuengzre gij mauzdun caeuq vwndiz moq didmaj banhraih、 mizyauq fuengzre gij mauzdun caeuq vwndiz gaenq gaijgez de fanjdanz caiq did.

  Gyonj daeuj gangj, najdoiq gij hingzseiq caeuq yinvu moq, ceiqdingh aen cunjcwz gvendaengz laj hingzseiq moq ndaw dangj cwngci swnghhoz, coihdingh aen diuzlaeh ndaw dangj gamduk, seizgei gaenq cingzsug、 diuzgen gaenq bwhmiz, iugouz gaenjbik, eiqngeih hungnaek. 

  Ngeih、 Gvendaengz Vwnzgengauj Sijgauj Gocwngz

  Bineix 3 nyied 1 hauh, dangj cunghyangh fat ok 《Cunghgung Cunghyangh Aen Dunghcih Gvendaengz Doiq Dangj Raeuz Cibbet Gaiq Roek Cung Cienzhoih Yenzgiu Aen Vwndiz Gyagiengz Caeuq Gveihfan Ndaw Dangj Cwngci Swnghhoz、 Coihdingh Cam’aeu Yigen》. Aen cuj dajgauj vwnzgen ciuhai daih’it baez hoih daengxcungq, cingqsik haiguh gij hong dajgauj vwnzgen.

  Baez cam’aeu yigen neix, daj gij cingzgvang hoizfuk de daeuj yawj, gak digih gak bouhmonz gak fuengmienh nyinhnaeuz, dangj cunghyangh gietdingh dangj raeuz Cibbet Gaiq Roek Cung Cienzhoih ciendaez yenzgiu aen vwndiz cienzmienh coengzyiemz ceih dangj caemhcaiq ceiqdingh coihdingh doxgven vwnzgen, cungfaen daejyienh le dangj cunghyangh gij gietsim giengiengz caeuq lizsij dangrap giendingh mbouj bienq doicaenh cienzmienh coengzyiemz ceih dangj, daejyienh le gij singsim caezcaemh daengx dangj, doiq gaijgez gij mauzdun caeuq vwndiz doedyienh ndaw dangj miz、 saedbauj dangj raeuz itcig cungj baenz aen gyangsim giengiengz lingjdauj gij saehnieb yiengh sevei cujyi miz Cungguek daegsaek miz eiqngeih gig youqgaenj.

  Caezgya nyinhnaeuz, youq laj hingzseiq moq yaek mbeguh yiemzsuk nyinhcaen ndaw dangj cwngci swnghhoz, gyagiengz ndaw dangj gamduk, gawq aeu ciepswnj caeuq fazyangz gij cienzdoengj ndei nem gihbwnj biucinj dangj raeuz youq ndaw ciengzgeiz saedguh cauxbaenz haenx, youh aeu giethab gij hingzseiq caeuq yinvu moq, youq ndaw dangj cwngci swnghhoz、 ndaw dangj gamduk lumjbaenz neiyungz fancouz、 fuengyiengq muzbyauh、 yenzcwz iugouz、 fuengfap roenloh daengj fuengmienh gaen hwnj seizdaih, doicaenh ndaw dangj cwngci swnghhoz caeuq ndaw dangj gamduk ciduva、 gveihfanva、 cwngzsiva bae.

  Caezgya doiq laj hingzseiq moq gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk daezok le haujlai yigen caeuq genyi gig ndei. Aen cuj dajgauj vwnzgen youq ndaw dajgauj vwnzgen, cungfaen ngeixnaemj、 nyinhcaen supsou le gij yigen caeuq genyi caezgya.

  Youq ndaw 8 ndwen seizgan, aen cuj dajgauj vwnzgen guh ciendaez diuyenz, gvangqlangh cam’aeu yigen caeuq genyi, fanfuk yaenglwnh coihgaij. Ndaw mboengq seizgan neix, Cunghyangh Cwngcigiz Cangzveijvei ciuhai 3 baez hoih、 Cunghyangh Cwngcigiz ciuhai 2 baez hoih faenbied saemjlwnh vwnzgengauj. 8 nyied co, aen vwnzgengauj cam’aeu yigen neix fatroengz aen gvaengh daegdingh ndaw dangj bae cam’aeu yigen, baudaengz cam’aeu gij yigen ndaw dangj bouhfaenh dungzci geq, lij cienmonz dingqaeu le gij yigen bouxfucwz gak aen minzcuj dangjbai cunghyangh、 Daengx Guek Gunghsanghlenz caeuq gij vunz mizmingz mbouj camgya dangjbai de.

  Daj gij cingzgvang hoizfuk de daeuj yawj, gak digih gak bouhmonz gak fuengmienh cungfaen haengjdingh aen gauj cunjcwz caeuq aen gauj diuzlaeh, nyinhnaeuz song aen vwnzgengauj neix cienzmienh gvancez gij cingsaenz dangj raeuz Cibbet Daih caeuq Cibbet Gaiq Sam Cung、 Seiq Cung、 Haj Cung Cienzhoih, aeu ciuqei dangjcangh guh gaenbonj, haeujlaeg cungjgez gij lizsij gingniemh aen dangj gensez, cigsoh mienhdoiq gij mauzdun caeuq vwndiz doedyienh ndaw dangj cwngci swnghhoz miz haenx, hopheux yiemzsuk ndaw dangj cwngci swnghhoz daezok gij iugouz mingzbeg doekdingh de, hopheux gyagiengz ndaw dangj gamduk guh ok gvidingh ciengzsaeq, vih laj hingzseiq moq gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk daezhawj le gij ciuqei gaenbonj de.

  Caezgya nyinhnaeuz, gij daegdiemj ceiq sienmingz song aen vwnzgengauj couh dwg ciepswnj caeuq cauhmoq ndaej doengjit ndei, gawq haeujlaeg cungjgez le gij gingniemh caeuq roxhit dangj raeuz youq gyagiengz bonjfaenh gensez fuengmienh miz haenx, ciepswnj caeuq fazyangz le gij cidu gvidingh caeuq cienzdoengj ndei dangj raeuz youq ndaw ciengzgeiz saedguh cauxbaenz de, youh cienzmienh cungjgez le gij saedguh sengdoengh dangj raeuz Cibbet Daih doxdaeuj dangj cunghyangh doicaenh cienzmienh coengzyiemz ceih dangj, gyonjcomz caeuq gvinab le gij lijlun caeuq saedguh cauhmoq cwngzgoj cienzmienh coengzyiemz ceih dangj, caemhcaiq haeujlaeg faensik gij cingzgvang moq vwndiz moq laj hingzseiq moq dangj raeuz gensez bungzdaengz, cimdoiq hothoh mbangnyieg dangqnaj ndaw dangj cwngci swnghhoz caeuq ndaw dangj gamduk miz haenx, daezok le gij guhfap mingzbeg doekdingh de, guhbaenz le cidu anbaiz moq, swnh’wngq le hingzseiq moq yinvu moq iugouz yiemzsuk ndaw dangj cwngci swnghhoz、 gyagiengz ndaw dangj gamduk.

  Caezgya doengzcaez nyinhnaeuz, genhciz dangj cunghyangh cizcungh doengjit lingjdauj, doekdingh caeuq henhoh aen lingjdauj cungsim dangj raeuz, dwg aen maqmuengh caezcaemh daengx dangj daengx guek gak cuz yinzminz, dwg aen iugouz gaenjbik doicaenh cienzmienh coengzyiemz ceih dangj、 daezsang gij rengzdajcauh、 rengzgietcomz、 rengzdwkhoenx dangj raeuz, dwg aen gaenbonj baujcingq baujciz gij saehnieb dangj caeuq guekgya fazcanj fuengyiengq cingqdeng.

  Caezgya lij nyinhnaeuz, dangj cunghyangh doiq song aen vwnzgen youq aen gvaengh daegdingh ndaw dangj cam’aeu yigen, daejyienh le cungfaen fazyangz ndaw dangj minzcuj、 gyonjcomz daengx dangj dungxcaiz, daejyienh le dangj raeuz gij cozfungh ndei gaijfang swhsiengj、 gangjgouz saedsaeh. Vwnzgengauj cawjdaez sienmingz、 roennaemj cingcuj, neiyungz lai raeuh、 cungdenj doedyienh, guhfap miz rengz、 guhsaed guenjyungh, swhsiengjsing、 cijdaujsing、 cauhcozsing cungj gig giengz. Vwnzgengauj ginggvaq cienzhoih saemjlwnh doenggvaq le, doiq gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk、 cienzmienh daezsang dangj raeuz gensez gohyozva suijbingz, doiq engq ndei bae guh aen doucwngh hungmbwk miz haujlai lizsij daegdiemj moq haenx, saedyienh aen muzbyauh buekguh “song aen bak bi”、 saedyienh aen loqsiengj Cungguek--Cunghvaz Minzcuz daih fukhwng, miz yienhsaed eiqngeih hungnaek caeuq lizsij eiqngeih gyaelaeg.

  Youq ndaw baez cam’aeu yigen neix, gak digih gak bouhmonz gak fuengmienh doiq song aen vwnzgen neix daezok le haujlai yigen caeuq genyi ndei, gaengawq gyoebsuenq, itgungh daezok 1955 diuz coihgaij yigen, gaeucawz gij yigen cungzfuk de bae le dwg 1582 diuz, ndawde yenzcwzsing yigen 354 diuz、 gidij yigen 1228 diuz. Dangj cunghyangh iugouz aen cuj dajgauj vwnzgen nyinhcaen bae cingjleix caeuq yenzgiu doenghgij yigen nem genyi neix. Aen cuj dajgauj vwnzgen doiq song aen vwnzgen neix guh le coihgaij youqgaenj. 

  Sam、 Gvendaengz Gij Yenzcwz Caeuq Gihbwnj Gvaenghgyaq Vwnzgengauj

  Youq ndaw sij vwnzgengauj, aen cuj dajgauj vwnzgen yunghrengz dawzndei doenghgij yenzcwz lajneix.

  It dwg ciepswnj caeuq fazyangz gij cienzdoengj ndei caeuq gingniemh dijbauj dangj raeuz, yunghrengz gvancez gij leixniemh moq、 swhsiengj moq、 canloz moq dangj raeuz Cibbet Daih doxdaeuj dangj cunghyangh daezok haenx, fanjyingj gij gingniemh moq、 guhfap moq dangj cunghyangh doicaenh cienzmienh coengzyiemz ceih dangj, caemhcaiq giethab saedguh moq daezok gvanhdenj moq、 guhfap moq, daejyienh seizdaih caeuq cauhmoq. Doedyienh cienzmienh coengzyiemz ceih dangj aen cawjdaez neix, demgiengz dangj raeuz gij naengzlig gag bienqseuq、 gag laebndei、 gag gaijmoq、 gag daezsang, mingzbeg doekdingh gij fuengyiengq、 muzbyauh、 yenzcwz、 yinvu、 guhfap laj hingzseiq moq gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk, aeu gij iugouz yiemz、 biucinj yiemz、 guhfap yiemz de bae doidoengh daengx dangj demgiengz cungj eiqsik coengzyiemz ceih dangj、 doeksaed aen cwzyin guenj dangj ceih dangj.

  Ngeih dwg genhciz aeu dangjcangh guh gaenbonj baengzgawq, doedyienh gingqcungh caeuq yawjnaek dangjcangh、 gvancez dangjcangh、 henhoh dangjcangh, yunghrengz dawz dangjcangh gij iugouz gvendaengz ndaw dangj cwngci swnghhoz caeuq ndaw dangj gamduk de bienqbaenz hengz ndaej bae, dawz doenghgij vwnzgen caeuq ndaw dangj fapgvi youqgaenj gaijgwz hailangh doxdaeuj daegbied dwg gaenh geij bi daeuj dangj cunghyangh fatbouh mizgven gvidingh caeuq iugouz gvendaengz ndaw dangj cwngci swnghhoz、 ndaw dangj gamduk de gviloih cingjleix ndei, doidoengh ndaw dangj cwngci swnghhoz caeuq ndaw dangj gamduk bienqbaenz cidu、 bienqbaenz biucinj、 bienqbaenz cwngzsi bae.

  Sam dwg genhciz vwndiz dazyinx, cimdoiq gij hothoh mbangnyieg ndaw dangj cwngci swnghhoz caeuq ndaw dangj gamduk miz haenx, yunghrengz hopheux lijlun、 swhsiengj、 cidu bae cauhlaeb dijhi, hopheux gienzlig、 cwzyin、 dangrap bae dajveh cidu, doidoengh gaijgez doenghgij vwndiz ndaw dangj cwngci swnghhoz bienq yungzsug、 bienq seizbienh、 bienq bingzdamh caeuq ndaw dangj gamduk cidu mbouj caezcienz、 cwgoemq mbouj daengz vih、 cwzyin mbouj cingcuj、 caephengz mbouj rengz daengj.

  Seiq dwg genhciz cingjdaej suenqveh boiqhab habdangq, gyagiengz caengzdingj suenqveh caeuq hidungj maeuzveh, yunghrengz cawqleix ndei gij gvanhaeh cunjcwz moq、 diuzlaeh moq caeuq cunjcwz gaeuq、 diuzlaeh gaeuq nem gizyawz ndaw dangj fapgvi, guh daengz gawq caemh meg cienz roengzdaeuj youh gaen hwnj seizdaih. Genhciz noix mbouj ndaej caeuq hengzndaej dox doengjit, gawq daj cwngci fuengmienh daezok yenzcwzsing iugouz bae gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk, youh cimdoiq vwndiz daezok gij guhfap caeuq banhfap cietsaed hengz ndaej, mbouj gauj yienghyiengh goqdaengz.

  Aen gauj cunjcwz faen sam bouhfaenh、 12 aen fuengmienh:Daih’it bouhfaenh dwg vahnduj, gvihaeuj gyoeblwnh, lwnhgangj gij cozyung hungnaek caeuq lizsij gingniemh ndaw dangj cwngci swnghhoz、 gij vwndiz doedyienh ndaw dangj cwngci swnghhoz miz、 gij hingzseiq yinvu ndaw dangj cwngci swnghhoz bungzdaengz, daiq lienz gij youqgaenj youh gaenjbik laj hingzseiq moq gyagiengz caeuq gveihfan ndaw dangj cwngci swnghhoz, daezok gij muzbyauh iugouz gyagiengz caeuq gveihfan ndaw dangj cwngci swnghhoz.

  Daihngeih bouhfaenh dwg faenlwnh, dwg aen bouhfaenh cawjdaej de, hopheux giendingh lijsiengj saenqniemh、 genhciz diuz lohsienq gaenbonj dangj raeuz、 genhgez henhoh gij gienzvi dangj cunghyangh、 yiemzmingz gij cwngci gijliz dangj raeuz、 baujciz dangj caeuq cungqvunz yinzminz lwed nem noh gvanhaeh、 genhciz aen yenzcwz minzcuj cizcunghci、 fazyangz ndaw dangj minzcuj caeuq baujcang gienzleih dangjyenz、 genhciz aen fuengyiengq dazyinx sienj vunz yungh vunz、 yiemzgek gij cujciz swnghhoz cidu dangj raeuz、 mbeguh baebingz caeuq gag baebingz、 gyagiengz hanhhaed caeuq gamduk gienzlig yinhhengz、 baujciz gij cwngci bonjsaek ndang cingq fwngz seuq 12 aen fuengmienh faenbied daezok gij iugouz mingzbeg doekdingh de、 guh ok gvidingh ciengzsaeq.

  Daihsam bouhfaenh dwg vahsat, cujyau gangj gyagiengz cujciz lingjdauj caeuq gamduk genjcaz、 gauhgiz ganbu daiqdaeuz guh yiengh ndei, saedbauj gak hangh yinvu doek daengz gizsaed.

  Aen gauj diuzlaeh itgungh 8 cieng、 47 diuz, hix faen sam bouhfaenh:Daih 1 cieng dwg cungjcwz, gapbaenz daih’it bouhfaenh, baij ok le 9 diuz, cujyau dwg mingzbeg doekdingh gij muzdiz caeuq baengzgawq dinghlaeb gvidingh, lwnhgangj doenghgij vwndiz youqgaenj ndaw dangj gamduk, lumjbaenz cijdauj swhsiengj、 gihbwnj yenzcwz、 gamduk neiyungz、 gamduk doiqsiengq、 gamduk fuengsik caeuq gyagiengz gag gamduk、 cauhlaeb ndaw dangj gamduk dijhi daengj.

  Daih 2 cieng daengz daih 5 cieng gapbaenz daihngeih bouhfaenh, dwg aen cawjdaej bouhfaenh diuzlaeh, baij ok le 27 diuz, faenbied doiq gij gamduk cizcwz aen dangj cunghyangh cujciz、 dangjveij (dangjcuj)、 aen dangj gijliz genjcaz veijyenzvei、 gihcwngz dangj cujciz caeuq dangjyenz seiq loih gamduk cawjdaej neix daiq lienz doxwngq gamduk cidu guh ok gvidingh. Ndawde, dawz gij gamduk aen dangj cunghyangh cujciz dan laeb baenz cieng ndeu, dwg cungbyoengq aen diuzlaeh seizneix, daejyienh dangj cunghyangh daiqdaeuz guh yiengh ndei、 aeu baihgwnz daiqdoengh baihlaj.

  Daih 6 cieng daengz daih 8 cieng gapbaenz daihsam bouhfaenh, baij ok le 11 diuz, faenbied doiq ndaw dangj gamduk caeuq baihrog gamduk dox giethab、 cingjgaij caeuq baujcang、 gij gveihcwz bengxgya de daengj guh ok gvidingh. Diuzlaeh mbouj guh ok gij gvidingh hawjgienz cunghyangh buveij caeuq deihfueng dangjveij ceiqdingh gij gveihcwz ciengzsaeq hengzguh de, daejyienh daengx dangj bietdingh aeu itheij caephengz, fuengzre gauj bienqdoeng、 miz gaeugemj. 

  Seiq、 Song Aen Vwndiz Aeu Cungdenj Gangjmingz De

  Daih’it, gij gvanhaeh gvendaengz aen gauj cunjcwz moq caeuq aen cunjcwz 1980 nienz. Dangj raeuz Cib’it Gaiq Sam Cung Cienzhoih gvaqlaeng, dangj raeuz cungjgez gij gingniemh cingqfanj song fuengmienh ndaw dangj cwngci swnghhoz daegbied dwg gij hit get “Vwnzva Daih Gwzming”, youq 1980 nienz ceiqdingh le 《Gvendaengz Ndaw Dangj Cwngci Swnghhoz Mizgven Cunjcwz》. Doengh aen cunjcwz neix, youq aen seizgeiz daegbied gietsat “Vwnzva Daih Gwzming”le, doiq saedyienh cwngci、 swhsiengj、 cujciz、 cozfungh fuengmienh buedluenh fanjcingq caeuq senjnod gij hong cungsim daengx dangj, coicaenh ndaw dangj doxgiet doengjit、 baujcingq gaijgwz hailangh caeuq sevei cujyi yendaiva gensez swnhleih bae guh, fazveih le cozyung gig youqgaenj.

  Aen cunjcwz 1980 nienz, gawq daezok le banhfap bae gaijgez gij mauzdun caeuq vwndiz doedyienh dangseiz ndaw dangj miz haenx, youh gvinab le gij gingniemh dijbauj dangj raeuz youq ndaw ciengzgeiz saedguh aeundaej haenx, dwg gya lai caeuq fazcanj le gij lijlun laeb dangj Majgwzswh cujyi, miz eiqngeih haicauh, gij cujyau yenzcwz caeuq gvidingh de ngoenzneix ciuqgaeuq habyungh. Lumjbaenz, gij muzbyauh caeuq gihbwnj cunjcwz ndaw dangj cwngci swnghhoz, gvendaengz genhciz gij cwngci lohsienq caeuq swhsiengj lohsienq dangj raeuz, gvendaengz genhciz cizdij lingjdauj、 fanjdoiq goyinz gag gangj gag dingh, gvendaengz henhoh gij cizcungh doengjit dangj raeuz、 yiemzgek ciuqsouj gij gijliz dangj raeuz, gvendaengz genhciz dangjsing, gvendaengz aeu gangj vahcaen、 gangj guh doxdoengz, gvendaengz fazyangz ndaw dangj minzcuj、 cingqdeng doiqdaih gij yigen mbouj doengz de, gvendaengz baujcang gij gienzleih dangjyenz mbouj deng ciemqfamh, gvendaengz ciepsouh dangj caeuq cungqvunz gamduk、 mbouj cinj gauj daeggienz, daengjdaengj. Doenghgij neix cungj aeu laebdaeb genhciz.

  Vihmaz lij aeu ceiqdingh aen cunjcwz moq ndeu ne?Gij ngeixnaemj dangj cunghyangh dwg, aen cunjcwz 1980 nienz yienznaeuz daengz ngoenzneix vanzlij miz cijdauj eiqngeih youqgaenj, hoeng aenvih aen cunjcwz neix dwg cimdoiq gij lizsij diuzgen caeuq cujyau mauzdun dangseiz, seizneix ndaw dangj okyienh di mauzdun caeuq vwndiz doedyienh ndeu dangseiz lij caengz bungzdaengz, hoeng di mauzdun caeuq vwndiz dangseiz haemq doedyienh ndeu seizneix gaenq mbouj doedyienh lo. Dangj raeuz Cibbet Daih caeuq aen dangjcangh coihdingh doenggvaq haenx, daiq lienz dangj raeuz Cibbet Gaiq Sam Cung、 Seiq Cung、 Haj Cung Cienzhoih doiq mizgven vwndiz laj hingzseiq moq dawzyiemz ndaw dangj cwngci swnghhoz guh ok le gij gvidingh mingzbeg doekdingh, hoeng dwg daihdaej gvidingh, aeu bienqbaenz ciengzsaeq bae. Baenzroix fapgvi caeuq gveihfansing vwnzgen ndaw dangj gaijgwz hailangh doxdaeuj daegbied dwg gaenh geij bi daeuj ceiqdingh haenx, haujlai nangqdaengz aen vwndiz gveihfan ndaw dangj cwngci swnghhoz, hoeng haemq faensanq, aeu gviloih cingjleix ndei bae.

  “Faplwd cidu swnh’wngq seizdaih bienqvaq cij ndaej guenj ndei guekgya, ceihleix fuengsik habngamj sevei cingzgvang cij aeundaej cingzyauq.”

  Laj hingzseiq moq gyagiengz caeuq gveihfan ndaw dangj cwngci swnghhoz, gawq aeu genhciz gij cidu caeuq gvidingh doenghbaez hengz ndaej mizyauq de, hix aeu giethab gij seizdaih daegdiemj moq bae swnh’wngq seizdaih, daez ok gij banhfap caeuq gvidingh moq de. Raeuz ceiqdingh caeuq fatbouh aen cunjcwz moq, mbouj dwg aeu dingjlawh aen cunjcwz 1980 nienz, cix dwg aeu youq gwnz giekdaej genhciz gij cujyau yenzcwz caeuq gvidingh de, cimdoiq cingzgvang moq vwndiz moq bae guh ok gvidingh moq. Ciuq aen cingsaenz neix, youq mwh sij vwnzgengauj, dou caiqgangj le gij cujyau yenzcwz caeuq gvidingh aen cunjcwz 1980 nienz. Aen cunjcwz moq caeuq aen cunjcwz gaeuq dox lienzhaeh、 caemh meg cienz roengzdaeuj, cungj dwg dangqnaj caeuq ngoenzlaeng aen seizgeiz ndeu ndaw dangj cwngci swnghhoz bietdingh aeu ciuqei.

  Daihngeih, gvendaengz aeu gauhgiz ganbu guh cungdenj. Gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk, dwg doiq daengx dangj daezok iugouz, hix dwg aen yinvu caezcaemh daengx dangj. Doengzseiz, aen gauj cunjcwz、 aen gauj diuzlaeh cungj giengzdiuh aeu gauhgiz ganbu guh cungdenj, cujyau ngeixnaemj dwg yaek gyagiengz aen dangj gensez bietdingh aeu ca ndei lingjdauj ganbu daegbied dwg gauhgiz ganbu, hoeng ceiq youqgaenj dwg ca ndei doenghgij vunz gapbaenz Cunghyangh Veijyenzvei、 Cunghyangh Cwngcigiz、 Cunghyangh Cwngcigiz Cangzveijvei. Ca ndei bouhfaenh vunz neix le, ndaej youq daengx dangj guh ok yiengh ndei, haujlai saehcingz couh ndei banh lo. Ndigah, gyagiengz caeuq gveihfan ndaw dangj cwngci swnghhoz、 gyagiengz ndaw dangj gamduk, bietdingh aeu sien daj bouhfaenh vunz neix ca hwnj gonq.

  Gaengawq gij ngeixnaemj yienghneix, dou youq ndaw dajgauj song aen vwnzgengauj, cungdenj doedyienh gauhgiz ganbu. Lumjbaenz, aen gauj cunjcwz daih’it bouhfaenh couh giengzdiuh, laj hingzseiq moq gyagiengz caeuq gveihfan ndaw dangj cwngci swnghhoz, cungdenj dwg gak gaep lingjdauj gihgvanh caeuq lingjdauj ganbu, ceiq youqgaenj dwg gauhgiz ganbu daegbied dwg gij vunz gapbaenz Cunghyangh Veijyenzvei、 Cunghyangh Cwngcigiz、 Cunghyangh Cwngcigiz Cangzvu Veijyenzvei, gauhgiz ganbu daegbied dwg gij vunz gapbaenz caengz lingjdauj cunghyangh de bietdingh aeu daiqdaeuz guh yiengh ndei, guh yiengh ndei ciuqsouj dangjcangh dangjgveih, yiemzsouj gij cwngci gijliz caeuq cwngci gvigawj dangj raeuz, genhciz mbouj lumz simnyienh codaeuz、 laebdaeb baenaj, daiqdaeuz guh yiengh ndei、 aeu baihgwnz daiqdoengh baihlaj, guh ok yiengh ndei hawj daengx dangj daengx biengz hag. Ndaw gauj cunjcwz gij aeu doiq gauhgiz ganbu daezok iugouz de hix cungj guh le giengzdiuh. Aen gauj cunjcwz satlaeng caenh’itbouh giengzdiuh, gyagiengz caeuq gveihfan ndaw dangj cwngci swnghhoz, aeu daj Cunghyangh Veijyenzvei、 Cunghyangh Cwngcigiz、 Cunghyangh Cwngcigiz Cangzvu Veijyenzvei guh hwnj. Gauhgiz ganbu aeu cingsingj nyinhrox aen gang’vih bonjfaenh doiq dangj caeuq guekgya daegbied youqgaenj, gang’vih yied sang yied aeu gagrox ciuq gij biucinj dangj raeuz daezok bae yiemzgek iugouz bonjfaenh, yied aeu guh daengz dangjsing giengiengz、 dangjgij yiemzmingz, guh daengz itcig cungj lauxsaed doiqdaih dangj、 ciengzlwenx mbouj fanjgoet dangj.

  Aen gauj diuzlaeh hix doiq caengzmbaek cunghyangh daezok le cienmonz iugouz. Lumjbaenz, doiq gij gamduk dangj raeuz cunghyangh cujciz cienmonz dan laeb cieng ndeu, giengzdiuh gij vunz Cunghyangh Veijyenzvei bietdingh aeu yiemzgek gij cwngci gijliz caeuq cwngci gvigawj dangj raeuz, fatyienh gizyawz cwngzyenz miz gij hingzveiz boihfamh dangjcangh、 buqvaih gijliz dangj raeuz、 haih daengz dangj raeuz doxgiet doengjit wngdang genhgez daeqceih, caemhcaiq gibseiz bauq naeuz dangj cunghyangh nyi;Cunghyangh Cwngcigiz moix bi ciuhai aen hoih minzcuj swnghhoz, guh doiqciuq genjcaz caeuq dangjsing faensik, yenzgiu gij guhfap gyagiengz bonjndang gensez;gij vunz Cunghyangh Cwngcigiz wngdang yiemzgek caephengz cunghyangh bet hangh gvidingh, gagrox bae camgya song caengz cujciz swnghhoz, ciuqsaed bauq naeuz gij saehhangh youqgaenj goyinz hawj dangj cunghyangh rox, daiqdaeuz laebhwnj gyahfungh ndei, gyagiengz gyauyuz caeuq hanhhaed gij vunz ndaw ranz caeuq gij vunz guhhong henz ndang bonjfaenh;doiq gij vunz Cunghyangh Cwngcigiz miz yigen, ciem coh caensaed doenggvaq aen hingzsik sij gwnz ceij roxnaeuz gizyawz hingzsik fanjyingj hawj Cunghyangh Cwngcigiz Cangzvu Veijyenzvei roxnaeuz Cunghyangh Gijliz Genjcaz Veijyenzvei Cangzvu Veijyenzvei, daengjdaengj.

  Aen gauj cunjcwz satlaeng daezok aeu ceiqdingh gij saedhengz yigen gvendaengz gauhgiz ganbu gvancez doeksaed aen cunjcwz neix, cijdauj caeuq dukcoi gauhgiz ganbu youq ciuqsouj caeuq caephengz ndaw dangj cwngci swnghhoz cunjcwz fuengmienh guh yiengh ndei hawj daengx dangj hag. Hangh hong neix cingqcaih guh.

  Youq ndaw cam’aeu yigen, di deihfueng caeuq danhvei ndeu genyi, dawz aen gauj cunjcwz neix gaujbaenz aen daejlaeh lumj diuzlaeh yienghhaenx. Dou ngeixnaemj, cunjcwz youq ndaw fapgvi dijhi ndaw dangj diegvih haemq sang, dan baiz youq laeng dangjcangh. Aen cunjcwz baezneix ceiqdingh, dwg aen vwnzgen swhsiengjsing、 cwngcising、 gyoebhabsingq gig giengz ndeu, aeu cungjgez gij gingniemh dijbauj caeuq gihbwnj gveihfan dangj raeuz ciengzgeiz doxdaeuj youq mbeguh ndaw dangj cwngci swnghhoz fuengmienh guhbaenz haenx, gangjmingz dangj raeuz gij yenzcwz caeuq lizcangz gvendaengz yiemzsuk nyinhcaen mbeguh ndaw dangj cwngci swnghhoz, miz haujlai vwndiz aeu bae gangjgangj dauhleix. Guh daengz gijneix, yungh aen daejlaeh lumj diuzlaeh yienghhaenx dwg nanz ndaej yungzhab. Caiq gangj daengz nangqdaengz di gidij gvidingh ndeu, miz mbangj mizgven fapgvi ndaw dangj gaenq mingzbeg doekdingh lo, miz mbangj aeu caenh’itbouh youq ngoenzlaeng ceiqdingh gizyawz mizgven fapgvi bae gvancez doeksaed. Aen gauj cunjcwz seizneix caeuq aen cunjcwz 1980 nienz funghgwz doxdoengz.

    GIENDINGH MBOUJ BIENQ BAE DOICAENH CIENZMIENH COENGZYIEMZ CEIH DANGJ

                Yinzminz Yizbau selun

  Bineix bi bingjsaen, seizcou daengz le ndaw doengh haeux henjrwgrwg, lwgmak gwnzgo naeknueknuek. Cungguek Gungcanjdangj Daih Cibbet Gaiq Cunghyangh Veijyenzvei Daihroek Baez Daengxcungq Veiyi swngli hai sat lo. Neix dwg baez daihhoih gig youqgaenj ndeu, de dwg youq aen lizsij seizhaeuh Cungguek Gungcanjdangj laebbaenz 95 hopbi、 Hungzginh Cangzcwngh ndaejhingz 80 hopbi, dwg youq aen seizduenh gvanhgen cienzmienh gyalaeg gaijgwz、 gietdingh cienzmienh siujgangh baenzbaih neix ciuhai. Cienzhoih cungfaen haengjdingh le Cunghyangh Cwngcigiz gij gunghcoz aen dangj daj Cibbet Gaiq Haj Cung Cienzhoih doxdaeuj haenx, gig sang bingzgyaq le gij cwngzciu cienzmienh coengzyiemz ceih dangj. Cienzhoih cienzmienh faensik le gij hingzseiq caeuq yinvu aen dangj gensez dangqnaj bungzdaengz haenx, hidungj cungjgez geij bi neix daeuj daegbied dwg dangj raeuz Cibbet Daih doxdaeuj gij lijlun caeuq sizcen cienzmienh coengzyiemz ceih dangj, cimdoiq youq hingzseiq moq baihlaj baenzlawz guh ndei aen dangj gensez guh ok baijbouh hungnaek moq, cungfaen daejyienh le dangj cunghyangh gij gietsim itdingh aeu cienzmienh doicaenh coengzyiemz ceih dangj caeuq gij damjliengh mboujlau rapnaek ngoenzlaeng, daejyienh le gij simmuengh doxdoengz dangj raeuz, doiq saedbauj dangj raeuz seizseiz cungj dwg Cungguek daegsaek seveicujyi saehnieb giengiengz lingjdauj ligliengh, doiq dungjcouz doicaenh “haj yiengh gyoebbaenz aen cingjdaej ndeu” cungjdaej baijbouh caeuq hezdiuz doicaenh “seiq aen cienzmienh” canloz baijbouh, engq ndei bae hengzguh gij doucwngh hungmbwk miz haujlai lizsij daegdiemj moq、 doicaenh gij gunghcwngz hungmbwk moq gensez dangj raeuz、 doicaenh aen saehnieb hungmbwk yiengh seveicujyi miz Cungguek daegsaek, saedyienh aen loqsiengj Cungguek sawj Cunghvaz Minzcuz daih fukhwng, yiyi hungnaek、 yingjyangj laeggyae.

  Ceih guek bietdingh aeu sien ceih dangj, ceih dangj itdingh aeu coengzyiemz. Cienzmienh coengzyiemz ceih dangj, dwg aen cawjdaez sienmingz baez cienzhoih neix. Dangguh aen dangj hung miz 8800 lai fanh boux dangjyenz ndeu, dangguh aen dangj ciengzgeiz youq aen guekgya hung miz 13 ik lai vunz gaemgienz ndeu, aen dangj gensez gvanhaeh hungnaek、 yiendoengh daengxbuenz. Cibbet Daih doxdaeuj, dangj raeuz gonqlaeng ciuhai le Cibbet Gaiq Sam Cung、 Seiq Cung、 Haj Cung cienzhoih, doiq cienzmienh gyalaeg gaijgwz、 cienzmienh ciuqfap ceih guek、 cienzmienh hwnqbaenz siujgangh sevei guh le baijbouh, baez cienzhoih neix ciendaez yenzgiu cienzmienh coengzyiemz ceih dangj, neix dwg aen cingjdaej sezgi dangj cunghyangh cimdoiq “seiq aen cienzmienh” cix guh ok haenx, dwg gij fanghloz dangj cunghyangh guenjleix guekgya guh cugciemh mbehai、 doicaenh haeuj laeg bae. Gyagiengz caeuq gveihfan gij cwngci swnghhoz ndaw dangj、 gyagiengz ndaw dangj gamduk, dwg youq laj hingzseiq moq gyagiengz dangj raeuz gensez aen goqdaez youqgaenj ndeu, hix dwg doicaenh cienzmienh coengzyiemz ceih dangj giz roengzfwngz youqgaenj de. Yiemzsuk gij cwngci swnghhoz ndaw dangj dwg gij conzdungj ndei caeuq cwngci youhsi dangj raeuz, hix dwg gij giekdaej cienzmienh coengzyiemz ceih dangj, dangj aeu guenj dangj, soujsien aeu daj gij cwngci swnghhoz ndaw dangj guenj hwnj; coengzyiemz ceih dangj, soujsien aeu daj gij cwngci swnghhoz ndaw dangj yiemz hwnj. Ndaw dangj gamduk dwg gij neiyungz youqgaenj aen dangj gensez, hix dwg gij baujcwng youqgaenj cienzmienh coengzyiemz ceih dangj, dangj raeuz aen diegvih gaemgienz de, gietdingh le ndaw dangj gamduk youq dangj caeuq guekgya gak cungj gamduk hingzsik ndawde dwg gij gamduk ceiq gihbwnj、 daih’it vih de.

  “Faplwd cidu swnh’wngq seizdaih bienqvaq cij ndaej guenj ndei guekgya, ceihleix fuengsik habngamj sevei cingzgvang cij aeundaej cingzyauq.” Dangj cunghyangh gietdingh baez cienzhoih neix ceiqdingh cunjcwz、 coihdingh diuzlaeh, cingqdwg aen anbaiz hungnaek yawjnaek doicaenh cienzmienh coengzyiemz ceih dangj、 genhciz swhsiengj laeb dangj caeuq cidu ceih dangj dox giethab ndeu. Gij daegdiemj ceiq sienmingz song aen vwnzgen baez cienzhoih neix couh dwg ciepswnj caeuq cauhmoq dox doengjit, gawq haeujlaeg cungjgez le gij gingniemh caeuq gyauyin dangj raeuz youq gyagiengz bonjndang gensez fuengmienh, ciepswnj le gij cidu gvidingh dangj raeuz youq ciengzgeiz sizcen ndawde guhbaenz haenx、 fazyangz le gij conzdungj ndei dangj raeuz, youh cienzmienh cungjgez le dangj raeuz Cibbet Daih doxdaeuj gij sizcen sengdoengh dangj cunghyangh doicaenh cienzmienh coengzyiemz ceih dangj haenx, doiq gij cwngzgoj lijlun cauhmoq caeuq sizcen cauhmoq cienzmienh coengzyiemz ceih dangj guh le gyonjcomz caeuq gvinab, caemhcaiq haeujlaeg faensik le gij cingzgvang moq vwndiz moq youq laj hingzseiq moq aen dangj gensez bungzdaengz haenx, cigsoh mienhdoiq gij vwndiz doedok dangqnaj ndaw dangj cwngci swnghhoz caeuq ndaw dangj gamduk mizyouq haenx, yawjcingx lingjdauj ganbu daegbied dwg gauhgiz ganbu aen “gvanhgen siujsoq” neix, guhbaenz le cidu anbaiz moq, saedyienh le ndaw dangj cwngci swnghhoz caeuq ndaw dangj gamduk miz cidu、 miz gveihfan、 miz cwngzsi, vih doicaenh cienzmienh coengzyiemz ceih dangj、 daezsang gij rengzdajcauh、 rengzgietcomz、 rengzdingjhoenx aen dangj raeuz daezgung le gij cidu baujcang engqgya akmaenh.

  Aen guekgya lawz、 aen cwngdangj lawz, gij lingjdauj haedsim de cungj youqgaenj dangqmaz. Raeuz aen guekgya hung、 aen dangj hung yienghneix, yaek gietcomz daengx dangj、doxgiet yinzminz、 hoenxhingz diuhcan、 buqlangh baenaj, baujcwng dangj raeuz seizseiz cungj dwg aen dangj gaemgienz Majgwzswhcujyi giengiengz miz rengz、 seizseiz cungj dwg aen lingjdauj ligliengh giengiengz seveicujyi miz Cungguek daegsaek, dangj cunghyangh、 daengx dangj couh bietdingh aeu miz aen haedsim ndeu. Cibbet Daih doxdaeuj, Siz Ginbingz cungjsuhgi daiqlingx daengx dangj daengx ginh daengx guek gak cuz yinzminz haicauh le aen gizmen moq yiengh saehnieb hungmbwk seveicujyi miz Cungguek daegsaek caeuq gij gunghcwngz hungmbwk moq gensez aen dangj, youq gaijgwz fazcanj onjdingh、 neicwng vaigyauh gozfangz、 ceih dangj ceih guek ceih bing daengj fuengmienh aeundaej le baenzroix cwngzciu miz yienhsaed yiyi hungnaek caeuq lizsij yiyi laeggyae, sawj gij saehnieb dangj caeuq guekgya ndaej ciep gonq swnj laeng laebdaeb baenaj. Siz Ginbingz cungjsuhgi youq ndaw doucwngh sizcen hungmbwk moq gaenq bienqbaenz aen haedsim dangj cunghyangh、 aen haedsim daengx dangj. Baez cienzhoih neix, cingqsik daezok “aen dangj cunghyangh aeu Siz Ginbingz dungzci guh haedsim haenx”, fanjyingj le gij simmuengh doxdoengz daengx dangj daengx ginh daengx guek gak cuz yinzminz, daejyienh le gij gaenbonj leih’ik dangj caeuq guekgya, dwg gij gaenbonj baujcwng genhciz caeuq gyagiengz dangj raeuz lingjdauj, dwg guh gij doucwngh hungmbwk miz haujlai lizsij daegdiemj moq、 genhciz caeuq fazcanj aen saehnieb hungmbwk yiengh seveicujyi miz Cungguek daegsaek gij aeuyungh gaenjbik de. Neix doiq henhoh gij gienzvi dangj cunghyangh、 henhoh dangj raeuz doxgiet caeuq cizcungh doengjit lingjdauj, doiq daengx dangj daengx ginh daengx guek gak cuz yinzminz engq ndei gietcomz ligliengh gaemdawz seizgei、 hoenxhingz diuhcan, doiq daengx dangj doxgiet itsim、 mbouj lumz aen simnyienh codaeuz、 laebdaeb baenaj, doiq baujcwng dangj caeuq guekgya hwngvuengh fatdad、 ciengzgeiz onjdingh, miz gij yiyi gig hungnaek youh laeggyae.

  Lizsij sawjmingh yied miznaj, diuzloh baenaj yied gvangqlangh, couh yied aeu dangj raeuz maeuzveh daengxbuenz、 yinxlingx fuengyiengq. Cienzhoih gietdingh, dangj raeuz Daih Cibgouj Baez Daengx Guek Daibyauj Daihhoih youq 2017 nienz buenq bi laeng youq Baekging ciuhai. Neix dwg dangj caeuq guekgya cwngci swnghhoz ndawde gienh saeh hung ndeu, daengx dangj aeu cienzmienh gvancez gij cingsaenz Cibbet Daih caeuq Cibbet Gaiq Sam Cung、 Seiq Cung、 Haj Cung、 Roek Cung cienzhoih, doxgiet daiqlingx daengx guek gak cuz yinzminz, giendingh saenqsim, haenqrengz buekguh, caenh’itbouh guh ndei gak hangh hongsaeh dangj caeuq guekgya, daegbied dwg aeu cietsaed guh ndei gij hong swhsiengj lijlun caepcawq、 gij hong cujciz caepcawq、 gij hong ginghci sevei fazcanj、 gij hong eiqsik hingzdai, cietsaed henhoh sevei huzndei onjdingh, aeu gij cingzcik daegbied maenhndei bae ciepcoux dangj raeuz ciuhai Cibgouj Daih.

  Loqsiengj ciuqrongh baihnaj, baenaj cingq dwg seizhaeuh. Cingj caezgya engqgya gaenjmaed doxgiet youq aen dangj cunghyangh aeu Siz Ginbingz dungzci guh haedsim de hophenz, cienzmienh haeujlaeg gvancez gij cingsaenz baez cienzhoih neix, laeb maenh cwngci eiqsik、 daihbuenz eiqsik、 haedsim eiqsik、 gaen hwnj eiqsik, giendingh mbouj bienq bae henhoh gij gienzvi dangj cunghyangh caeuq dangj cunghyangh cizcungh doengjit lingjdauj, laebdaeb doicaenh cienzmienh coengzyiemz ceih dangj, doengzcaez cauh ok cungj cwngci swnghdai rumz seuq heiq cingq, engqgya netsaed bae dawz dangj cunghyangh gak hangh gezcwz baijbouh doek daengz diegsaed, caezgya doengz sim、 gietcomz ligliengh, vih saedyienh “song aen it bak bi” fwndou muzbyauh、 saedyienh aen loqsiengj Cunghvaz Minzcuz daih fukhwng mboujduenh buekguh.

  (2016 nienz 10 nyied 28 hauh 《Yinzminz Yizbau》)
Dozsiengq
自拍偷窥亚洲图片wap19uuuucom