Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

CWNGFUJ GUNGHCOZ BAUGAU

—— 2020 Nienz 5 Nyied 22 Hauh Youq Gwnz Gaiq Cibsam Daengx Guek Yinzminz Daibyauj Daihhoih Baez Hoih Daihsam

Gozvuyen cungjlij   Lij Gwzgyangz
  
【Cihsaw Hung’iq : hung rauh iq】  Dajyaenq
      
Gak boux daibyauj:

  Seizneix, gou daibyauj Gozvuyen, yiengq daihhoih bauq gangj gij hong cwngfuj, cingj saemjlwnh, caemhcaiq cingj Daengx Guek Cwnghez veijyenz daezok yigen.

  Baez binghraq bwtndat neix, dwg Cungguek moq laebbaenz doxdaeuj guek raeuz bungzdaengz gij saehgienh goenggungh veiswngh fwtfat hungnaek raihcienz ceiq vaiq、 banhdawz ceiq gvangq、 fuengzhaed ceiq hoj haenx. Ndaej aen Dangjcunghyangh aeu Siz Ginbingz dungzci guh cehsim dazyinx giengzak, ginggvaq daengx guek gwnz laj caeuq gyoengqvunz lwgminz gannanz sinhoj roengzrengz caemhcaiq sijndaej vutcuengq leih’ik, fuengzre gaemhaed binghraq aeundaej hongbaenz hungnaek. Dangqnaj, gij hong fuengzhaed binghraq caengz gietsat, yinvu hwngfat gig gannanz naekcaem. Bietdingh aeu roengzrengz dawz gij sonjsaet binghraq cauhbaenz gemj daengz ceiq noix, roengzrengz guhbaenz gij moegbiu yinvu ginghci caeuq ndawbiengz hwngfat bineix.

  It、 Nyeuxyawj Gij Hong 2019 Nienz Caeuq Bineix Doxdaeuj

  Bi’gvaq, guek raeuz hwngfat bungzdaengz hojnanz hojcawq haujlai. Seiqgyaiq ginghci demmaj numqmenh, gozci ginghci mouyiz doxdawz gyahaenq, gij atlig ndaw guek ginghci gyodroengz gyadaih. Aen Dangjcunghyangh aeu Siz Ginbingz dungzci guh cehsim de lienzhab dazyinx daengx guek gak cuz yinzminz gungroengz hojnanz, guhbaenz gij moegbiu yinvu ceiq youqgaenj daengx bi, vih cienzmienh laebbaenz aenbiengz siujgangh dwkroengz aen giekdaej gietdingh baenzsaeh.

  ——Ginghci yinhhengz cungjdaej bingzonj. Ndawguek swnghcanj cungjciz dabdaengz 99.1 fanh ik maenz, demmaj 6.1%. Hawsingz caiq miz 1352 fanh vunz ra ndaej hong guh, aen beijlwd diucaz saetnieb daemq gvaq 5.3%. Gij gyaqcienz siuyungh gihminz hwnjsang 2.9%. Gozci soucei daihdaej doxdaengh.

  ——Gij gapgyaq ginghci caeuq gij baijbouh ranghdieg laebdaeb bienq ndei. Huqsiuyungh ndawbiengz gailingz cungjngeg mauhgvaq 40 fanh ik maenz, siuyungh laebdaeb ndaej ragdoengh ginghci youqgaenj. Hangzdajcauh ndei、 hangzfugsaeh yienhdaih demmaj haemq vaiq. Haeuxgwn canjliengh 1.33 fanh ik gaen. Gij vunz ciengzseiz youq hawsingz ciemq daengx guek vunzsoq baez it mauhgvaq 60%, aen canloz ranghdieg hungnaek ndaej hengzguh haeuj laeg bae.

  ——Gij rengz moq doidoengh hwngfat mboujduenh demgiengz. Gohgi cauhmoq aeundaej buek hongbaenz hungnaek ndeu. Canjnieb saenhwng lienzdaemh bienq hung, gij canjnieb daih cienz daih de swnggaep vaiq. Vunzlai cauhnieb、 cauhmoq mbeguh haeuj laeg bae, moix ngoenz cingh demgya giyez fanh hoh doxhwnj.

  ——Gaijgwz hailangh yamq ok yamq youqgaenj. Laebdaeb gyalaeg gaijgwz gij gapgyaq mbiengj gunghawj, gaijgwz aen lingjyiz youqgaenj aeundaej cungbyoengq moq. Gemj gvaeh gyangq feiq yienzlaiz dingh gaenh 2 fanh ik maenz, gatsat dabdaengz 2.36 fanh ik maenz, hangzdajcauh caeuq giyez iq saeq souh’ik ceiq lai. Gij yinvu gaijgwz cwngfuj gihgou gaenq guhbaenz. Gij gaijgwz “cuengqgienz、 gamguenj、 fugsaeh” ndaej doicaenh haeuj laeg bae. Ndalaeb gohgi cangyez banj. Doengzcaez cauhlaeb “Rangh Ndeu Roen Ndeu” ndaej miz cingzyauq moq. Fatbouh saedhengz gij diuzlaeh hengzguh Aen Fap Vaisangh Douzswh, gya laeb benq dieg moq Sanghaij Swmou Siyengih. Vaimou vaiswh baujciz onjdingh.

  ——Sam ciengz ciengq hung ceiq hoj gung guhbaenz bouh ceiq youqgaenj de. Gij vunz gungzhoj lajmbanj gemjnoix 1109 fanh, aen beijlwd fatseng gungzhoj gyangqdaemq daengz 0.6%, gunggeng duetgungz aeundaej gij cingzcik gietdingh baenzsaeh de. Fuengzceih uqlah laebdaeb doi baenaj, aen soqliengh baizcuengq gij doxgaiq uqlah ceiq youqgaenj de laebdaeb doekdaemq, swnghdai vanzging cungjdaej ndaej gaijndei. Ginhyungz yinhhengz cungjdaej bingzonj.

  ——Gij gwndaenj lwgminz caiq ndaej gaijndei. Gij souhaeuj moix boux gihminz ndaej ceiyungh de mauhgvaq 3 fanh maenz. Giekbonj ciengxlaux、 ywbingh、 dihbauj daengj aen suijbingz baujcang ndaej daezsang. Hwnqguh gij ranz bauj miz youq hawsingz caeuq gaijcauh gij ranz yaek lak lajmbanj ndaej doicaenh haeujlaeg bae. Gij vunzsoq boux hagseng duenh yivu gyauyuz ndaej bangbouj gwndaenj de demgya gaenh 40%, gauhciz yenyau gyalai ciusou 100 fanh hagseng.

  Raeuz gig hoengh bae angqhoh Cunghvaz Yinzminz Gunghozgoz laebbaenz 70 hopbi, gig daih gikfat gij simcingz gyaez guek daengx guek gak cuz yinzminz, gyonjcomz baenz gij rengz hunghoengh roengzrengz ceng’aeu yiengh sevei cujyi miz gij daegsaek Cungguek seizdaih moq ndaej hingz hungmbwk.

  Raeuz gyagiengz bae guh dangjfungh lenzcwng, netsaed mbeguh aen cawjdaez gyauyuz “mbouj lumz simnduj、 geiq maenh diuzrap”, dawzyiemz doeksaed gij cingsaenz bet hangh gvidingh cunghyangh, lienzdaemh niujcingq “seiq yiengh”, doiq caengzdaej soeng cag gemj rap.

  Yiengh vaigyauh guek hung miz gij daegsaek Cungguek ndaej hongbaenz lailai. Banh baenz gij vaigyauh hozdung hungnaek guek raeuz guhdaeuz banh, lumjbaenz Gaiq Daihngeih “Rangh Ndeu Roen Ndeu” Gozci Gapguh Gauhfungh Lundanz daengj, Siz Ginbingz cujsiz daengj bouxdaeuz Dangj caeuq guekgya okbae cunzfangj lai aen guekgya, camgya hozdung hungnaek, lumjbaenz Bouxdaeuz Ngeihcib Guek Cizdonz Funghvei、 bouxdaeuz aen guekgya ciengim doxraen、 Yasin Funghvei、 Sanghaij Hozcoz Cujciz Funghvei、 baenzroix aen hoih bouxdaeuz Dunghya gapguh、 bouxdaeuz Cungh Ouh doxraen、 bouxdaeuz Cungh Yiz Hanz doxraen daengj. Gaenxmaenx caeuqfaenh cauhlaeb caeuq gaijgwz aen dijhi ceihleix daengx seiqgyaiq, doidoengh cauhlaeb aen minghyinh caezcaemh vunzloih. Yiengh vaigyauh ginghci、 cungj gyaulouz yinzvwnz gig miz cingzyauq. Cungguek vih coicaenh seiqgyaiq huzbingz caeuq hwngfat guh ok le gunghawj youqgaenj.

  Gak boux daibyauj!

  Fatseng binghraq bwtndat le, Dangjcunghyangh dawz fuengzre gaemhaed binghraq dangguh gienh saeh hung ceiq youqgaenj daeuj guh, Siz Ginbingz cungjsuhgi caenndang cijveih、 caenndang baijbouh, dingjmaenh dawz gij sengmingh ancienz caeuq ndangdaej cangqheiq lwgminz cuengq youq vih daih’it. Ndaej Dangjcunghyangh dazyinx, Cunghyangh Wngqdoiq Binghraq Gunghcoz Lingjdauj Siujcuj gibseiz yenzgiu baijbouh, Cunghyangh Cijdaujcuj lai gamduk dazyinx, Gozvuyen aen gihci lienzhab fuengzre lienzhab gaemhaed cingjdaej suenqveh diuzboiq, gak dieg gak bouhmonz laemxsim caenhrengz guhhong, ndawbiengz gak fuengmienh cienzlig haeujcoengh, doenggvaq guh ciengz ciengq daengxcungq caeuqfaenh hoenx、 ciengz ciengq cungjdaej hoenx、 ciengz ciengq lanzhoenx bae fuengzre gaemhaed binghraq. Gyoengq canghyw bouxhohleix buek guh mbouj lau dai, gij guenbing yinzminz gaijfangginh gamj dawz rapnaek, boux guh hong gohgi dox boiqhab gunggvan, boux youq segih guhhong、 boux gangingj gungh’anh、 boux ganbu caengzdaej、 boux guh hong sinhvwnz、 bouxgagnyienh soujmaenh vih hong bonjfaenh, bouxvaiqsoengq、 bouxsauqhaw、 boux swnghcanj daehyinh gij doxgaiq dingj fuengz binghraq de mbouj lau sinhoj, ik fanh bouxguhhong ngaemgyaeuj gaenxguh, gyoengq lwgminz Vujhan、 gyoengq lwgminz Huzbwz saenqniemh giendingh, ndawbiengz gak gyaiq caeuq gyoengq beixnuengx Gangj Au Daiz、 gyoengq beixnuengx youq rog guek gien cienz gien doxgaiq. Gyoengq lwglan Cunghvaz rumz fwn caemh ruz、 hensouj doxbang, cuk hwnj diuz fuengzsienq maenhrwd dingjfuengz binghraq.

  Youq ndaw fuengzre gaemhaed binghraq, raeuz ciuq aen cungjiugouz giendingh saenqsim、 doengzcaez okrengz、 gohyoz fuengzyw、 dawzcinj guhfap, bae dawzndaet gaemsaed guhsaeq gak hangh hong. Gibseiz yungh banhfap wngqgip, doiq binghraq bwtndat ciuq cungj binghlah gyaploih bae guenjleix, gak dieg haidoengh it gaep han’wngq gij saehgienh goenggungh veiswngh hungnaek sawqmwh fatseng. Laemxsim dwkhingz ciengz ciengq henhoh Vujhan caeuq Huzbwz, caemhcaiq aeundaej gij hongbaenz hingz dingh, doenggvaq mbouj yaemhywx saekdi bae yungh gij banhfap gaem ndaet guenj yiemz, yungh gij rengz daengx guek bae bangcoengh, diuhbaij 4 fanh lai boux canghyw bouxhohleix ganj bae, hwnjguh Hojsinzsanh、Leizsinzsanh Yihyen caeuq fanghcangh yihyen, riengjvaiq gyalai congzmbonq souyw, baujcang gij doxgaiq ywbingh gonq, mboujduenh gaijndei aen fueng’anq duenqbingh ywbingh, dingjmaenh cunghyih sihyih giethab, dingjmaenh “seiq aen cizcungh”, yungh cienzbouh goengrengz bae gouqyw bouxbingh, caenhliengh hawj bouxbingh yw ndei ceiq lai、 deng dai ceiq noix. Lai gya daengx guek ngoenzgyaj ndwencieng, doilaeng haihag、 lingzvued dauq haihong、 veqseiz okrog, dingjmaenh gyoengqvunz fuengzre gyoengqvunz gaemhaed, dingjmaenh “seiq caeux”, laemxsim gaemhaed goekbingh cienzlah, mizyauq naenxhaed binghraq banhraih. Lai yenzgiu haifat yw、 yizmyauz caeuq ywsawq niemhdingh. Gig vaiq gyalai swnghcanj gij doxgaiq ywbingh yungh, youq ndaw seizgan dinjdet demmaj haujlai, gunghawj doxgaiq gwndaenj cukgaeuq caemhcaiq onjdingh gyaqcienz, baujcang diuz roenloh ceiq youqgaenj de doengrat caeuq gunghawj meiz dienh youz heiq. Hab’wngq binghraq bienqvaq, habseiz doicaenh ciengzseiz guh fuengzre gaemhaed. Cimdoiq gij cingzgvang binghraq roggyaiq banhraih, gibseiz cauxlaeb aen dijhi fuengzre binghraq rogguek cienz haeuj, lailai gvansim gyaezhoh gij gunghminz guek raeuz youq rogguek. Gaenxmaenx mbeguh gozci gapguh, ciuq gij daidu goenghai、 ronghcingx、 raphwnj cwzyin, gibseiz doengbauq gij saenqsik binghraq, cawjdoengh faenyungh gij gisuz caeuq guhfap fuengz binghraq, doxbang doxcoengh dingjfuengz binghraq.

  Doiq raeuz yienghneix aen guekgya cingqcaih hwngfat miz baenz 14 ik vunz daeuj gangj, ndaej youq ndaw duenh seizgan haemq dinj mizyauq gaemhaed binghraq, baujcang gij gwndaenj lwgminz, caen dwg gig mbouj ngaih、 nanz dangqmaz. Raeuz hix sonjsaet bae haujlai, gij ginghci aen geiqdoh daih’it demmaj noix gvaq lingz, guh hong gvaq saedceij deng cungdongj bienq luenh bae, hoeng mingh vunz ceiq sang, gij sonjsaet neix raeuz bietdingh aeu dingjsouh ndaej hix cigndaej dingjsouh. Raeuz cingjdaej suenqveh doicaenh fuengzre gaemhaed binghraq caeuq hwngfat ginghci nem ndawbiengz, coemjdawz seizgei bae doicaenh dauq haihong, doiok 8 aen fuengmienh 90 hangh cwngcwz guhfap, saedhengz bangcoengh giyez onjdingh yunghhong, gemjmienx mbangj gvaeh feiq, mienx sou gij cienzroen sojmiz goengloh soucienz, gyangqdaemq cingzbonj yungh nwngzyenz, fat cuengq diepsik daigvanj. Ciuq bouhloh daezgonq fat roengz aen hanhngeg cienzcaiq deihfueng cwngfuj. Mbouj loek gvaq mwh dajndaem bae ca ndaemcin. Mbouj soengheiq bae doicaenh gunggeng duetgungz. Fatcuengq cienz bangbouj hawj boux youq itsienq dingjfuengz binghraq caeuq boux hojnanz, dawz aen biucinj laemzseiz boujdiep gyaqcienz daezsang boix ndeu. Doengh gij cwngcwz neix hawj gyoengqvunz daj ndawde ndaej souh’ik, gibseiz mizyauq coicaenh le baujcang gunghawj、 onjdingh gyaqcienz caeuq dauq haihong, gij ginghci guek raeuz yienh’ok rengznyangq caeuq rengzndumj hungloet.

  Gak boux daibyauj!

  Gij cingzcik ginghci caeuq ndawbiengz hwngfat bi’gvaq doxdaeuj caeuq gij fuengzre gaemhaed binghraq bineix aeundaej, dwg aen Dangjcunghyangh aeu Siz Ginbingz dungzci guh cehsim giengzak dazyinx ndaej daeuj, dwg Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz gohyoz ceijyinx ndaej daeuj, dwg daengx Dangj daengx ginh daengx guek gak cuz yinzminz doxgiet buekguh ndaej daeuj. Gou daibyauj Gozvuyen, caensim docih daengx guek gak cuz yinzminz、 gak minzcuj dangjbai、 gak yinzminz donzdij caeuq boux mizmingz gak gyaiq! Caensim docih gyoengq beixnuengx Yanghgangj Dwzbez Hingzcwnggih、 gyoengq beixnuengx Aumwnz Dwzbez Hingzcwnggih、 gyoengq beixnuengx Daizvanh caeuq gyoengq beixnuengx youq rogguek! Caensim docih gak guek cwngfuj、 gozci cujciz caeuq gak guek baengzyoux gvansim haeujcoengh Cungguek cauhlaeb yendaiva caeuq dingjfuengz binghraq haenx!

  Youq mwh haengjdingh cingzcik, dou hix singjsag yawj daengz gij gunnanz caeuq vwndiz dangqnaj bungzdaengz. Deng daengx seiqgyaiq binghraq cungdongj, seiqgyaiq ginghci doeknyieg youqgaenj, diuz lienh canjnieb diuz lienh gunghawj dingzdingz duenhduenh, gozci mouyiz douzswh sukreuq, aen hawciengz daihbuek huqgai fubfab. Gij siuyungh、 douzswh、 cuzgouj ndaw guek doekdaemq, cungj atlig ra hong guh gya rem haujlai, gij hojnanz giyez daegbied dwg giyez minzyingz、 giyez rauh iq saeq doedyienh, ndaw lingjyiz ginhyungz daengj cwk miz yungyiemj, gij mauzdun soucei caizcwng caengzdaej gyahaenq. Hong cwngfuj guh ndaej mbouj gaeuq ndei, hingzsik cujyi、 guenliuz cujyi lij haemq lai, saekdi ganbu mbouj dangrap、gik guh saeh、 mbouj rox guh saeh、luenh guh saeh. Mbangj lingjyiz deihdeih miz nduknaeuh. Youq ndaw fuengzre gaemhaed binghraq, goenggungh veiswngh、 wngqgip guenjleix daengj fuengmienh laeuh ok giz nyieg mbouj noix, gyoengqvunz lij miz di yigen caeuq genyi wngdang yawjnaek. Dou itdingh aeu roengzrengz gaijndei gunghcoz, cietsaed guhndei hong, caenhsim caenhrengz bae guh, mbouj hawj lwgminz saetmuengh.

  Ngeih、 Gij Moegbiu Hwngfat Ceiq Youqgaenj Bineix Caeuq Aen Cungjdaej Baijbouh Hong Saeh Mboengq Laeng

  Yaek guh ndei gij hong cwngfuj bineix, aeu youz aen Dangjcunghyangh aeu Siz Ginbingz dungzci guh cehsim daeuj dazyinx giengzak, yungh Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj ceijyinx, cienzmienh gvancez gij cingsaenz Cibgouj Daih caeuq Baez Ngeih Cungh、 Sam Cungh、 Seiq Cungh Cienzhoih Gaiq Cibgouj aen Dangj, laemxsim gvancez gij lijlun giekbonj、 lohsienq giekbonj、 fanghloz giekbonj aen Dangj, demgiengz “seiq rox”、 giendingh “seiq aen gagsaenq”、 guhdaengz “song aen henhoh”, hop gaenj gij moegbiu yinvu cienzmienh laebbaenz aenbiengz siujgangh, cingjdaej suenqveh doicaenh gij hong fuengzre gaemhaed binghraq caeuq hwngfat ginghci nem ndawbiengz, ciengzseiz guhndei gij hong fuengzre gaemhaed binghraq, dingjmaenh aen diuhgoek guhhong youq ndaw bingzonj gouz baenaj, dingjmaenh hwngfat leixniemh moq, dingjmaenh aeu gaijgwz gij gapgyaq mbiengj gunghawj guh sienqmeh, dingjmaenh aeu gaijgwz hailangh guh rengzdoengh doicaenh hwngfat caetliengh sang, laemxsim dwk ndei sam ciengz ciengq ceiq hoj gung, gyarengz guh gij hong “roek onj”, bauj gihminz miz hong guh、 bauj lwgminz gwndaenj、 bauj hawciengz cawjdaej、 bauj haeuxgwn nwngzyenz ancienz、 bauj diuz lienh canjnieb diuz lienh gunghawj onjdingh、 bauj caengzdaej yinhcienj, giendingh saedhengz aen canloz gyalai aeuyungh ndawguek. Henhoh aen daihbuenz ginghci hwngfat caeuq ndawbiengz onjdingh, saedbauj guhbaenz aen moegbiu yinvu gunggeng duetgungz ndaej hingz dingh, cienzmienh laebbaenz aenbiengz siujgangh.

  Seizneix caeuq baezlaeng aen seizgeiz ndeu, guek raeuz hwngfat bungzdaengz yungyiemj hojnanz doenghbaez caengz miz gvaq, hoeng raeuz miz yienghndei cwngci caeuq cidu daegbied、 gij giekdaej ginghci nanoek、 rengzndumj hawciengz hungloet, ik fanh lwgminz gaenxgoenx coengmingz. Cijaeu gamj bae wngqdoiq hojnanz, giendingh gij saenqsim hwngfat, demgiengz gij rengz doidoengh hwngfat, henhoh caeuq yungh ndei mboengq canloz seizgei youqgaenj guek raeuz hwngfat, couh itdingh ndaej roemxgvaq nanzgvan dangqnaj, Cungguek itdingh ndaej hwngfat ndeindei.

  Gyoebhab yenzgiu duenqdingh gij hingzseiq seizneix, raeuz habdangq diuzcingj le gij moegbiu yawhgeiz mwh caengz miz binghraq naemj haenx. Bineix aeu onjdingh yunghhong bauj lwgminz gwndaenj gonq, laemxsim dwkhingz ciengz ciengq gunggeng duetgungz, roengzrengz saedyienh aen moegbiu yinvu cienzmienh laebbaenz aenbiengz siujgangh; hawsingz caiq miz 900 fanh vunz doxhwnj ra ndaej hong guh, aen beijlwd diucaz saetnieb hawsingz 6% baedauq; aen beijlwd daenghgeiq saetnieb hawsingz 5.5% baedauq;gij gyaqcienz siuyungh gihminz swnghwnj 3.5% baedauq; hawj cingouj cuzgouj engqgya onjdingh、 caetliengh engq sang, gozci soucei daihdaej doxdaengh; gihminz souhaeuj demmaj caeuq ginghci demmaj daihdaej doengzbouh; ciuq aen biucinj seizneix gij vunz gungzhoj lajmbanj ndaej duetgungz caez、 gij yienh gungzhoj ndaej duet aen mauh gungzhoj caez; ginhyungz yungyiemj hungnaek ndaej fuengzre gaemhaed ndei; danhvei ndaw guek swnghcanj cungjciz siuyungh nwngzyenz caeuq aen soqliengh baizcuengq gij huq uqlah ceiq youqgaenj de laebdaeb doekdaemq, roengzrengz guhbaenz gij moegbiu yinvu “Cibsam Haj” Gveihva.

  Gizneix aeu gangjmingz: Dou mbouj daezok aen moegbiu bineix ginghci demmaj geijlai, cujyau dwg binghraq daengx seiqgyaiq caeuq ginghci mouyiz hingzseiq mbouj doekdingh geijlai, guek raeuz hwngfat bungzdaengz saekdi yinhsu yingjyangj nanz ndaej liuh daengz. Dou yienghneix guh, ndaej ikleih dazyinx gak fuengmienh comzrengz bae guhndei “roek onj” “roek bauj”. “Roek bauj” dwg giz yungh rengz gij hong “roek onj” bineix. Souj ndaej diuz sienq ceiq daemq “roek bauj”, couh hawj aen buenzgoek ginghci ndaej onjdingh; aeu baujcang bae coicaenh onjdingh、 youq ndaw onjdingh gouz baenaj, couh ndaej vih cienzmienh laebbaenz aenbiengz siujgangh cuknet giekdaej. Raeuz aeu yawj daengz, mboujlwnh dwg bauj yunghhong caeuq lwgminz gwndaenj、 guhbaenz aen moegbiu duetgungz, roxnaeuz dwg fuengzre vaqgej yungyiemj, cungj aeu miz ginghci demmaj daeuj cengjdingj, ginghci yinhhengz onjdingh gvendaengz daengxbuenz. Aeu yungh gij banhfap gaijgwz hailangh, bae onjdingh yunghhong、 baujcang lwgminz gwndaenj、 coicaenh siuyungh, ragdoengh hawciengz、 onjdingh demmaj, byaij ok diuz roen moq mizyauq wngqdoiq cungdongj、 baenqcienq ndaej ndei ndeu.

  Aen caizcwng cwngcwz gaenxmaenx de aeu engqgya gaenxmaenx baenzsaeh. Bineix aen beijlwd cei lai gvaq sou dajsuenq ciuq 3.6% doxhwnj bae anbaiz, bineix aensoq caizcwng cei lai gvaq sou beij bi’gvaq lai 1 fanh ik maenz, doengzseiz fathengz 1 fanh ik maenz guekcaiq daegbied bae dingjfuengz binghraq. Neix dwg gij guhfap daegbied youq mboengq daegbied de yungh. 2 fanh ik maenz gwnzneix gangj cienzbouh cienj hawj deihfueng, laebhwnj aen gihci cienjnod ceihawj mbouj doengz de, hawj cienzngaenz cigsoh haeuj caengzdaej si yienh bae、 cigsoh bang daengz giyez caeuq lwgminz, ceiq youqgaenj dwg aeu bae bauj yunghhong、 bauj lwgminz gwndaenj、 bauj hawciengz cawjdaej, baudaengz haeujcoengh gemj gvaeh gyangq feiq、 gemj co gyangq leih、 gyalai siuyungh caeuq douzswh daengj, seizseiz geiqmaenh gij cienz caizcwng yungh youq goenggungh fuengmienh, bouxlawz cungj mbouj ndaej gatlouz nodyungh. Aeu roengzrengz gaijndei aen gapgyaq ceiok caizcwng, gij ceiok lwgminz senglix noix mbouj ndaej de cijndaej demlai mboujndaej gemjnoix, aeu cietsaed baujcang gij ceiok giz youqgaenj, laemxsim atgemj gij ceiok itbuen de, yiemzgimq saen hwnq louz dangz gvanj soj, yiemzgimq saisangq luenh yungh. Gak gaep cwngfuj bietdingh aeu caencingq haed saivaq gvaq saedceij, cunghyangh cwngfuj aeu daiqdaeuz guh, cunghyangh bonjgaep ceiok anbaiz demmaj noix gvaq lingz, ndawde gij ceiok mbouj gaenj、 yungh mbouj yungh hix ndaej de aeu gemj 50% doxhwnj. Gak loih cienz gietcienj、cienzcaem ndaej sou hwnjdaeuj caenhliengh sou, dauqcungz anbaiz. Aeu roengzrengz daezsang caetliengh demgya yauqlwd, gak hangh ceiok bietdingh aeu suenq saeq, itdingh aeu hawj moix bit cienz yungh youq giz ceiq gaenj yungh de, itdingh aeu hawj hawciengz cawjdaej caeuq gyoengqvunz saedsaed caihcaih roxnyinh daengz.

  Gij hobi cwngcwz onjmaenh de aeu engqgya lingzvued habdoh. Gyoebhab yungh gij soujduenh gyangqdaemq cienzbwh gyangq leihsik、 caiq daigvanj daengj, bae dazyinx aen soqliengh gunghawj gvangjyi hobi caeuq aen gvaengh ndawbiengz yungzswh demmaj lai gvaq bi’gvaq haujlai. Itcig hawj yinzminzbi veiqlwd youq gwnz suijbingz hableix bingzyaenx daihdaej onjdingh. Cauhmoq gij hongdawz hobi cwngcwz ndaej cigsoh ikleih saeddaej ginghci haenx, itdingh aeu doidoengh giyez fuengbienh aeundaej daigvanj, doidoengh leihlwd lienzdaemh doekdaemq.

  Aeu cienzmienh gyagiengz aen cwngcwz yunghhong baiz gonq. Caizcwng、 hobi caeuq douzswh daengj cwngcwz aeu comzrengz haeujcoengh onjdingh yunghhong. Haenqrengz onjdingh gij yunghhong seizneix, gaenxmaenx caiq gyalai yunghhong, coicaenh boux saetnieb de caiq ra ndaej hong guh. Gak dieg aeu cingleix siusek gij hanhhaed mbouj hableix yunghhong bae, gij guhfap coicaenh yunghhong hab yungh couh yungh, gij banhfap haigvangq yunghhong ndaej yungh couh yungh.

  Duetgungz dwg gij yinvu cienzmienh laebbaenz aenbiengz siujgangh bietdingh aeu guhbaenz de, aeu dawzmaenh aen biucinj duetgungz seizneix, demgya douzhaeuj banggungz, gyarengz doeksaed gij banhfap banggungz, saedbauj doengh boux lij gungzhoj de ndaej duetgungz caez, laeb caezcienz caeuq caephengz aen gihci bangfuz gamcaek doengh boux dauq gungz de, gyamaenh gij hongbaenz duetgungz. Aeu dwk ndei ciengz ciengq henhoh mbwn gvengq、 raemx saw、 namh seuq, guhbaenz aen moegbiu mboengq ndeu ciengz ciengq hoj gung fuengzceih uqlah. Gyagiengz fuengzre gaemhaed gij yungyiemj hungnaek ndaw lingjyiz ginhyungz daengj, baenzlawz cungj aeu soujmaenh diuz sienq ceiq daemq mbouj ok yiengh yungyiemj baenz roix baenz rangh.

  Bineix gaenq gvaqbae gaenh 5 ndwen, mboengq laeng aeu mbouj cuengqsoeng saekdi ciengzseiz fuengzre gaemhaed binghraq, cagaenj guhndei gak hangh hong hwngfat ginghci caeuq ndawbiengz. Fatbouh saedhengz cwngcwz, aeu gaeuq rengz youh aeu naemj daengz ndaej laebdaeb yungh, gaenqgawq hingzseiq bienqvaq lij ndaej laeb caezcienz bae, raeuz miz gietsim miz naengzlig guhbaenz gij moegbiu yinvu daengx bi.

  Sam、 Gyarengz Saedhengz Hungzgvanh Cwngcwz, Roengzrengz Onjdingh Giyez Baujcang Yunghhong

  Yaek baujcang yunghhong caeuq lwgminz gwndaenj, bietdingh aeu hawj baenz ik hawciengz cawjdaej onjdingh, caenhrengz haeujcoengh giyez daegbied dwg giyez rauh iq saeq、 hoh guh seng’eiq banh giyez siucawz hojnanz.

  Gyarengz gemj gvaeh gyangq feiq. Sawj gij cwngcwz mboengq seizgan ndeu engq mizyauq, caeuq cidu anbaiz dox giethab, cuengq raemx ciengx bya, bangcoengh hawciengz cawjdaej siu hoj hwngfat. Laebdaeb caephengz gij cwngcwz bi’gvaq diuzdaemq aen suiqlwd cwnghcizsui caeuq aen beijlwd giyez gyau cienz ciengxlaux baujyiemj, lai gya gemj gvaeh gyangq feiq daihgaiq 5000 ik maenz. Geizgonq saedhengz gij cwngcwz gemj gvaeh gyangq feiq 6 nyied daej daengz geiz, baudaengz mienx sou gij cienz danhvei gyau yiengh baujyiemj ciengxlaux、 saetnieb、 hongsieng giyez rauh iq saeq, gemjmienx gij cwnghcizsui bouxnabsuiq noix de, mienx sou gij cwnghcizsui fugsaeh lumjbaenz goenggungh gyaudoeng daehyinh、 dozninz gwnndoet、 baeyouz guh’angq、 vwnzva dijyuz daengj, gemjmienx gij hwngfat gihginh minzhangz、 gij cienzhwnqguh baksok, aen geizhanh caephengz de cienzbouh gya raez daengz bineix nienzdaej. Gij giyez iq saeq、 hoh guh seng’eiq banh giyez gyaunab sojdwzsui cienzbouh doilaeng daengz bimoq. Yawhgeiq daengx bi caiq gemj diuzrap giyez 2.5 fanh ik maenz. Itdingh aeu dawz gij cwngcwz gemj gvaeh gyangq feiq doeksaed daengz giyez bae, louz ndoengfaex heuswd, daengzcog miz fwnz dwk.

  Doidoengh gyangqdaemq gij cingzbonj swnghcanj ginghyingz giyez. Gyangqdaemq gij gyaqdienh gunghsanghyez 5%, aen cwngcwz neix gyaraez daengz bineix nienzdaej. Gij cienzyungh gvanhdai caeuq conhsen bingzyaenz gyangqdaemq 15%. Gemjmienx gij cienzco fangzcanj guekmiz, gikcoi gak loih bouxokco gemjmienx roxnaeuz doilaeng sou cienzco, caemhcaiq hawj cwngcwz bae haeujcoengh. Itdingh aeu cingjceih yiengh sou cienz famh gvidingh nangqdaengz giyez.

  Gyarengz youq ginhyungz fuengmienh haeujcoengh giyez onjdingh. Gij cwngcwz giyez rauh、 iq、 saeq daigvanj doilaeng boiz bonj hawj leih caiq gyaraez daengz bimoq 3 nyied daej, yiengh daigvanj ndei doh giyez iq saeq haenx ndaej doilaeng boiz couh doilaeng boiz, doiq gizyawz gij daigvanj doengh aen giyez hojnanz doxyaeng doilaeng boiz. Laebndei aen gihci gikcoi gaujhaed, gikcoi ngaenzhangz gamj daigvanj、nyienh daigvanj、ndaej daigvanj, lai demgya saenqyungh daigvanj、 baez it daigvanj、 caengz boiz bonj hawj leih caiq daigvanj hawj giyez iq saeq, leihyungh ginhyungz gohgi caeuq soqgawq hung gyangqdaemq cingzbonj fugsaeh, dawzcinj fugsaeh. Lailai gya cungj yungzswh cwngfuj saenqyungh danhbauj caemhcaiq gyangqdaemq feiqlwd yienhda. Doengh aen sanghyez ngaenzhangz hung lai gya gij daigvanj ndei doh giyez iq saeq aeu sang gvaq 40%. Coicaenh caezyungh gij saenqsik saenqyungh nangqdaengz giyez. Haeujcoengh giyez gyalai yungh caigen yungzswh. Gyagiengz gamguenj, fuengzre cienzngaenz “cienjhoengq” aeu leih, dwkceih daegdaengq deuz caiq. Ginhyungz gihgou caeuq gij giyez daigvanj caemh seng caez hwng, gikcoi ngaenzhangz hableix nyienghleih. Vih bauj gij cawjdaej hawciengz, itdingh aeu hawj giyez rauh、 iq、 saeq engq yungzheih aeu ndaej daigvanj, itdingh aeu hawj gij cingzbonj gak cungj yungzswh doekdaemq yienhda.

  Siengj caenh banhfap bae onjdingh caeuq gyalai yunghhong. Gyagiengz haeujcoengh hangznieb cungdenj yunghhong、 gyoengq vunz cungdenj miz hong guh. Bineix gij hagseng doeg sat dayoz de dabdaengz 874 fanh vunz, aeu coicaenh doenggvaq hawciengz dazyinx caeuq ndawbiengz bae yunghhong, dayoz caeuq aen cwngfuj dangdieg cungj aeu daezhawj fugsaeh yunghhong laebdaeb mbouj dingz, hawj gij hanghmoeg fugsaeh caengzdaej lai aeu vunz. Anbaiz ndei bouxbing doiok doihbing caeuq baujcang de miz hong guh. Saedhengz aen cwngcwz nungzminzgungh youq dieg yunghhong bingzdaengj aeundaej fugsaeh yunghhong. Bangcoh gyoengq vunz gunnanz de ra hong guh, lumjbaenz bouxndangcanz、 doengh ranz mbouj miz saek boux miz hong guh de daengj. Guek raeuz miz baenz ik vunz lingzvued ra hong guh, ndawde baudaengz boux guh honglingz, bineix doiq gij vunz souhaeuj daemq de saedhengz hangh cwngcwz gagnyienh doilaeng gyau cienz sebauj, cienzbouh siu bae gij soucienz hingzcwng saehnieb nangqdaengz yunghhong haenx, hableix ndadingh giz dieg riuzdoengh baijdan. Doenggvaq aeu cienz bang sonlienh onjdingh vih hong, lai guh gij sonlienh bonjsaeh najyiengq hawciengz de, gikcoi aeu guhhong dingj sonlienh, caez laeb dieggoek faenyungh sonlienh swnghcanj, bineix bimoq sonlienh bonjsaeh guhhong 3500 fanh vunz baez doxhwnj, gauhciz yenyau lai ciu 200 fanh vunz, aeu hawj engqlai bouxguhhong dinfwngz soemraeh、 ndei ra hong.

  Seiq、 Baengh Gaijgwz Gikfat Gij Rengzhoengh Hawciengz Cawjdaej, Gyaak Gij Rengznyoengx Moq Hwngfat

  Hojnanz deuqnyex yied hung, yied aeu gyalaeg gaijgwz, buqcawz gij gazngaih dijci gihci, gikfat gij rengz doidoengh hwngfat ndawok de.

  Gyalaeg gaijgwz “cuengqgienz、 gamguenj、 fugsaeh”. Ciengzseiz guh ndei gij hong fuengzre gaemhaed binghraq le, aeu diuzcingj guhfap、 gemjnoix soujsuz, coicaenh cienzmienh dauq haihong、 dauq haihaw. Hawj saehhangh fugsaeh engq lai ndaej youq aen vangj ndeu banh caez, guhdaengz haibanh giyez ndaej youq gwnz vangj banh soujsuz caez. Cuengqsoeng hanhhaed giz dieg giyez iq saeq、 hoh guh seng’eiq banh giyez daenghgeiq ginghyingz, fuengbienh boux cauhnieb geiqbouh ginghyingz、 gibseiz aeundaej cwngcwz bangfuz. Haeujcoengh gij cienzngaenz giyez hung、 rauh、 iq riuzdoeng hwngfat. Laebndei aen dijhi saenqyungh ndawbiengz. Baengh goengcingq gamguenj henhoh goengbingz beijak, laebdaeb dajcauh yiengh vanzging gaicawx dwg hawciengz dazyinx、 ciuqfap guenjleix、 habngamj gozci haenx.

  Doicaenh gij gaijgwz youz hawciengz bae boiqbaij yausu. Doidoengh aen ngaenzhangz rauh iq de boujcung swhbwnj caeuq laebndei ceihleix, engq ndei bae fugsaeh giyez rauh iq saeq. Gaijgwz cangyezbanj caemhcaiq sawqhengz geiqbouh fathengz gujbyau, hwngfat aen hawciengz swhbwnj lai caengzmbaek de. Hawj baujyiemj engq ndaej guh baujcang. Hawj sengjgaep cwngfuj engq miz gienz gag guhcawj guenj dieg dajhwnq. Coicaenh vunzcaiz riuzdoengh, gungganq gij hawciengz gisuz caeuq soqgawq, gikhoengh gij rengzndumj gak loih yausu.

  Hawj gaijgwz swhcanj guekmiz、 giyez guekmiz guh ndaej engq ndei. Haiguh gij hengzdoengh sam bi gaijgwz giyez guekmiz. Laeb caezcienz aen cidu giyez yienhdaih, laebndei aen dijci gamguenj swhcanj guekmiz, gyalaeg gaijgwz gij sojyoujci doxgyaux. Daihdaej guhbaenz faen ok gij ciznwngz ndawbiengz youz giyez guh caeuq gaijgez gij vwndiz gaxgonq louz roengzdaeuj. Giyez guekmiz aeu comzrengz guh ndei gij cawjnieb bonjfaenh caeuq cwzyin bonjfaenh, laebndei aen gihci youz hawciengz dazyinx ginghyingz, daezsang gij naengzlig beijak ceiq youqgaenj de.

  Gaijndei gij vanzging hwngfat minzyingz ginghci. Baujcang gij giyez minzyingz bingzdaengj aeundaej swnghcanj yausu caeuq cwngcwz haeujcoengh, cingleix feiqcawz gij gvidingh mbouj hableix caeuq giyez singqcaet lienzhaeh hwnjdaeuj haenx. Hanhgeiz guhbaenz gij yinvu boiz caez gij cienz cwngfuj gihgou、giyez guekmiz niengqyiemq giyez minzyingz caeuq giyez rauh iq haenx. Cauxlaeb yiengh gvanhaeh cwngfuj caeuq canghseng’eiq youh gyawj youh seuq, coicaenh gij ginghci mbouj dwg gunghyoujci de fatmaj ndei.

  Doidoengh hangzdajcauh swnggaep caeuq canjnieb ngamqhwng fatmaj. Haeujcoengh hangzdajcauh fatmaj ndei. Lailai demgya cunggeiz ciengzgeiz daigvanj hawj hangzdajcauh. Hwngfat aen bingzdaiz gunghyez hulenzvangj, doicaenh cinwngz cauhguh, gungganq comzgyoengq canjnieb ngamqhwng. Hwngfat gij hangznieb fugsaeh swnghcanj, lumjbaenz yenzfaz sezgi、yienhdaih vuzliuz、cazniemh cazrau nyinhcingq daengj. Youq gwnz vangj gaicawx、 youq gwnz vangj fugsaeh daengj yienghnieb moq youq ndaw dingjfuengz binghraq fazveih cozyung youqgaenj, aeu laebdaeb fatbouh cwngcwz haeujcoengh, cienzmienh doicaenh “hulenzvangj +”, dajcauh giz ak moq yiengh ginghci soqcih.

  Daezsang gij naengzlig cengjdingj gohgi cauhmoq. Onjdingh haeujcoengh gihcuj yenzgiu caeuq wngqyungh gihcuj yenzgiu, dazyinx giyez demgya douzhaeuj guh yenzgiu haifat, coicaenh swnghcanj gyauyoz yenzgiu doxdoeng cauhmoq. Hwnqguh guekgya sizyensiz vaiq di, dauqcungz cujhab aen dijhi guekgya cungdenj sizyensiz, hwngfat gij yenzfaz gihgou ndawbiengz, gyagiengz gungroengz bouh ceiq youqgaenj gisuz cehsim. Hwngfat gij gohgi gvendaengz lwgminz gwndaenj. Gyalaeg gozci gohgi gapguh. Gyagiengz baujhoh cihsiz canjgienz. Gaijgwz aen gihci cienjvaq gij hongbaenz gohgi, deudoeng diuz lienh cauhmoq, dajcauh aen vanzging gohyenz gikcoi cauhmoq、soeng’yungz doiqdaih saetbaih haenx. Saedhengz cungdenj hanghmoeg gunggvan “ciep buengj dangdaeuz”, bouxlawz rem’ak couh hawj bouxlawz guh.

  Haeujlaeg doicaenh gyoengqvunz cauhnieb、 cauhmoq. Hwngfat douzswh cauhnieb caeuq douzswh gujgienz, demgya danbauj daigvanj cauhnieb. Gyalaeg lwnz sawqniemh moq cienzmienh cauhmoq gaijgwz, hwnqguh buek dieg yienghndei cauhnieb cauhmoq ndeu, dingjmaenh bauyungz youh siujsim gamguenj, hwngfat yiengh ginghci bingzdaiz、 yiengh ginghci caezyungh, engq lai bae gikfat gij rengz dajcauh ndawbiengz.

  Haj、 Saedhengz Aen Canloz Gyalai Gij Aeuyungh Ndawguek, Doidoengh Gij Fuengsik Hwngfat Ginghci Cienjbienq Engq Vaiq

  Gij rengzndumj aeuyungh ndawguek raeuz hungloet, aeu gyalaeg gaijgwz aen gapgyaq mbiengj gunghawj, doedyienh yiengqcoh lwgminz gwndaenj, hawj gikhwnj siuyungh caeuq gyalai douzswh giethab ndei、 doxdoi baenaj.

  Doidoengh siuyungh dauqswng. Doenggvaq onjdingh yunghhong coicaenh demsou baujcang lwgminz gwndaenj, hawj vunz gag haengj siuyungh miz ngaenz siuyungh. Haeujcoengh gij hangznieb fugsaeh mizgven gwndaenj de lumjbaenz gwnndoet、 hawciengz、 vwnzva、 baeyouz、 hongranz daengj dauqfuk hwngfat, doidoengh gwnz vangj laj vangj yungzhab. Coicaenh siuyungh giceh, haenqrengz gaijgez aen vwndiz hoj cuengq ci. Hwngfat yiengh fugsaeh ciengxlaux、 dawzlwg. Hwngfat aen canjnieb cangqndang soengsim. Gaijcauh daezswng gaiyouzbyaij. Haeujcoengh densangh、 vaiqsoengq roengz lajmbanj bae, haigvangq gij siuyungh lajmbanj. Aeu lai cungj banhfap caez yungh bae gyalai siuyungh, hab’wngq gij aeuyungh lai cungj lai yiengh gyoengqvunz.

  Gya’gvangq mizyauq douzswh. Bineix dajsuenq anbaiz deihfueng cwngfuj cienhangh caigen 3.75 fanh ik maenz, beij bi’gvaq demgya 1.6 fanh ik maenz, engq lai hawj caigen cienhangh yungh guh cienzgoek hanghmoeg, gij douzswh ndaw cunghyangh yawhsuenq anbaiz 6000 ik maenz. Cungdenj haeujcoengh hwnqguh gij “song yiengh moq yiengh hungnaek ndeu” ndaej coicaenh siuyungh ikleih lwgminz youh ndaej diuzcingj gapgyaq demgya rengzlaeng haenx, cujyau dwg: Lai hwnqguh gij sezsih giekdaej yienghmoq, hwngfat daih saenqsik vangjloz moq, haigvangq yungh 5G, hwnqguh aen cungsim soqgawq, demgya donghcungdienh、camhvuenhdienh daengj sezsih, doigvangq giceh nwngzyenz moq, gikfat giz aeuyungh moq、 bangcoengh canjnieb swnggaep. Gyagiengz cauhlaeb hawsingz yienghmoq, gyarengz daezswng gij sezsih goenggungh caeuq naengzlig fugsaeh yienhsingz, yawhbienh hab’wngq nungzminz gij iugouz ngoenz beij ngoenz naemj bae yienhsingz an’gya guhhong. Caiq haigoeng gaijcauh gij siujgih gaeuqgeq ndaw hawsingz 3.9 fanh aen, haeujcoengh gaijcauh guenj vangj、 gya an dendih, guh gij fugsaeh segih lai yiengh de, lumjbaenz youq ranz ciengxlaux、 diemq gwnhaeux、 bauj cinghseuq daengj. Lai hwnqguh gunghcwngz hungnaek lumjbaenz gyaudoeng、 suijli daengj. Lai demgya 1000 ik maenz cienzbonj hwnqguh dietloh guekgya. Laeb caezcienz aen gihci hawciengz dazyinx douzswh yungzswh, haeujcoengh giyez minzyingz bingzdaengj caeuqfaenh. Aeu genj ndei hanghmoeg, mbouj ce vwndiz roengzdaeuj, hawj douzswh lienzdaemh langh ok yauqik.

  Haeujlaeg doicaenh cungj hawsingz yienghmoq. Hawj aen singz cungsim caeuq singzgyoengq gyoebhab de daiqdoengh henzgyawj hwngfat, gungganq canjnieb、 demgya yunghhong. Dingjmaenh aen dinghvih “ranz dwg aeu daeuj youq mbouj dwg cienjgai canh cienz”, yawj singz dingh geiq, coicaenh hawj aen hawciengz fangzdicanj fatmaj bingzonj maenhndei. Laeb caezcienz gij sezsih fuengbienh gyoengqvunz、mbouj miz gazngaih daengj, hawj hawsingz engq habngamj cauhnieb habngamj youq.

  Vaiqdi doeksaed aen canloz ranghdieg hwngfat. Laebdaeb doidoengh daih haifat Baihsae、 cienzmienh saenqhwng Doengbaek、 Dieg Cungqgyang hwnghwnj、 Baihdoeng daiqdaeuz hwngfat. Haeujlaeg doidoengh Bwzgingh Denhcinh Hozbwz boiqhab hwngfat、 cauhlaeb Yez Gangj Au Davanhgih、 Cangzsanhgoz baenz aen cingjdaej ndeu bae hwngfat. Doidoengh ranghdieg ginghci Dah Cangzgyangh caez guh daih baujhoh. Bienguh aen ganghyau gviveh baujhoh gij swnghdai ranghdieg Dah Vangzhoz caeuq hawj dieg de hwngfat caetliengh sang. Doidoengh hwnqguh gvaengh ginghci Cwngzduh Cungzging. Hawj dieg doenghbaez guh gwzming、 dieg minzcuz、 dieg henz guek、 dieg gungzhoj hwngfat lai vaiq. Hwngfat haijyangz ginghci.

  Saedhengz ndei baenzroix cwngcwz haeujcoengh Huzbwz hwngfat, haeujcoengh bauj yunghhong、 bauj lwgminz gwndaenj、 bauj yinhcienj, coicaenh ginghci caeuq ndawbiengz cienzmienh hoizdauq cingqciengz.

  Coihawj ceihleix swnghdai vanzging engq mizyauq. Aeu eifap、 gohyoz、 dawzcinj bae ceihleix uqlah. Engq haenq rengz bae ceihleix gij hoengheiq uqlah dieg youqgaenj. Lai hwnq gij sezsih cawqceq raemxuq、 nyapnyaj, doicaenh faenloih nyapnyaj ngoenznaengz. Buensenj gaijcauh gij giyez swnghcanj cungj vayozbinj yungyiemj giz vunz maedcomz de vaiqdi. Guhhung aen canjnieb mbaetyungh nwngzyenz habngamj vanzbauj de. Yiemzfad gij hingzveiz mbouj habfap gaeb gaj、 gaicawx、gwn duzdoengh duzndoeng. Guh aen gunghcwngz hungnaek baujhoh caeuq coihfuk swnghdai hidungj youqgaenj, coicaenh cauhlaeb swnghdai vwnzmingz.

  Baujcang nwngzyenz ancienz. Doidoengh leihyungh gij meizdanq cinghseuq yauqnaengz sang de, hwngfat gij nwngzyenz ndaej caiq miz, laeb caezcienz aen dijhi swnghcanj gunghawj siugai sizyouz、 denhyenzgi、 denliz, engq miz naengzlig caengcwk nwngzyenz.

  Roek、 Saedbauj Guhbaenz Aen Moegbiu Gunggeng Duetgungz, Coicaenh Nungzyez Sou Ndaej Lai、 Nungzminz Ndaej Demsou

  Doeksaed gij banhfap gunggeng duetgungz caeuq saenqhwng lajmbanj, baujcang miz nungzcanjbinj youqgaenj gunghawj, hawj nungzminz gwndaenj engq ndei.

  Roengz gietsim dwkhingz ciengz ciengq gunggeng duetgungz. Gyarengz hawj gij yienh gij mbanj lij gungzhoj de duetgungz, doiq gyoengq vunz ok rog guhhong de, aeu youq dieg guhhong onjdingh vih hong. Doenggvaq siuyungh bae banggungz, haeujcoengh gij canjnieb banggungz dauq hwngfat. Senj dieg buenranz banggungz gvaqlaeng lij aeu lai bangfuz. Coicaenh Baihdoeng Baihsae gapguh banggungz caeuq cunghyangh danhvei dinghdiemj banggungz haeuj laeg bae. Gyagiengz daizdaej baujcang gij vunz daegbied gungzhoj de. Guh ndei hong caz doh gunggeng duetgungz. Laebdaeb caephengz aen cwngcwz cujyau bangfuz aen yienh duetmauh de. Laebdaeb doicaenh duetgungz caeuq saenqhwng lajmbanj hamzciep ndei bae, cienzlig hawj gyoengq vunz duetgungz de yamq coh fouqmiz.

  Roengzrengz guh ndei nungzyez swnghcanj. Hawj dajndaem haeuxgwn miz dieg gaeuq ok haeux lai, daezsang aen ceijsoq bi ndaem lai dangq, daezsang gij gyaqcienz ceiq daemq soucawx haeuxgok, lai dajciengj doengh aen yienh ok haeuxgwn lai de, roengzrengz fuengzyw binghhaih nonhaih hungnaek. Haeujcoengh ndaem duhhenj daengj doenghgo caq youz. Cawqfad gij hingzveiz famhfap famh gvidingh ciemqyungh reihnaz, caiq cauh gij reihnaz biucinj sang de 8000 fanh moux. Gungganq doigvangq binjcungj ndei. Laebndei aen cwngcwz boujdiep nungzgih. Gyalaeg gaijgwz lajmbanj. Lai gaemhaed binghraq lumjbaenz mouraq Feihcouh daengj, hawj hangz ciengxmou dauq lai ciengx, hwngfat ciengx doihduz、 doenghduz ndaw raemx. Laebndei aen dijhi riuzdoeng nungzcanjbinj. Hengz ndei aen cidu swngjcangj guenj “daeh haeux” sicangj guenj “lamz byaek”. Vanjhaeux 14 ik vunz Cungguek, raeuz miz naengzlig hix bietdingh aeu gaemndaet youq ndaw fwngz bonjfaenh.

  Haigvangq roenloh hawj nungzminz ra ndaej hong guh、 demgya souhaeuj. Haeujcoengh nungzminz youq henzgyawj ra hong guh、 cauhnieb, coicaenh it ngeih sam canjnieb yungzhab hwngfat, gya’gvangq aen gvaengh aeu hong dingj gouqcaeq, hawj gyoengq nungzminzgungh dauqma ranzmbanj de miz hong guh、 miz souhaeuj. Lai sonlienh gij bonjsaeh guhong nungzminz. Ciuqfap daj goekgaen bae ceihleix aen vwndiz niengqyiemq cienzhong nungzminzgungh. Bangfuz aen cawjdaej ginghyingz hung iq habdoh de, hawj nungzhoh engq ndei youz ndawbiengz fugsaeh. Haeujcoengh cingsaeq gyagoeng nungzcanjbinj. Laebndei aen cwngcwz baujcang gij dieg hwngfat canjnieb lajmbanj. Gyaak gij saedlig cizdij ginghci. Lai douzhaeuj cienhangh caigen, haeujcoengh gij sezsih yienhdaih nungzyez、 aen gunghcwngz gwn raemx ancienz caeuq cingjceih aen vanzging vunz youq, lienzdaemh gaijndei gij diuzgen nungzminz guhhong、 gvaq saedceij.

  Caet、 Hawj Doiq Rog Hailangh Suijbingz Engq Sang, Onjdingh Aen Buenzgoek Vaimou Vaiswh

  Najdoiq vanzging baihrog bienqvaq, aeu giendingh mbouj bienq bae gya’gvangq doiq rog hailangh, onjdingh diuz lienh canjnieb diuz lienh gunghawj, aeu hailangh coi gaijgwz coi hwngfat.

  Coicaenh vaimou daihdaej onjdingh. Hopheux haeujcoengh giyez demgya dinghdan、 onjdingh vih hong、 baujcang yunghhong, gyalai douzcuengq saenqyungh daigvanj, hawj gij baujyiemj saenqyungh cuzgouj de haeuj ndaw giyez bae engq lai, hawj gij cingzbonj cingouj cuzgouj hab gvidingh de doekdaemq, haeujcoengh gij canjbinj cuzgouj de cienj gai ndaw guek. Vaiqdi hwngfat yienghnieb moq lumjbaenz hamj gyaiq densangh daengj, hawj gij naengzlig yinhhuq daengz seiqgyaiq gak dieg engq ak. Doicaenh lwnz sawqdiemj moq cauhmoq hwngfat fugsaeh mouyiz. Couzbanh ndei Gaiq Daihsam Cinbozvei, gaenxmaenx gyalai cingouj, hwngfat aen hawciengz hung najcoh seiqgyaiq suijbingz engq sang haenx.

  Gaenxmaenx yungh ndei vaiswh. Daih fukdoh sukgemj mbaw dan gimq vaiswh haeuj, fatbouh mbaw dan gimq hamj gyaiq guh fugsaeh mouyiz. Gyalaeg ginghci dwzgih gaijgwz hailangh. Hawj dieg sawqniemh swyouz mouyiz de lai miz gienz gag guhcawj gaijgwz hailangh, youq dieg cungqgyang dieg baihsae gya laeb dieg sawqniemh swyouz mouyiz、 dieg gyoebhab baujsuiq, demgya aen gyoebhab sawqdiemj gya’gvangq hailangh hangz fugsaeh. Gyavaiq hwnqguh aen baksok swyouz mouyiz Haijnanz. Cauh ok aen hawciengz vanzging doiqdaih giyez neiswh vaiswh doxdoengz, hawj gyoengqde goengbingz beijak.

  Aeu caetliengh sang bae caezlaeb “Rangh Ndeu Roen Ndeu”. Dingjmaenh caez yaeng caez hwnq caez yungh, ciuqsouj gij yenzcwz hawciengz caeuq gij gveihcwz gozci doenghengz, fazveih gij cozyung giyez cawjdaej, mbeguh gij gapguh doxleih caez ndaej ndeicawq de. Dazyinx hawj doiq rog douzcienz fatmaj ndei.

  Doidoengh mouyiz caeuq douzswh engq swyouz engq fuengbienh bae. Giendingh henhoh aen dijci lai mbiengj mouyiz, gaenxmaenx caeuqfaenh gaijgwz Simou Cujciz. Doidoengh ciemdingh aen hezding ranghdieg cienzmienh ginghci gapdoih gvanhaeh, doicaenh gij damzbuenq swyouz mouyiz gvendaengz Cungh Yiz Hanz daengj. Doengzcaez doeksaed Cungh Meij gij ginghmou hezyi duenh daih’it. Cungguek roengzrengz lai caeuq gak guek gapguh ginghmou, guhdaengz doxleih caezhingz.

  Bet、 Aeu Baujcang Caeuq Gaijndei Lwgminz Gwndaenj Guh Cungsim, Doidoengh Gaijgwz Hwngfat Saehnieb Ndawbiengz

  Najdoiq gunnanz, diuz sienq ceiq daemq lwgminz gwndaenj baenzlawz cungj aeu soujmaenh, gij saehcingz gyoengqvunz ceiq gvansim de aeu roengzrengz banh ndei.

  Lai rengz hwnqguh aen dijhi goenggungh veiswngh. Dingjmaenh mingh vunz ceiq sang, gaijgwz aen dijci fuengzre gaemhaed bingh, gyaak gij naengzlig fuengzyw binghlah, laeb caezcienz aen hidungj cigsoh bauq caeuq yawhsien daezsingj binghlah, dingjmaenh gibseiz goenghai ronghcingx fatbouh gij saenqsik binghraq. Yungh ndei gij daegbied guekcaiq dingjfuengz binghraq, gyalai douzhaeuj yenzgiu haifat yizmyauz、 gijyw caeuq gij gisuz niemhdingh riengjvaiq de, demgya gij yihliuz sezsih fuengzraq gouqyw, demgya gij sizyensiz ndaej senjdoengh de, gyagiengz baujcang gij doxgaiq wngqgip, demgiengz gij veiswngh fuengzraq caengzdaej. Cauhlaeb aen doih vunzcaiz goenggungh veiswngh vaiqdi. Haeuj laeg mbeguh gyaez guek veiswngh yindung. Dauqcawq doigvangq gij cihsiz cinghseuq cangqheiq, iuheuh gvaq gij saedceij cangqheiq vwnzmingz de. Aeu lailai daezswng gij naengzlig fuengzre gaemhaed, baenzlawz cungj aeu fuengzre binghraq dauq fat, baenzlawz cungj aeu henhoh lwgminz ndangcangq.

  Daezsang gij suijbingz gihbwnj yihliuz fugsaeh. Aen biucinj caizcwng bangbouj gihminz yihbauj moix vunz lai gya 30 maenz, sawq guh gij cienzyungh youq mwnzcinj ywbingh de hamj sengj cigsoh gietsuenq. Bangfuz gij yihliuz gihgou deng binghraq yingjyangj haenx. Gyalaeg gyoebhab gaijgwz yihyen goenglaeb. Hwngfat “hulenzvangj + yihliuz cangqheiq”. Cauhlaeb aen yihliuz cungsim ranghdieg. Daezsang gij naengzlig yihliuz fugsaeh segih singz mbanj. Doicaenh faengaep yawjbingh ywbingh. Coicaenh cunghyihyoz hwngfat hwnjdaeuj, lai hawj cunghyih sihyih giethab. Cauhlaeb cungj gvanhaeh canghyw bouxbingh huzndei. Dawzyiemz gamguenj gijgwn gijyw, saedbauj ancienz.

  Doidoengh gyauyuz goengbingz hwngfat caeuq daezswng caetliengh. Dingjmaenh laeb daudwz gungganq vunzcaiz. Miz bouhloh anbaiz gij hong cunghsiujyoz son hag caeuq cunghgauj gauhgauj. Gyarengz hwnqguh gij hagdangz dozninz yanghcin、gij hagdangz iq ndaw mbanj caeuq gij hagdangz yienhsingz. Laebndei gij cwngcwz hawj boux lwgnyez buen ranz de haeujhag ciepsouh yivu gyauyuz. Banh ndei gij gyauyuz daegbied de、 gij gyauyuz daezsang de, haeujcoengh caeuq gveihfan gij gyauyuz minzbanh. Hwngfat cungj gyauyuz caengz haeuj siujyoz ndei doh ndawbiengz haenx, bangcoh youwzyenz minzbanh hoizsoeng hojnanz. Doidoengh gauhdwngj gyauyuz baihndaw gag fatmaj ndeindei, doicaenh hwnqguh aen dayoz ceiq ndei caeuq aen yozgoh ceiq ak, haeujcoengh hwngfat gij dayoz giz dieg cungqgyang、 baihsae. Coicaenh dayoz lai ciusou gij hagseng lajmbanj caeuq dieg gungzhoj. Hwngfat cizyez gyauyuz. Gya rengz cauhlaeb aen doih lauxsae. Doicaenh gyauyuz sinsizva. Aeu onjdingh gij douzhaeuj gyauyuz, gaijndei gij gapgyaq douzhaeuj, sukiq gij cengca singz mbanj、 dieg caeuq dieg、 hagdangz caeuq hagdangz, hawj sojmiz gyadingz caeuq lwgnyez cungj aeundaej gij ndeicawq gyauyuz swhyenz, hawj gij roenloh daengzcog gyoengqde engq ronghsag.

  Gyarengz baujcang gij senglix noix mbouj ndaej lwgminz. Diuz sang gij cienzgoek ciengxlaux boux duiyouh, daezsang aen biucinj ceiq daemq gij cienz giekdaej ciengxlaux boux gihminz singz mbanj. Saedyienh sengjgaep gyonj sou gyonj cei gij cienz goekbonj ciengxlaux baujyiemj gyoengq cizgungh ndaw giyez, daezsang aen beijlaeh cunghyangh diuzbouj. Daengx guek gaenh 3 ik vunz ndaej lingx cienzciengxlaux, bietdingh aeu saedbauj ciuqseiz gaeuqsoq fathawj. Doeksaed aen cwngcwz daihndei bouxbing doiqok doihbing. Daihndei gij boh meh lwg yah (gvan) boux vih goengsaeh dai bae de. Gya’gvangq aen gvaengh baujcang saetnieb baujyiemj, dawz nungzminzgungh daengj boux saetnieb camgya baujyiemj mbouj gaeuq bi ndeu cungj nabhaeuj dieg de ciengzseiz youq bae baujcang. Laebndei aen cidu ndawbiengz gouqbang. Gya’gvangq aen gvaengh baujcang ceiq daemq gwndaenj, doiq doengh ranz gungzhoj singz mbanj wngdang baujcang couh caenhliengh baujcang, dawz doengh boux saetnieb ndaw hawsingz caeuq boux dauqma ranzmbanj hab diuzgienh de gibseiz nabhaeuj baujcang ceiq daemq gwndaenj bae. Doiq doengh boux aenvih caihaih、 baenzbingh、 ndangcanz camhseiz gunnanz de, cungj aeu bae gouqbang. Aeu cietsaed baujcang gij gwndaenj ceiqnoix sojmiz gyoengqvunz gunnanz de, bauj lwgminz gwndaenj hix bietdingh yaek bangcoengh engq lai boux saetnieb caiq ra hong guh、 gamj bae cauhnieb.

  Hawj gij cingsaenz vwnzva swnghhoz gyoengqvunz lai cungj lai yiengh bae. Gungganq caeuq hengzguh aen gyacizgvanh cehsim sevei cujyi, hwngfat gij saehnieb lumjbaenz cezyoz sevei gohyoz、 sinhvwnz okbanj、 gvangjbo denyingj densi daengj. Lai baujhoh leihyungh vwnzvuz caeuq cienzswnj feih vuzciz vwnzva yizcanj. Gyaak gij fugsaeh goenggungh vwnzva, couzbanh Bwzgingh Dungh’auvei、 Dunghcanzauvei, iuheuh bouxboux lienhndang caeuq bouxboux doegsaw, hawj daengxbiengz gizgiz miz rengzhoengh、 yienghyiengh coh ndei.

  Gyaak caeuq cauhmoq gij ceihleix ndawbiengz. Laeb caezcienz aen gihci guenjleix caeuq fugsaeh segih. Gyagiengz ceihleix lajmbanj. Haeujcoengh hawj gij cujciz ndawbiengz、 yinzdau gouqbang、 gagnyienh fugsaeh、 gij saehnieb swnzsienh daengj fatmaj ndei. Baujcang gij gienzik habfap mehmbwk、 lwgnyez、 bouxgeq、 bouxndangcanz. Laeb caezcienz aen cidu sinfangj, hawj faplwd bangcoh engq mizyauq, gibseiz gaijgez gij iugouz hableix gyoengqvunz, vaqgej ndei mauzdun cengnauh. Guh baez daihcaet caz doh gij vunz daengx guek. Gyarengz cauhlaeb gij naengzlig hawj guekgya ancienz. Laebndei aen dijhi fuengzhaed cianh ndawbiengz, ciuqfap dwkceih gak cungj famhcoih, hwnqguh aen Cungguek engqgya bingzan.

  At yiemz gij cwzyin hawj swnghcanj engq ancienz. Gyaak fuengzre caihaih lumjbaenz raemxrongz raemxdumh、 feizcoemh、 deihdoengh daengj, guh ndei heiqsiengq fugsaeh, hawj wngqgip guenjleix、ciengjyiemj gouqbang caeuq fuengz cai gemj cai guh ndaej engq ndei. Saedhengz cienhangh cingjceih ancienz swnghcanj. Roengz gietsim naenxhaed gij saehhux hungnaek、 daegbied hungnaek de fatseng.

  Gak boux daibyauj!

  Miz yinvu gannanz naekcaem baij youq dangqnaj, gak gaep cwngfuj aeu gagrox hawj swhsiengj、 cwngci、 hengzdoengh caeuq aen Dangjcunghyangh aeu Siz Ginbingz dungzci guh cehsim de doxdoengz caez, hengzguh aen swhsiengj aeu lwgminz guh cungsim bae hwngfat, doeksaed aen iugouz cienzmienh yiemz haenq guenj dangj, dingjmaenh ciuqfap hingzcwng, cauhlaeb aen cwngfuj fapceih, dingjmaenh goenghai hongsaeh guenjleix guekgya, daezsang gij naengzlig ceihleix. Aeu ciuqfap ciepsouh aen yinzda doengzgaep caeuq aen cangzveijvei de gamduk, gagrox ciepsouh yinzminz cwnghez minzcuj gamduk, gag bae ciepsouh ndawbiengz gamduk caeuq baklinx gamduk. Hawj saemjgeiq gamduk engq yiemz. Yungh ndei gij cujciz ginzdonz lumjbaenz gunghvei、 gungcinghdonz、 fulenz daengj. Boux youq ndaw cwngfuj guhsaeh aeu gagrox ciepsouh faplwd、 genhcaz caeuq lwgminz gamduk. Gyarengz cauhlaeb aen cwngfuj cinghseuq, roengz gietsim fadceih nduknaeuh.

  Gak gaep cwngfuj aeu itcig dingjmaenh gangjgouz saedsaeh, gaem ndaet duenh cogaep sevei cujyi aen guekcingz giekbonj neix, ciuqei gwzgvanh gvilwd, yienghyiengh daj saedsaeh hwnjdin, ndwnmaenh banh ndei gij saeh bonjfaenh dangrap. Aeu roengz rengz hung bae niujcingq caeuq cingjceih “seiq yiengh”, haenqrengz gaiqcawz hingzsik cujyi、guenliuz cujyi, hawj gyoengq ganbu youq caengzdaej baetduet hingzsik cujyi cughaed bae guh saeh cauhnieb, bang boux dangrap dawzrap, hawj boux dangrap caenhrengz. Aeu gaenjndaet baenghgauq gyoengqvunz lwgminz, yawjnaek gij cingsaenz cauh gonq caengzdaej, engq yungh rengz bae doidoengh gaijgwz hailangh, gikfat gij rengzhoengh ndawbiengz, gietcomz gij coengmingz caeuq ligliengh ik fanh vunz, neix hawj gyoengqraeuz miz saenqsim dwkhingz sojmiz gunnanz hojcawq. Gyoengq ganbu raeuz wngdang bungz nanz mbouj ndoj、 yawjnaek saedguh, comz sim comz rengz bae ca hwngfat、 bauj lwgminz gwndaenj. Cijaeu raeuz itcig caeuq gyoengqvunz lwgminz caemh haemz caemh hoj、 haenqrengz baenaj, gij simmuengh lwgminz Cungguek gyaepgouz gwndaenj engq ndei couh itdingh ndaej guh daengz.

  Bineix yaek bien ndei “Cibseiq Haj” Gveihva, vih yamq hwnj diuz roen moq haidoengh gij moegbiu buekguh aen bak bi daihngeih nda veh dozlamz.

  Gak boux daibyauj!

  Raeuz aeu dingjmaenh caeuq laebndei aen cidu minzcuz gihyiz swci, haeujcoengh siujsoq minzcuz caeuq dieg minzcuz hwngfat engq vaiq, hawj caezgya cungj nyinh dwg aen Cunghvaz Minzcuz ndeu. Cienzmienh gvancez diuz fuengcim giekbonj guh hong cunghgyau aen Dangj, hawj boux cunghgyaugai caeuq gyoengqvunz saenq gyauq de youq ndaw coicaenh ginghci nem ndawbiengz hwngfat miz cozyung ndei. Gyoengq beixnuengx youq rog guek ndaej guekcoj gvaqniemh, dwg diuz giuz youqgaenj lienzdoeng seiqgyaiq, aeu hawj gijndei daegbied gyoengq beixnuengx youq rogguek caeuq vunz ndawranz de langh okdaeuj, mboujduenh demgiengz gij rengzgietcomz lwglan Cunghvaz, doengzsim caez cauh cingzcik ronghsag.

  Bi’gvaq doxdaeuj, cauhlaeb gozfangz caeuq doihbing aeundaej cingzcik youqgaenj, doihbing lwgminz youq ndaw fuengzre gaemhaed binghraq baijok le gij cozfungh ndei dingq Dangj cijveih、 doq hemq doq daengz、 gamj dawz rapnaek. Aeu haeujlaeg gvancez aen swhsiengj hawj doihbing bienq ak Siz Ginbingz, haeujlaeg gvancez aen canloz fuengcim ginhsw seizdaih moq, dingjmaenh doihbing aeu gangj cwngci、 baengh gaijgwz hawj doihbing bienq ak、 baengh gohgi hawj doihbing bienq ak、 baengh vunzcaiz hawj doihbing bienq ak、 ciuqfap guenj doihbing. Dingjmaenh Dangj baenzbaenz cungj aeu dazyinx doihbing lwgminz, dawzyiemz doeksaed aen cidu ginhveij cujsiz fucwz. Cienzlig gyagiengz lienhbing bwh hoenx, giendingh henhoh gij cawjgienz、 ancienz、 leih’ik hwngfat guekgya. Dwk ndei ciengz ciengq hoj gung doeksaed “Cibsam Haj” Gveihva cauhlaeb hwngfat doihbing, bienguh “Cibseiq Haj” Gveihva cauhlaeb doihbing. Gyalaeg gaijgwz gozfangz caeuq doihbing, hawj gij naengzlig baujcang houginz caeuq canghbei engq ak, doidoengh gozfangz gohgi cauhmoq hwngfat. Laeb caezcienz aen dijhi gozfangz dungyenz, itcig hawj ginh cwng ginh minz doxgiet genq lumj rinranx.

  Raeuz aeu cienzmienh cinjdeng gvancez diuz fuengcim “aen guek ndeu song cungj cidu”、 “vunz Yanghgangj guenj Yanghgangj”、 “vunz Aumwnz guenj Aumwnz”、 gauhdu swci, laebhwnj laebndei gij cidu faplwd caeuq gihci caephengz hawj daegbied hingzcwnggih henhoh guekgya ancienz, doeksaed gij yenci cwzyin dwzgih cwngfuj. Haeujcoengh Yanghgangj、 Aumwnz hwngfat ginghci、 gaijndei lwgminz gwndaenj, engq ndei yungz haeuj aen daihbuenz guekgya hwngfat bae, baujciz Yanghgangj、 Aumwnz ciengzgeiz mwnhoengh onjdingh.

  Raeuz aeu dingjmaenh aen fuengcim cwngcwz hungnaek gij hong doiq Daizvanh, dingjmaenh gij yenzcwz aen Cungguek dog, youq gwnz giekdaej “Gij Yawjfap Caezcaemh Goujngeih” doidoengh song hamq gvanhaeh huzbingz hwngfat. Baenzbaenz cungj aeu fanjdoiq caeuq naenxhaed gij guhfap gauj faenmbek “Daizduz”. Laeb caezcienz gij cidu anbaiz caeuq cwngcwz guhfap doidoengh song hamq gyaulouz gapguh、 gyalaeg song hamq yungzhab hwngfat、 baujcang beixnuengx Daizvanh vuenyungz, lienzhab gyoengq beixnuengx Daizvanh doengzcaez fanjdoiq “Daizduz”、 coicaenh doengjit, raeuz itdingh ndaej hai ok aen daengzcog gyaeundei, minzcuz fukhwng ndaejbaenz.

  Wngqdoiq daengx seiqgyaiq fatseng goekhux goenggungh veiswngh、 ginghci doek nyieg youqgaenj daengj doengh gij deuqnyex neix, gak guek hab dazfwngz baenaj. Cungguek yaek caeuq gak guek gyarengz gapguh fuengzre gaemhaed binghraq, coicaenh seiqgyaiq ginghci onjdingh, doicaenh daengx seiqgyaiq ceihleix, henhoh aen gozci dijhi aeu Lenzhozgoz guh cehsim caeuq aen gozci cizsi aeu gozcifaz guh giekdaej haenx, doidoengh cauhlaeb aen minghyinh caezcaemh vunzloih. Cungguek giendingh mbouj bienq byaij diuz roen doxhuz hwngfat, youq ndaw gya’gvangq hailangh gyalaeg caeuq gak guek doxndei gapguh, Cungguek itcig dwg gij ligliengh youqgaenj coicaenh seiqgyaiq doxhuz onjdingh caeuq hwngfat mwnhoengh.

  Gak boux daibyauj!

  Cunghvaz Minzcuz soqlaiz mbouj lau gannanz yungyiemj, gyoengq lwgminz Cungguek daihneix miz eiqceiq giendingh caeuq naengzlig dwkhingz sojmiz deuqnyex. Raeuz aeu engqgya gaenjmaed doxgiet youq seiqhenz aen Dangjcunghyangh aeu Siz Ginbingz dungzci guh cehsim, yaengx sang fan geiz hungmbwk yiengh sevei cujyi miz gij daegsaek Cungguek, aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz bae dazyinx, coh nanz roemx bae, daihdamj buekguh, cingjdaej suenqveh doicaenh fuengzre gaemhaed binghraq caeuq ginghci nem ndawbiengz hwngfat, roengzrengz guhbaenz gij moegbiu yinvu daengx bi, vih dawz guek raeuz cauhlaeb baenz aen guekak sevei cujyi yendaiva fouqgiengz、 minzcuj、 vwnzmingz、 doxhuz、 gyaeundei ndeu, vih saedyienh aen loqsiengj Cungguek —— Cunghvaz Minzcuz fukhwng hungmbwk buekguh mbouj dingz!

 ?。⊿inhvazse Baekging 5 nyied 29 hauh dienh)
Dozsiengq
自拍偷窥亚洲图片wap19uuuucom