Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

AEN BAUGAU HONG CUIGAUH YINZMINZ FAZYEN

—— 2020 Nienz 5 Nyied 25 Hauh Youq Gwnz Gaiq Cibsam Daengx Guek Yinzminz Daibyauj Daihhoih Baez Hoih Daihsam

Cuigauh Yinzminz Fazyen yencangj    Couh Gyangz
  
【Cihsaw Hung’iq : hung rauh iq】  Dajyaenq
      
Gak boux daibyauj:

  Gou daibyauj Cuigauh Yinzminz Fazyen yiengq daihhoih bauq hong fazyen,cingj saemjlwnh,caemhcaiq cingj Daengx Guek Cwnghez gak boux veijyenz daez yigen.

  Binghraq bwtndat fatseng doxdaeuj,Siz Ginbingz cungjsuhgi caenndang cijveih、caenndang baijbouh,aen Dangjcunghyangh aeu Siz Ginbingz dungzci guh cehsim,doxgiet daiqyinx daengx dangj daengx ginh daengx guek gak cuz yinzminz caezsim gaprengz、buekmingh dwkceih binghraq,ginggvaq haemzhaemz hojhoj roengzrengz le,Ciengz Ciengq Henndei Huzbwz、Ciengz Ciengq Henndei Vujhan gaenq ndaej hingz,ciengz ciengq lanzdangj fuengzre gaemhanh binghraq ndaej daengz goenglauz hungnaek,gij hong caemhcomz coiguh fuengzre gaemhanh binghraq caeuq ndawbiengz ginghci fatmaj guh ndaej ndei. Guhbaenz doengh gij saeh youqgaenj neix,goekgaen dwg youq aen Dangjcunghyangh aeu Siz Ginbingz dungzci guh cehsim neix giengzak lingjdauj,raen miz daihbaj gijndei Cunghgoz Gungcanjdangj lingjdauj caeuq sevei cujyi cidu guek raeuz,youq lajmbwn baij ok le goengrengz Cungguek、cingsaenz Cungguek、akhong Cungguek.

  Cuigauh Yinzminz Fazyen dingj hengz aen cijsi cingsaenz youqgaenj Siz Ginbingz cungjsuhgi caeuq gij gezcwz baijbouh Dangjcunghyangh,youq laj cunghyangh cwngfazveij lingjdauj,nyinhcaen hengzndei gij iugouz ciuqfap fuengzre gaemhanh,gagdingh roxnaeuz gapcaeuq mizgven danhvei ceiqdingh gij yigen gvendaengz ciuqfap fadceih yiengh famhcoih gazngaih fuengzre gaemhanh binghraq、fadceih yiengh famhcoih gazngaih henzguek cazniemh binghraq、baujndei dauq hai goeng swnghcanj,caezcienz gij hong dawzfap fugsaeh “roek onj” “roek bauj”, fatbouh 57 aen anq yienghbanj fadceih gij famhcoih nangqdaengz binghraq caeuq fugsaeh dauq hai goeng swnghcanj,roengzrengz doxbang dwk binghraq、fugsaeh daihbuenz. Gak gaep fazyen caemhcomz guhndei gij hong fuengzre gaemhanh binghraq caeuq henhoh onjdingh,saemjsat gij anq nangqdaengz binghraq 2736 gienh,coicaenh fuengzre vaqgej gij goekrag doxdawz nangqdaengz binghraq; yiemzfad gij famhcoih sienghaih ndang canghyw caeuq soemhnaj canghyw,baujhoh gij “boux soemhyiemj gouq vunz” youq mwh “dwk binghraq” dawz rapnaek; dingj aeu siujsim simndei bae vwnzmingz dawzfap,gaenxmaenx bang giyez rauh giyez iq giyez iqet gejcawz hojnanh;aeu youq dieggyae laeb anq、gwnzvangj saemjbuenq、coengmingz caephengz bae gibseiz duenhdaengx cengnauh. Fazyen coengmingz youq mwh fuengzre gaemhanh binghraq “ok bonjsaeh hung”,daengx guek fazyen youq gwnzvangj laeb anq 136 fanh gienh、haidingz 25 fanh baez,diuzgaij 59 fanh baez,denswj soengqdaengz 446 fanh baez,vangjloz genjcaz gaemhanh 266 fanh gienh,gwnzvangj dawzfap bekgai gaibaenz cienzsoq 639 ik maenz,gij cienzsoq caephengz ndaej daengz 2045 ik maenz. Gyoengq gangingj fazyen daegbied dwg gij gangingj Huzbwz caeuq Vujhan fazyen laemxsim dingq Dangjcunghyangh hauhlingh,gaenxmaenx youq gak dieg dwk binghraq, vih caemhcomz coiguh fuengzre gaemhanh binghraq caeuq ndawbiengz ginghci fatmaj guh dawzfap fugsaeh caeuq baujndei, raen baenz gij bonjcaet cwngci doiq dangj caensim、doiq guekgya caensim、doiq yinzminz caensim、doiq faplwd caensim.

  
Hong Goekdaeuz Bi 2019


  Bi 2019,Cuigauh Yinzminz Fazyen dingj aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj dazyinx,ndaej daengz aen Dangjcunghyangh aeu Siz Ginbingz dungzci guh cehsim neix giengzak lingjdauj,ndaej daengz Daengx Guek Yinzda caeuq aen cangzveijvei de gamduk rengzrwd,lai miz “seiq rox”、dinghmaenh “seiq aen gagsaenq”、guhdaengz “song aen henhoh”,yungh caez yungh ndei gij cingsaenz Cibgouj Daih caeuq Cibgouj Gaiq Ngeih Cungh、Sam Cungh、Seiq Cungh Cienzhoih dangj,haeujlaeg yungh ndei gij cingsaenz gangjvah youqgaenj Siz Ginbingz cungjsuhgi, gij vah neix dwg Siz Ginbingz cungjsuhgi youq seiz guhgoek hai aen Hoih Cunghyangh Cwngcigiz Cangzveijvei Dingq Dangjcuj Cuigauh Yinzminz Fazyen comzbauq hong fazyen le gangj,nyinhcaen hengz aen gezyi Cibsam Gaiq Daengx Guek Yinzda Baez Hoih Daihngeih,gaenjmaenh hopheux gij hong aeu guhdaengz “roengzrengz hawj vunzlai youq ndaw moix gienh anq dawzfap cungj roxnyinh goengbingz leixcingq”,dingj aeu fugsaeh daihbuenz、dawzfap vih beksingq、goengcingq dawzfap,lauxsaed hengzguh faenh hong yenfaz faplwd gyauhawj,coihawj gak hangh hong guh ndaej baenz moq,mizrengz bae dawzfap fugsaeh caeuq baujndei ndawbiengz ginghci fatmaj. Cuigauh Yinzminz Fazyen souhleix anqgienh 38498 gienh,saemjsat 34481 gienh,doengzbeij faenbied lai sang 10.7 % caeuq 8.2 %,ceiqdingh gij cekgej dawzfap 20 gienh,fatbouh gij anq dazyinx 33 aen,haenqrengz gamduk dazyinx gij hong daengx guek fazyen saemjbuenq; gak gaep fazyen deihfueng souhleix anqgienh 3156.7 fanh gienh,saemjsat、caepsat 2902.2 fanh gienh,gij cienzsoq doekbiu gietanq 6.6 fanh ik maenz,doengzbeij faenbied lai sang 12.7 %、15.3 % caeuq 20.3 %.

  It、Gaenxmaenx ronxdoeng guekgya daengxbuenz anhcenzgvanh,coihawj hwnqguh aen Cungguek an’onj suijbingz engq sang

  Dingj aeu henhoh guekgya ancienz caeuq ndawbiengz onjdingh. Saemjsat gij anq itsaemj saehfamh 129.7 fanh gienh,buenq vunzfamh 166 fanh boux. Ciuqfap yiemzfad gak cungj famhcoih,beijlumj gij famhcoih iemqhaeuj boekfan buqvaih、 dox dub dox gaj、minzcuz faenmbek、cunghgyau mbiengjyak,dingh aeu henhoh gij cwngci ancienz guekgya caeuq gij leih’ik ranghmingh yinzminz. Seizseiz doiq gij famhcoih sienghaih ndawbiengz ancienz youqgaenj,cungj aeu yiengh gaemhmingh bae hengzguh,saemjsat gij anq famhcoih dox dub dox gaj 4.9 fanh gienh,gij anq ciemqfamh caizcanj fatseng lai 27.2 fanh gienh,gij anq nangqdaengz bauqcaq、nangqdaengz guhdoj guhndauq 6.5 fanh gienh,gij anq famhcoih dox dub dox gaj youqgaenj lienzdaemh cib bi miz yiengh doekdaemq,ndawbiengz bauj guh seizseiz an’onj. Haeujlaeg bae hengz gij saeh gimqdoeg,saemjsat gij anq famhcoih nangq gaiqdoeg 8.6 fanh gienh. Gapcaeuq doengh aen bu guenjleix gouqgip, lai hawj hingzcwng caepfap caeuq saehfamh dawzfap doxciep,ciuqfap fadceih gij bouxfamh famh ancienz swnghcanj,baujndei sengmingh caizcanj vunzlai. Gapcaeuq Cuigauh Yinzminz Genjcazyen、Gungh’anhbu fatbouh gij yigen fadceih cungj famhcoih hoenx gingjcaz,caencingq henhoh sengmingh caeuq gienz caepfap yinzminz gingjcaz. Ciuqfap saemjleix buek anq yakrwix hungnaek ndeu,lumjbaenz giepdawz cigunghgyauh bae daemj vunz、youq bakdou hagdangz luenh gaj vunz、gaj boux swnh roen bengx naengh ci,doiq gij boux famhcoih gig naek ciuqfap buenq gajdai,hawj fadfamh lai miz yiengh haeplau.

  Haeujlaeg bae guh ciengz saeh cienmonz cawzraeg gyoengqhengzyak. Dingj aeu hengzndei aen fuengcim ciuqfap yiemzfad,daengx guek fazyen saemjsat gij anq famhcoih nangqdaengz hengz yak 12639 gienh 83912 boux. Ciuqfap saemjleix aen anq Sunh Siujgoj、Du Saubingz gaj vunz haem seihaiz youq cauhcangz,doiq Sunh Siujgoj、Du Saubingz doengh boux goekfamh neix, dingj aeu buenqcoih youh caephengz gajdai,ndaej guhbaenz goengbingz leixcingq. Gapcaeuq mizgven danhvei okdaiz gij yigen gvendaengz banhleix yiengh anq saehfamh gyoengqhengzyak、“dauqloh daigvanj”、 mbouj habfap cuengq daigvanj,doekdingh gyaiqhanh cwngcwz faplwd,caenbauj dwk ndaej haenq,dwk ndaej cinj. Dingj aeu “sik liengj cek muengx”,yiemzfad gij famhcoih boux guh goengsaeh nangq gyoengq hengz manz hengz yak. Hengz daengz “dwk caiz goenq lwed”,gyoebhab yungh gij guhfap buenq famhcoih caizcanj,gyaepgyau、muedsou gij doxgaiq famhfap aeundaej,daj goek canjcawz gij giekdaej ginghci gyoengqhengzyak. Guh ciengz saeh cienmonz cawzraeg neix doxdaeuj,ciuqfap fadceih le buek vunz hengz manz hengz yak lumjbaenz “gyoengqhangzciemq huqcangranz” “gyoengqhangzciemq roenloh” “gyoengqhangzciemq hawbyaek” “ndaeklanhmbanj”,hawj rumzheiq ndawbiengz cinghseuq.

  Dingj aeu yiemzhaenq fadceih famhcoih nduknaeuh. Saemjsat gij anq dam’aeu gwn’oet、dawz goengsaeh guhcaemz 2.5 fanh gienh 2.9 fanh boux,ndawde bouxdenggauq yienzlaiz dwg gij ganbu guenjleix gaepgyang 27 boux. Cinjdeng raenbaenz aen cwngcwz saehfamh soeng yiemz doxbouj,doiq Ai Vwnzlij doengh bouxdenggauq gag bae douzanq haenx ciuqfap aeu mbaeu cawqleix,doiq Hingz Yinz doengh boux nduknaeuh youqgaenj habyungh gyaeng daengxciuh. Gapcaeuq Guekgya Genhcaz Veijyenzvei, caezcienz gij guhfap hawj guekgya gamcaz caeuq saehfamh dawzfap doxciep. Gaenxmaenx boiqhab rog guek gyaep boux deuzfamh gyaep cienzcang huqcang,saemjsat gij anq bouxfamh nduknaeuh deuz youq rog guek dauq guek saemjleix 321 gienh, ciuqfap muedsou gij cienzcaiz famhfap aeundaej lumj Bungz Yuzfungh doengh boux cienj bae rog guek,nyengh mbouj hawj boux nduknaeuh mbouj deng fap、ndojdeuz fadceih.

  Caensaed hawj yinzminz ginzcung roxnyinh ancienz. Yiemzfad gij famhcoih sienghaih gijgwn gijyw ancienz,ciuqfap saemjleix gij anq hungnaek,lumjbaenz aen anq cangzswngh yizmyauz、aen anq Siuh Bingzveih swnghcanj siugai nohvaiz dwk raemx,ciuqfap fadceih gij saeh famhcoih siugai lauzraemxmok, henhoh gijgwn ancienz yinzminz ginzcung. Gij fazyen Hozbwz、Sanghaij、Gyanghsuh ciuqfap saemjleix yiengh anq saehfamh nangqdaengz gijyw ciuqcauh caengz beicinj dawz haeuj guek, cinjdeng dawzndei diuz gyaiqhanh dwg mbouj dwg famhcoih,hawj dawzfap youh mizrengz youh raeujsim. Doiq minzcuz swhcanj gejfung yiengh loxyaeuh gwnzvangj densin bienq lai neix,gapcaeuq Gungh’anhbu okdaiz cijdauj yigen,lai roengzrengz cawqfad. Yiemzfad gij famhcoih “yaeuh lwghag daigvanj”, baujhoh gij gienzik habfap lwghag. Yiemzfad gij famhcoih dub gaj canghyw,doiq cungj lumj Sunh Vwnzbinh gaj canghyw Bwzgingh Minzhangz Cungjyihyen buek bouxfamh neix, ciuqfap buenqcoih caiqlij caephengz gajdai,caencingq baujhoh aenndang caeuq gienzik habfap bouxcanghyw, henhoh gij saeh cingqciengz guh yw. Doiq gij saeh hung nyingz doxgaiq hwnjmbwn doekdauq haephangz ginzcung,okdaiz cwngcwz dawzfap,haenqrengz ciuqfap fadceih caeuq daj goek fuengzre,goenghai saemjbuenq buek anq nyingz doxgaiq hwnjmbwn doekdauq sienghaih vunzlai ancienz,henhoh gij ancienz gwnzgyaeuj yinzminz ginzcung.

  Ciuqfap caizdingh daegbied mienx coih. Nyinhcaen hengz ndei aen cujsizling daegbied mienx coih youz Siz Ginbingz cujsiz ciemfat caeuq aen gietdingh daegbied mienx coih youz Daengx Guek Yinzda Cangzveijvei guh ok,youq mwh yaek daengz seiz Cungguek moq laebbaenz 70 hopbi,ciuqfap caizdingh bouxfamh daegbied mienx coih 23593 boux,raen baenz dangj caeuq guekgya aeu fapguenj maenh lajmbwn、aeu dauhleix unq sim vunz.

  Haenqrengz dawzfap baujndei gienzvunz. Dingj ciuq saedsaeh bae guh、miz loek dingh aeu gaij,gak gaep fazyen ciuq mbaekhong saemjbuenq gamduk bae caiqsaemj gaijbuenq anq saehfamh 1774 gienh,Sanhdungh doengh aen fazyen neix, ciuqfap niujcingq cungj anq Cangh Cicauh dwg anq uengj anq loek hung. Saemjsat gij anq guekgya dienzboiz 1.8 fanh gienh,baujndei gij gienzik habfap bouxcingjgouz dienzboiz. Dingjguh famhcoih aeu fap dingh、ngeiz coih dangq mbouj coih、baengh baengzgawq caizbuenq, ciuqfap senhgau 637 boux bouxdenggauq ndaw anq guekgya dajgauq caeuq 751 boux bouxdenggauq ndaw anq gaggauq mbouj miz coih. Sanjsih fazyen ciuqfap senhgau Fan Daiying mbouj miz coih, re ok anq uengj anq loek hungnaek. Dingj hengz aen cwngcwz saehfamh soeng yiemz doxbouj, wnggai yiemz cix yiemz, wngdang soeng cix soeng, fadceih dang famhcoih. Haeujlaeg doicaenh gaijgwz aen cidu dajgauq saehfamh aeu saemjbuenq guh cungsim,cienzmienh cinjdeng habyungh aen cidu nyinh famhcoih nyinh fadceih ciuq mbaeu cawqleix. Gapcaeuq swhfazbu hawj gij anq saehfamh gienhgienh miz lizswh bangbuek, baujndei lizswh ciuqfap hengz hong.

  Ngeih、Dingj aeu seizseiz guh daengz gij leixniemh fatmaj moq, fugsaeh ginghci ndawbiengz lienzdaemh fatmaj ndeindup

  Cauh giz guh seng’eiq aeu fapguenj. fapguenj dwg giz guh seng’eiq ceiq ndei. Gak gaep fazyen saemjsat gij anq itsaemj saehseng’eiq 453.7 fanh gienh. Ceiqdingh aen yigen gvendaengz fugsaeh ndeindei fatmaj, okdaiz gij cekgej dawzfap ndaw fap gunghswh、fap buqcanj, fatbouh gij sawfaenz geiq saeh seng’eiq lwgminz ndaw hoih hong saemjbuenq, caemh yiengh habyungh faplwd caeuq caizbuenq biucinj ndeu, hawj dawzfap engqgya ronghgveng caeuq ndaej maengxmuengh. Ciuqfap saemjleix gij anq hingzcwng dajgauq nangqdaengz “cuengqgienz、gamguenj、fugsaeh” gaijgwz, haeujcoengh gij hingzcwng gihgvanh gamduk ndaej ciuqfap yungh gienz, saemjsat gij anq hingzcwng itsaemj 28.4 fanh gienh, bangcoengh hwnqguh aen cwngfuj fapguenj, gaijndei hwngfat aen dieg aeu cwngcwz faplwd guenj. Youq faenh baugau dieg seng’eiq bi 2020 seiqgyaiq yinzhangz raen miz, dieg seng’eiq guek raeuz youq seiqgyaiq baizmingz yat hwnj gig lai, gij cijbyauh “caephengz habdoengz” “banhleix buqcanj” “baujhoh bouxokcienz rauh iq” gvendaengz dawzfap neix daraen hwnj sang, ndawde “mbaekhong dawzfap ndeindup” baiz youq baihnaj, deng bingz baenz hangz dawzfap “daengx seiqgyaiq bouxsaedguh ceiq ndei”.

  Ciuqfap bingzdaengj baujhoh gij gienzik habfap gak loih hawciengz cawjdaej. Dingj guh daengz aendieg dajgauq、habyungh faplwd、cwzyin faplwd boux hai hawciengz yienghneix yienghhaenx cungj bingzdaengj, mboujlwnh giyez guekgya giyez beksingq、cienz ndaw guek cienz rog guek、giyez hung rauh iq iqet, cungj caemh yiengh doiqdaih、ciuqfap baujhoh. Dingj aeu lwgda fatmaj bae cimyawj cawqleix gij saeh mbieng caeuq canghgiyez ndaw giyez beksingq doenghbaez hai hong miz, ciuqfap faenndei niujcingq gij anq uengj anq loek nangqdaengz canjgenz mwh gonq cauxbaenz, Suhcouh Cunghyen caiqsaemj gaijbuenq aen anq Niz Gizbauj, dingj aeu loek liux gaij liux, mbangj loek mbangj gaij, loek daengz gizlawz gaij daengz gizlawz. Leixseuq sojmiz gij cekgej dawzfap daj Cungguek moq laebbaenz doxdaeuj okdaiz haenx, feiqbae 103 gienh, feiqbae sojmiz gij gvidingh doiq giyez beksingq mbouj bingzdaengj. Yiemzgimq mauhgvaq biucinj bae cazfung gaeuat funggiet caizcanj, cauhmoq habyungh gij guhfap “yaep fung yaep gaeu”, caenhliengh hawj hong giyez ngaih siuj. Yiemzgek faenbied gij cengnauh ginghci caeuq gij famhcoih ginghci、cwzyin saehminz caeuq cwzyin saehfamh、caizcanj habfap caeuq famhfap aeundaej、caizcanj gunghswh caeuq caizcanj gagboux、comzcienz habfap caeuq comzcienz mbouj habfap, doiq bouxdenggauq saedsaeh mbouj cingq、baengzgawq mbouj gaeuq, dingh aeu mbouj miz coih cuengq dauq, baujhoh gij ndangvunz caeuq caizcanj canghgiyez, coihwnj gij rengz cauhmoq cauhnieb hoengh hwnjdaeuj.

  Haenqrengz dawzfap baujhoh cihsiz canjgenz. Cihsiz canjgenz baujhoh dwg gij goekdaej baujndei rengzcoi cauhmoq, baujhoh cihsiz canjgenz couh dwg baujhoh cauhmoq、coicaenh cauhmoq. Saemjsat gij anq cihsiz canjgenz lumjbaenz conhli、sanghbyauh、cucozgenz gijneix 41.8 fanh gienh, fugsaeh cauhmoq coihawj fatmaj. Cuigauh Yinzminz Fazyen cihsiz canjgenz fazdingz ciuqfap goengbingz riengjvaiq saemjleix gij anq gauqhwnj gaepgwnz gvendaengz fatmingz、saedyungh conhli yienghmoq, coicaenh gaijndei gij vanzging fapguenj gohgi cauhmoq. Goengbingz saemjleix gij anq seng’eiq luenh yungh gwnzvangjloz dangguh hawciengz gaicawx、mbouj ciuq cingqciengz beijak, henhoh hawciengz goengbingz beijak. Gaenxmaenx habyungh aen cidu aeu dienzboiz ceihfad, gyahung gij cienzgoek famhfap ciemq aeu cihsiz canjgenz. Gij fazyen Fuzgen、Gvangjdungh saemjleix ndei gij anq Gauhdungh caeuq Bingzgoj、Vazveiz caeuq Sanhsingh baenzroix conhli cengnauh,coicaenh bouxdangsaeh ndaej youq daengx seiqgyaiq huzgaij cengnauh. Seiqgyaiq Cihsiz Canjgenz Cujciz baez nduj cienmonz okbanj gij anq Cungguek dawzfap baujhoh cihsiz canjgenz. Guek raeuz gaenq baenz aen guekgya saemjleix anq cihsiz canjgenz daegbied dwg anq conhli ceiq lai, hix dwg doengh aen guekgya saemjleix hopseiz ceiq dinj ndawde aen ndeu.

  Fugsaeh fuengzre vaqgej ginhyungz fungyiemj. Okdaiz gij cekgej dawzfap, ciuqfap fadceih yiengh famhcoih gaemhanh hawciengz cwnggen geizhuq、boux baihndaw laeglemx gaicawx. Gapcaeuq Yinzminz Yinzhangz、Yinz Bauj Genhvei、Cwnggenhvei coi yungh lai yiengh vaqgej ginhyungz cengnauh, ciuqfap baujhoh gij gienzik habfap bouxokcienz、bouxsawjngaenz ginhyungz gak fueng. Vih ndalaeb gaiq gohgi dajcauh dem gizsawqguh haeujbouh cidu gaijgwz, bae ceiqdingh gij yigen baujndei dawzfap, fugsaeh gaijgwz gij cidu giekdaej swhbwnj hawciengz. Gij fazyen Baekging、Sanghaij miz bouhloh bae coiguh gij hong dienzboiz,dienzboiz gij cienzngaenz ndaw anq hulenzvangj lumjbaenz “e cuhbauj”, ciuqfap caeuqfaenh cawqceq gij anq hungnaek nangqdaengz ginhyungz fungyiemj. Gij fazyen Yinznanz ciuqfap saemjleix gij anq mbouj habfap comzcienz lumjbaenz “Fanya Mizsaek”, gaenxmaenx gyaepgyau cawqceq gij cienzcaiz nangqdaengz anqgienh, roengzrengz bang vunzlai soudauq cienzcaiz,hawj vunzlai deng coemsied ceiq noix. Sanghaij Ginhyungz Fazyen cauhmoq gij guhfap yienghbanj buenqdingh anq cwnggen cengnauh, damqra gij roenloh moq dawzfap baujhoh bouxokcienz rauh iq.

  Fugsaeh ciengz ciengq duetgungz hojnanh. Hengz ndei guh saeq gij cwngcwz dawzfap fugsaeh lajmbanj saenqhwng, ciuqfap yiemzfad gij famhcoih ciemqhaih leih’ik vunzlai, lumjbaenz gij yaeuh bouj yaeuh bauj ngaiz daengz lajmbanj、giz gouq gungz bang hoj miz nduknaeuh、cauh doxgaiq gyaj hawj lajmbanj. Gij fazyen Sanhsih、Huznanz、Swconh、Ningzya saemjleix ndei gij anq vuenhfwngz diegdeih lajmbanj、 cienjnyiengh gienzndoengfaex、gapguh gujfwn,henhoh gij gienzik habfap bouxguhgoek haihong lajmbanj, bang dieg gungzhoj hai hoengh hangzhong. Gij fazyen Gveicouh、Sihcang caeuq Nu’gyangh、Linzya gaenxmaenx fugsaeh gij hong bang bouxgungz senj dieg beuj ranz, henhoh gij gienz bauguh diegdeih、gij gienz yungh diegranz gyoengq nungzminz, vaqgej ndei gij doxceng seiz ndaem seiz gai doxgaiq dajndaem, coicaenh ginghci ndawbiengz lajmbanj fatmaj.

  Fugsaeh hoenx ndei ciengz ciengq henhoh mbwn lamz raemx heu namh seuq. Saemjsat gij anq doxgaiq diegdeih itsaemj 26.8 fanh gienh. Saemjsat gij anq dajgauq nangqdaengz dieg ciengxmingh vunzlai youz genjcaz gihgvanh caeuq cujciz ndawbiengz ok gauq 1953 gienh, yiemzhaenq gyaepcaz gij faplwd cwzyin boux buqvaih diegdeih lumjbaenz dwkvaih goengq bya Gimangjfungh ndaw rangh bya Sanhcinghsanh. Anhveih fazyen saemjleix aen anq famhfap yungh guenjhaem baizcuengq doxgaiq miz doeg haeuj Dahcangzgyangh, hawj bouxfamhfap rapdawz saehfamh, youh aeu coihndei diegdeih. Youq Gyanghsuh Nanzgingh、Ganhsuz Lanzcouh ngamq laeb aen fazdingz gaemguenj gij anq nangqdaengz doxgaiq diegdeih seiqhenz, gyonjcomz gaemguenj gij anq nangqdaengz doxgaiq diegdeih seiqhenz ndaw sengj, bang henhoh doenghgo doenghduz gonq、saekheu fatmaj. Gij fazyen dox youq rangh dieg Dahcangzgyangh、Dahvangzhoz haenqrengz dawzfap gapguh, coihawj baujhoh doenghgo doenghduz giz dah hung caeuq guh baenzrangh ceihleix.

  Fugsaeh gaijgwz gij gezgou mbiengj gunghawj. Gapcaeuq Guekgya Fazcanj Gaijgwz Veij okdaiz aen fueng’anq gaijgwz gij cidu hawciengz cawjdaej doiqok gyavaiq laebndei, doekdaemq goekcienz doiqok, coicaenh gaiqyiengh swnghcanj yunghyinz caeuq giyez cienjyiengh swnggaep. Hawj cidu buqcanj ndaej coicaenh gyoengq hai hawciengz guhbaenz ce ndei ndek yaez、vaqgej ginhyungz fungyiemj deihfueng、henhoh ndawbiengz huzndei onjdingh, saemjsat ndei gij anq buqcanj youh doxgap moq 4626 gienh, nangqdaengz gaemcaiq 6788 ik maenz, coi gij “giyez daigyaengj” ndaej bingzonj miz bouhloh okbae caez, hawj 482 aen giyez miz roen fatmaj, doenggvaq youh doxgap moq ndaej hamjgvaq giz hoj, bang 10.8 fanh boux vunzhong giyez baujmaenh dieg guhhong. Denhcinh fazyen ciuqfap haeujcoengh guekmiz giyez cabgaij youh doxgap moq, coicaenh vaqgej gij fungyiemj guekmiz giyez dawzcaiq. Dunghva Fazyen doenggvaq gij mbaekhong buqcanj youh doxgap moq bae bang Dunghgangh Cizdonz guhbaenz “cienzcaiq cienj gujbyau”, vaqgej gij saeh yiemqcaiq soqmoeg hungloet, baujndei le gij leih’ik gyoengq bouxgaemcaiq cienzsoq noix caeuq gij leih’ik bouxhong ndaw giyez. Vaizbwz Fazyen damqra gij vunqsik huzgej giyez fangzdicanj buqcanj, coicaenh hawciengz fangzdicanj ndeindei fatmaj.

  Fugsaeh saedhengz aen canloz gvaengxdieg doxdaengh fatmaj. Okdaiz cienzmonz yigen, fugsaeh Yungzanh Sinhgih gviveh hwnqguh caeuq cauhmoq fatmaj. Gij fazyen Baekging、Denhcinh、Hozbwz vaqgej ndei gij cengnauh nangqdaengz hanghmoeg hungnaek, fugsaeh Bwzgingh Denhcinh Hozbwz dox boiqhab fatmaj caeuq couzbanh Seizdoeng Auyinvei、Seizdoeng Canzauvei. Gij fazyen Sanghaij、Gyanghsuh、Cezgyangh、Anhveih daezsang gij suijbingz dawzfap gapguh, fugsaeh gvaengxdieg Cangzsanhgoz guhbaenz caemh buenz fatmaj. Gij fazyen Liuzningz、Gizlinz、Hwzlungzgyangh comzrengz gaijndei aen dieg fapguenj seng’eiq, fugsaeh dieg Doengbaek seizdaih moq yienghyiengh saenqhwng、gizgiz saenqhwng. Gvangjdungh fazyen roengzrengz cauxguh aen dieg fapguenj goengbingz banh saeh vaiq, henhoh hwnqguh giz yienghbanj Yez Gangj Au Davanhgih caeuq Sinhcin hengzguh gonq.

  Fugsaeh ginghci cihsoq fatmaj. Haenqrengz dawzfap baujhoh gienzleih soqgawq, ndaej ndeileih dawzyungh daihsoqgawq、fatmaj ginghci cihsoq, ndeileih baujhoh yaemsei vunzbiengz. Dawzfap aeu hawj ginghci cihsoq caux aen dieg beijak ngamjhab、hailangh bauyungz ndeu. Gak gaep fazyen ciuqfap saemjleix ndei gij anq nangqdaengz gaicawx moq vunqsik moq yienghhong moq, baujndei ginghci cihsoq fatmaj ndei, coi ginghci cihsoq caeuq gyoengq dawzhong ginghci yungzhab guhndei baenaj, gya rengzcoengh moq hawj ginghci fatmaj ndeindup. Saemjleix buek anq gienzcucoz yinzgungh cinwngz、vangjloz guhcaemz yienghmoq, haenqrengz baujhoh gij gienzokbanj cihsoq、canjbinj neiyungz cihsoq. Lai roengzrengz baujhoh soqgawq ancienz caeuq yaemsei gagboux, yiemzfad gij famhcoih ciemqfamh saenqsik gagboux vunzbiengz, ciuqfap saemjleix doengh aen anq mwh yungh soujgih gag luenh doeg aeu saenqsik bouxyungh、giz vangjloz saenqyungh luenh souaeu saenqsik soqgawq gagboux; cinjdeng habyungh gij gveihcwz “doengcoenz cabae”, doiq giz gwnzvangj luenh fat gij vah bangjlaih bouxwnq, ciuq bouxdenghaih cingjgouz hatheuh de cabae gij saenqsik bangjlaih.

  Fugsaeh doiq rog hailangh suijbingz engq sang. Saemjsat gij anq itsaemj saeh seng’eiq lwgminz nangqdaengz rog guek 1.7 fanh gienh, gij anq saeh gwnzhaij seng’eiq gwnzhaij 1.6 fanh gienh. Ceiqdingh gij cekgej dawzfap aen fap bouxseng’eiq rog guek okcienz, ciuqfap bingzdaengj baujhoh gij habfap gienzik bouxokcienz ndaw guek rog guek. Okdaiz gij yigen ndalaeb fugsaeh “it rangh it loh”、fugsaeh benq dieg moq henz gangj Sanghaij Swmou Siyengih. Gij fazyen Denhcinh、Huzbwz、Gvangjsih、Cungzging、Swconh gaenxmaenx caezcienz gij banhfap dawzfap baujndei giz sawqguh ciuq iek langh gaicawx. Haijnanz fazyen haidoeng aen bingzdaiz dawzfap fugsaeh aen sokhaij ciuq iek langh gaicawx, hawj bouxokcienz ndaw guek rog guek ndaej sou saenqsik dawzfap mbouj hai cienz. Nanzgingh Haijsw Fazyen daj gijndei ndaw dieg bonjfaenh guhhwnj,gaenxmaenx fugsaeh haijyangz ginghci fatmaj. Cinghdauj Haijsw Fazyen vaqgej ndei gij anq gaeuat aen ruz “Nizlisah”, hawj gak fueng nangq saeh mbouj deng coem cienzhung, bouxdangsaeh guek rog daegdaengq gaij mingz aen ruz neix baenz “gingqcungh”, aeu neix daeuj gingqleix Cungguek dawzfap.

  Sam、Dingj aeu dawzfap vih beksingq、goengbingz dawzfap, henhoh ndawbiengz goengbingz leixcingq

  Angjcienz aen gyacizgvanh cehsim sevei cujyi. Yaengx sang fan geiz gyaezguek, yiemzfad yiengh famhcoih nyoegnyamx gozgiz gozveih gozgoh, gaiqhauh yienghnaj guekgya, baenzlawz cungj mbouj ndaej ciemqfamh. Saemjsat gij anq dajgauq gvendaengz boux yungh mingh bonjfaenh bae baujhoh leih’ik vunzlai 22 gienh, doiq gij boux ciemqhaih gienzik doengh boux vih guekgya vutmingh lumjbaenz Fangh Ciminj、Dungj Cunzsui、Vangz Gi’gvangh caeuq Muzlij boux gouqfeiz maenh’ak, yiemzhaenq gyaepcaz faplwd cwzyin, riengz laebciengz dangj bae henhoh boux vih guekgya vutmingh. Yungh ndei 《Aen Ganghyau Hengzguh Laebndei Goengdauh Vunzbiengz Seizdaih Moq》, dingj dawz cehsim gyacizgvanh sevei cujyi yungz haeuj ndaw hong dawzfap bae, yungh goengrengz fapguenj bae dazyinx yinzminz ginzcung guh baenaj guh saehndei. Gapcaeuq Gozgyah Fazcanj Gaijgwzveij laebcienz yiengh guhfap lienzhab fadgimq bouxdengcaephengz saetsaenq, haenhcoi lauxsaed dawzmaenh saenqyungh, fadgimq iekdingh saetsaenq. Saemjleix gij anq doiqboiz cienzngaenz gwnzvangj couzcomz, gveihfan vangjloz gij saeh bang vunzlai hengzguh, henhoh gij singqcingz ndei ciuhlaux bang hoj gouq nanh、simsoh gyaezvunz.

  Henhoh gij goengbingz ndawbiengz. Saemjsat gij anq itsaemj saehminz 939.3 fanh gienh, ndawde gij anq nangqdaengz gwndaenj beksingq lumj gij gyauyuz、rahong、ywbingh、ranzyouq、sawjngaenz、baujndei ndawbiengz 144 fanh gienh. Yiemzfad gij famhcoih ciemqhaih bouxndangcanz, fuengbienh bouxndangcanz dajgauq, caensaed baujndei gij habfap gienzik bouxndangcanz. Gaenxmaenx caeuqfaenh guh gij hong “hoh cienzhong”, lai saemjbuenq caephengz yiengh anq niengqyiemq cienzhong bouxlajmbanj gairengz, haenqrengz ceihfad gij famhcoih doi haihawj cienzhong, bang bouxlajmbanj gairengz gyaepaeu cienzhong 106.6 ik maenz. Fathawj ngaenzgouqbang dawzfap 11.2 ik maenz, gouq bang doengh boux ginzcung gungzhoj yaek dajgauq. Gapcaeuq Yinzswbu fat gij vwnzgen gveihfan rahong, hawj mehmbwk bouxsai seiz rahong doxdoengz, dajcauh aendieg cidu goengbingz rahong. Saemjleix ndei gij anq mehmbwk mizndang guhhong deng gejgoq、hagseng okhag rahong deng yawj dieg aeu vunz, coi guhbaenz giz sawqhengz dienzboiz vunz ndaw hawsingz lajmbanj ndangvunz deng haih caemh aen biucinj, ciuqfap baujndei gij gienzleih goengbingz、seizsaeh goengbingz、gveihcwz goengbingz.

  Coicaenh cauhlaeb ndawranz huzndei. Gyalaeg gaijgwz saemjbuenq saehranz, gapcaeuq daengx guek fulenz laebcienz gij guhfap baujhoh gienzik mehmbwk lwgnyez, engqgya yawjnaek baujhoh gij aennaj、aenndang、aensim bouxvunz ndawranz. Saemjsat gij anq gvanbaz faenranz 185 fanh gienh, haenqrengz fanj ndawranz doxhoenx, gibseiz ciemfat aen lingh baujhoh ndangvunz ancienz 2004 faenh. Gij fazyen Hoznanz Sinhyangh、Huzbwz Yauganj、Gvangjsih Yilinz haenqrengz duenhndei gij cengnauh gvanbaz ndawranz, caenhliengh hawj gij gvanbaz sim lij ndaej hapdauq haenx dauq baenzranz, hawj lwgnyez ndaej miz aen ranz miz bohmeh raeujrub; hawj gyoengq gvanbaz caen mbouj caemh sim cix faenranz haenx, mbouj hawj ndawranz ok saehhux. Yiemzfad gij famhcoih daihyak、vutgveng、sienghaih bouxgeq, saemjsat gij anq ciengx bouxgeq 2.6 fanh gienh, henhoh gij gienzik habfap bouxgeq; fazdingz saehranz giuj duenh saeh ndawranz, vaqgej ndei gij cengnauh ciengx bouxgeq, hawj gij singqcingz ndei ciuhlaux Cunghvaz Minzcuz gingqgyaez bouxlaux ndaej cienz ciuh dam ciuh, gij dauhleix yawjnaek ndawranz ciuhgeq cienz daeuj neix ciengxlwenx mboujduenh.

  Baujhoh boux caengz baenz vunzhung ndangndei hungmaj. Laebcienz cungj cidu dawzfap nyezrauh,dingj aeu naengh daizluenz daeuj saemjbuenq.Gvangjcouh Cunghyen Cinz Haijyiz fazgvanh lumj daxmeh nei bae bang gyoengq nyezrauh famhsaeh gaij loeng bienq ndei. Doenggvaq bae fazdingz nyezrauh yawjhag dawzfap, hawj nyezrauh roxyiuj baenzlawz dawzfap, hag rox gij faplwd haethaemh yungh. Ciuqfap yiemzfad gij famhcoih ciemqhaih aensim aenndang nyezrauh, doiq buek vunz famh gig naek lumj Cau Ciyungj、Hoz Lungz gyoengq boux ej loengh lwgnyez haenx, dingj aeu ciuqfap buenq guh gajdai. Gapcaeuq Minzcwngbu fat ok yigen, haenqrengz baujhoh gij lwgnyez caen mboujmiz boux ciengx, Gveicouh fazyen cienmonz dingh gij vwnzgen baujhoh gienzik habfap gyoengq lwgnyez ce youq ndawranz lajmbanj, hawj bouxboux lwgnyez cungj ndaej daengz faplwd henhoh. Haenqrengz fuengzre cawqceq gij saeh haephangz lwghag, saemjsat gij anq nangqdaengz haephangz lwghag 4192 gienh. Gapcaeuq Gyauyuzbu caezcienz gij guhfap cawqleix saeh sienghaih vunz hagdangz, ciuqfap fadceih gij boux famhfap nangqdaengz “nyoegnyaux hagdangz”. Gaenxmaenx hwnq giz sawqguh ndeu, hawj dawzfap baujhoh caeuq hingzcwng、ndawranz、hagdangz、segih baujhoh lienzdoengh, yungh dawzfap baujhoh lwgnyez ndangndei hungmaj.

  Henhoh gij leih’ik gozfangz caeuq gienzik habfap bouxbing dem vunzranz de. Cienzmienh guhbaenz fugsaeh baujndei gij hong gatduenh cienzhong bouxbing, daengx guek fazyen 5 aen senhcin danhvei、15 boux senhcin gagboux ndaej daengz Yinzsebu caeuq Cunghyangh Ginhveij cwngci gunghcozbu、houginz baujcangbu lienzhab dajciengj gangjhaenh. Yenzgiu okdaiz 15 diuz banhfap, cienmonz cujciz goengrengz, haidoeng diuz roenloh saekheu, vih guhndei gij hong coglaeng gatduenh cienzhong bingdoih bae dawzfap fugsaeh. Yiemzfad gij famhcoih buqvaih gaiqhuq bingdoih yungh、cang guh bouxbing seiqlengq yaeuh vunz, saemjsat gij anq bouxfamh nangq saehbing 484 gienh. Ginhsw fazyen baez yamq baez yamq bae haiguh giz sawqbuenq hingzcwng saehbing, ciuqfap henhoh gij gienzik habfap bingdaeuz binglwg. Gij fazyen Huznanz、Cungzging、Swconh laeb caezcienz yiengh guhfap hawj fazyen binghdoih caeuq fazyen deihfueng doxgap doxbang, Sanhdungh Linzyiz、Hoznanz Sinyangz doengh aen fazyen neix ciepcienz gij conzdungj ndei gingniemh ndei dieggeq gwzming, yungh sim yungh fap guhndei gij hong henhoh gienzik nangqdaengz bingdoih,hawj bingdoih caeuq cwngfuj、bingdoih caeuq lwgminz doxgiet.

  Baujhoh gij gienzik habfap beixnuengx Gangj Au Daiz caeuq beixnuengx vazgyauz、bouxranz vazgyauz dauq guek. Saemjsat gij anq nangqdaengz Gangj Au Daiz 2.7 fanh gienh, banhleix gij anq dawzfap doxgap doxbang 9648 gienh, saemjsat gij anq nangqdaengz vazgyauz 2475 gienh. Daihdaej guhbaenz saehseng’eiq lwgminz diegndaw caeuq Gangj Au gizgiz ndaej dawzfap doxbang caez, hai baenz aen vangjloz diegndaw caeuq Aumwnz dawzfap doxbang.Okdaiz 36 diuz guhfap dawzfap ndeileih Daizvanh, bingzdaengj baujhoh gij gienzik habfap beixnuengx Daizvanh giyez Daizvanh. Gaenxmaenx cauh diuzgen hawj Gangj Au Daiz lwghag faplwd lienh guhhong, lai hawj gyoengq bouxcoz Gangj Au Daiz doiq cidu dawzfap guekcoj engqgya liujgaij.

  Dazyinx vunz ndawbiengz lai rox vunzlai doxcaemh、lai rox gveihcwz. Aen biengz ciuhneix, vunz raeuz gvaq ndwenngoenz cungj liz mbouj ndaej gaiqdieg doxcaemh, gij saeh gveihfan gaiqdieg doxcaemh dwg gij giekdaej hawj ndawbiengz hoenghvuengh、huzndei mbouj luenh. Saemjleix gij anq fatseng youq gaiqdieg doxcaemh, yinzminz fazyen goq daengz faplwd、dauhleix、simvunz, faen dengloek, fad yak haenh ndei, roengzrengz hawj gij saeh faplwd cauhbaenz caeuq gij saeh ndawbiengz cauhbaenz doxcaemh. Saemjleix “aen anq bouxlaux caeuq lwgnyez doxdaemj byaijdeuz deng laengz dai”, buenqdingh bouxlaengz mbouj rap cwzyin, haenh gij vunz raen saeh ndei gamj bang guh. Saemjleix “aen anq bouxbingh dik canghyw fanj deng sieng”, gaijbuenq canghyw dwg cingqdangq fuengzhen, baenzbaenz mbouj guh “ndeiyak cungj haenh”. Saemjleix “aen anq daih’it bouxcawj veizsin dik vunz ok gyoengq”, haeujcoengh boux cingqdangq guenjleix gyoengqvunz, mbouj hawj vangjloz segih bienqbaenz giz dieg fapguenj mbouj daengz. Saemjleix “aen anq gag bin faex mbaet makseq doek dai”, nyinhdingh cunhveijvei mbouj famh gij saeh baujndei minghvunz, hawj bouxhenfap gaej bang gij loekca bouxwnq “hai cienz”. Saemjleix “aen anq gwnz naehang langh ma doek dah dai heuh boiz”, hawj boux gamj soemhyiemj gag rap cwzyin. Saemjleix “aen anq bouxgaijdiuq buetdeuz diuq dah dai”, ciuqfap buenqdingh gyoengq vunzlai gaemh caeg mbouj miz cwzyin, gangjbiengj boux raen saehndei gamj bang guh mbouj yungh rapdawz gij saeh hableix louzsim daiq lai. Doenggvaq saemjleix aen dam aen anqgienh, buqgej gij saeh “rex mbouj rex” “gienq mbouj gienq” “gyaep mbouj gyaep” “gouq mbouj gouq” “guh mbouj guh” “guenj mbouj guenj” dwg fungyiemj ndaw faplwd caeuq dauhleix ciengxlwenx geujheux vunzlai, dingj aeu fuengzre gij guhfap “byawz nauh ndaej haenq byawz miz leix” “byawz yak byawz miz leix” “byawz sieng byawz miz leix” yienghlawz cungj naeuz deng neix, hawj dawzfap miz goengrengz、miz dengloek、miz raeujsim; hawj vunzlai roxnyinh simraeuj、miz giz ciuq、miz baujcang, ceng guh boux vunzbiengz dawzfap Cungguek.

  Seiq、Cauhlaeb gij guhfap ak vaqgej doxdawz doxceng fuengbienh beksingq, gaenxmaenx caeuqfaenh ceihleix ndawbiengz

  Vaqgej doxdawz cengnauh dwg gij neiyungz youqgaenj ceihleix ndawbiengz. Yinzminz fazyen dwg aen saemjbuenq gihgvanh vaqgej doxdawz doxceng、 gaijgez gij saeh gitsim vunzlai. Goengbingz riengjvaiq bae vaqgej doxdawz、duenhdaengx cengnauh, dwg faenh hong youqgaenj yinzminz fazyen caeuqfaenh ceihleix ndawbiengz, hix dwg gij neiyungz youqgaenj coihawj guhbaenz buenzhong guekgya ceihleix caeuq goengrengz ceihleix yendaiva.

  Deudoeng diuz roenloh gaijgez vunzlai cengnauh. Henmaenh gij saehcingz youz gaijgwz aen cidu daenghgeiq laeb anq guhbaenz, coihawj anqgienh dangciengz laeb、gag bang laeb、gwnzvangj laeb, itdingh aeu fuengzre yiengh laeb anq nanz fanjfoek doxdauq. Fazyen byaengq douhung, hoeng mbouj ndaej boux dog gag ram saeu, dingjdawz caeuq fatmaj gij “gingniemh Funghgyauz” seizdaih moq, yungzhaeuj ndaw buenzhong ceihleix ndawbiengz aeu dangjveij lingjdauj bae, baengh yinzminz ginzcung caeuq ndawbiengz cujciz caezcaemh vaqgej doxdawz doxnauh. Gak dieg fazyen dingj aeu dawz gij cengnauh mbouj dwg dajgauq guh youqgonq, haenqrengz hawj yinzminz diuzgaij、hingzcwng diuzgaij、dawzfap diuzgaij doxlienz doxning, mbouj dwg dajgauq caeuq dajgauq doxciep, hawj aen bingzdaiz yinzminz fazyen guh vaqgej neix lai youq gwnzvangj vaqgej cengnauh, hawj gij doxdawz baihndaw yinzminz ndaej vaqgej youh vaiq youh ndei. Gij fazyen Yinznanz、Cinghhaij、Ningzya、Sinhgyangh caeuq binghdonz, cauhmoq gij guhfap diuzgaij miz minzcuz daegsaek, henhoh gij gienzik habfap gak cuz ginzcung, coi baenz minzcuz doxgiet. Cezgyangh fazyen cungjgez lai yungh gij guhfap Bujdoz、Anhgiz, gaenxmaenx caeuqfaenh buenz saeh hung ceihleix ndawbiengz, caensaed aeu doxdawz gaijgez youq mwh ngamq fat、vaqgej youq caengzlaj.

  Cauhlaeb yiengh caemhgiz guh laiyiengh vaqgej doxceng caeuq fugsaeh dajgauq. Hawj anq fukcab genjdanh faenbanh、faen ok naekmbaeu、vaiqmenh faen loh, youq giz goek fugsaeh dajgauq cauh guh diuzgaij、vaiqbuenq、vaiqsaemj caemh giz ndeu vaqgej cengnauh, hawj goengbingz leixcingq ndaej lai vaiq guhbaenz. Daengx guek fazyen giz goek fugsaeh dajgauq vaqgej anqgienh 849.7 fanh gienh, ndawde gij anq saehminz seng’eiq vaiqbuenq vaiqsaemj hopseiz saemjleix bingzyaenz beij itsaemj sukdinj 49.2%. Deudoeng diuz roenloh fugsaeh dajgauq, nyengh mbouj hawj ginzcung mbouj miz giz dajgauq, nyengh mbouj cinj ginzcung gouzcingz mbouj leixlangh. Youq dieg cungsim fugsaeh dajgauq ndaej giz ndeu banh caez、aen vangj ndeu banh doeng、hauh ndeu banh sat, gij fazyen Gyanghsih、Huznanz,youq ndaw segih lajmbanj ndalaeb gauqyungh fugsaeh dajgauq, hawj ginzcung caeuqfaenh dajgauq engq vaiq engq fuengbienh.

  Doigvangq yiengh fugsaeh dajgauq hamj dieg laeb anq. Youq daengx guek cungj guh gij fugsaeh dajgauq hamj dieg laeb anq, bouxdangsaeh ndaej genj youq aen fazyen gyawj gyau laeb anq sinhcingj, mbouj yungh buet bae buet dauq. Baekging、Denhcinh、Hozbwz、Cangzsanhgoz、Cuhsanhgoz gij dieg neix,daiqdaeuz guhbaenz daengx dieg hamj dieg laeb anq ndaej doeng caez, daengx guek gij fazyen gaepgyang、gaeplaj caeuq fazyen saehhaij cungj ndaej guh daengz hamj dieg laeb anq fugsaeh caez, cungj vunqsik moq “youq bakdouranz dajgauq” neix caen ndaej gaijgez gij vwndiz ginzcung youq dieg wnq dajgauq mbouj fuengbienh.

  Daj vaqgej cengnauh caengzlaj mbanj singz guhhwnj. Yungh ndei daengx guek 10759 aen yinzminz fazdingz, gaenxmaenx caeuqfaenh ndaw yienh caengzlaj ceihleix, gungh diuzgaij、 saemjsat anqgienh 473.1 fanh gienh. Gij yinzminz fazdingz Yenzanh、 Sinzvuh、Liengjdangh dingj aeu guh daengz ginzcung gangj saeh、saehminz soh gangj、 fazgvanh gangj fap, gibseiz vaqgej doxdawz cengnauh, fugsaeh lajmbanj saenqhwng. “Fazdingz laengmax” “fazgvanh gyoiaemq” bin bya dangh raemx, daengz gyaeujreih gyaeujnaz, haeuj ranz beksingq bae, roengzrengz guh daengz gizlawz aeu dawzfap, yinzminz fazdingz dawzfap fugsaeh couh gizlawz.

  Haj、Henmaenh gij saeh gubhaenz “daihdaej gaijgez caephengz nanz”, hawj caephengz cungj dwg suijbingz sang

  Ciuq seiz guhbaenz gij saeh “daihdaej gaijgez caephengz nanz” le, yinzminz fazyen gaemndaet hong caephengz mbouj cuengq, mboujduenh bae henmaenh gij saeh guhbaenz “daihdaej gaijgez caephengz nanz”, coh giz caencingq gaijgez caephengz nanz neix guh baenaj. Bi 2019, daengx guek fazyen gungh souhleix caephengz anqgienh 1041.4 fanh gienh, caephengz sat 954.7 fanh gienh, gij cienzsoq caephengz ndaej 1.7 fanh ik maenz, doengzbeij faenbied hwnj 17.4%、22.4% caeuq 10.8%, gij cijbyauh gak hangh caephengz onjdingh caiq miz daezswng, gij cidu、guhfap caeuq vunqsik caephengz miz daegsaek Cungguek engq laebcaez.

  Gyalaeg gyoebhab ceihleix、dajgoek ceihleix. Nyinhcaen yungh caez yungh ndei aen “Vwnzgen 1 Hauh” Bi 2019 Cunghyangh Cienzmienh Ciuqfap Guenj Guek Veijyenzvei, hawj gij guhfap hamj bumwnz ndaej daengxbuenz gamguenj caeuq lienzhab fadgimq caezcienz, henmaenh haigvangq buenzhong gyoebhab ceihleix caephengz nanz. Hozbwz、Gyanghsih、Hoznanz、Sanjsih doengh dieg neix, cienzmienh ciuqfap guenj swngj veijyenzvei dingh ndei yungh ndei yigen,Huznanz Swngj Yinzda Cangzveijvei cienmonz okdaiz vwnzgen,haeujcoengh fazyen caensaed gaijgez caephengz nanz. Nyinhcaen yungh ndei gij saemjlwnh yigen daibyauj,dingh ndei hengz ndei aen fazcanj ganghyau haj bi hong caephengz,laebcienz gij guhfap ndei ciengxlwenx yungh,caenbauj gij biucinj gvaq mwh hojnanh le mbouj doekdaemq、 goengrengz mbouj bienq noix. Dingh ndei gij yigen lizswh caeuqfaenh caephengz,hawj gyoengq caixhangz lai dawz dungxcaiz okdaeuj. Ciuq Daengx Guek Yinzda Cangzveijvei baijbouh,boiqhab guh gij hong laeb aen fap saehminz ap hawj caephengz,coihawj laebcienz aen cidu caephengz gij faplwd miz daegsaek Cungguek.

  Aeu simndei bae caephengz、vwnzmingz bae caephengz. Dingj aeu ciuqfap goengbingz caephengz dahraix, roengzsim dwkceih gij vunz ndojdeuz doidingj caephengz, baujndei gij gienzik habfap boux hingzsaeh dajgauq. Dingh gij yigen aeu simndei vwnzmingz caephengz,gaijndei gij saeh cazfung、bienqgyaq,hawj gij giyez cingqciengz hai hong swnghcanj neix deng ngaih ceiq noix. Doiq gij giyez goenq cienz hoeng miz rengzndumj fatmaj, mizmuengh ndaej gouqdauq, yungh gij fuengsik dazyinx doenggvaq caeuq faenseiz hengzguh、gyoebgyonj doxgap moq bae caephengz, Laebguh yiengh faen gaep guenjleix fadgimq saenqyungh caeuq coihndei saetsaenq,yiemzgek gij diuzgen mbaekhong cawqfad saetsaenq,cinjdeng bae saedhengz gij saenqyungh gimqfad. Ciuqfap gibseiz siucawz mingzcoh ndaw mbawdan saetsaenq 208.3 fanh vunz baez,doengzbeij hwnjsang 19.3%. Cienjbienq gij leixniemh hong caephengz,youz doenghbaez aeu ceihfad guhgoek bienqbaenz gimqfad caeuq haenhcoi caez yawjnaek,gij fazyen Cezgyangh Ningzboh、Fuzgen Ningzdwz coihengz yiengh gagrox aeu gikcoi bae guh,coihawj gij saeh gagrox hengzguh gyalai haujlai,cauhbaenz yiengh ndawbiengz haenhndei soujsaenq.

  Lai roengzrengz gaijgez gij vwndiz ginzcung fanjyingj haenqrem. Doiq gij anq nangqdaengz beksingq gwndaenj、saeh cienzngaenz、niengqyiemq cienz giyez lwgminz,caezcomz guh daengx hangh caephengz. Mwh caezcomz caephengz,daengx guek fazyen caephengz sat gij anq nangqdaengz beksingq gwndaenj 21 fanh gienh,gij cienzsoq caephengz ndaej 98 ik maenz,hawj vunzlai roxnyinh ndaej daengz engq lai. Caephengz sat gij anq nangqdaengz saeh ngaenzcienz 47 fanh gienh,gij cienzsoq caephengz ndaej 2000 ik maenz. Caephengz sat gij anq niengqyiemq giyez lwgminz 5870 gienh,gij cienzsoq caephengz ndaej 127 ik maenz,caensaed baujhoh gij gienzik habfap giyez lwgminz、giyez rauh iq.

  Roek、Gyalaeg gaijgwz buenz cidu dawzfap caeuq hwnqguh fazyen coengmingz,mboujduenh hawj dawzfap ndeindup riengzvaiq caeuq vunzlai saenqfug

  Goengbingz caeuq banh vaiq dwg gij saeh dijcienz yinzminz fazyen ciengxlwenx gouzaeu guh daengz. Bungzdaengz yiengh seiqdaeuz anq daengx seiqgyaiq daegbied dwg anq saehminz seng’eiq lienzdaemh hwnj haemq vaiq,Cungguek fazyen dawz aen fueng’anq bonjfaenh baenzlawz bae guh okdaeuj. Dou mbouj ndaej byaij diuz roen mboujduenh gya benhci dem vunz,youh mbouj ndaej byaij diuz roen hanhhaed laeb anq、genjleh laeb anq、doi vunzlai gouzsaeh,itdingh aeu baengh gyalaeg gaijgwz dawzfap、hwnqguh fazyen coengmingz,gyavaiq coiguh buenz hong saemjbuenq caeuq saemjbuenq guh daengz yendaiva.

  Haeujlaeg gaijgwz buenz cidu gyoebhab boiqdauq dawzfap. Gvaengh cwngfaz aeu doeng caez gij yigen hengzguh gizgiz gyalaeg gaijgwz,fat faenh gaijgwz ganghyau yinzminz fazyen daihhaj aen hajbi, coicaenh gak hangh gaijgwz guh ndaej baenzroix caezcomz、doxbang akguh. Yungh ndei aen fap cujciz caeuq aen fap fazgvanh yinzminz fazyen coihdingh moq, laebcaez gij fuengsik boiqdauq fugsaeh dawzfap,hawj gijndei ndaw cidu dawzfap yiengh sevei cujyi miz daegsaek Cungguek cienjvaq baenz yaunwngz ceihleix. Yungh ndei aen fap bouxbuenxsaemj yinzminz,gya’gvangq gij dieg caeuqfaenh saemjbuenq,daengx guek bouxbuenxsaemj caeuqfaenh saemj anq 340.7 fanh gienh. Ciuq Daengx Guek Yinzda Cangzveijvei hawj gienz,youq 15 aen swngj 20 aen singz haiguh gij hong sawq gaijgwz saehminz dajgauq,hawj mbaekhong fukcab genjdanh doxfaen,doenggvaq cidu cauhmoq gikfat dawzfap baenzrengz,gyangqdaemq cienzgoek dajgauj,yungh gij banhfap laiyiengh、guh ak、guh vaiq bae diuzhuz gij cengnauh gyoengqvunz.

  Gizgiz yungh ndei gij cidu dawzfap. Laebcaez gij guhfap ndaw buenz hong gaem gienz saemjbuenq,guh daengz cuengq gienz miz bouhloh、 boiq gienz gohyoz、yungh gienz gveihfan、yiemzgek haed gienz,haeddingh gienzgaem saemjbuenq caeuq mbawdan cwzyin,doekdingh gij gienzhanh caeuq cwzyin yencangj dingzcangj、saemjbuenq cujciz、fazgvanh,naenxnet cwzyin yencangj dingzcangj gamduk guenjleix saemjbuenq,guh daengz miz gienz dingh aeu miz cwzyin、yungh gienz dingh aeu dawz cwzyin、guhhong loek dingh aeu caz cwzyin、luenh yungh gienz dingh aeu gyaep cwzyin. Hawj gij cekgej dawzfap、gij anq yienghbanj dazyinx lai yungh youq hong dawzfap,coi yungh gij guhfap bikhawj diemjvangj cazra anq caemh yiengh caeuq anq doxnangq,caezcienz gij fuengsik guhhong saemjbuenq veijyenzvei,coi guhbaenz saemjbuenq caemh biucinj. Gyalaeg gaijgwz gij yenzngwzci fazgvanh, haenqrengz guh ndei gij hong genjaeu fazgvanh,laebcienz gij fuengsik fazgvanh ndaw doih swngj gaep caemhcouz、ciuq saehseiz diuzcwngj caeuq vuenhdieg hwnj banh,guh daengz miz haeuj miz ok、boux ndei ce boux yaez ok. Sanhsih、Neimungzguj、Cungzging doengh dieg neix,guh ndei guh saeq gij cwngcwz baujndei hengzguh cizcwz,gikcoi fazgvanh goengbingz banh anq、goengbingz dawzfap.

  Damqra gij vunqsik moq hulenzvangj dawzfap. Hawj gij fazyen hulenzvangj Baekging、Hangzcouh、Gvangjcouh guhbaenz “dazyinx” hong dawzfap,lai haiguh “gij anq gwnzvangj youq gwnzvangj saemjleix”,caezcienz gij gveihcwz youq gwnzvangj dajgauq,hawj vunzlai fuengbienh youq gwnzvangj dajgauq. Gizgiz hai yungh “aen fazyen iq Cunghgoz Yizdung”,coihawj denswj fugsaeh dajgauq coh gyaeuj Yizdung fatmaj,dazyinx seiqgyaiq hwng yungh yizdung denswj dajgauq. Saemjleix buek anq “dangseiz boq daiqhuq” , doekdingh gij gveihfan、henzgyaiq gienzleih caeuq cwzyin giz gwnzvangj,saemjleix gij anq famhfap hulenzvangj “laeglemx yungh liuzlieng”,coihawj gwnz vangjloz ceihleix guhbaenz fapguenj. Youq Uhcin Hengzbanh Seiqgyaiq Hulenzvangj Fapguenj Lundanz,hawj hulenzvangj dawzfap biengz caeuq biengz doxgap lailai,hawj gwnzvangj cauhbaenz giz caezcaemh baujmingh vunz lajmbwn.

  Coi lai yungh gij gisuz daihsoqgawq、cangcihsoq doxdaep. Lai yungh daihsoqgawq dawzfap,guhbaenz daengxgienh baugau 806 faenh,hawj ceihleix gij saeh nyingz doxgaiq hwnj mbwn doekdauq、baujhoh gij gienzik mehmbwk lwgnyez guh canhgauj. Hwnq baenz aen bingzdaiz dawzfap cangcihsoq doxdaep daengx guek caezcaemh,cauhmoq gij fuengsik youq gwnzvangj baujcunz baengzgawq,coihawj gaijgez gij vwndiz denswj nanz aeu baengzgawq、 nanz baujcunz baengzgawq、 nanz nyinhcingq. Youq mwh caephengz yungh gij gisuz hab’iek yiengh’uk baenz aen cangcihsoq doxgaep,hawj caephengz engqgya gveihfan. Lai yungh yiengh dingzsaemj yungh sing’vah nyinhrox、yiengh’uk gaij sawcingz、yiengh’uk “saenq fap” soengq hawj,vih fazgvanh banh anq、ginzcung dajgauq guh gij hong doxbouj.

  Hawj dawzfap lai gvengrongh. Aen Vangj Sawfaenz Caizbuenq Cungguek biengjgangj sawfaenz 9195 fanh faenh,Aen Vangj Biengjhai Gij Saenqsik Mbaekhong Anqgienh Cungguek Saemjbuenq hawj bouxdangsaeh yawjdaengz 2900 fanh gienh,biengjhai saenqsik 15 ik hangh,hawj goengbingz dingj ndaej vunzlai homx yawj. Aen Vangj Dangseiz Biengjhai Anqgienh Cungguek Dingzsaemj 696 fanh gienh,237 ik boux baez ngonzyawj,youq gwnzvangj bengxdingq dingzsaemj bienqbaenz aen bingzdaiz moq vunzlai ei fap hag fap souj fap yungh. Gvaq lai bi sizcen le,gij fuengsik dawzfap hailangh gvengrongh fuengbienh beksingq haenx, engqgya bienq ndei dinghyiengh,gyalai fatmaj sevei cujyi fapguenj vwnzmingz.

  Dawzfap gaijgwz caeuq fazyen coengmingz dwg “song aen loekci、song fwed duzroeg” guhbaenz buenzhong saemjbuenq caeuq mehrengz saemjbuenq ndaw yinzminz fazyen,hawj hong saemjbuenq guh ndaej engq ndei engq vaiq. Bi 2019, gij fazgvanh daengx guek fazyen bingzyaenz moix boux banh anq 228 gienh,doengzbeij demmaj 13.4%;gak loih anqgienh itsaemj gvaqlaeng bouxdangsaeh fug buenq dingz gauq ciemq 89.2%,ngeihsaemj gvaqlaeng ciemq lai daengz 98.2%;gij cungjsoq saenqcazsaeh nangqdaengz dajgauq、gij saeh haeuj Bwzgingh cazsaeh nangqdaengz dajgauq doengzbeij faenbied doekdaemq 13.3% caeuq 40%; gij anq hulenzvangj fazyen bingzyaenz saemjleix hopgeiz 42 ngoenz,beij vunqsik ciuhcienz yungh sukdinj 57.1%.

  Caet、Dingjbyaij aen fuengyiengq guhbaenz gwzming、cwnggveih、conhyez、cizyez,lai roengzrengz cauh ndei doihvunz yinzminz fazyen

  Seizseiz dawz cwngci gensez dangj cuengq youq giz daih’it. Haeujlaeg hagsib yungh ndei Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz,caensaed yungh daeuj cang uk、 dazyinx ningndang、 coihawj guhhong,laemxsim dingj aeu dangj seizseiz lingjdauj hong dawzfap. Caensaed sonyinx guh daengz “mbouj lumz simnduj、geiqmaenh diuzrap”,ciepsouh gij swhsiengj cwngci laegdaeuq son’gyauq,dazyinx gyoengq gangingj geiqmaenh diuzrap simnduj、caensim rapdawz faenhhong. Nyinhcaen hengzndei 《Cunghgoz Gungcanjdangj Cwngfaz Gunghcoz Diuzlaeh》,aeu dangj daeuj lingjdauj daengxbuenzhong fazyen. Dingj aeu dangj gensez daeuj daiq doihvunz gensez coiguh saemjbuenq,roengzrengz cauhlaeb aen gihgvanh yienghndei hawj Dangjcunghyangh cuengqsim、hawj yinzminz ginzcung habhoz. Nyinhcaen ciepsouh cunghyangh liebyawj,haenqrengz cingjgaij vwndiz. Gak gaep fazyen hengz hag Couh Bizvaz,daengx guek fazyen nyoenx ok buek vunz yienghndei seizdaih moq lumj Lij Gingginh dawzfap goengbingz、dawzfap vih beksingq ndeu,532 aen cizdij、661 boux gagboux ndaej Cunghyangh doengh aen bumwnz gaemguenj haenx byaujcangh,Baekging fazyen Sung Yizsuij、Liuzningz fazyen Danz Yen、Hwzlungzgyangh fazyen Sunh Boh、Sanghaij fazyen Couh Bizvaz、Fuzgen fazyen Vangz Cili ndaej aen mingzdaeuz “boux buekguh ceiq gyaeu”,gyoengqde aeu caensim lienzdaengz diuzmingh gejgangj aen simnduj yinzminz fazgvanh.

  Mboujduenh gensez naengzlig dawzfap. Son’gyauq gangingj 61.5 fanh vunz baez. Cauhmoq gij fuengfap gungganq bouxcaixhangz fapguenj,lailai caeuq daihhagdangz doxgap,gaenxmaenx caeuqfaenh hai dangz cienzmonz daihgangj saehsaed Cungguek cwngfaz,coihawj hong dawzfap caeuq son hag gohyenz gaenjmaed giethab. Sienjbaij 851 boux fazgvanh caeuqfaenh son’gyauq hagsib gij saeh nangq rog guek. Gungganq gij vunz caixhangz dawzfap nangqdaengz rog guek. Lai hwnqguh giekdaej caengzlaj, gaijndei diuzgen hong caengzlaj, lai roengzrengz hwnqguh fazyen caeuq gungganq bouxcaixhangz dieggeq gwzming、dieg minzcuz、dieg henzguek、dieg gungzhoj. Gungganq gij fazgvanh rox song cungj vah 1345 boux,gij fazyen Neimungzguj、Sihcang、Cinghhaij、Sinhgyangh gaenxmaenx caeuqfaenh “yiengh hong yungh song cungj vah okbanj faplwd vwnzva”,hawj ginzcung dieg minzcuz ndaej yungh gij saw dawzfap aeuyungh.

  Seizseiz cungj aeu ndang cingq gijliz yiemz. Yiemzgek hengz cingq gij cingzsaenz cunghyangh bet hangh gvidingh caeuq doengh diuz vehsaeh saedhengz cunghyangh bet hangh gvidingh,caensaed gaijgez gij vwndiz hingzsiz cujyi、gvanhliuz cujyi githeux caengzlaj. Giethab baez cienzmonz sonyinx gyonjcomz ceihcoih gij saehcingz youh lai youh naek,caensaed gaijgez gij saeh “laj daeng laep”. Yiemzgek hengz ndei “faenh hong ndeu song diuzrap”,hawj guh saeh loeng dingh deng cazbanh bienqbaenz yiengh hong ngoenznaengz. Dingj dawz bakcax coh baihndaw,yiemzfad boux dawzfap nduknaeuh di mbouj nyiuzcingz,dingj aeu cawzseuq gij vunz haih gyoengq. Cuigauh Yinzminz Fazyen cazbanh gij gangingj famh gijliz famh fap ndaw fazyen 11 boux,gak gaep fazyen cazbanh gij gangingj yungh gienz saemjbuenq caephengz famh gijliz famh fap 1374 boux,ndawde gyaepcaz cwzyin saehfamh 115 boux. Doiq gij saeh daraen ngaih daengz dawzfap cenghseuq lumjbaenz gij yiengh famh gvidingh cazcam anqgienh、famh dangsaeh baexndoj、caencik baengzyoux muenz coh dingjlawh daihleix,lai guh gag caz gag gaij, yienghyiengh gaijcingq caez. Lai guh gij saeh son’gyauq singjgaeh,aeu gij anq famh fap famh gijliz guh bonjsaw fanjmienh son’gyauq,geiqmaenh roxhit,naeuz ndeu rox song,saek red conghroh,laebcaez guhfap,cauh giz dawzfap rumz seuq heiq cingq ndeu.

  Bet、Gagrox ciepsouh gamduk,gyaak caeuq gaijndei gij hong yinzminz fazyen

  Ciuqfap ciepsouh yinzda gamduk,nyinhcaen hengz ndei gij gezyi Gaiq Cibsam Daengx Guek Yinzda Baez Hoih Daihngeih caeuq gij yigen genyi daibyauj daezok,baez gienh baez gienh faengoeng,haenqrengz gaenlaeng gamduk cazbanh. Nyinhcaen hengz ndei gij yigen saemjlwnh youz Daengx Guek Yinzda Cangzveijvei cienzmonz doiq hangh baugau gaijgez caephengz nanz daezok,youh cienmonz baugau gij saeh hengzguh. Cienmonz bauq gij hong saemjbuenq saehfamh hawj Daengx Guek Yinzda Cangzveijvei,ciuq gij yigen saemjlwnh,doihawj gij hong saemjbuenq saehfamh seizdaih moq fatmaj. Nyinhcaen banhleix gij genyi daibyauj 355 gienh,banhleix gij genyi ngoenznaengz 395 gienh,seizseiz maedcaed doxdoeng,caenh lai yungh gij yigen daibyauj. Iucingj daengx guek yinzda daibyauj cazyawj fazyen、camgya hai hoih、youq henz dingq dingzsaemj, gij saeh neix hengz 1492 vunz baez, cienzmonz cingj daibyauj caezcaemh diuyen dawzfap baujhoh doenghgo doenghduz rangh dieg Dahcangzgyangh、Dahvangzhoz. Nyinhcaen ciepsouh minzcuj gamduk,banhleix cwnghez daezanq 173 gienh,cunzcaz ciepdaih Daengx Guek Cwnghez veijyenz 180 vunz baez. Caeuq minzcuj dangjbai、gunghsanghlenz nem boux mbouj haeuj dangjbai lai doengcoenz,gvangqlangh dingqaeu gak fuengmienh yigen. Caengzcaengz yungh ndei aen fap gamcaz,gagrox ciepsouh genhcaz gihgvanh gamduk boux guh saeh fazyen. Ciuqfap ciepsouh genjcaz gihgvanh gamduk dajgauq,goengbingz saemjleix gij anq dingjgauq,nyinhcaen banhleix gij genyi genjcaz. Gvangqlangh ciepsouh ndawbiengz gamduk,gaenxmaenx mbeguh gij saeh daegbied iekcingj bouxgamduk、daegbied cingj bouxcazcam、bouxcaixhangz damzgangj diuyenz、caemhhai hoih saemjlwnh. Lai caeuq sinhvwnz meizdij dox doengcoenz,lai haiguh gij saeh hawj daengx meizdij dangseiz cienzboq,gag bae ciepsouh vunzlai gamduk.

  Gak boux daibyauj,gij hong yinzminz fazyen ndaej fatmaj,goekgaen dwg miz aen Dangjcunghyangh aeu Siz Ginbingz dungzci guh cehsim neix giengzak lingjdauj,dwg youq Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz gohyoz dazyinx. Yinzminz fazyen ndaej guh baenz hong,dwg Daengx Guek Yinzda caeuq aen cangzveijvei de haenqrengz gamduk,Gozvuyen roengzrengz bangcoengh,Daengx Guek Cwnghez minzcuj gamduk,Guekgya Genhcaz Veijyenzvei、Cuigauh Yinzminz Genjcazyen gamduk,gak minzcuj dangjbai、gunghsanghlenz、yinzminz donzdij、boux mbouj haeuj dangjbai guh minzcuj gamduk,gak gaep dangj cwng gihgvanh deihfueng、Daengx Guek Yinzda daibyauj、Daengx Guek Cwnghez veijyenz caeuq gyoengq yinzminz ginzcung gvansim haeujcoengh cij aeundaej. Youq gizneix,gou daibyauj Cuigauh Yinzminz Fazyen caensim gyo’mbaiq!

  Dou singjsag rox daengz,gij hong yinzminz fazyen lij miz haujlai giz guh mbouj ndei: It dwg gij sim dawzfap、 gij rengz dawzfap caeuq gij seizdaih moq iugouz moq doxbeij lij cengca haemq hung,gij rengz dingjdoiq fungyiemj、fugsaeh ndeindei fatmaj lij aeu haenqrengz. Ngeih dwg doiq gij saeh moq vwndiz moq seiz ginghci ndawbiengz fatmaj miz youq ndaw hong dawzfap, yenzgiu mbouj gaeuq,ok di vwndiz anqgienh caizbuenq biucinj mbouj doengz. Sam dwg gaijgwz buenzhong gyoebhab boiqdauq dawzfap miz di guh mbouj daengz caez. Gij guhfap gaemhanh gamduk cidu guenjleix saemjbuenq caeuq gienz saemjbuenq mbouj gaeuq caezcienz. Seiq dwg youq doengh giz cihsiz canjgenz、hulenzvangj、nangqdaengz rog guek,gij vunz caixhangz saemjbuenq suciz sang neix giepnoix,gij hong gungganq vunz caixhangz lij aeu gaijndei dem. Haj dwg gij saeh dawzfap ndang mbouj cingq、fwngz mbouj seuq, seiz mbouj seiz fatseng,mizmbangj gangingj aeu anq maeuz leih bonjfaenh、 gai gienz aeu cienz,lij guh “ndaekgangliengj” hawj gyoengqhengzyak, gij hong dangjfungh lenzcwng gensez caeuq gij doucwngh fanj nduknaeuh lij hojnanh naekcaem. Roek dwg mizmbangj fazyen vunz anq doxdawz lai、diuzrap banh anq naek,mizmbangj fazyen caengzlaj dieghenz youq gyae lij miz gij vwndiz ciu vunz nanz、louz vunz nanz haenx haemq lai. Dou yaek youq laj dangj lingjdauj,yungh banhfap baenzrengz bae gaijgez doengh gij vwndiz neix.

  
Gij Anbaiz Hong Mboengq Laeng


  Bineix dwg bi haepsat cienzmienh hwnqbaenz aen biengz siujgangh caeuq “13·5” gveihva,hix dwg bi gietdingh gij hong duetgungz hojnanh neix baenz rox mbouj. Ginghci ndawbiengz guek raeuz fatmaj deng ciengz binghraq bwtndat cungdongj doenghbaez caengz miz gvaq,hawj ndaw guek rog guek miz yiengh ngaihsaeh youqgaenj doenghbaez caengz miz gvaq,gij hong dawzfap hix bungzdaengz gij gitgaz doenghbaez caengz miz gvaq,diuzrap hung youh naek. Yinzminz fazyen aeu seizseiz yungh Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz daeuj dazyinx,yungh caez yungh ndei gij cingsaenz Cibgouj Daih caeuq Cibgouj Gaiq Ngeih Cungh、Sam Cungh、Seiq Cungh Cienzhoih dangj nem Cunghyangh Cwngfaz Gunghcoz Veiyi,haeujlaeg hagsib yungh ndei gij cingsaenz bien gangjvah youqgaenj Siz Ginbingz cungjsuhgi,neix dwg de youq seiz guhgoek hai aen Hoih Cunghyangh Cwngcigiz Cangzveijvei dingq aen dangjcuj Cuigauh Yinzminz Fazyen bauq hong le gangj,nyinhcaen hengz ndei gij gezyi baez daihhoih neix,ndawsim miz daengxbuenz canloz Cunghvaz Minzcuz fukhwng hungmbwk caeuq buenz bienqvaq hung seiqgyaiq bak bi caengz miz gvaq,dingj aeu dangj seizseiz lingjdauj hong dawzfap,dingj aeu yinzminz guh goek, dingj aeu hong dawzfap youq seiz bingzmaenh gouz baenaj,rox bienq saeh yiemj baenz saeh ndei,lai bae hengzguh faenh hong gwnzndang,ciuqfap henhoh daengxbuenz ginghci fatmaj caeuq ndawbiengz onjdingh,vih caemhcomz doxcoi fuengzre gaemhanh binghraq caeuq ginghci ndawbiengz fatmaj,caenbauj guhbaenz gij hong duetgungz hojnanh dingh seiz guhbaenz,hawj hwnq baenz aen biengz siujgangh caez, guh dawzfap fugsaeh caeuq baujndei baenzrengz.

  It dwg roengzrengz fugsaeh caeuq baujndei fuengzre gaemhanh binghraq baenz yiengh hong ngoenznaengz caeuq ginghci ndawbiengz yienghyiengh dauq ndei caez. Youq mwh guh yiengh hong ngoenznaengz fuengzre gaemhanh binghraq neix,guh ndei dawzfap dingjdoiq,ciuqfap baujndei gwndaenj caeuq aenndang yinzminz,hawj dawzfap lai ndaej coicaenh fatmaj、baujmaenh gij saeh maengx gonq、baujndei gwndaenj beksingq,ciuqfap hawj gij cwngcwz guekgya ndei giyez neix ndaej hengz ndei yungh ndei,cinjdeng bae fugsaeh guhndei gij hong “roek maenh”、guh daengz faenhhong “roek bauj”. Dingj aeu gaijgez yiengh doxceng mbouj dwg dajgauq neix guh youq baihnaj,yawjnaek yungh gij yiengh huzgej lumj diuzgaij、caephengz daeuj vaqgej ndei gij doxdawz doxceng aenvih binghraq cauxbaenz, youq gwnz loh fapguenj baujndei yiengh hong fuengzre gaemhanh binghraq. Ciuqfap cinjdeng habyungh gij gveihcwz dingh maenh neix,hableix bingzyaenx gij leih’ik bouxnangqsaeh,dazyinx gak mbiengj caez rap fungyiemj、caemh dwkroengz hojnanh. Dingj aeu gij siengjfap simndei vwnzmingz bae caephengz,itdingh aeu gimqraeg mauhgvaq biucinj cazfung、 luenh cazfung, rox yungh gij banhfap “ndaej fung ndaej hai”,hawj gij cienzcaiz giyez ndaej yungh cauhguh ceiq lai. Doenggvaq gij mbaekhong buqcanj caiq doxhab、huzgaij neix,bang giyez vaqgej veizgih、duetgungz dauq hwng. Lai yungh gij fuengfap dawzfap, caenhrengz bauj giyez daegbied giyez rauh iq ndaej lix, baujndei caeuq coihawj ra ndaej hong. Ciuqfap vaqgej ndei gij doxceng ndaw doengh giz cuengqcienz sawjngaenz、dajhwnq yienghmoq,vih hengz aen canloz hawj huq ndaw guek gaisiu lai cauh giz fapguenj ndei. Ciuqfap dwkceih saeh dungxbwn ndojdeuz dawzcaiq. Ciuqfap goengbingz riengjvaiq bae saemjleix gak loih anq nangqdaengz guekrog,fugsaeh gya’gvangq doiq rog hailangh caeuq caezhwnq “it rangh it loh” fatmaj ndeindei,haeujcoengh hwnqguh Haijnanz Swyouzgangj. Gyalaeg biengz caeuq biengz baedauq gapguh dawzfap,coihawj daengx seiqgyaiq doxgap yungh fapguenj dingjhoenx binghraq,fugsaeh cauhlaeb giz bouxvunz caemh youq ciengxmingh. Cungguek fazyen yaek yiemzgek ciuqsouj gozcifaz caeuq gij gihbwnj yenzcwz biengzbiengz caemhnyinh,laemxsim henhoh gij cawjgienz dawzfap caeuq gij guekgya ancienz guek raeuz.

  Ngeih dwg roengzrengz fugsaeh hwnqguh aen Cungguek an’onj suijbingz engq sang. Yiemzhaenq dwkceih gij vunz gauj iemqhaeuj、buqvaih、boekfan、faenmbek. Ciuqfap fadceih gij famhcoih laengzgaz ciengzseiz fuengzre gaemhanh binghraq,laemxsim henhoh guekgya ancienz、swnghvuz ancienz、swnghdai ancienz、 veiswngh vunzlai ancienz caeuq ndawbiengz onjdingh. Aeu hengz dawzfap bae coiguh laebcaez buenz veiswngh vunzlai,dawzrem caeuq caezcienz gij fapguenj baujndei veiswngh vunzlai. Ciuqfap fadceih gij famhcoih ndaw hong dangsaeh,caemh gyoengq fugsaeh coiguh mbouj gamj nduknaeuh、mbouj ndaej nduknaeuh、mbouj siengj nduknaeuh. Yiemzfad gij famhcoih giz nangqdaengz vunzlai ancienz、baujndei gwndaenj beksingq,roengzrengz yenzgiu dingjdoiq gij vwndiz famhcoih yienghmoq. Haenqrengz dawzfap baujndei gienzvunz,ciuqfap baujndei gij gienz hengz saeh lizswh. Guh laeg guh daeuq bae cienmonz dwkraeg gyoengqhengzyak,ciuqfap goengbingz riengjvaiq bae saemjleix gij anq famcoih nangqdaengz gyoengqhengzyak,hawj gienhgienh anq cungj gvaq ndaej faplwd caeuq lizsij genjniemh,hawj yinzminz ginzcung roxnyinh ancienz lai dangqmaz.

  Sam dwg roengzrengz fugsaeh ginghci fatmaj ndeindup. Hopheux gij hong aeu dwkhoenx dwkhingz ciengz ciengq duetgungz hojnanh caeuq gizgiz hwnqbaenz aen biengz siujgangh bae caezcienz dawzfap cwngcwz. Yiemzfad gij famhcoih ndaw “sam nungz”,caengzcaengz aeu fapguenj banggungz, haenqrengz dawzfap baujndei sawjngaenz banggungz、rahong banggungz、hai hangz guh ok doxgaiq banggungz,roengzrengz saemjbuenq gij anq cienzngaenz、doxgaiq diegdeih,vih dwk ndei sam ciengz ciengq hojnanh bae dawzfap fugsaeh. Lai yungh gij guhfap fazyen Bwzgingh、Sanghaij, gaenxmaenx cauhlaeb giz guh seng’eiq fapguenj engq dinghmaenh goengbingz ronghseuq、ndaej guhbaenz gij saeh maengxmuengh gonq. Haenqrengz dawzfap baujhoh canjgenz caeuq cihsiz canjgenz,baujhoh baexmaed hangzseng’eiq. Haenqrengz baujhoh ndei gienzleih soqgawq caeuq saenqsik gagboux,yiemzfad gij famhcoih laeuh、gai saenqsik gagboux ciemqfaemh vunzbiengz, fugsaeh ginghci cihsoq fatmaj ndeindup. Caezcienz gij cwngcwz hengz dawzfap fugsaeh,vih Baekging Denhcinh Hozbwz gapdoih fatmaj、hwnqguh Yez Gangj Au Davanhgih、 rangh dieg Cangzgyangh fatmaj、Cangzsanhgoz guhbaenz caemh gyoengq fatmaj、 rangh dieg Dahvangzhoz doenghduz doenghgo baujhoh caeuq fatmaj ndeindup、Baihsae daih haifat、 Doengbaek gizgiz saenqhwng、dieg Cungqgyang hwnghwnj、 hwnqguh gvaengxdieg ginghci suengsingz Swconh Cungzging guh dawzfap fugsaeh suijbingz sang.

  Seiq dwg roengzrengz lai dawzfap baujndei beksingq gwndaenj. Nyinhcaen yungh ndei yungh caez bouh minzfazdenj saemjlwnh doenggvaq gvaqlaeng,gizgiz cingleix gij cekgej dawzfap saehminz, dingh gij cekgej dawzfap boiqdauq moq, haenqrengz hagsib beizyin, daezsang gij nwngzliz caeuq suijbingz dawzfap saehminz, ciuqfap baujhoh gienzik habfap bouxgoek saehminz,diuzndei saehminz gvanhaeh, henhoh gij saeh ngoenznaengz ndawbiengz caeuq ginghci swnhleih. Dingj aeu gij cehsim gyacizgvanh sevei cujyi yungzhaeuj dawzfap saemjbuenq bae,hengzndei gij saeh “byawz caepfap byawz son vunzlai yungh fap”, angjcienz cingqheiq. Hong caepfap ciengxlwenx youq gwnz roen, laebcaez gij guhfap seizseiz ndaej caencingq gaijgez caephengz nanz,lai goengbingz gveihfan vwnzmingz caephengz. Gaenxmaenx caeuqfaenh ndaw singz guh ndawbiengz ceihleix,hawj yinzminz fazdingz lai ok rengz bae guh gij saeh fapguenj lajmbanj. Ciuqfap henhoh leih’ik gozfangz,baujndei gij gienzik hapfap bouxbing bouxranzbing、bouxdangbingsat. Dingj aeu gij singheuh beksingq guh aen saenqhauh daih’it,mboujduenh gejcawz gijhoj gijgaz gijin beksingq. Haenqrengz dawzfap baujhoh gij mehmbwk lwgnyez、 bouxlaux、bouxcanz. Dingj aeu ciuqfap niujcingq gij saehmbiengj doiq boux rahong yawj ranghdieg、mbwksai ciuvunz,dingj aeu ciuqfap niujcingq gij saeh famh faplwd gvidingh gejcawz aen lauzdung habdoengz gvanhaeh boux baenz binghraq bwtndat,ciuqfap ceihleix gij vwndiz niengqyiemq cienzhong bouxlajmbanj gairengz, henhoh gij gienzleih goengbingz boux rahong.

  Haj dwg roengzrengz coi buenzhong saemjbuenq caeuq rengz saemjbuenq guhbaenz yendaiva. Nyinhcaen hengzguh gij yigen yinzminz fazyen yungh caez yungh ndei gij cingsaenz Cibgouj Gaiq Seiq Cung Cienzhoih dangj,daezsang gij yauqnaengz dawzfap coicaenh buenzhong ceihleix caeuq ceihleix naengzlig yendaiva. Gyagiengz gaijgwz “dauqngeux yawj”,gyamaenh gaijgwz cwngzgoj. Nyinhcaen hengz ndei gij yigen haeujlaeg gyoebhab boiqdauq gaijgwz dawzfap cwzyinci, haenqrengz dazyinx caengzlaj, daezsang gaijgwz cwngzyau. Gyalaeg gaijgwz saehminz dajgauq mbaekhong fukcab caeuq genjdanh faen banh. Gaijndei gij mbaekhong dingzsaemj hingzcwng dajgauq. Hawj “giz ndeu” ndaej vaqgej lai yiengh doxceng caeuq fugsaeh lai yiengh dajgauq. Yenzgiu cingzgvang moq gaijgez vwndiz moq,guhbaenz caemh aen biucinj buenqdingh. Gyalaeg dawzfap gvenglangh. Gyamaenh gyalai gij cwngzgoj mwh binghraq hwnqbaenz sawjyungh fazyen coengmingz guhbaenz,caezcienz gij vunqsik hulenzvangj dawzfap.

  Roek dwg roengzrengz laebguh doihvunz fazyen maenh’ak、simsoh、cinghseuq、gamj rapdawz. Yinzminz fazyen lai roengzrengz gensez cwngci dangj, gyamaenh haigvangq gij cwngzgoj cawjdaez gyauyuz,gyalaeg gungganq bouxcaixhangz caeuq guenjleix doihvunz, dizlienh doihvunz suciz sang cwngci baengh ndaej、guh hong baengh ndaej、rap hong baengh ndaej、gijliz baengh ndaej、guhvunz baengh ndaej. Lai hwnqguh giekdaej caengzlaj,haeujcoengh fatmaj gij fazyen dieggeq gwzming、dieg minzcuz、dieg henzguek、dieg gungzhoj. Nyinhcaen bae guh liebyawj gaijndei guhbaenz. Gagrox ciepsouh yinzda gamduk、minzcuj gamduk caeuq gak fuengmienh gamduk. Cuknet gij cawjdaej cwzyin cienzmienh ciuq yiemz guenj dangj,dingj aeu buqcawz hingzsiz cujyi、gvanhliuz cujyi,yiemzgek caephengz gij gvidingh gimqlingh lumjbaenz “sam aen gvidingh”, fuengzre capfwngz cazcam anqgienh dawzfap,hawj gij saeh laeglemx guh mbouj miz dieg hengz, hawj boux dawzfap nduknaeuh mbouj giz ndoj, lauxsaed haiguh gij hong son rox “aeu anq gangj laex、aeu anq gangj gijliz、aeu anq gangj fap”,aeu mbouj yungznyaenx saek di bae yiemzfad dawzfap nduknaeuh,dawz yiengh dawzfap “yiemz” neix ciengzseiz guh roengzbae,aeu ndangcingq fwngzseuq dawzfap bauj dawzfap goengbingz. Fathwnj cungj cingsaenz dwk yakrwix,gyaak gij bonjsaeh dwk yakrwix,aeu gamj dawzfap daeuj vaqgej doxdawz doxceng,aeu goengbingz dawzfap daeuj guhbaenz goengbingz dawzleix.

  Gak boux daibyauj,guhndei gij hong yinzminz fazyen bineix,cwzyin hungnaek,dawzrap miznaj.Dou aeu engqgya gaenjmaed doxgiet youq seiqhenz aen Dangjcunghyangh aeu Siz Ginbingz dungzci guh cehsim neix,aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz guh dazyinx, lauxsaed hengzguh faenh hong yenfaz caeuq faplwd gyauhawj,dinghmaenh saenqsim,roemx nanz baenaj,ngaemgyaeuj buekguh,vih guhbaenz gij hong buekguh “song aen bakbi”、guhbaenz aen loqsiengj Cungguek Cunghvaz Minzcuz daih fukhwng caiq ok goengrengz engq hung!

 ?。⊿inhvazse Baekging 6 nyied 1 hauh dienh)
Dozsiengq
自拍偷窥亚洲图片wap19uuuucom