Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

DAENGX GUEK YINZMINZ DAIBYAUJ DAIHHOIH CANGZVU VEIJYENZVEI GUNGHCOZ BAUGAU

——2020 Nienz 5 Nyied 25 Hauh Youq Gwnz Gaiq Cibsam Daengx Guek Yinzminz Daibyauj Daihhoih Baez Hoih Daihsam

Daengx Guek Yinzminz Daibyauj Daihhoih Cangzvu Veijyenzvei veijyenzcangj    Liz Cansuh
  
【Cihsaw Hung’iq : hung rauh iq】  Dajyaenq
      
Gak boux daibyauj:

  Daengx Guek Yinzda Cangzveijvei dak gou yiengq daihhoih baugau gij hong dou, cingj saemjlwnh.

  
Cibsam Gaiq Daengx Guek Yinzda Baez Hoih Daihngeih Doxdaeuj Dou Cujyau Guh Gij Hong Lajneix


  Cibsam Gaiq Daengx Guek Yinzda Baez Hoih Daihngeih doxdaeuj bi lai neix,youq gwnz lizsij guek raeuz gig mbouj yungzheih、gig mbouj bingzciengz. Dangjcunghyangh aeu Siz Ginbingz dungzci guh haedsim doengjlamx ciengz ciengq hungmbwk、aen gunghcwngz hungmbwk、aen saehnieb hungmbwk、aen loqsiengj hungmbwk,gamj ndwn gyaeuj raemxlangh、dangrap guhsaeh,hairengz wngqdoiq diuhcan hungnaek、dingjdangj fungyiemj hungnaek、 cawqleix vwndiz hungnaek,doidoengh gak hangh saehnieb dangj caeuq guekgya caiq aeundaej baenaj hungnaek. Ciengz binghraq bwtndat neix sawqmwh fatseng le,Dangjcunghyangh aeu Siz Ginbingz dungzci guh haedsim dawz fuengzgaemh binghraq dangguh gij saeh ceiq hung,Siz Ginbingz cungjsuhgi caenndang cijveih、caenndang baijbouh,genhciz dawz beksingq sengmingh ancienz cuengq youq vih daih’it, daiqlingx daengx dangj daengx ginh daengx guek gak cuz yinzminz, dwk hingz ciengz ciengq fuengzgaemh binghraq. Ginggvaq gannanz roengzrengz bae guh,ciengz ciengq soujmaenh Vujhan、ciengz ciengq soujmaenh Huzbwz gaenq ndaejhingz lo, ciengz ciengq lanzhoenx caeuq fuengzgaemh binghraq neix goenglaux hungnaek, seizneix gij hong fuengzgaemh binghraq caeuq ndawbiengz ginghci hwngfat cungj ndaej doengzcaez doinyoengx baenaj. Neix caiq baez daejyienh le Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz maenh’ak dahraix,yawjok le gij lingjdauj naengzlig aen Dangjcunghyangh aeu Siz Ginbingz dungzci guh haedsim haenx cingsim suenqveh、daihdamj gamj guh、dinghmaenh fuengyiengq、dazyinx baenaj,yienh’ok le gij ndeicawq yienhda Cunghgoz Gungcanjdangj lingjdauj caeuq yiengh cidu sevei cujyi miz gij daegsaek Cungguek,doedok le gij maenh’ak gyoengq lwglan Cungguek gag buekrengz baenaj,gamj hoenxhingz sojmiz hojnanz cix mbouj deng gijmaz gannanz utfug,youq ndaw cainanh majhung、daj ndaw cainanh haenqrengz buekguh.

  Binghraq fatseng doxdaeuj,Daengx Guek Yinzda Cangzveijvei giengiet gvancez gij gezcwz baijbouh Dangjcunghyangh, riengjvaiq hengzdoengh、ciuqfap hengzguh cizcwz,gietdingh gimqhaed famhfap gaicawx caeuq gaj gwn duzdoengh, fuengzre le gij fungyiemj goenggungh veiswngh ancienz,dazyinx ndawbiengz vwnzmingz baenaj. Vihliux hawj guekgya ceihleix dijhi caeuq ceihleix naengzlig engqgya swnh’wngq seizdaih iugouz, gaengawq goenggungh veiswngh cingzgvang moq vwndiz moq,baijbouh haiguh gij hong laebfap coihfap,roengzrengz guhndei aen goenggungh veiswngh fapceih dijhi,vih henhoh beksingq sengmingh ancienz dwkmaenh diuz fuengzsienq fapceih. Hoizwng gij saeh ndawbiengz gvansim haenx,cawjdoengh gejdoeg faplwd fuengzgaemh binghraq,yungh faplwd bae haeujcoengh fuengzgaemh binghraq caeuq hwngfat ndawbiengz ginghci.

  Bi lai daeuj,cangzveijvei nyinhcaen hengzsawj gij gienz laebfap、gij gienz gamduk、gij gienz gietdingh、gij gienz nyaemhmienx,gungh saemjlwnh gij caujan faplwd、gij caujan gietdingh 48 gienh,doenggvaq 34 gienh,ndawde ceiqdingh faplwd 5 gienh,coihgaij faplwd 17 gienh,dinghroengz gij vwndiz faplwd caeuq gij vwndiz hungnaek 12 gienh; dingqaeu saemjlwnh baugau 39 aen,genjcaz 6 bouh faplwd hengzguh ndaej baenzlawz yiengh,haiguh 3 baez ciendaez cazcam、7 hangh ciendaez diuyenz,guh’ok hangh gezyi ndeu; gietdingh baecinj 5 aen song mbiengj diuzyoz; saemjlwnh doenggvaq 38 aen anqgienh nyaemhmienx,ciuqfap nyaemhmienx bouxguenjsaeh guekgya gihgvanh 282 vunzbaez,gak hangh hong cungj guh ndaej bae guh ndaej ndei.

  It、Saedbauj Yenfaz Youq Guenj Guek Gaem Gienz Gak Fuengmienh Cungj Guh Ndaej Daengz Caez

  Yenfaz dwg gij fapgoek aen guekgya ndeu,dwg gyonjcomz daejyienh gij eiqceiq dangj caeuq beksingq. Ciuqfap guenj guek sien aeu dinghmaenh ciuq yenfaz guenj guek,ciuqfap gaemgienz sien aeu dinghndei ciuq yenfaz gaemgienz.

  Mwh Cungguek moq laebbaenz 70 hopbi,Dangjcunghyangh dazyinx,ciuq yenfaz gvidingh,cangzveijvei gietdingh hawj gij cingqciengj caeuq mingzdaeuz guekgya,Siz Ginbingz cujsiz ciem cujsizling, dawz gij mingzdaeuz ceiq sang guekgya dajciengj hawj 36 boux maenh’ak vih cauhlaeb caeuq hwngfat Cungguek moq laebhwnj goenglauz gig daih haenx,hawj 6 boux baengzyoux guekrog vih coicaenh Cungguek caeuq guekrog gyaulouz doxgap guh’ok gunghawj gig daih haenx. Neix dwg hengz bouh yenfaz seizneix doxdaeuj baez daih’it caebcomz fat hawj gij ciengj guekgya. Gietdingh doiq mbangj boux vunzfamh cingq naengh lauz haenx guh mienxcoih daegbied,Siz Ginbingz cujsiz ciemdingh fatbouh aen minghlingh mienxcoih daegbied. Ginggvaq gij bouhloh fapdingh yiemzgek,daegbied mienx le gij coih gouj loih bouxfamh cingq naengh lauz haenx gungh 23593 vunz,neix dwg yenfaz gvidingh aen cidu mienxcoih daegbied le caiq guh baez saedguh hungnaek ndeu.

  Gvancez gij cingsaenz dangj raeuz Cibgouj Gaiq Seiq Cungh Cienzhoih, cangzveijvei dingqaeu saemjlwnh le aen baugau Gozvuyen gvendaengz Yanghgangj Daegbied Hingzcwnggih henhoh guekgya ancienz cingzgvang, gaengawq yenfaz caeuq Yanghgangj gihbwnjfaz mizgven gvidingh, yenzgiu dajgauj dinghlaeb caemcaiq saemjlwnh le《Daengx Guek Yinzminz Daibyauj Daihhoih Aen Gietdingh Gvendaengz Laebhwnj Laebcaez Gij Faplwd Cidu Caeuq Caephengz Gihci Hawj Yanghgangj Daegbied Hingzcwnggih Henhoh Guekgya Ancienz Haenx (Caujan)》, gietdingh daezcingj baez daihhoih neix saemjlwnh. Neix dwg gij cosih hungnaek youq hingzsi moq genhciz caeuq caezcienz aen cidu dijhi “aen guekgya ndeu song cungj cidu”、genhciz ciuqfap ceihleix Yanghgangj、henhoh yenfaz caeuq gihbwnjfaz doekdingh aeu faplwg guhgoek guenjleix guekgya,habngamj gij gaenbonj leih’ik daengxcungq lwgminz Cungguek baudaengz beixnuengx Yanghgangj. Ndaej siengsaenq ginggvaq gyoengq daibyauj doengzcaez roengzrengz, itdingh ndaej swnhleih guhbaenz aen yinvu laebfap youqgaenj neix, vih henhoh gij cawjgienz、ancienz、leih’ik guekgya ndaej hwngfat, saedbauj Yanghgangj ciengzgeiz hwnghoengh onjdingh, daezhawj gij fapceih baujcang engqgya rengzrwd.

  Ciuqfap bae guh habngamj yenfaz saemjcaz、bwh’anq saemjcaz. Ceiqdingh hengzguh yigen bae doidoengh gij hong saemjcaz hab mbouj hab yenfaz,onjdangq hoizwngq ndawbiengz gij vwndiz nangqdaengz yenfaz de,ciuqfap gaijcingq gij vwnzgen gveihfan famh yenfaz famh faplwd haenx,bauj yenfaz ndaej daengz cietsaed ciuqsouj caeuq caephengz. Laebndei gij dijci gihci fapgvi、swhfaz cekgej bwh’anq saemjcaz,laebbaenz aen bingzdaiz doengjit ndaej cwgoemq daengz gij saenqsik bwh’anq saemjcaz daengx guek,haidaeuz laebbaenz aen sugigu faplwd fapgvi guekgya. Lienzdaemh sam bi dingqaeu aen baugau saemjlwnh hong bwh’anq saemjcaz guh ndaej baenzlawz yiengh,caemhcaiq yiengq ndawbiengz goenghai. 2019 nienz bauqsoengq hingzcwng fazgveih bwh’anq、fazgveih deihfueng、swhfaz cekgej 1995 gienh,bauqsoengq gij faplwd daegbied hingzcwnggih bonjdieg bwh’anq haenx 33 gienh, yenzgiu cawqleix gij saemjcaz genyi gunghminz、cujciz daezok haenx 138 gienh. Ginggvaq saemjcaz, dukcoi aen gihgvanh ceiqdingh niujcingq gij vwnzgen gveihfan caeuq yenfaz faplwd gvidingh nem cingsaenz doxdingj、mbouj doxngamj、mbouj hab’wngq haenx 506 gienh,henhoh le guekgya fapceih doengjit、viyiemz caeuq gienzvi.

  Haiguh yenfaz senhconz gyauyuz vueddoengh. Couzbanh 6 baez yenfaz senhsi,hawj 18 boux ndaej nyaemhmingh haenx senhsi,gyoengq boux gapbaenz veijyenzcangj veiyi haenx guhdaeuz caemhcaiq gamyawj senhsi,hawj bouxguenjsaeh guekgya lai rox yenfaz. Aeu “angjcienz gij cingsaenz yenfaz,hawj gij dijhi ceihleix caeuq gij naengzlig ceihleix guekgya engqgya swnh’wngq seizdaih” guh cawjdaez,hai daihroek aen hoih yaenglwnh ngoenz guekgya yenfaz,daiqdoengh gak gaep gak dieg haiguh lai cungj lai yiengh vueddoengh senhconz yenfaz. Hai aen hoih yaenglwnh geiqniemh Aumwnz Daegbied Hingzcwnggih gihbwnjfaz saedguh 20 hopbi,hawj diuz fuengcim “aen guekgya ndeu song cungj cidu” caeuq yenfaz、gihbwnjfaz ndaej senhconz ndaej saedhengz.

  Ngeih、Mboujduenh Laebndei Aen Faplwd Dijhi Sevei Cujyi Miz Gij Daegsaek Cungguek

  Ngaeugaenj cienzmienh ciuq fap guenj guek,gij hong laeb gaij feiq gej faplwd doengzcaez guh,caetliengh caeuq yauqlwd caez yawjnaek,gyarengz youq aen lingjyiz youqgaenj laebfap, mboujduenh daezsang gij suijbingz gohyoz laebfap、 minzcuj laebfap、 ciuq fap laebfap.

  Boiqhab caeuq coicaenh cienzmienh gyalaeg gaijgwz,saedbauj gij gaijgwz hungnaek haenx miz gaengawq bae yungh faplwd. Aen fap bouxseng’eiq guekrog okcienz doenggvaq le,baenzroix coihgaij doengh gij fap lumjbaenz aen fap dajhwnq、aen fap refeiz、aen fap denswj ciemmingz、aen fap ndabaij singzmbanj、aen fap gvaehsuiq ci ruz、aen fap sanghbyauh、aen fap fanj gij gingcwngh mbouj cingqdangq、aen fap hingzcwng cinjhawj,hawj mizgven faplwd hamzciep baenz cingjdaej bae;coihgaij aen fap baujhoh gyoengq beixnuengx Daizvanh douzswh,caencingq hawj gyoengq beixnuengx Daizvanh caemh yiengjsouh daengz gij ndeicawq gaijgwz. Saemjlwnh gij caujan aen fap gvaehsuiq coihcingj dajhwnq hawsingz、aen fap heiqgvaeh、aen fap guenjhaed gij huq ok guek,guh ok aen gietdingh gyau gienz hawj Gozvuyen youq swyouz mouyizgih camhseiz diuzcingj habyungh mizgven faplwd gvidingh,aen gietdingh gyau gienz hawj Aumwnz Daegbied Hingzcwnggih guenjceih Hwngzginz goujan mbiengj sok Aumwnz caeuq rangh dieg nangqdaengz de,gaenriengz seizdaih caeuq gaijgwz aeuyungh guhbaenz le gij hongsaeh fapceih. Gyau gienz hawj Gozvuyen youq Haijnanz Swyouz Mouyizgih camhseiz diuzcingj gij gvidingh mizgven habyungh aen fap diegdeih guenjleix、aen fap cehfaen、aen fap seng’eiq gwnz haij,haeujcoengh Haijnanz hwnqguh aendieg sawqniemh swyouz mouyiz caeuq aen gangjgouj swyouz mouyiz miz daegsaek Cungguek. Aen fap cwnggen coihgaij ginggvaq seiq saemj,soujmaenh aen fuengyiengq laebfap doicaenh gaijgwz、baujhoh gij gienzik bouxdouzswh、gyahaenq gamguenj,haengjdingh le cucwzciz daengj gaijgwz cingzcik,yungh fapceih bae baujhoh swhbwnj hawciengz gaijgwz fatmaj.

  Aeu fazcanj leixniemh moq cang haeuj uk bae,aeu laebfap caetliengh sang bae doidoengh fazcanj caetliengh sang. Ceiqdingh aen fap gvaehsuiq swhyenz,coihgaij aen fap fuengzceih gudij huqfeiq uqlah vanzging、aen fap ndoengfaex,dawz gij leixniemh sien bauj swnghdai、guh loegsaek fazcanj、vunz caeuq swyenz doxhuz caemhyouq cienzbouh yungzhaeuj laebfap bae. Dajgauj caemhcaiq saemjlwnh aen caujan aen fap baujhoh Dahcangzgyangh,aeu gij leixniemh “caez ca daih baujhoh,mbouj gauj daih haifat” bae dazyinx,yungh faplwd vujgi、fapceih ligliengh bae baujhoh Dahcangzgyangh. Saemjlwnh gij caujan aen fap cucozgenz coihcingqanq,gyarengz dwkceih gij hingzveiz ciemqgienz famhfap haenx,roengzrengz baujhoh cihsiz canjgienz. Coihgaij aen fap guenjleix diegdeih、aen fap guenjleix fangzdicanj hawsingz,doiqdaih nungzminz leih’ik dinghmaenh laebfap daejsienq caeuq fuengyiengq,dan gya mbouj gemj,yungh cidu bae bauj diegdeih swhyenz ndaej buenzhoengh、nungzminz caizcanj souhaeuj ndaej gyalai、gyahaenq baujhoh reihnaz、 singz mbanj yungzhab fazcanj.

  Dawz beksingq muengh gvaq gij saedceij ndei dangguh muzbyauh bae buekguh,gyavaiq cimdoiq beksingq gwndaenj bae laebfap. Ceiqdingh aen fap coicaenh gihbwnj yihliuz veiswngh caeuq gengangh,yungh faplwd bae bauj beksingq seizseiz gizgiz cungj ndangdaej cangqak. Coihgaij aen fap guenjleix gijyw,doidoengh gaijgez ndei doengh gij vwndiz yw gyaj、yw yaez、gyaqcienz yw sang、yw noix daengj beksingq fanjyingj haenqrem haenx. Ceiqdingh aen fap guenjleix yizmyauz,hawj yenzgiu haifat、swnghcanj、riuzdoeng、ciep ndaem yizmyauz ndaej bauj ancienz. Cungjgez gij gingniemh hangh hong fuengzgaemh binghraq bwtndat,ciuq iugouz gyarengz hwnqguh aen dijhi aeu fapceih bae baujcang goenggungh veiswngh,ceiqdingh giva hengzguh cienhangh laebfap coihfap,anbaiz vunz cienmonz guh yiengh hong neix,doiq 30 gienh laebfap coihfap hanghmoeg gyoebhab anbaiz,ceng’aeu yungh 1 daengz 2 bi seizgan guhbaenz daih dingzlai yinvu laebfap. Saemjlwnh gij caujan coihdingh aen fap fuengzgaemh binghraq doenghduz,hawj gij yawhgingj gamcaek goekraq binghraq doenghduz engq ak. Dajgauj caemhcaiq saemjlwnh gij caujan aen fap swnghvuz ancienz,roengzrengz ceiqdingh bouh faplwd ndaej fuengzre fungyiemj swnghvuz、coicaenh swnghvuz gisuz fazcanj、 cengjdingx ndaej hwnj aen dijhi swnghvuz ancienz guekgya.

  Hopheux cauhlaeb guekgya cidu caeuq guekgya ceihleix dijhi,haenqrengz youq genhcaz、swhfaz、sevei ceihleix、guekgya ancienz daengj doengh aen lingjyiz neix laebfap. Gyalaeg gaijgwz hawj aen dijci guekgya gamcaz,guh ok aen gietdingh hawj Gozgyah Genhcaz Veijyenzvei ceiqdingh gij fapgvi gamcaz,saemjlwnh gij caujan aen fap cawqfaen bouxguenjsaeh guekgya. Ceiqdingh aen fap hawj bouxfamh youq segih gaijcingq,saemjlwnh gij caujan coihdingh aen fap baujhoh bouxcaengzhung、aen fap yawhfuengz bouxcaengzhung famhfap,gietdingh feiq bae gij faplwd gvidingh caeuq cidu soulouz gyauyuz, ciuq seizdaih iugouz bae guh ndei ndawbiengz ceihleix. Coihgaij aen fap fazgvanh、aen fap genjcazgvanh,gietdingh hawj gienz guh gij hong sawqdiemj gaijgwz saedhengz minzsaeh dajgauq yungzheih caeuq genjbienh song loh faenriuz,hawj swhfaz dijci gaijgwz engq onjmaenh engq haeujlaeg. Ceiqdingh aen fap mizmaj,saemjlwnh gij caujan coihdingh aen fap dangjan, saedyienh aeu faplwd cidu bae ceihleix mizgven lingjyiz.

  Aen caujan minzfazdenj yaek daezhawj baez daihhoih neix saemjlwnh,dwg guek raeuz fapceih gensez aen geizhauh hungloet ndeu. Gaiq cangzveijvei dou baengh gij gyadaej gaiq gonq gyavaiq biensij minzfazdenj, 2018 nienz 8 nyied gyonjcomz saemjlwnh sojmiz caujan faenbien, gaenlaeng faen baenz danhyenz lai baez saemjlwnh, caemhcaiq doiq aen minzfazdenj caujanq caezcingj haenx guh saemjlwnh, gonq laeng 7 baez goenghai cam’aeu yigen, sou daengz gak fuengmienh yigen 90 lai fanh diuz. Ginggvaq fanfoek coihgaij、baenz di doq ngeix doq guh, guhbaenz le aen caujan minzfazdenj mwhneix,gungh miz 7 bien 1260 diuz. Siengsaenq ginggvaq daengxcungq daibyauj nyinhcaen saemjlwnh, itdingh ndaej ceiqdingh ok bouh minzfazdenj miz gij daegsaek Cungguek、daejyienh gij cingsaenz seizdaih、fanjyingj gij simmuengh beksingq、 baujhoh minzsaeh gienzleih、henhoh ndawbiengz goengbingz cingqngeih ndeu.

  Gij hong laebfap bi lai daeuj hawj raeuz aen daezsingj youqgaenj ndeu couh dwg:Yiengh sevei cujyi miz gij daegsaek Cungguek haeuj daengz seizdaih moq,gij hong laebfap itdingh aeu hab’wngq dangj caeuq guekgya saehnieb fazcanj iugouz moq,seizseiz genhciz aeu yinzminz guh cungsim, saedbauj gij cawjcieng aen Dangj doenggvaq fapdingh cwngzsi bienqbaenz gij eiqceiq guekgya. Aeu gibseiz fanjyingj gij gingniemh moq gij cingzcik moq gaijgwz hailangh,itcig hawj laebfap gezcwz caeuq gaijgwz gezcwz dox hamzciep、dox doengjit,hawj faplwd engq gibseiz、engq caezcienz、engq miz cimdoiq、engq miz yungh,laebdaeb guhndei aen faplwd dijhi yiengh sevei cujyi miz gij daegsaek Cungguek.

  Sam、Ciuq Gij Cizcwz Fapdingh Hopheux Gij Yinvu Hungnaek Gaijgwz Fazcanj Bae Doinyoengx Gij Hong Gamduk

  Cingqdeng bae gamduk、gamduk ok saedyauq,conz sim haeuj ciuqfap cingqdeng bae hengzsawj gij gienz lumjbaenz gienzhengzcwngq、gienzgamcaz、gienzsaemjbuenq、gienzgenjcaz daengj,louzsim gij saeh gaenj saeh nanz beksingq hwnzngoenz cungj siengj haenx,hawj gij ndeicawq gaijgwz fazcanj engq lai engq goengbingz faenhawj daengxcungq beksingq,engq ndei bae bangcoengh ndawbiengz ginghci hwngfat, rapdawz gij yinvu gaijgwz gunggeng.

  Ciuqfap guh gij hong gamduk giva caeuq yawhsuenq. Dingqaeu saemjlwnh aen baugau gij giva gozminz ginghci caeuq ndawbiengz hwngfat guh ndaej baenzlawz yiengh、yawhsuenq guh ndaej baenzlawz yiengh, hopheux doeksaed gij cijbyauh youqgaenj、gij yinvu youqgaenj caeuq daezsang gij cikyauq yungh cienz doengh gij neix daezok yigen genyi 300 lai diuz, bangcoengh hoenx ndei sam ciengz ciengqhung gunggeng caeuq guh ndei gij hong “roek onj”. Dingqaeu saemjlwnh aen baugau hong 2018 nienz caephengz cunghyangh yawhsuenq caeuq saemjgeiq gizyawz caizcwng soucei、aen baugau doiq doengh gij vwndiz saemjgeiq caz ok haenx cingjgaij ndaej baenzlawz yiengh, dukcoi mizgven bouhmonz yiemzgek caephengz gij faplwd fapgvi caizgingh、haeujlaeg bae cingjgaij vwndiz.

  Yinzda yawhsuenq saemjcaz gamduk aeu cuengq rengz mbe’gvangq daengz ceiok yawhsuenq caeuq cwngcwz bae, gyahaenq gamduk guenjleix gij swhcanj guekmiz, dwg song aen cizcwz youqgaenj Dangjcunghyangh gyauhawj yinzda. Cangzveijvei vihliux “saemjcaz dohdaengz、gamguenj dohdaengz”,ceiqdingh aen yigen gvendaengz caiq roengzrengz gamduk gak gaep yinzda cangzveijvei doiq saemjgeiq caz ok gij vwndiz doedok haenx cingjgaij ndaej baenzlawz yiengh,hawj gij gezcwz baijbouh Dangjcunghyangh youq mwh yawhsuenq bienceiq caeuq caephengz yawhsuenq ndaej cienzbouh daejyienh doeksaed. Conz sim haeuj doengh gij hongsaeh youqgaenj beijlumj saedhengz caizcwng cwngcwz、caephengz bouhmonz yawhsuenq、fatroengz senjnod ceihawj、 deihfueng cwngfuj baenzlawz fathengz caeuq sawjyungh caigen、gij cwngcwz banhfap fuengzceih uqlah caeuq baenzlawz anbaiz caizcwng swhginh,laebdaeb gaenriz gamduk, gungh cujciz 25 baez cienhangh diuyenz, dingq 35 baez veibau,guh 4 baez ciendaez saemjlwnh, saemjcaz 9 hangh cienhangh swhginh, caizcwng swhginh sawjyungh yauqgoj caeuq cwngcwz saedhengz yauqgoj cungj gakduk cazniemh ndaej engqgya dohdaengz. Doinyoengx deihfueng yinzda doeksaed gij gaijgwz banhfap yawhsuenq saemjcaz gamduk aeu cuengq rengz mbe’gvangq daengz ceiok yawhsuenq caeuq cwngcwz bae, sojmiz sengj (gih、si) cungj ceiqdingh le gij yigen baenzlawz hengzguh. Vihliux guhdaengz gizgiz yienghyiengh gveihfan、goenghai ronghcingx、gamduk ndaejrengz,ceiqdingh aen haj bi gveihva gvendaengz gamduk guenjleix gij swhcanj guekmiz, saemjlwnh aen gyoebhab baugau gvendaengz 2018 nienz gij swhcanj guekmiz guenjleix cingzgvang caeuq aen cienhangh baugau gvendaengz gij swhcanj guekmiz gvihaeuj daengx guek hingzcwng saehnieb singqcaet haenx guenjleix cingzgvang,hawj yiengh hong guenjleix gij swhcanj guekmiz ndaej gamduk engq laeg engq gvangq、engq miz caetliengh、engq miz yauqgoj. Hawj deihfueng dawz gij cidu baugau swhcanj guekmiz guenjleix cingzgvang ietraez daengz doengh aen si laeb gih caeuq swcicouh bae.

  Netsaed bae gamduk cienhangh gunghcoz. Dingqaeu saemjlwnh 11 aen baugau Gozvuyen cienhangh gunghcoz,lumjbaenz guenjleix aen duivuj canghyw caeuq hengz aen fap dang canghyw、 gaijgwz caeuq hwngfat gij saehnieb yozcenz gyauyuz、doinyoengx gij hong gouqbang ndawbiengz、hwngfat gij canjnieb lajmbanj、gaijgwz aen cidu cizdij canjgienz lajmbanj、hwngfat gij canjnieb vwnzva、lai vaiq hawj vaimou cienjhingz swnggaep、gemj suiq gyangq feiq、faenboiq caeuq yungh gij cienz caizcwng bae guh swnghdai vanzbauj、 2018 nienz caeuq 2019 nienz vanzging canggvang caeuq vanzging baujhoh muzbyauh guhbaenz cingzgvang,doidoengh gaijgez doengh aen vwndiz doedok nangqdaengz gij leih’ik nemndang beksingq, bangcoengh mbiengj gunghawj gaijgwz gezgou,bangcoh ginghci baengh caetliengh hwngfat. Guh 7 aen ciendaez diuyenz,lumjbaenz duetgungz gunggeng、hawj dieg minzcuz henz guek hwngfat hawj beksingq fouqmiz、fuengzre vaqgej hidungjsing ginhyungz fungyiemj、wngqdoiq vunzgeq bienq lai、guenjleix caeuq gaijgwz gij cienzgoek ciengxgeq baujyiemj、hengz aen fap guekgya ancienz、gaijgwz aen dijci gamcaz caeuq hengz aen fap gamcaz, daezok genyi hawj guhhong engq ndei engq ak.

  Gamduk gij hong swhfaz engq yiemz. Daj 2018 nienz dingqaeu saemjlwnh aen baugau doiq “caephengz nanz” yinzminz fazyen gaijgez ndaej baenzlawz yiengh le, 2019 nienz lai guh gaenriz gamduk, cienmonz dingqaeu saemjlwnh aen baugau gvendaengz gij yigen saemjlwnh gyoengq boux gapbaenz cangzveijvei haenx banhleix ndaej baenzlawz yiengh, gij cingzcik gaijgez “caephengz nanz” youh lai onjmaenh. Dingqaeu saemjlwnh aen baugau gvendaengz gij hong guhndei hingzsaeh saemjbuenq guh ndaej baenzlawz yiengh,coicaenh gaijgwz aen cidu hingzsaeh dajgauq aeu saemjbuenq guhdaeuz haenx. Dingqaeu saemjlwnh aen baugau hong genjcaz goeng’ik dajgauq guh ndaej baenzlawz yiengh caemhcaiq guh ciendaez cazcam, doidoengh genjcaz gihgvanh hengz ndei gij cizcwz fapdingh henhoh gij leih’ik guekgya caeuq gij leih’ik goenggungh ndawbiengz.

  Ciuq faplwd gvidingh bae genjcaz caepfap baenz yienghlawz. Caezcienz gij gihci caeuq fuengsik fuengfap guh hong caepfap genjcaz, cug diuz doiqciuq faplwd gvidingh bae genjcaz, lai hawj mizgven fuengmienh yiemzgek doeksaed cidu faplwd caeuq cizcwz fapdingh. Genjcaz 6 bouh faplwd hengz ndaej baenzlawz yiengh,6 bouh neix baudaengz aen fap coicaenh giyez rauh iq、aen fap fuengzceih raemx uqlah、aen fap gauhdwngj gyauyuz、aen fap coicaenh couhnieb、aen fap nwngzyenz caiq miz、aen fap hangzdwkbya, giethab saemjlwnh aen baugau genjcaz aen fap coicaenh giyez rauh iq、aen fap fuengzceih raemx uqlah caephengz ndaej baenzlawz yiengh bae guh 2 baez ciendaez cazcam. Youq mwh genjcaz aen fap raemx uqlah daengj 4 bouh fap caephengz ndaej baenzlawz yiengh, yinxhaeuj daihsam fueng bingzguj, hawj genjcaz engq gohyoz、engq gwzgvanh、engq gienzvi. Gaenxmaenx damqra gij hingzsik moq banhfap moq bae bingzgyaq faplwd hengzguh ndaej baenzlawz yiengh, doiq aen fap coicaenh giyez rauh iq、aen fap giyez loemqbaih、aen fap canjbinj ndeiyaez guh laebfap le aeu guh bingzguj, hawj laebfap gezcwz、sezgi cidu、hengzguh faplwd caeuq hoizdauq yaugoj baenz aen gengx haepgven bae dox yingjyangj,hawj gij hong laebfap caeuq gamduk caetliengh engq sang.

  Seiq、 Haeujcoengh Caeuq Fugsaeh Cauhlaeb Yiengh Cidu Hawj Daibyauj Ciuqfap Hengzguh Cizcwz

  Daengx guek yinzda daibyauj dwg boux gapbaenz aen gienzlig gihgvanh ceiq sang guekgya. Yawjnaek gij gienzleih daibyauj couh dwg yawjnaek gij gienzleih beksingq,bauj daibyauj ndaej ciuqfap hengzguh cizcwz couh dwg bauj hawj beksingq danggya guhcawj.Vihliux gyaak caeuq gaijndei gij hong daengx guek yinzda daibyauj, cangzveijvei ceiqdingh le 35 diuz guhfap ciengzsaeq, engq ndei haeujcoengh caeuq bauj hawj daibyauj ciuqfap hengzguh cizcwz.

  Nyinhcaen banhleix gij yian caeuq genyi daibyauj. Gij yian caeuq genyi gyoengq daibyauj youq Gaiq Cibsam Daengx Guek Yinzda Baez Hoih Daihngeih geizgan daezok de, Daengx Guek Yinzda Cienmonz Veijyenzvei ciuqfap guh le saemjlwnh, doengh aen danhvei ciepbanh de yawjnaek banhleix gietlwnh caemh yawjnaek banhleix ginggvaq, “diemj doiq diemj” lienzhaeh, “naj doiq naj” gyausim, gibseiz yiengq bouxdaibyauj nem aen danhvei yienzlaiz senj de bauqgangj banhleix ndaej baenzlawz yiengh. 491 gienh yian daibyauj youz cujsizdonz gyauhawj saemjlwnh de cungj gaenq banhleix caez, ndawde miz 27 gienh yian nangqdaengz 12 aen laebfap hanghmoeg gaenq saemjlwnh doenggvaq, 56 gienh yian nangqdaengz 9 aen laebfap hanghmoeg gaenq daezcingj saemjlwnh, 191 gienh yian nangqdaengz 65 aen laebfap hanghmoeg gaenq liedhaeuj gveihva roxnaeuz giva laebfap bae. 8160 gienh genyi gyauhawj 193 aen danhvei ciepbanh caemhcaiq dapfuk hawj daibyauj rox, vwndiz ndaejdaengz gaijgez roxnaeuz dajsuenq cugbouh gaijgez haenx ciemq genyi cungjsoq 71.3%. 22 hangh genyi gaenq gietdingh cuengq rengz coibanh haenx, nangqdaengz 276 gienh daibyauj genyi, youz 7 aen cienmonz veijyenzvei bae coibanh, doidoengh gaijgez le buek saedsaeh vwndiz ndeu. Nyinhcaen banhleix 560 gienh yigen genyi youq sathoih geizgan daibyauj daezok haenx, ndawde baudaengz 210 gienh daibyauj cigsoh daezok, 63 gienh dwg boux gapbaenz veijyenzcangj veiyi cienjgyau, 10 gienh dwg boux veijyenz ndaw cangzveijvei cienjgyau, 277 gienh dwg boux daibyauj ndaej iucingj de youq mwh daeuj camgya aen hoih cangzveijvei daezok.

  Hawj daibyauj youq ndaw hong laebfap langh rengz okdaeuj. Gaengawq gij yian genyi daibyauj bae yenzgiu doekdingh laebfap hanghmoeg, iucingj daibyauj cigsoh camgya gij hong diuyenz、dajgauj、lwnhcingq、bingzguj faplwd caujan. Dawz gij faplwd caujan youqgaenj naqnaengq mienh gvangq、youh dwg giekbonj haenx yaenqfat hawj daengxcungq daibyauj cam’aeu yigen, dawz gij faplwd caujan ciennieb haemq giengz haenx yaenqfat hawj boux daibyauj youq aen hangznieb miz gvanlienz haenx cam’aeu yigen.

  Cangzveijvei gyalai caeuq daibyauj lienzhaeh. Guh ndei gij hong fuengbienh boux gapbaenz cangzveijvei de lienzhaeh daibyauj, hawj cienmonz veijyenzvei、 gunghcoz veijyenzvei lai lienzhaeh daibyauj. Boux gapbaenz cangzveijvei doenggvaq lai cungj hingzsik lienzhaeh daibyauj, hawj daibyauj fanjyingj cingzgvang、 dingqaeu yigen miengloh doengswnh,engq ndei bae liujgaij gaeplaj, fanjyingj gij yigen caeuq iugouz cungqvunz. Laebcaez laebndei gij guhfap hawj daibyauj caeuqfaenh guh hong cangzveijvei、cienmonz veijyenzvei, ciucomz daibyauj 74 vunzbaez camgya caepfap genjcaz, iucingj daibyauj 73 vunzbaez camgya gamduk saemjcaz yawhsuenq,iucingj daibyauj 298 vunzbaez camgya aen hoih cangzveijvei, ciuhai 5 baez lezsiz daibyauj codanzvei.

  Hawj daibyauj maedcaed lienzhaeh vunzlai. Doidoengh deihfueng yinzda ciucomz daengx guek yinzda daibyauj bae doengh aen daibyauj lenzlozcan、 aen ranz guenj daibyauj、 aen diegdiemj lienzhaeh laebfap gyawj ranz de,caeuqfaenh gij hongsaeh bonjdieg. Deihfueng gak gaep yinzda gaenq laebbaenz 22.8 fanh aen daibyauj lenzlozcan、 aen ranz guenj daibyauj, vih daibyauj ndalaeb aen gunghcoz bingzdaiz mienhdoiq gihcwngz, depgaenh vunzlai,cwgoemq singz mbanj. Gyoengq daibyauj doenggvaq lai cungj hingzsik, dingqaeu caeuq fanjyingj gij yigen nem genyi vunzlai, guhbaenz yiengh hong cienzdap gij cingsaenz baihgwnz、 fanjyingj gij cingzgvang baihlaj.

  Gij hong fugsaeh daibyauj guh ndaej lai ndei. Anbaiz 1830 boux daibyauj haiguh ciendaez diuyenz、damqcaz caeuq cazyawj, guhbaenz 91 aen diuyenz baugau. Itcig ngengcoh gihcwngz beizyin daibyauj,daengx bi daibyauj miz 1900 lai vunzbaez camgya doxcomz hag lienh, Gaiq Cibsam Daengx Guek Yinzda doxdaeuj gyoebsuenq ciucomz daibyauj hag lienh 3200 lai vunzbaez, daihdaej guhdaengz moix boux daibyauj gihcwngz cungj ndaej gyonjcomz son lienh gvaq. Itgungh anbaiz daibyauj 1254 vunzbaez camgya “it fuj it veij song yen” lienzhaeh daibyauj hozdung. Gyalai caeuq gij danhvei daibyauj youq haenx doxdoeng saenqsik, cauh ok diuzgen ndei hawj daibyauj hengzguh cizcwz.

  Ciengz ciengq fuengzgaemh binghraq neix, cunghyangh mbat heuh, daengx guek yinzda daibyauj caeuq deihfueng yinzda daibyauj doengzcaez hwnjciengq, youz gak gaep dangjveij、cwngfuj dazyinx,roemx bae dingjfuengz binghraq, caeuqfaenh guh gohyenz gunggvan, bauj gunghawj doenghyiengh, doxcanj gien cienz gien doxgaiq, cawjdoengh lai gangj lai ok banhfap,youq gak diuz canqsienq、gak aen gangvih lai ok rengzhung, aeu saedsaeh hengzdoengh hengzguh le gij sawjmingh miznaj daibyauj beksingq、vihliux beksingq、 fugsaeh beksingq.

  Haj、Hopheux Fugsaeh Aen Daihbuenz Vaigyauh Dangj Caeuq Guekgya Bae Guh Gij Hong Doiq Rog Doxgyau

  Cienzmienh gvancez gij vaigyauh swhsiengj Siz Ginbingz, hawj yinzda youq gij hong guekgya vaigyauh ndaej langh rengz okdaeuj, caiq coisawj gij hong doiq rog yinzda guh ndaej engq cawjdoengh、engq miz cimdoiq、miz banjloh. Gungh ciepdaih 36 aen guekgya caeuq gak guek yivei lenzmungz 53 aen donz cuj daeuj cunzfangj guek raeuz, baij ok 65 aen donz cuj cunzfangj 60 aen guekgya caeuq aen digih yivei cujciz ndeu.

  Vihliux sawj gij cwngzgoj caeuq yigen caezcaemh gyoengq bouxdaeuz doenggvaq vaigyau gangjbaenz de ndaej doeksaed, coidoengh Daengx Guek Yinzda gyalai caeuq gak guek yivei doxndei baedauq. Hopheux gij fuengcim cwngcwz hungnaek hongsaeh vaigyauh, lumjbaenz caeuq guek hung fazcanj gvanhaeh、lai caeuq guekgya seiqhenz doxhuz doxndei、gyalaeg caeuq gij guekgya cingqcaih fazcanj haenx doxgiet gapguh doengh gij neix, daezgung faplwd caeuq cwngcwz bae gyalaeg caeuq gak fuengmienh gouzsaed gapguh. Gaenxmaenx cienzgangj Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, cekgangj gaisau gij roenloh、lijlun、cidu、vwnzva Cungguek caeuq gij gingniemh guenjleix guekgya,hawj seiqgyaiq liujgaij Cungguek, liujgaij Cunghgoz Gungcanjdangj, liujgaij yiengh sevei cujyi miz gij daegsaek Cungguek. Boiqhab gij vaigyauh hozdung youqgaenj guhdaeuz gawjbanh Gaiq Daihngeih “It Rangh It Loh” Gozci Gapguh Gauhfungh Lundanz、Gaiq Daihngeih Cungguek Gozci Cingouj Bozlanjvei daengj, gyalaeg caeuq gij yivei mizgven guekgya gyaulouz gapguh. Ndwn youq aen diegvih laebfap gihgvanh gangjvah, dukcoi mizgven guekgya baujhoh gij leih’ik guek raeuz caeuq gij vunz guek raeuz capyouq guekrog, okrengz bangcoengh guekgya hengzguh aen canloz doiq rog hailangh.

  Roengzrengz caeuq yivei guekrog coidoengh song mbiengj gyaulouz, gaenxmaenx caeuqfaenh yivei lai mbiengj baedauq. Caezcaemh gawjbanh Cungguek Daengx Guek Yinzda Caeuq Ngozlozswh Yivei Hozcoz Veijyenzvei Baez Hoih Daihhaj, caeuq Fazgoz、Yizbwnj、Bahsih daengj guek yivei haiguh gij hozdung coidoengh gyaulouz. Saen laeb song mbiengj doxndei siujcuj 4 aen, gij youjhauj cujciz Daengx Guek Yinzda caeuq yivei guekrog gapbaenz de gyoebgya hwnjdaeuj miz 129 aen, vih guek raeuz caeuq mizgven guekgya gyalaeg liujgaij、gya lai cingzngeih demgya le ligliengh. Baij donz camgya Gak Guek Yivei Lenzmungz Daih 140 Gaiq Caeuq Daih 141 Gaiq Daihhoih、Ngeihcib Guek Cizdonz Yicangj Veiyi、Ya Dai Yivei Lundanz Daih 28 Gaiq Nenzvei、Gaiq Daihseiq Ouh Ya Guekgya Yicangj Veiyi、Baez Daihsam Roek Guek Yicangj Veiyi、Ginhconh Guekgya Yivei Lundanz、Gaiq Daihsam Ndaej Lienzdaemh Hwngfat Seiqgyaiq Yivei Lundanz、Yivei Simou Daihhoih Cijdauj Veijyenzvei、Ya Dai Yiyenz Vanzfat Daihhoih、Nanzgiz Yiyenz Daihhoih doengh gij veiyi neix, leihyungh lai mbiengj ciengzhab gyaak gaeudoeng boiqhab. Gawjbanh aen yenzdaujbanh boux yiyenz gij guekgya cingqcaih fazcanj、aen yenzdaujbanh boux yiyenz aen guekgya gangj vah Fazyij Feihcouh、aen yenzdaujbanh boux yiyenz Menjden, 14 aen guekgya 74 boux yiyenz daeuj Cungguek gyaulouz hagsib, gyalai gyaulouz supaeu gij gingniemh ceihleix guekgya.

  Gyalaeg gyaulouz laebfap. Yungh ndei gij miengloh caeuq mizgven guekgya gyaulouz gapguh faplwd, youq laebfap lijlun、cidu caeuq saedguh fuengmienh lai guh gyaulouz. Hopheux gij hong laebfap, lumjbaenz laeb gij fap mizgven gisuz biucinj、laeb gij fap mizgven gak dieg dox boiqhab caeuq gij hong laebfap minzfazdenj、conhli、baujhoh bouxcaengzhung、hingzcwng cawqfad、baujhoh vanzging, caeuq mizgven guekgya guh ciendaez diucaz yenzgiu daujlun. Cawjdoengh senhconz aen cidu yinzminz daibyauj daihhoih guek raeuz, guh ndei doiq rog cekgangj yenfaz、aen fap vaisangh douzswh, gaisau guek raeuz youq dwkceih swiqcienz famhcoih、baujhoh cihsiz canjgienz caeuq swnghdai vanzging、engqgya doiq rog hailangh daengj fuengmienh laebfap cingzcik.

  Gapbaij 3 aen Daengx Guek Yinzda Sihcang Daibyaujdonz bae daengz mizgven guekgya caeuq digih, gejhoiz gij cwngcwz minzcuz cunghgyau caeuq minzcuz gihyiz swci guek raeuz, gangj gij ginghci ndawbiengz minzcuz swci deihfueng fatmaj ndaej baenzlawz yiengh. Ciucomz 27 boux daengx guek yinzda gihcwngz daibyauj caeuq deihfueng yinzda daibyauj camgya Daengx Guek Yinzda doiq rog hozdung,caenndang gangj gij gojsaeh swhgeij baenzlawz hengzguh cizcwz,hawj ndawbiengz guekrog yawjraen beksingq Cungguek baenzlawz danggya guhcawj.

  Roek、Daezsang Gij Bonjsaeh Dawz Aeu Dangj Lingjdauj、Yinzminz Danggya Guhcawj、Ciuqfap Guenj Guek Giethab Youq Itheij

  Dawzmaenh dangj lingjdauj、yinzminz danggya guhcawj、ciuqfap guenj guek giethab youq itheij,dwg sevei cujyi cwngci fazcanj bietdingh aeu baenzneix guh, dwg dingjmaenh caeuq guhndei aen cidu yinzminz daibyauj daihhoih bietdingh aeu baenzneix guh,hix dwg gyarengz youq ndaw yinzda gensez aen caeuq guh yinzda bonjfaenh gensez gij yinvu youqgaenj haenx.

  Henhoh henhoh gij gienzvi caeuq yiengh gyonjcomz lingjdauj aeu Dangjcunghyangh guhdaeuz,caencingq hawj dangj lingjdauj gij hong yinzda doeksaed daengz gak giz gak fueng gak hothoh bae. Nyinhcaen haiguh aen cawjdaez gyauyuz “mbouj lumz simnduj,geiq maenh diuzrap”, aeu lijlun cang haeuj uk bae, engqgya roxnyinh gij cwzyin gij sawjmingh fugsaeh beksingq、vih guhbaenz gij lizsij sawjmingh dangj raeuz buekguh mbouj dingz. Vihliux engq rox hengzguh cizcwz engq rox guh hong, banh 6 baez ciendaez gyangjco. Hai aen hoihgyaulouz baez daihngeih hagsib gij swhsiengj youqgaenj Siz Ginbingz cungjsuhgi dawzmaenh caeuq caezcienz aen cidu yinzminz daibyauj daihhoih, haeujlaeg lijgaij caeuq gaemdawz gij gohyoz neihanz aen cidu yinzminz daibyauj daihhoih caeuq gij saedguh iugouz yiengh hong yinzda seizdaih moq. Guh caez gij hong vuenh gaiq Yinzda Cidu Lijlun Yenzgiuvei, coengz lijlun daengz saedguh,gij hong yinzda cungj aeu cienzmienh yenzgiu caez bae.

  Anbaiz hawj cungqvunz lai bae caeuqfaenh gij hong yinzda, doenggvaq lai cungj hingzsik dingqaeu gij yigen cungqvunz, caencingq guhdaengz vih beksingq yungh gienz、vih beksingq hengzguh cizcwz. Haeujlaeg gvancez gij cingsaenz cunghyangh bet hangh gvidingh nem gij saedhengz gveihcwz de, caenhrengz gimqcawz hingzsik cujyi、gvanhliuz cujyi, doengbuenz anbaiz diuyenz hozdung, gibseiz liujgaij caeuq fanjyingj gyoengq beksingq siengj gijmaz muengh gijmaz naemj gijmaz. Cangzveijvei、cienmonz veijyenzvei haiguh diuyenz gaenh 300 baez. Doengh aen diegdiemj lienzhaeh laebfap ndalaeb youq gihcwngz haenx ciepgaenh beksingq、gyonjcomz dungxcaiz beksingq lumj “aen ci cigsoh” doeng daengz gaepgwnz, haeujcoengh beksingq daj gyaeuj daengz rieng caeuqfaenh laebfap, yienzyienz bonjbonj bae ribsou fanjyingj yigen genyi. Gyarengz gaijndei gij hong saenqfangj, haidoeng aen bingzdaiz daengx guek yinzda gihgvanh gwnz vangj saenqfangj, banhleix gij saenq caeuq daeuj cunz gaenh 8 fanh gienhbaez, ndawde miz 178 gienh dwg daibyauj cienjgyau, doinyoengx ciuqfap gibseiz gaijgez gij iugouz hableix beksingq.

  Daengx Guek Yinzda nem aen cangzveijvei de dangguh gij gihgvanh guekgya laebfap, couh aeu daiqdaeuz ciuqsouj yenfaz faplwd、ciuqfap hengzguh cizcwz、ciuqfap banhsaeh. Yiemzgek caephengz aen fap laebfap、aen fap gamduk caeuq gij gveihcwz lwnhsaeh cangzveijvei, caencingq hawj moix baez hoih、moix hangh yicwngz、moix gienh yian cungj hab faplwd gvidingh caeuq fapdingh bouhloh. Genhciz cizdij hengzsawj cizgenz、cizdij gietdingh vwndiz, hableix anbaiz daengxcungq veiyi、faen cuj saemjlwnh caeuq lienzcuj saemjlwnh, gangj minzcuj, caez doengh uk, ra ok gij siengjfap doxdoengz, youq mwh hengzguh cizcwz moix gienh saeh cungj ciuq minzcuj cizcunghci bae banhleix. Daj aen dohsang hengzguh fapdingh cizcwz bae yiemz guenj haihoih gijliz, aen hoih cangzveijvei baujciz daengz hoih vunzsoq miz 97% doxhwnj, guhdaengz sojmiz byaujgez saehhangh bouxboux cungj naenx byaujgezgi, saedbauj gij gienzlig yinzminz gyauhawj haenx yungh ndaej ngamj yungh ndaej deng.

  Daengx Guek Yinzda gak cienmonz veijyenzvei nyinhcaen hengzguh cizcwz fapdingh, youq yenzgiu、ngeixdingh、saemjlwnh mizgven yian, bang cangzveijvei youq guh gij hong lumjbaenz laebfap、gamduk、daibyauj、doiq rog gyaulouz doengh gij fuengmienh neix ndaej langh rengzhung okdaeuj. Cienzmienh dizlienh gij cwngci、swhsiengj、cujciz、cozfungh、gijliz Daengx Guek Yinzda gihgvanh, haiguh song lwnz baihndaw liebyawj, gyanaek guh daezsingj gyauyuz caeuq lenzcwng fungyiemj fuengzgaemh, engq ndei bae guh bouxbangfwngz ok geiqmaeuz, guh baenz aen gihgvanh maenh’ak hawj Dangjcunghyangh cuengqsim、beksingq habhoz.

  Engq ndei bae guh gij hong sinhvwnz yizlun yinzda, laegdaeuq daj gyaeuj daengz rieng bauqdauj gij hong laebfap、gamduk, yienh ok gij yienghsiengq daibyauj hengzguh cizcwz, senhconz deihfueng yinzda saedguh cauhmoq,hawj vunzlai gyalaeg nyinhrox diuz cwngci cidu goekdaeuz guek raeuz. Cauhmoq yinzda sinhvwnz yizlun fuengsik,gyavaiq gaijgwz gij cazci caeuq gij vangjloz Cungguek Yinzda, doinyoengx “cazci dennauj soujgih doengzcaez yawjdoeg” yungzhab fazcanj. Laebhwnj aen gihci hawj Daengx Guek Yinzda Vaisw Veijyenzvei daeuj gangjvah, gibseiz doiq gij vwndiz hungnaek nangqdaengz gij leih’ik haedsim guek raeuz gangjmingz yawjfap、siengjmuengh. Laebhwnj aen gihci hawj Cangzveijvei Fazci Gunghcoz Veijyenzvei daeuj gangjvah, hoizdap gij faplwd vwndiz cungqvunz cungj gvansim haenx.

  Hai aen hoih yaenglwnh geiqniemh deihfueng yinzda ndalaeb cangzveijvei 40 hopbi、aen hoih gyaulouz gij hong sengjgaep yinzda laebfap、aen hoih yaenglwnh gij hong daengx guek deihfueng laebfap daih 25 baez, nyinhcaen hengzguh gij cingsaenz youqgaenj Siz Ginbingz cungjsuhgi dazyinx haenx, doxdoeng gunghcoz siusik, gyaulouz gunghcoz gingniemh, gaprengz guhhong, doengzcaez guhndei gij hong yinzda seizdaih moq.

  Gak boux daibyauj!

  Gij hong Daengx Guek Yinzda Cangzveijvei guh ndaej baenz, dwg baengh aen Dangjcunghyangh aeu Siz Ginbingz dungzci guh haedsim dazyinx giengzak, baengh Daengx Guek Yinzda daibyauj、gyoengq boux gapbaenz cangzveijvei、gyoengq boux gapbaenz gak cienmonz veijyenzvei caeuq gyoengq boux guhhong Daengx Guek Yinzda gihgvanh rapdawz cwzyin、gaenxmaenx guh hong cij aeundaej, dwg Gozvuyen、Gozgyah Genhcaz Veijyenzvei、Cuigauh Yinzminz Fazyen、Cuigauh Yinzminz Genjcazyen caeuq deihfueng gak gaep yinzda nem gij cangzveijvei de maedcaed boiqhab、caezsim doxgap cij aeundaej, dwg daengx guek gak cuz yinzminz gig saenqnyaemh、roengzrengz haeujcoengh cij aeundaej. Youq neix, gou daibyauj Daengx Guek Yinzda Cangzveijvei caensim docih daihgya!

  Gij hong cangzveijvei lij miz di guh ndaej caengz gaeuq ndei, cujyau dwg: Daiqdaeuz guh gij hong laebfap lij caengz gaeuq lai, gij caetliengh laebfap aeu caiq daezsang dem; gij hong gamduk lij caengz caezcienz, gij saedyauq gamduk aeu caiq demhung; gij bonjsaeh fugsaeh daibyauj ciuqfap hengzguh cizcwz lij caengz gaeuq sang, gij guhfap doxgven aeu caiq ciengzsaeq dem; gij cidu yinzda cujciz caeuq gij gveihcwz lwnhsaeh aeu caiq laeb caezcienz bae, gij yauqlwd hong gihgvanh aeu caiq daezsang. Cangzveijvei yaek lai lai dingqaeu gij yigen genyi daibyauj caeuq gak fuengmienh, laebdaeb bae gaijndei gak hangh gunghcoz.

  Gak boux daibyauj!

  Dangj raeuz Cibgouj Gaiq Seiq Cung Cienzhoih doengbuenz cungjgez le doengh gij cingzcik hungloet caeuq gizak yienhda aen dijhi guekgya cidu caeuq guekgya ceihleix guek raeuz, doiq seizdaih moq dawzmaenh caeuq caezcienz aen cidu yiengh sevei cujyi miz gij daegsaek Cungguek、doi hawj gij dijhi ceihleix caeuq gij naengzlig ceihleix guekgya engqgya yienhdaih doengh gij fuengmienh neix guh ok yiengh baijbouh ceiq sang ceiq caezcienz. Aen cidu yinzminz daibyauj daihhoih dwg gij gapbaenz youqgaenj yiengh cidu sevei cujyi miz gij daegsaek Cungguek, dwg aen cwngci cidu goekgaen cengjdaemx aen dijhi ceihleix caeuq gij naengzlig ceihleix guekgya. Cungguek moq laebbaenz 70 bi daeuj, Cungguek yinzminz daj guekgya bienqvaq hwngfat riengjvaiq ndawde, yied daeuj yied cingcuj rox daengz, aen cidu yinzminz daibyauj daihhoih miz gizak caeuq rengzmingh hungloet. Raeuz aeu seizseiz dawzmaenh caeuq laebcaez aen cidu yinzminz daibyauj daihhoih, mboujduenh gyalai gij daegsaek saedguh、gij daegsaek seizdaih aen cidu yinzminz daibyauj daihhoih, dawz gizak cidu cienjvaq baenz gij rengz ceihleix guekgya, doenggvaq aen cidu yinzminz daibyauj daihhoih hawj yinzminz gaem maenh gij ngoenzcog caeuq minghyinh guekgya caeuq minzcuz.

  
Gij Cujyau Yinvu Duenh Seizgan Baihlaeng


  2020 nienz dwg dangj raeuz yaek dazyinx yinzminz saedyienh gij fwndou muzbyauh aen bak bi daih’it. Dangqnaj,vanzging rog guek cabsonx haenqrem,gij yinvu gaijgwz fazcanj onjdingh ndaw guek gannanz naek lai,gij hong yinzda bungzdaengz haujlai cingzgvang moq iugouz moq. Cangzveijvei aeu yaengx sang mbaw geiz hungmbwk yiengh sevei cujyi miz gij daegsaek Cungguek,aeu Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz guh dazyinx,cienzmienh gvancez gij cingsaenz dangj raeuz Cibgouj Daih caeuq Cibgouj Gaiq Ngeih Cung、Sam Cung、Seiq Cung Cienzhoih,lai gangj “seiqrox”、giendingh “seiq aen gagsaenq”、 guhdaengz “song aen henhoh”,dawzmaenh aen dangj lingjdauj、yinzminz danggya guhcawj、ciuqfap guenj guek ndeindei gyoebhab,ngaeugaenj doi hawj gij dijhi ceihleix caeuq gij naengzlig ceihleix guekgya engqgya yienhdaih,ngaeugaenj cingjdaej doihaeuj aen cungjdaej baijbouh “haj yiengh gap baenz aen”、boiqhab doihaeuj aen canloz baijbouh “seiq aen cienzmienh”,ngaeugaenj gij hongsaeh duetgungz gunggeng、buek hingz cienzmienh hwnqbaenz aen biengz siujgangh,coenghrengz guhndei gaiq hong fuengzgaemh binghraq caeuq ndaw biengz ginghci hwngfat,genhciz aen goekdiuh youq mwh onjdingh gouz baenaj,ciuqfap hengzguh cizcwz,doidoengh gij hong yinzda laebdaeb aeundaej cingzcik moq hwnj mbaek moq.

  Bineix doxdaeuj,ciuq Dangjcunghyangh baijbouh, cangzveijvei miz bouhloh doinyoengx gak hangh gunghcoz lienzdaemh baenaj. Mboengq laeng cujyau anbaiz gij hong lajneix:

  (It) Saedbauj yenfaz cienzmienh saedhengz. Dinghlaeb gij bouhloh gejdap Yenfaz. Gij hong saemjcaz hab mbouj yenfaz aeu guh roengzbae. Gyarengz laebguh gij cidu bwh’anq saemjcaz,yiemzgek caephengz《Gij Hong Fapgvi、Swhfaz Cekgej Bwh’anq Saemjcaz Banhfap》,laeb caez gij goengnaengz aen bingzdaiz saenqsik bwh’anq saemjcaz, gya lai gag guh saemjcaz caeuq bae guh cienhangh saemjcaz. Guh ndei yenfaz senhconz gyauyuz,banh ndei gij vueddoengh yenfaz senhsi caeuq ngoenz guekgya yenfaz. Dawzdingh ciuq fap guenj Yanghgangj guenj Aumwnz,aeu faplwg guhgoek guenjleix guekgya dwg yenfaz caeuq gihbwnjfaz doekdingh, raeuz aeu ciuqhengz,laebndei gij cidu Daengx Guek Yinzda Cangzveijvei cekgej gihbwnjfaz,coengz guekgya caengzmienh bae naemj, laebhwnj laebndei gij cidu faplwd caeuq gij hengzguh banhfap hawj Yanghgangj daegbied hingzcwnggih ndaej henhoh guekgya ancienz,caiqlij gyavaiq bae laebcaez gij faplwd doxgven de. Dawzmaenh gij cwngcwz youqgaenj guh gaiq hong cimdoiq Daizvanh,laemxsim fanjdui caeuq naenxroengz gij seiqlig “Daizduz”,aeu “goujngeih yinsiz” guhgoek doidoengh song hamq gvanhaeh hozbingz fazcanj.

  (Ngeih) Gyarengz youq aen lingjyiz youqgaenj laebfap. Bineix gij hong laebfap gig naek,aeu dawz ndei gij gvanhaeh caetliengh caeuq yauqlwd,engq ndei hawj yinzda youq mwh laebfap ndaej langh rengz daiqdaeuz guhhong,youq engq saeqnaeh、engq cingcinj、engq doiqcinj gwnzde bae roengz goengfou,caencingq bauj ndei laeb gienh baenz gienh. Hopheux yienghyiengh cungj vihliux hawj fazcanj lai miz caetliengh, ceiqdingh aen fap baujhoh Dahcangzgyangh、aen fap coicaenh saenqhwng lajmbanj、aen fap geizhuq、aen fap Haijnanz swyouz mouyiz gangj、coihgaij aen fap conhli. Hopheux laeb ndei hangh cidu ndaej bauj gij gwndaenj beksingq, doedyienh youq aen lingjyiz goenggungh veiswngh laebfap,coihgaij doengh gij fap lumjbaenz aen fap fuengz binghraq doihduz、aen fap henhoh duzdoengh、aen fap fuengzyw binghlah、aen fap cazniemh binghraq veiswngh ndawguek、aen fap wngqdoiq gij saehgienh fwtfat、aen fap cizyez gyauyuz,ceiqdingh aen fap ndawbiengz gouqcoengh、aen fap baujndei bouxbing duiyiz. Hopheux guekgya ancienz caeuq ndawbiengz ceihleix,ceiqdingh aen fap swnghvuz ancienz、aen fap baujhoh goyinz saenqsik、aen fap soqgawq ancienz,doenggvaq aen anq coihcingq hingzsaeh (cib’it),coihgaij aen fap hingzcwng cawqfad、aen fap hingzcwng fuklwnh、aen fap cawqfad gij famh cianh guenjleix、aen fap yinzminz vujcangh gingjcaz. Hopheux gyavaiq laebguh gij faplwd dijhi guek raeuz youq rog guek habyungh haenx,ceiqdingh aen fap guenjhaed ok guek,coihgaij aen fap fanj swiqcienz、aen fap Yinzminz Yinzhangz、aen fap Sanghyez Yinzhangz、aen fap baujyiemj daengj. Hopheux guh ndei gij dijhi cidu beksingq danggya guhcawj,coihgaij aen fap Daengx Guek Yinzda cujciz caeuq lwnhsaeh gveihcwz、aen fap senjgij、aen fap gozgiz daengj. Guh ndei gij hong senhconz caeuq saedguh mizfazdenj. Lij aeu gaengawq gij cingzgvang cienzmienh gyalaeg gaijgwz,guhndei gij hong laebfap gietdingh hawjgienz caeuq gaijgwz,saedbauj gij yinvu laebfap youqgaenj Dangjcunghyangh gaenq dingh、gij yinvu laebfap gvendaengz aen daihbuenz sevei ginghci fazcanj haenx guhbaenz caezcup.

  (Sam) Ciuqfap guh ndei gij hong gamduk. Laeb caezcienz gij cidu gamduk,bauj gij gezcwz baijbouh Dangjcunghyangh ndaej roengz daengz gizsaed,bauj Yenfaz faplwd saedhengz ndaej ndei. Conz sim haeuj gij baijbouh hungnaek dangj caeuq guekgya bae,sien anbaiz 29 aen gamduk hanghmoeg gonq. Hopheux cienzmienh hwnqbaenz aen biengz siujgangh,dwk ndei sam ciengz ciengq gunggeng,guhndei gij hong “roek onj”,doeksaed gaiq hong “roek bauj”,dingqaeu saemjlwnh 16 aen baugau gvendaengz gij hongsaeh doeksaed gij canloz aeu cauhmoq bae doidoengh hwngfat, gyarengz gamduk saemjcaz yawhsuenq gietsuenq caeuq gamduk guenjleix guekmiz swhcanj. Genjcaz cangzveijvei mizgven gietdingh caeuq aen fap henhoh duzdoengh、aen fap fuengzceih namh deng uqlah、aen fap swzsienh、aen fap fanj mbouj cingqdangq gingcwngh、aen fap bauj goenggungh vwnzva fugsaeh、aen fap coicaenh nungzyez gihgaiva daengj 6 bouh faplwd guh ndaej baenzlawz yiengh. Hopheux gij yienghsaeh cingjgaij fuengzceih diegnamh uqlah、saemjgeiq cazok gij vwndiz youqgaenj guh ciendaez cazcam. Hopheux bienguh “cibseiq haj” gveihva ganghyau、gaijgwz hangh hong cauhlaeb minzcuz doxgiet cinbu、gaijgwz hangh cidu ndawbiengz baujyiemj daengj guh 5 hangh ciendaez diucaz yenzgiu. Bineix,gij saehnieb hungmbwk hingzdingh duetgungz、buek hingz cienzmienh hwnqbaenz aenbiengz siujgangh guek raeuz,bietdingh yaek sij haeuj bonj lizsij ronghlwenq Cunghvaz Minzcuz、lizsij vunzloih bae. Cangzveijvei aeu gaenjgaenj hopheux aen canloz baijbouh hungnaek neix bae guh gij hong gamduk,vih aen fwndou muzbyauh bak bi daih’it ndaej ciuqseiz saedyienh guh ok gij gunghawj wnggai guh de.

  (Seiq) Haeujcoengh daibyauj ciuqfap hengzguh cizcwz. Laebcaez laebndei daibyauj lienzhaeh miengloh,aeu ciengzsaeq banhfap hawj gij hong Daengx Guek Yinzda daibyauj guh ndaej lai ak lai ndei bae,sawj cangzveijvei caeuq daibyauj、daibyauj caeuq yinzminz ginzcung ndaej maedcaed lienzhaeh. Lai hawj daibyauj daezsang bonjsaeh, daezswng gij swhsiengj cwngci suijbingz caeuq gij naengzlig hengzguh cizcwz gyoengqde. Coengz daezok、banhleix、hoizdauq gak aen hothoh bae gaijndei gij hong banhleix daibyauj genyi caeuq yian, cazniemh daibyauj genyi wngswngz banhleix cingzgvang,guh ndei gaenriz dukbanh. Hawj daibyauj lai bae caeuqfaenh gij hong cangzveijvei、cienmonz veijyenzvei、gunghcoz veijyenzvei,nyinhcaen dingqaeu caeuq ciepsouh gij yigen genyi daibyauj daezok. Maeuzveh guhndei gij hong daibyauj cazyawj caeuq diuyenz,sawj daibyauj hagsib beizyin hag ndaej cinj cix engq miz yungh. Gyavaiq hwnqguh aen bingzdaiz hawj daibyauj soucomz saenqsik hengzguh cizcwz.

  (Haj) Gaenxmaenx haiguh gij hong doiqrog doxgyau. Hawj yinzda langh rengz dawz gij bonjsaeh gag miz de, guhndei yiengh hong caeuq rog guek doxgyau doxgap,fugsaeh gaiq hong vaigyauh dangj caeuq guekgya. Caeuq bouxdaeuz gak guek gyalai baedauq doxcunz,hawj gak cienmonz veijyenzvei、youjhauj siujcuj、gunghcoz gihgou youq gij hong doiqrog doxgyau ndawde cungj ndaej okrengz. Onjbouh doicaenh gij hong gyaulouz,gaenxmaenx caeuqfaenh yivei lai guek doxgap,lailai gyauhliuz gaiq hong laebfap gunghgung veiswngh,coicaenh guekgya gvanhaeh gaenjmaenh caeuq gak fuengmienh caensaed gapguh.

  (Roek) Guh ndei cangzveijvei bonjfaenh gensez. Gyamaenh caeuq gyalaeg “mbouj lumz simnduj、geiqmaenh diuzrap” cawjdaez gyauyuz,haeujlaeg hagsib gvancez Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz. Nyinhcaen doeksaed gij cingsaenz caeuq gveihcwz cunghyangh bet hangh gvidingh,gaijndei gunghcoz cozfungh,maedcaed lienzhaeh ginzcung,haeujlaeg bae guh diucaz yenzgiu. Laebndei gij bouhloh baenzlawz lwnhsaeh caeuq gij fuengfap baenzlawz guhhong. Doiq yinzminz daibyauj daihhoih cidu lai guh lijlun yenzgiu,gaijndei yinzda sinhvwnz yizlun gunghcoz. Hawj gyoengq cienmonz veijyenzvei ok rengz caez bae. Cietsaed guenj ndei aen gihgvanh Daengx Guek Yinzda. Hopheux gvancez doeksaed gij fuengcim cwngcwz caeuq gezcwz baijbouh Dangjcunghyangh,lai bae lienzhaeh deihfueng yinzda,hawj gij hong yinzda gaepgwnz gaeplaj cungj guh ndei caez bae.

  Gak boux daibyauj!

  Ciengz ciengq cienzmienh hwnqbaenz aen biengz siujgangh couh yaek ndaej hingz,minzcuz fukhwng baihnaj ronghsag. Cingj raeuz gaenjmaed doxgiet youq seiqhenz aen Dangjcunghyangh aeu Siz Ginbingz dungzci guh haedsim haenx,caezsim gaprengz、laemxsim baenaj,ciengj haet ganj haemh、dawz ndaej rap naek,vih dawzdingh caeuq laebndei aen cidu sevei cujyi miz gij daegsaek Cungguek、hawj gij dijhi ceihleix guekgya caeuq gij naengzlig ceihleix guekgya engqgya hab’wngq seizdaih iugouz, saedyienh gij fwndou muzbyauh “song aen bak bi”、saedyienh aen loqsiengj Cunghvaz Minzcuz fukhwng hungmbwk buek rengz bae guh!

 ?。⊿inhvazse Baekging 5 nyied 31 hauh dienh)
Dozsiengq
自拍偷窥亚洲图片wap19uuuucom