Nda Guh YiebdaeuzYolouz RoengzdaeujAen Saenqsieng Bouxbien
YiebdaeuzYinzminzvangjSawmungzgujSawcangqcuzSawveizvuzwjSawhahsazgwzSawcauzsenhSawyizcuz

BUEKRENGZ DWKHINGZ CIENZMIENH HWNQBAENZ AEN BIENGZ SIUJGANGH DUEDAEU YIENGH SEVEI CUJYI MIZ GIJ DAEGSAEK CUNGGUEK SEIZDAIH MOQ NDAEJ HINGZ HUNGMBWK

——Aen baugau youq gwnz hoih Cunghgoz Gungcanjdangj Daih Cibgouj Baez Daengx Guek Daibyauj Daihhoih guh
(2017 nienz 10 nyied 18 hauh)

Siz Ginbingz
  
【Cihsaw Hung’iq : hung rauh iq】  Dajyaenq
      
Gak boux dungzci:

  Seizneix, gou daibyauj Daih Cibbet Gaiq Cunghyangh Veijyenzvei yiengq daihhoih guh baugau.

  Cunghgoz Gungcanjdangj Daih Cibgouj Baez Daengx Guek Daibyauj Daihhoih, dwg youq aen gaihdon gietdingh cienzmienh hwnqbaenz aen biengz siujgangh sawhingz、aen seizgeiz gig youqgaenj yiengh sevei cujyi miz gij daegsaek Cungguek haeuj daengz seizdaih moq le ciuhai,dwg baez daihhoih gig youqgaenj ndeu.

  Aen cawjdaez daihhoih dwg: Mbouj lumz cosim, geiqmaenh sawjmingh, yaengx sang mbawgeiz hungmbwk yiengh sevei cujyi miz gij daegsaek Cungguek, buekrengz dwkhingz cienzmienh hwnqbaenz aen biengz siujgangh, duedaeu yiengh sevei cujyi miz gij daegsaek Cungguek seizdaih moq ndaej hingz hungmbwk, vih saedyienh aen loqsiengj Cungguek Cunghvaz Minzcuz fukhwng hungmbwk buekguh mbouj dingz.

  Mbouj lumz cosim, cij ndaej miz goek miz byai. Gij cosim caeuq sawjmingh vunz Cunghgoz Gungcanjdangj, couh dwg vih gij yinzminz Cungguek maeuz vuenyungz, vih Cunghvaz Minzcuz maeuz fukhwng. Aen cosim caeuq sawjmingh neix dwg gij rengzgoek gikleih vunz Cunghgoz Gungcanjdangj mboujduenh baenaj. Daengx dangj dungzci itdingh aeu ciengzlwenx caeuq yinzminz doengz diemheiq、 caemh minghyinh、sim doxlienz, ciengzlwenx dawz yinzminz siengjmuengh gvaq saedceij ndei dangbaenz aen muzbyauh buekguh, yungh cungj cingsaenz yienghceij baenzmaz cungj mbouj soengse laihgik caeuq cungj yienghsiengq itloh buekguh baenaj, laebdaeb riengz aen muzbyauh hungloet saedyienh Cunghvaz Minzcuz fukhwng hungmbwk haenqrengz roemx baenaj.

  Dangqnaj, gij hingzseiq ndaw guek rog guek cingqcaih mizok yiengh bienqvaq laegdaeuq youh fukcab, guek raeuz fazcanj vanzlij cawqyouq mboengq canloz seizgei youqgaenj, diuzroen baihnaj ronghsagsag, diuhcan hix yiemzhaenq dangqmaz. Daengx dangj dungzci itdingh aeu ndwn sang muengh gyae、youq onj ngeix nanh, gamj bae bengwz、gamj bae cauhmoq, ciengzlwenx mbouj gaengjbanj、 ciengzlwenx mbouj dingznywngh, comzgiet daiqlingx daengx guek gak cuz yinzminz dwkhingz cienzmienh hwnqbaenz aen biengz siujgangh, buekrengz duedaeu yiengh sevei cujyi miz gij daegsaek Cungguek seizdaih moq ndaej hingz hungmbwk.

  It、 Gij Gunghcoz Haj Bi Gvaqbae Neix Caeuq Gij Bengwz Miz Lizsij Yiyi

  Cibbet Daih doxdaeuj haj bi neix, dwg dangj caeuq guekgya hwngfat baenaj ndawde haj bi gig mbouj bingzciengz. Mienhdoiq aen vanzging baihrog seiqgyaiq ginghci hoizswng mbouj rengz、mbangj dieg deihdeih miz ok doxdawz caeuq fubfab mbouj dingh、gij vwndiz seiqgyaiq gak guek bungzdaengz haenx gyahaenq, mienhdoiq guek raeuz ginghci hwngfat haeuj daengz cangzdai moq daengj baenzroix bienqvaq laegdaeuq, raeuz genhciz aen gunghcoz cawjdiuh youq mwh onjdingh gouz baenaj, dingj nanz bae guh, hailoh baenaj, aeundaej le gij cingzcik miz lizsij yiyi gaijgwz hailangh caeuq sevei cujyi yendaiva gensez.

  Vih gvancez gij cingsaenz Cibbet Daih, dangj cunghyangh ciuhai caet baez cienzhoih, faenbied cimdoiq cwngfuj gihgou gaijgwz caeuq ciznwngz cienjbienq、 cienzmienh gyalaeg gaijgwz、cienzmienh doicaenh ciuqfap ceih guek、ceiqdingh “cibsam haj” gveihva、cienzmienh coengzyiemz ceih dangj daengj doengh gij vwndiz hungnaek neix guh’ok gietdingh caeuq baijbouh. Haj bi daeuj, raeuz doengjit suenqveh doicaenh “haj yiengh gyoeb baenz cingjdaej” cungjdaej baijbouh、hezdiuz doicaenh “seiq aen cienzmienh” canloz baijbouh, “cibngeih haj” gveihva ndaej swnhndei guhbaenz, “cibsam haj” gveihva swnhleih hengzguh, aen saehnieb dangj caeuq guekgya cienzmienh haiok gizmen moq.

  Ginghci gensez aeundaej cingzcik hungnaek. Giendingh mbouj bienq gvancez fazcanj leixniemh moq, giengiet dawzcingq fazcanj gvanhnen、cienjbienq fazcanj fuengsik, fazcanj caetliengh caeuq yauqik mboujduenh daezswng. Ginghci demmaj baujciz yiengh suzdu cungdaengj haemq vaiq, youq seiqgyaiq cujyau guekgya ndawde baiz youq baihnaj, gij swnghcanj cungjciz ndaw guek daj hajcib seiq fanh ik maenz gyalai daengz betcib fanh ik maenz, youq seiqgyaiq onjmaenh naengh youq daihngeih, doiq seiqgyaiq ginghci demmaj gunghawj beijlwd mauhgvaq sam cingz. Gij gezgousing gaijgwz mbiengj gunghawj doicaenh haeujlaeg, ginghci gezgou mboujduenh bienq ndei, soqcih ginghci daengj canjnieb saenhwng fazcanj hoenghhwd, gauhdez、goengloh、giuz、sokruz、gihcangz daengj giekdaej sezsih gensez gyavaiq doicaenh. Nungzyez yendaiva onjbouh guh baenaj, haeuxgwn swnghcanj naengzlig dabdaengz it fanh song cien ik gaen. Aen beijlwd hawsingzvaq moix bi bingzyaenz daezsang it diemj ngeih aen bakfaendiemj, bet cien lai fanh vunz daj ndaw nungzyez cienjbienq baenz gihminz hawsingz. Gak rangh dieg dox boiqhab fazcanj demgiengz, “it rangh it loh” gensez、Bwzgingh Denhcinh Hozbwz dox boiqhab fazcanj、rangh ginghci Cangzgyangh fazcanj cingzyauq yienhda. Roengzrengz hengzguh hangh canloz cauhmoq doidoengh fazcanj, gij cwngzgoj hwnqguh aen guekgya ak cauhmoq haenx laidaih, Denhgungh、Gyauhlungz、Denhyenj、Vugungh、 Mwzswj、feihgih hung daengj gohgi cwngzgoj hungnaek laebdaeb okseiq. Gij hong gensez doengh aen daujciuh Nanzhaij cizgiz doihaeuj, aen dijci moq yiengh ginghci hailangh haenx cugbouh laeb caezcienz, doiq rog mouyiz、 doiq rog douzswh、 cienz guekrog bwhcwk youq seiqgyaiq onjdingh baiz youq baihnaj.

  Cienzmienh gyalaeg gaijgwz ndaejdaengz cungbyoengq hungnaek. Byaij gaenj yamq onj doicaenh cienzmienh gyalaeg gaijgwz, giengiet buqcawz gij yaezrwix ndaw dijci gihci gak fuengmienh. Gaijgwz cienzmienh fat rengz、lai diemj cungbyoengq、doicaenh haeuj laeg, roengzrengz sawj gaijgwz engq baenz hidungj、 engq baenz cingjdaej、engq miz boiqhab bae guh, ciuq bouhloh yamq doek yamq bae doicaenh gaijgwz mbe engq gvangq caeuq guh haeuj laeg, doiok it cien haj bak lai hangh gaijgwz cosih, gij gaijgwz ndaw lingjyiz youqgaenj caeuq aen hothoh gyaugvan haenx ndaej cungbyoengq dwk guh baenaj, gij cawjdaej gvaenghgaq cujyau lingjyiz gaijgwz daihdaej dinghlaeb. Gij cidu sevei cujyi miz daegsaek Cungguek engqgya caezcienz, guekgya ceihleix dijhi caeuq ceihleix naengzlig yendaiva suijbingz mingzyienj daezsang, gij rengzhoengh fazcanj caeuq gij rengzhoengh cauhmoq daengx biengz mingzyienj demgiengz.

  Minzcuj fapceih gensez yamq ok yamqdin hungnaek. Cizgiz fazcanj yiengh minzcuj cwngci sevei cujyi, doicaenh cienzmienh ciuqfap ceih guek, laebguh gij cidu aen dangj lingjdauj、yinzminz danggya guhcawj、ciuqfap ceih guek gaenjmaed doengjit neix cienzmienh gyagiengz, gij dijci gihci aen dangj lingjdauj mboujduenh caezcienz, yiengh minzcuj sevei cujyi mboujduenh fazcanj, gij minzcuj ndaw dangj engqgya gvangqlangh, yiengh minzcuj doxyaeng sevei cujyi cienzmienh mbehai, aen cansen gyaez guek doengjit ndaej gyamaenh caeuq fazcanj, hongsaeh minzcuz cunghgyau miz cauhmoq dwk doihaeuj baihnaj. Gohyoz laebfap、yiemzgek caepfap、goengcingq dawzfap、bouxboux soujfap doicaenh haeuj laeg, hwnqguh aen guekgya fapceih、 aen cwngfuj fapceih、 aen biengz fapceih dox guh coicaenh, aen fapceih dijhi sevei cujyi miz daegsaek Cungguek haenx yied ngoenz yied caezcienz, daengx biengz fapceih gvanhnen mingzyienj demgiengz. Gij sawqdiemj gaijgwz aen dijci guekgya gamcaz aeundaej saedyauq, hingzcwng dijci gaijgwz、 swhfaz dijci gaijgwz、 gienzlig yinhhengz hanhhaed caeuq gamduk dijhi gensez mizyauq hengzguh.

  Swhsiengj vwnzva gensez ndaejdaengz cincanj hungnaek. Gyagiengz dangj lingjdauj gij hongsaeh yisiz hingzdai, gij lijlun cauhmoq aen dangj cienzmienh doicaenh, Majgwzswh Cujyi youq yisiz hingzdai lingjyiz aen diegvih dazyinx de engqgya sienmingz, yiengh sevei cujyi miz gij daegsaek Cungguek caeuq aen loqsiengj Cungguek haeujlaeg daengz ndaw sim cungqvunz, aen haedsim gyacizgvanh sevei cujyi caeuq gij conzdungj vwnzva maenhndei Cunghvaz dauqcawq hungzyangz, gij hozdung cungqvunz caeuqfaenh cauhlaeb cingsaenz vwnzmingz haenx netsaed mbeguh. Aen suijbingz goenggungh vwnzva fugsaeh mboujduenh daezsang, dajcauh vwnzyi cozbinj laebdaeb hoenghvuengh, vwnzva saehnieb caeuq vwnzva canjnieb fazcanj hoenghhwd, hulenzvangj gensez guenjleix yinhyungh mboujduenh caezcienz, cienzminz lienhndang caeuq dijyuz doxdax cienzmienh fazcanj. Cujsenzliz engqgya yiengjgok, rengzcingq engqgya rem’ak, vwnzva gagsaenq ndaej yienhraen okdaeuj, gij saedlig’unq guekgya vwnzva caeuq gij rengzyingjyangj Cunghvaz vwnzva daihdaih daezswng, daengx dangj daengx biengz swhsiengj fuengmienh doxgiet doengjit engqgya maenhrem.

  Saedceij yinzminz mboujduenh gaijndei. Haeujlaeg gvancez cungj fazcanj swhsiengj aeu yinzminz guh cungsim, baenz daihbuek cosih ikleih yinzminz haenx ndaej cietsaed hengzguh, yinzminz cungj roxnyinh ndaej ndeicawq haenx demgiengz yienhda. Ciengz ciengq gunggeng duetgungz aeundaej gij cincanj dingh maenh, roek cien lai fanh vunz gungzhoj onjdingh duetgungz, aen beijlwd mizok gungzhoj daj bak faenh cih cib diemj ngeih doek daengz bak faenh cih seiq doxroengz. Gyauyuz saehnieb cienzmienh fazcanj, gij gyauyuz dieg cungqgyang dieg baihsae caeuq lajmbanj yienhda gyaak. Couhnieb canggvang laebdaeb gaijndei, ndaw singz gij vunz lai demgya couhnieb haenx moix bi bingzyaenz it cien sam bak fanh boux doxhwnj. Gihminz hawsingz lajmbanj souhaeuj demmaj vaiq gvaq ginghci demmaj, gyoengq vunz souhaeuj gaepgyang haenx lienzdaemh gyalai. Aen sevei baujcang dijhi goq daengz gihminz hawsingz lajmbanj haenx daihdaej laeb hwnjdaeuj, yinzminz ndangcangq caeuq yihliuz veiswngh suijbingz daihdaih daezsang, hwnqguh gij ranz bauj miz youq haenx onjbouh doi baenaj. Aen dijhi ceihleix ndawbiengz engqgya caezcienz, ndawbiengz daihbuenz baujciz onjdingh, guekgya ancienz cienzmienh gyarem.

  Swnghdai vwnzmingz gensez cingzyauq yienhda. Roengz rengz hung bae doicaenh swnghdai vwnzmingz gensez, daengx dangj daengx guek gagrox caeuq cawjdoengh bae gvancez cungj leixniemh loegsaek fazcanj demgiengz yienhda, yiengh cingzgvang yawjlawq baujhoh swnghdai vanzging haenx mingzyienj gaijbienq. Aen cidu dijhi swnghdai vwnzmingz gyavaiq cauxbaenz, aen cidu vehfaen dieg cawjdaej goengnaengz cugbouh laeb caezcienz, guekgya gunghyenz dijci sawqdiemj ndaej cizgiz doicaenh. Cienzmienh mbaetyungh swhyenz mizyauq doicaenh, nwngzyenz swhyenz siuhauq daih fukdoh doekdaemq. Aen gunghcwngz hungloet baujhoh caeuq coihndei swnghdai swnhleih guh baenaj, ndoengfaex cw dieg yied bi yied gvangq. Gij hongsaeh ceihleix swnghdai vanzging mingzyienj demgiengz, vanzging canggvang ndaejdaengz gaijndei. Dazyinx guek caeuq guek doxgap wngqdoiq dienheiq bienqvaq, bienqbaenz aen guekgya youqgaenj caeuqfaenh、 gunghawj、yinxlingx hwnqguh daengx seiqgyaiq swnghdai vwnzmingz.

  Bingdoih hwnghwnj bienq ak haiok gizmen moq. Daj saedyienh aen loqsiengj Cungguek aen loqsiengj bingdoih giengzak bae naemj, dingh ok aen ginhsw canloz fuengcim habngamj hingzsi moq, caenhrengz doicaenh gozfangz caeuq bingdoih yendaiva. Ciuhai Gujdenz Daengx Ginh Cwngci Gunghcoz Veiyi, hoizfuk caeuq fatyiengz gij conzdungj miznaj caeuq gij cozfungh maenhrem dangj raeuz bingdoih raeuz, gij cwngci swnghdai bingdoih yinzminz ndaejdaengz mizyauq ceihleix. Gozfangz caeuq bingdoih gaijgwz cungbyoengq lizsij, cauxbaenz cungj baijbouh moq ginhveij guh doengjguenj、cangih guenj cijveih hoenxciengq、gak ginhcungj guenj bingdoih cauhlaeb, aen gvaenghgaq cujciz caeuq gij dijhi ligliengh bingdoih yinzminz daj ndaw daengz rog ndaej dauqcungz dajcauh. Gyagiengz lienh bing bwhhoenx, mizyauq hengzguh gwnz haij hen gienz、fanjgungj hen onj、gouqyiemj gouqcai、gozci hen huz、Yadinghvanh hohhangz、yinzdau cujyi gouqbang daengj yinvu hungnaek, vujgi canghbei haifat gyavaiq, gij hong caepcawq ginhsw doucwngh ndaej hwnj mbaeksang moq. Bingdoih yinzminz youq gwnz roen hwnghwnj bienq ak miz gij daegsaek Cungguek byaij ok le yamqdin gengmaenh.

  Gij hongsaeh Gangj Au Daiz caiq ndaej guh baenaj. Cienzmienh cinjdeng gvancez aen fuengcim “aen guekgya ndeu song cungj cidu” , gaemndaet gij gienz cunghyangh cienzmienh guenjceih Yanghgangj、Aumwnz yenfaz caeuq gihbwnjfaz gyauhawj haenx, gyalaeg doicaenh diegndaw caeuq Gangj Au digih gyaulouz doxgap, baujciz Yanghgangj、Aumwnz mwnhoengh onjdingh. Genhciz diuz yenzcwz aen Cungguek dog caeuq “gij nyinhrox doxdoengz 1992 nienz” , doidoengh song hamq gvanhaeh hozbingz fazcanj, gyagiengz song hamq youq ginghci vwnzva fuengmienh guh gyaulouz doxgap, guhbaenz bouxdaeuz song hamq mbat raennaj miz lizsij yiyi ndeu. Onjdangq bae wngqdoiq Daizvanh hingzseiq bienqvaq, giengiet fanjdui caeuq gaemhnaenx gij seiqlig faenmbek “Daizvanh doglaeb” , mizrengz henhoh Daizhaij hozbingz onjdingh.

  Yiengh vaigyauh baijbouh cienz fuengvih haenx mbehai haeuj laeg. Cienzmienh doicaenh yiengh vaigyauh guekhung miz daegsaek Cungguek, cauxbaenz cungj vaigyauh baijbouh cienz fuengvih、lai caengz、baenz lizdij, vih guek raeuz fazcanj cauh’ok gij diuzgen baihrog ndei. Hengzguh aen cawjcieng caez hwnqguh “it rangh it loh” , fathwnj haibanh Yacouh Gihcuj Sezsih Douzswh Yinzhangz, ndalaeb Swhlu Gihginh, gawjbanh Daih’it Gaiq “It Rangh It Loh” Gozci Doxgap Gauhfungh Lundanz、Bouxdaeuz Ya Dai Ginghhoz Cujciz Aen Hoih Mbouj Cingqsik、 Bouxdaeuz Ngeihcib Guek Cizdonz Hangzcouh Funghvei、Bouxdaeuz Aen Guek Ciengim Yamwnz Doxraen、Yasin Funghvei. Daiqdaeuz cawjcieng cauhlaeb vunzloih minghyinh gungdungzdij, coicaenh bengwz aen dijhi ceihleix daengx seiqgyaiq. Gij rengz yingjyangj、 rengz gamjciu、 rengz dajcauh guek raeuz youq gwnz gozci caenh’itbouh daezsang, vih seiqgyaiq hozbingz caeuq fazcanj caiq guh ok gunghawj hungnaek.

  Cienzmienh coengzyiemz ceih dangj cingzyauq yienhda.Cienzmienh gyagiengz aen dangj lingjdauj caeuq aen dangj gensez, giengiet gaijbienq gij yienghsiengq guenj dangj ceih dangj soeng’unq mbouj yiemz haenx. Doidoengh daengx dangj gingqcungh dangjcangh, demgiengz gij eiqsik cwngci、gij eiqsik daengxbuenz、gij eiqsik haedsim、gij eiqsik gaenhwnj, giengiet henhoh gij gienzvi caeuq gij cizcungh doengjit lingjdauj dangj cunghyangh, yiemzmingz gij cwngci gijliz caeuq cwngci gvigawj dangj raeuz, caengzcaengz doeksaed gij cwngci cwzyin guenj dangj ceih dangj. Genhciz ciuq gij iugouz ciuq gingq yawj、cingj buh mauh、 swiqswiq ndang、 ywyw bingh, haiguh gij hozdung son’gyauq hengzguh diuz ginzcung lohsienq aen dangj caeuq aen ciendaez gyauyuz “sam yiemz sam saed”, doicaenh “song hag it guh” yozsiz gyauyuz bienqbaenz sibgvenq bienqbaenz cidu, gij lijsiengj saenqniemh daengx dangj engqgya giendingh、dangjsing engqgya giengiengz. Gvancez gij biucinj boux ganbu ndei seizgeiz moq, gij canggvang caeuq fungheiq genj vunz yungh vunz mingzyienj bienq ndei. Gaijgwz hangh cidu aen dangj gensez haeujlaeg guh baenaj, aen dijhi fapgvi cidu ndaw dangj mboujduenh caezcienz. Dawz gijliz baij youq baihnaj, roengzrengz gaijgez doengh gij vwndiz yienhda yinzminz ginzcung fanjyingj ceiq haenq、doiq aen giekdaej dangj raeuz gaemgienz miz yungyiemj ceiq hung haenx. Okdaiz cunghyangh bet hangh gvidingh, yiemzhaenq cingjceih hingzsik cujyi、gvanhliuz cujyi、youqlag cujyi caeuq fungheiq saisaengq saj baizciengz, giengiet fanjdui daeggienz. Yiengh cunzyawj raeh dangq faggiemq haenx cozyung mingzyienj, guhbaenz cunghyangh caeuq sengjgaep dangjveij cunzyawj dohdaengz caez. Genhciz fanj nduknaeuh mbouj miz dieggimq、cienzbouh goq daengz、mbouj yungznyaenx saek di, giendingh mbouj bienq bae “moeb guk”、“bek nengznyaen”、“dwk nyaenma”, aen muzbyauh mbouj gamj nduknaeuh cobouh guhbaenz, aen loengz mbouj ndaej nduknaeuh yied san yied maenh, diuz fai mbouj siengj nduknaeuh cingqcaih caep hwnjdaeuj, gij seiqdaeuz fanj nduknaeuh doucwngh itdingh ndaej hingz haenx gaenq cauxbaenz caemhcaiq gyamaenh fazcanj.

  Gij cingzcik haj bi neix daeuj dwg gij cingzcik sojmiz fuengmienh caemhcaiq lij dwg miz haicauh bae guh le aeu ndaej, gij bengwz haj bi neix daeuj dwg gij bengwz haeuj daengz ndokngviz haeuj daengz goekgaen. Haj bi daeuj, dangj raeuz baengh cungj cwngci damjliengh hungloet caeuq gig ndaej rapdawz cwzyin, daezok baenzroix leixniemh moq swhsiengj moq canloz moq, okdaiz baenzroix fuengcim cwngcwz hungnaek, doiok baenzroix cosih hungnaek, doicaenh baenzroix hongsaeh hungnaek, gaijgez le haujlai nanzdaez ciengzgeiz siengj gaijgez hoeng cix caengz ndaej gaijgez haenx, banhbaenz le haujlai daihsaeh doenghbaez siengj banh hoeng cix caengz banh ndaej baenz haenx, doidoengh aen saehnieb dangj caeuq guekgya fatseng le gij bengwz miz lizsij yiyi. Doengh gij bengwz miz lizsij yiyi neix, doiq gij saehnieb dangj caeuq guekgya hwngfat miz gij yingjyangj hungnaek youh gyaeraez.

  Haj bi daeuj, raeuz gamj bae mienhdoiq gij fungyiemj gaujniemh hungnaek aen dangj bungzdaengz caeuq gij vwndiz doedyienh baihndaw aen dangj, baenghgauq gij eiqceiq binjcaet genggwt bae niujcingq fungheiq、yiemzsuk gijliz、bae fanj nduk fad yak, siucawz le doengh gij huxndumj youqgaenj ndaw dangj ndaw guek, gij yienghsiengq cwngci swnghhoz ndaw dangj bienq moq, gij cwngci swnghdai ndaw dangj mingzyienj bienq ndei, dangj raeuz gij rengz cauhguh、gij rengz gietcomz、gij rengz hoenxdwk dem’ak yienhda, dangj raeuz doxgiet doengjit engqgya onjmaenh, gij gvanhaeh dangj caeuq ginzcung mingzyienj gaijndei, dangj raeuz youq gwzmingsing muzlienh ndawde engqgya giengiengz, sanqfat ok gij rengzhoengh hung’ak moq, vih gij saehnieb dangj caeuq guekgya hwngfat baenaj daezhawj le cwngci baujcingq giengiengz.

  Doengzseiz, ietdingh aeu singjsag yawj daengz, gij hong raeuz lij miz haujlai caengz guh ndaej ndei caez, hix bungzdaengz hojnanz caeuq diuhcan mbouj noix. Cujyau dwg: Mbangj di vwndiz doedok cauhbaenz fazcanj mbouj bingzyaenx mbouj cungfaen lij caengz ndaej gaijgez, gij caetliengh caeuq yauqik fazcanj lij mbouj sang, gij rengz cauhmoq lij mbouj gaeuq ak, gij suijbingz saeddaej ginghci lij caj bae daezsang, baujhoh swnghdai vanzging rap naek roen gyae; yinzminz gwndaenj fuengmienh lij miz giz nyieg mbouj noix, duetgungz gunggeng diuzrap naekcaem, hawsingz lajmbanj gak dieg fazcanj caeuq souhaeuj faenboiq cengca vanzlij haemq hung, ginzcung youq couhnieb、gyauyuz、ywbingh、ranzyouq、ciengxlaux daengj fuengmienh bungzdaengz nanzdaez mbouj siuj; gij suijbingz vwnzmingz ndawbiengz lij aeu bae daezsang; gij mauzdun caeuq vwndiz ndawbiengz dox gyaux dox daeb, aen yinvu cienzmienh ciuqfap ceih guek vanzlij naekcaem, aen ceihleix dijhi caeuq gij ceihleix naengzlig guekgya lij aeu gyagiengz; gij doucwngh ndaw yisiz hingzdai lij ciuqyiengh fukcab, guekgya ancienz bungzdaengz cingzgvang moq; mbangj di gaijgwz baijbouh caeuq cwngcwz cosih hungnaek yaek aeu caenh’itbouh doeksaed; aen dangj gensez fuengmienh lij miz gij hothoh buegnyieg mbouj noix. Doengh gij vwndiz neix, itdingh aeu roengzrengz bae gaijgez.

  Gij cingzcik haj bi neix, dwg baengh dangj cunghyangh giengiengz lingjdauj cij ndaej daeuj, engq dwg baengh daengx dangj daengx guek gak cuz yinzminz doengzcaez buekguh cij ndaej daeuj. Gou daibyauj Cunghgung Cunghyangh, yiengq daengx guek gak cuz yinzminz, yiengq gak aen minzcuj dangjbai、gak aen yinzminz donzdij caeuq gyoengq vunz gyaezguek gak gyaiq, yiengq gyoengq beixnuengx Yanghgangj Daegbied Hingzcwnggih、gyoengq beixnuengx Aumwnz Daegbied Hingzcwnggih caeuq gyoengq beixnuengx Daizvanh nem gyoengq beixnuengx vazgyauz, yiengq gij baengzyoux gak aen guekgya gvansim caeuq cihciz Cungguek yendaiva gensez haenx, biujsiq caensim docih!

  Gak boux dungzci!Mwh ngamq guh gaijgwz hailangh, dangj raeuz fatok gij haucauh hungmbwk byaij diuzroen swhgeij、gensez yiengh sevei cujyi miz gij daegsaek Cungguek. Daj mwhhaenx doxdaeuj, dangj raeuz comzgiet daiqlingx daengx guek gak cuz yinzminz mboujduenh buekguh, doidoengh gij ginghci saedlig、gohgi saedlig、gozfangz saedlig、cunghab gueklig guek raeuz haeuj daengz baiz baihnaj seiqgyaiq, doidoengh gij gozci diegvih guek raeuz ndaej daezswng daengz giz dieg doenghbaez caengz miz gvaq, gij yienghsiengq dangj、yienghsiengq guekgya、yienghsiengq yinzminz、yienghsiengq bingdoih、yienghsiengq Cunghvaz Minzcuz miz ok gij bienqvaq doenghbaez caengz miz gvaq, Cunghvaz Minzcuz cingq aeu gij yienghsiengq moqsak daengj sang youq baihdoeng seiqgyaiq.

  Ginggvaq ciengzgeiz roengzrengz, yiengh sevei cujyi miz gij daegsaek Cungguek haeuj daengz le seizdaih moq, neix dwg aen lizsij fuengvih moq guek raeuz fazcanj.

  Yiengh sevei cujyi miz gij daegsaek Cungguek haeuj daengz seizdaih moq, neix couh dangq naeuz, aen Cunghvaz Minzcuz ciuhgyawj doxdaeuj deng ciengzgeiz muznanh raeuz gaenq ciep daeuj le cungj bonghyat hungmbwk daj ndwn hwnjdaeuj、fouq hwnjdaeuj daengz ak hwnjdaeuj, ciep daeuj le gij roennaj ronghsag saedyienh Cunghvaz Minzcuz fukhwng hungmbwk; neix couh dangq naeuz, gohyoz sevei cujyi youq ngeihcib it sigij aen Cungguek raeuz sanqfat ok gij rengzhoengh rengzrwdrwd, youq gwnz seiqgyaiq yaengxsang mbaw geiz hungmbwk yiengh sevei cujyi miz gij daegsaek Cungguek; neix couh dangq naeuz, gij roenloh、lijlun、cidu、vwnzva yiengh sevei cujyi miz gij daegsaek Cungguek mboujduenh fazcanj, haigvangq le diuzroen hawj doengh aen guekgya cingqcaih fazcanj de byaij yiengq yendaiva, hawj gwnz seiqgyaiq doengh gij guekgya caeuq minzcuz gawq muengh gyavaiq fazcanj youh muengh baujciz bonjndang ndaej doglaeb haenx daezhawj cungj genjaeu moqsak, vih gaijgez gij vwndiz vunzloih gunghawj le gij dungxcaiz Cungguek caeuq aen fueng’anq Cungguek.

  Aen seizdaih moq neix, dwg aen seizdaih swnj gonq ciep laeng、 hai roen baenaj、 youq laj lizsij diuzgen moq laebdaeb duedaeu yiengh sevei cujyi miz gij daegsaek Cungguek ndaej hingz hungmbwk, dwg aen seizdaih gietdingh cienzmienh hwnqbaenz aen biengz siujgangh sawhingz、 caiq bae cienzmienh hwnqguh aen yendaiva guekak sevei cujyi, dwg aen seizdaih daengx guek gak cuz yinzminz doxgiet buekguh、mboujduenh cauhguh saedceij gyaeundei、cugbouh saedyienh daengxcungq yinzminz doengzcaez fouqmiz, dwg aen seizdaih daengxcungq lwglan Cunghvaz caezsim gaprengz、haenqrengz saedyienh aen loqsiengj Cungguek Cunghvaz Minzcuz fukhwng hungmbwk, dwg aen seizdaih guek raeuz yied ngoenz yied byaij haeuj cungqgyang daizheiq seiqgyaiq、 mboujduenh vih vunzloih guh’ok gunghawj engq daih.

  Yiengh sevei cujyi miz gij daegsaek Cungguek haeuj daengz seizdaih moq, gij cujyau mauzdun aen biengz guek raeuz gaenq cienjvaq baenz yiengh mauzdun yinzminz gij aeuyungh saedceij gyaeundei yinzminz ngoenz beij ngoenz demmaj hoeng fazcanj mbouj doxdaengh mbouj cukgaeuq. Guek raeuz onjmaenh gaijgez le aen vwndiz cib geij ik vunz gwn imq daenj raeuj, daihdaej saedyienh siujgangh, mbouj geijlai nanz yaek cienzmienh hwnqbaenz aen biengz siujgangh, yinzminz gij aeuyungh saedceij gyaeundei ngoenz beij ngoenz demlai gya’gvangq, mboujdan doiq vuzciz vwnzva swnghhoz daezok le iugouz engq sang, caiqlij youq minzcuj、 fapceih、 goengbingz、 cingqngeih、 ancienz、 vanzging daengj fuengmienh iugouz ngoenz beij ngoenz demmaj. Doengzseiz, gij sevei swnghcanjliz suijbingz guek raeuz cungjdaej ma gangj daezsang yienhda, sevei swnghcanj naengzlig youq haujlai fuengmienh haeuj daengz baiz baihnaj seiqgyaiq, gij vwndiz engqgya doedyienh de dwg fazcanj mbouj doxdaengh mbouj cukgaeuq, neix gaenq bienqbaenz gij yinhsu youqgaenj hanhhaed muenxcuk yinzminz gij aeuyungh saedceij gyaeundei ngoenz beij ngoenz demlai haenx.

  Bietdingh aeu rox daengz, gij cujyau mauzdun aen biengz guek raeuz bienqvaq dwg gij lizsij bienqvaq nanangq daengxbuenz, doiq gij hong dangj caeuq guekgya daezok le haujlai iugouz moq. Raeuz aeu youq gwnz giekdaej laebdaeb doidoengh fazcanj, roengzrengz gaijgez ndei aen vwndiz fazcanj mbouj doxdaengh mbouj cukgaeuq, haenqrengz daezswng fazcanj caetliengh caeuq yauqik, engq ndei bae muenxcuk gij aeuyungh yinzminz youq ginghci、cwngci、vwnzva、sevei、 swnghdai daengj fuengmienh ngoenz beij ngoenz demmaj haenx, engq ndei bae doidoengh bouxvunz cienzmienh fazcanj、sevei cienzmienh cinbu.

  Bietdingh aeu rox daengz, gij cujyau mauzdun aen biengz guek raeuz bienqvaq, mboujcaengz gaijbienq raeuz duenqdingh aen lizsij gaihdon guek raeuz sevei cujyi soj cawqyouq haenx, aen gihbwnj guekcingz guek raeuz vanzlij cawqyouq caemhcaiq yaek ciengzgeiz cawqyouq duenh cogaep sevei cujyi mboujcaengz bienq, aen gozci diegvih guek raeuz dwg gwnz seiqgyaiq aen guekgya ceiq hung cingqcaih fazcanj haenx mboujcaengz bienq. Daengx dangj aeu gaemndaet duenh cogaep sevei cujyi aen gihbwnj guekcingz neix, ndwn maenh duenh cogaep sevei cujyi aen saedsaeh ceiq daih neix, dawzndaet gij gihbwnj lohsienq aen dangj diuz sienq sengmingh dangj caeuq guekgya、diuz sienq vuenyungz yinzminz neix, lingjdauj caeuq comzgiet daengx guek gak cuz yinzminz, aeu ginghci gensez guh cungsim, genhciz seiq hangh gihbwnj yenzcwz, genhciz gaijgwz hailangh, baengh rengz swhgeij, ganhoj cauhnieb, vih gensez guek raeuz baenz aen guekak sevei cujyi yendaiva fouqgiengz minzcuj vwnzmingz doxhuz gyaeundei cix buekguh.

  Gak boux dungzci! Yiengh sevei cujyi miz gij daegsaek Cungguek haeuj daengz seizdaih moq, youq gwnz fazcanj lizsij Cunghvaz Yinzminz Gunghozgoz、gwnz fazcanj lizsij Cunghvaz Minzcuz miz yiyi hungnaek, youq gwnz fazcanj lizsij seiqgyaiq sevei cujyi、gwnz fazcanj lizsij vunzloih sevei hix miz yiyi hungnaek. Daengx dangj aeu giendingh saenqsim、haenqrengz guh’ok cingzcik, hawj yiengh sevei cujyi miz gij daegsaek Cungguek engqgya hwnghoengh engqgya hung’ak!

  Ngeih、Seizdaih Moq Gij Lizsij Sawjmingh Cunghgoz Gungcanjdangj

  Bak bi gonq, singbauq Cibnyied Gwzming baez yiengj, soengq Majgwzswh-Lezningz Cujyi daeuj hawj Cungguek raeuz. Doengh boux senhcin fwnswj Cungguek daj ndaw gohyoz caenleix Majgwzswh-Lezningz Cujyi yawj daengz le diuz roen gaijgez ndaej gij vwndiz Cungguek. Ciuhgyawj gvaqlaeng youq ndaw yindung haenqrem aen biengz Cungguek, youq ndaw doucwngh haenqmengx Cungguek yinzminz dingjhoenx funghgen dungjci caeuq baihrog ciemqhaeuj, youq ndaw gocwngz Majgwzswh-Lezningz Cujyi caeuq gij gunghyinz yindung Cungguek dox giethab, 1921 nienz Cunghgoz Gungcanjdangj swnh’wngq seizseiq doekseng lo. Daj mwhhaenx hwnj, aen doucwngh Cungguek yinzminz gouzaeu minzcuz doglaeb、yinzminz gaijfang caeuq guekgya fouqgiengz、yinzminz vuenyungz haenx couh miz le baenghgauq, Cungguek yinzminz couh daj cingsaenz fuengmienh youz ngaizdoengh cienjbaenz cawjdoengh.

  Cunghvaz Minzcuz miz gij vwnzmingz lizsij haj cien lai bi, cauh’ok le yiengh Cunghvaz vwnzmingz ronghsag, vih vunzloih guh’ok le gunghawj gig lai, bienqbaenz aen minzcuz hungmbwk gwnz seiqgyaiq. Yahben Cancwngh gvaqlaeng, Cungguek loemq haeuj congh laepamq ndaw luenh rog ciemq, Cungguek yinzminz ginglig le gij haemzhoj naekcaem lienzdaemh hoenxciengq、diegguek siksanq、beksingq gwndaenj hojnanz. Vihliux minzcuz fukhwng, fouzsoq vunz maenh’ak miz ceiqheiq mbouj ut mbouj fug、 gonq laemx laeng hwnj, guh le gij doucwngh hab haenh hab danq, guh le gij sawqguh gak cungj gak yiengh, hoeng cungj mbouj ndaej gaijbienq gij sevei singqcaet Cungguek gaeuq caeuq gij minghyinh siliengz Cungguek yinzminz.

  Saedyienh Cunghvaz Minzcuz fukhwng hungmbwk dwg ciuhgyawj doxdaeuj aen loqsiengj ceiq hungmbwk Cunghvaz Minzcuz. Cunghgoz Gungcanjdangj baez laebbaenz, couh dawz saedyienh gungcanj cujyi dangguh lijsiengj ceiq sang caeuq muzbyauh doeksat aen dangj, mbouj goq dailix raphwnj aen lizsij sawjmingh saedyienh Cunghvaz Minzcuz fukhwng hungmbwk, comzgiet daiqlingx yinzminz guh gij doucwngh ganhoj noix raen, raiz baenz le hot sei lizsij gyaeundei heiqseiq daemxmbwn he.

  Dangj raeuz laegdaeuq rox daengz, yaek saedyienh Cunghvaz Minzcuz fukhwng hungmbwk, bietdingh aeu nyoengxlaemx digoz cujyi、funghgen cujyi、 gvanhliuz swhbwnj cujyi sam goengq bya hung daenz youq gwnz gyaeuj Cungguek yinzminz neix, saedyienh minzcuz doglaeb、 yinzminz gaijfang、 guekgya doengjit、 ndawbiengz onjdingh. Dangj raeuz comzgiet daiqlingx yinzminz ra ndaej diuz roen gwzming cingqdeng aeu lajmbanj gvaeghumx hawsingz、vujcangh duedaeu cwnggenz ndeu, ginggvaq ngeihcib bet bi buekmingh dwkhoenx, guhbaenz le sinhminzcuj cujyi gwzming, 1949 nienz laebhwnj le Cunghvaz Yinzminz Gunghozgoz, saedyienh le baez bonghyat hungmbwk Cungguek daj yiengh cwngci funghgen conhci geij cien bi haeuj daengz yiengh minzcuj yinzminz.

  Dangj raeuz laegdaeuq rox daengz, yaek saedyienh Cunghvaz Minzcuz fukhwng hungmbwk, bietdingh aeu laebhwnj aen sevei cidu senhcin hab gij saedsaeh guek raeuz. Dangj raeuz comzgiet daiqlingx yinzminz guhbaenz sevei cujyi gwzming, dinghlaeb gij gihbwnj cidu sevei cujyi, doicaenh sevei cujyi gensez, guhbaenz le baez sevei bengwz Cunghvaz Minzcuz miz sawcih geiqloeg doxdaeuj ceiq gvangqlangh youh laegdaeuq haenx, vih dangdaih Cungguek sojmiz fazcanj cinbu demhroengz aen cwngci cenzdiz gaenbonj caeuq aen giekdaej cidu, saedyienh le baez bonghyat hungmbwk Cunghvaz Minzcuz daj ciuhgyawj mboujduenh doekbaih cienj daengz daj goekgaen bae niujcienj minghyinh、laebdaeb byaij yiengq mwnhoengh fouqgiengz.

  Dangj raeuz laegdaeuq rox daengz, yaek saedyienh Cunghvaz Minzcuz fukhwng hungmbwk, bietdingh aeu hab gij byaijyiengq seizdaih、swnhhab gij eiqnyienh yinzminz, daihdamj guh gaijgwz hailangh, hawj gij saehnieb dangj caeuq yinzminz seizseiz cungmuenx rengz hung rengz ak haenq roemx baenaj. Dangj raeuz comzgiet daiqlingx yinzminz guh gij gwzming hungmbwk moq gaijgwz hailangh, buqcawz sojmiz gij swhsiengj caeuq dijci gitgaz dangjlaengz guekgya caeuq minzcuz fazcanj haenx, hai ok le diuzroen sevei cujyi miz gij daegsaek Cungguek, sawj Cungguek yamq hung gaenhwnj seizdaih.

  Goujcib roek bi neix daeuj, vihliux saedyienh aen lizsij sawjmingh Cunghvaz Minzcuz fukhwng hungmbwk, mboujlwnh dwg nyiegsaeq roxnaeuz akhung, mboujlwnh dwg mwh swnhleih roxnaeuz mwh daemdengj, dangj raeuz cungj mbouj gaijbienq cosim、laebceiq mbouj bienq, comzgiet daiqlingx yinzminz ginggvaq cien nanz fanh yiemj, sai lwed sai mingh, gamj bae najdoiq daemdengj, gamj bae coihcingq loengloek, gung roengz le gij nanzgvan aen dem aen yawj hwnjdaeuj lumj gung mbouj roengz haenx, cauh’ok le gij saeh mbouj bingzciengz gwnzbiengz aen dem aen hab geiq haeuj cek saw lizsij.

  Gak boux dungzci! Ngoenzneix, raeuz beij gwnz lizsij aen seizgeiz lawz cungj engqgya ciepgaenh、engqgya miz saenqsim caeuq naengzlig saedyienh aen muzbyauh Cunghvaz Minzcuz fukhwng hungmbwk.

  Bak leix roen gyae laeng cib leix ceiq nanz. Cunghvaz Minzcuz fukhwng hungmbwk, baenzmaz cungj mbouj dwg soengse seizbienh、roq gyong roq laz couh ndaej guhbaenz. Daengx dangj bietdingh aeu caepcawq engqgya dwgrengz、 engqgya ganhoj bae buekguh.

  Yaek saedyienh aen loqsiengj hungmbwk, bietdingh aeu guh gij doucwngh hungmbwk. Sevei dwg youq ndaw mauzdun yindung doi baenaj, miz mauzdun couh yaek miz doucwngh. Dangj raeuz aeu comzgiet daiqlingx yinzminz mizyauq wngqdoiq diuhcan hungnaek、dingjdangj fungyiemj hungnaek、siucawz rengzgaz hungnaek、gaijgez mauzdun hungnaek, bietdingh aeu guh gij doucwngh hungmbwk miz haujlai lizsij daegdiemj moq, mboujlwnh cungj swhsiengj caeuq hingzveiz damdoz yiengjsouh、doeknaiq laihgik、veq gvaq mauzdun lawz cungj dwg loekcak. Daengx dangj aeu engqgya gagrox genhciz aen dangj lingjdauj caeuq gij cidu sevei cujyi guek raeuz, giengiet fanjdui sojmiz gij vah gij hengzdoengh siunyieg、 luenhgaij、 foujdingh aen dangj lingjdauj caeuq gij cidu sevei cujyi guek raeuz; engqgya gagrox bae henhoh gij leih’ik yinzminz, giengiet fanjdui sojmiz gij hingzveiz sonjhaih leih’ik yinzminz、duetliz ginzcung; engqgya gagrox bae gyahaeuj aen seizdaih cauzliuz gaijgwz cauhmoq, giengiet buqcawz sojmiz gij mauzbingh nanz yw; engqgya gagrox bae henhoh gij cawjgienz、ancienz、leih’ik fazcanj guek raeuz, giengiet fanjdui sojmiz gij hingzveiz faenmbek guekcoj、buqvaih minzcuz doxgiet caeuq sevei huzndei onjdingh; engqgya gagrox bae fuengzre gak cungj fungyiemj, giengiet dwkhingz sojmiz gij gunnanz caeuq diuhcan okyienh youq ndaw lingjyiz cwngci、ginghci、vwnzva、sevei daengj caeuq ndaw swyenzgai haenx. Daengx dangj aeu cungfaen rox daengz ciengz doucwngh hungmbwk neix dwg ciengzgeiz、fukcab、gannanz、 hungloet, fatyiengz gij cingsaenz doucwngh, daezsang gij bonjsaeh guh doucwngh, mboujduenh bae duedaeu ciengz doucwngh hungmbwk caiq ndaej hingz.

  Yaek saedyienh aen loqsiengj hungmbwk, bietdingh aeu gensez aen gunghcwngz hungmbwk. Aen gunghcwngz hungmbwk neix couh dwg aen gunghcwngz hungmbwk moq gensez aen dangj dangj raeuz cingqcaih haeujlaeg doicaenh neix. Lizsij gaenq cwngmingz caiqlij yaek laebdaeb cwngmingz, mbouj miz Cunghgoz Gungcanjdangj lingjdauj, minzcuz ndaej dauqcungz hwnghoengh bietyienz dwg siengjndwi. Dangj raeuz yaek itcig guhbaenz boux senhfungh seizdaih、diuz ndoksaen minzcuz, itcig guhbaenz aen dangj gaemgienz Majgwzswh Cujyi, bonjfaenh bietdingh aeu itcig dingj ndaej geng. Daengx dangj aeu engqgya gagrox bae giendingh dangjsing yenzcwz, gamj bae najdoiq vwndiz, gamj bae gvet ndok yw doeg, siucawz sojmiz gij yinhsu sonjhaih aen dangj senhcin caeuq seuqcingh, cawzseuq sojmiz gij binghdoeg cimqmyaex nohndang aen dangj, mboujduenh demgiengz gij rengz cwngci lingjdauj、gij rengz dazyinx swhsiengj、gij rengz cujciz ginzcung、gij rengz haucauh gwnzbiengz dangj raeuz, saedbauj dangj raeuz ciengzlwenx hoenghhwd ciengzlwenx giengzak.

  Yaek saedyienh aen loqsiengj hungmbwk, bietdingh aeu doicaenh aen saehnieb hungmbwk. Yiengh sevei cujyi miz gij daegsaek Cungguek dwg gaijgwz hailangh doxdaeuj gij cawjdaez cienzbouh lijlun caeuq sizcen aen dangj, dwg gij gaenbonj cingzcik dangj caeuq yinzminz ginggvaq cien nanz fanh hoj、ok daiqgyaq hungloet le aeundaej. Diuzroen sevei cujyi miz gij daegsaek Cungguek dwg diuz roen saedyienh sevei cujyi yendaiva、dajcauh saedceij gyaeundei yinzminz bietdingh aeu byaij, aen lijlun dijhi sevei cujyi miz gij daegsaek Cungguek dwg gij lijlun cingqdeng dazyinx dangj caeuq yinzminz saedyienh Cunghvaz Minzcuz fukhwng hungmbwk, aen cidu sevei cujyi miz gij daegsaek Cungguek dwg gij gaenbonj cidu baujcang dangdaih Cungguek fazcanj cinbu, yiengh vwnzva sevei cujyi miz gij daegsaek Cungguek dwg gij rengzak cingsaenz gikcoi daengx dangj caeuq daengx guek gak cuz yinzminz haenqrengz baenaj. Daengx dangj aeu engqgya gagrox bae lailai gag saenq diuz roen bonjfaenh、gag saenq lijlun bonjfaenh、gag saenq cidu bonjfaenh、gag saenq vwnzva bonjfaenh, gawq mbouj byaij diuz roengaeuq fungsaek gyaengjgyat, hix mbouj byaij diuz roenloek gaijvuenh geizhauh, baujciz rengzmaenh cwngci, genhciz saedguh hwng guek, itcig genhciz caeuq fazcanj yiengh sevei cujyi miz gij daegsaek Cungguek.

  Doucwngh hungmbwk, gunghcwngz hungmbwk, saehnieb hungmbwk, loqsiengj hungmbwk, lienzhaeh gaenjmaed、dox ronz dox doeng、dox miz cozyung, ndawde gij miz gietdingh cozyung de dwg aen gunghcwngz hungmbwk moq gensez aen dangj. Doicaenh gunghcwngz hungmbwk, aeu giethab gij sizcen doucwngh hungmbwk、saehnieb hungmbwk、loqsiengj hungmbwk daeuj guh, saedbauj dangj youq ndaw lizsij cincwngz seiqgyaiq hingzseiq bienqvaq laegdaeuq itcig byaij youq baihnaj seizdaih, youq ndaw lizsij cincwngz wngqdoiq ndaw guek rog guek gak cungj fungyiemj caeuq gaujniemh itcig baenz aen cizdij hawj daengx guek yinzminz ndaej baengh, youq ndaw lizsij cincwngz genhciz caeuq fazcanj yiengh sevei cujyi miz gij daegsaek Cungguek itcig baenz aen lingj dauj haedsim giengiengz.

  Gak boux dungzci!Sawjmingh heuh’aeu dangrap, sawjmingh dazyinx daengzcog. Raeuz aeu dawz ndaej hwnj gij daknaek yinzminz、doiq ndaej gvaq gij genjleh lizsij, youq ndaw sizcen hungmbwk yiengh sevei cujyi miz gij daegsaek Cungguek seizdaih moq, aeu gij giengiengz lingjdauj caeuq haenqrengz buekguh aen dangj, gikcoi daengxcungq lwglan Cunghvaz mboujduenh haenqguh baenaj, gietcomz baenz gij rengz hoenghhwd caezsim caemh cuk aen loqsiengj Cungguek!

  Sam、 Aen Swhsiengj Sevei Cujyi Miz Gij Daegsaek Cungguek Seizdaih Moq Caeuq Gihbwnj Fanghloz

  Cibbet Daih doxdaeuj, hingzseiq ndaw guek rog guek bienqvaq caeuq gak hangh saehnieb guek raeuz fazcanj cungj daezok le aen seizdaih goqdaez hungnaek ndeu hawj raeuz, neix couh dwg bietdingh aeu daj lijlun caeuq sizcen giethab fuengmienh hidungj bae hoizdap seizdaih moq genhciz caeuq fazcanj yiengh sevei cujyi miz gij daegsaek Cungguek lawz、baenzlawz genhciz caeuq fazcanj yiengh sevei cujyi miz gij daegsaek Cungguek, baudaengz aen muzbyauh goekdaeuz、aen yinvu goekdaeuz、cungjdaej baijbouh、canloz baijbouh caeuq aen fuengyiengq fazcanj、fuengsik fazcanj、doenghlig fazcanj、canloz bouhloh、diuzgen baihrog、cwngci baujcingq seizdaih moq genhciz caeuq fazcanj yiengh sevei cujyi miz gij daegsaek Cungguek daengj doengh gij gihbwnj vwndiz neix, caemhcaiq aeu gaengawq sizcen moq doiq ginghci、cwngci、 fapceih、gohgi、vwnzva、gyauyuz、minzswngh、minzcuz、cunghgyau、sevei、swnghdai vwnzmingz、guekgya ancienz、gozfangz caeuq bingdoih、“aen guekgya ndeu song cungj cidu” caeuq guekcoj doengjit、doengjit cansen、vaigyauh、aen dangj gensez daengj gak fuengmienh guh ok lijlun faensik caeuq cwngcwz dazyinx, ndei bae engq ndei genhciz caeuq fazcanj yiengh sevei cujyi miz gij daegsaek Cungguek.

  Hopheux aen seizdaih goqdaez hungnaek neix, dangj raeuz genhciz aeu Majgwzswh-Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj” Cung’yau Swhsiengj、Gohyoz Fazcanjgvanh daeuj dazyinx, genhciz gaijfang swhsiengj、ciuq saedsaeh bae guh、caeuq seizdaih caez baenaj、gouz caen guh saed, genhciz bencwng veizvuz cujyi caeuq lizsij veizvuz cujyi, gaenjmaed giethab seizdaih diuzgen caeuq sizcen iugouz moq, aeu yiengh lwgda moqsak bae gyalaeg nyinhrox gij gvilwd gungcanjdangj gaemgienz、gij gvilwd gensez sevei cujyi、gij gvilwd vunzloih sevei fazcanj, bae guh lijlun damqra ganhoj, youq lijlun cauhmoq fuengmienh aeundaej cwngzgoj hungnaek, cauxbaenz le Aen Swhsiengj Sevei Cujyi Miz Gij Daegsaek Cungguek Seizdaih Moq.

  Aen Swhsiengj Sevei Cujyi Miz Gij Daegsaek Cungguek Seizdaih Moq, mingzbeg doekdingh genhciz caeuq fazcanj yiengh sevei cujyi miz gij daegsaek Cungguek, aen yinvu goekdaeuz dwg saedyienh sevei cujyi yendaiva caeuq Cunghvaz Minzcuz fukhwng hungmbwk, youq gwnz giekdaej cienzmienh hwnqbaenz aen biengz siujgangh, faen song bouh byaij, youq duenhgyang aen sigij neix hwnqbaenz aen guekak sevei cujyi yendaiva fouqgiengz minzcuj vwnzmingz doxhuz gyaeundei; mingzbeg doekdingh seizdaih moq gij cujyau mauzdun aen biengz guek raeuz dwg yiengh mauzdun yinzminz gij aeuyungh saedceij gyaeundei ngoenz beij ngoenz demmaj hoeng fazcanj mbouj doxdaengh mbouj cukgaeuq, bietdingh aeu genhciz cungj fazcanj swhsiengj aeu yinzminz guh cungsim, mboujduenh coicaenh bouxvunz cienzmienh fazcanj、daengxcungq yinzminz doengzcaez fouqmiz; mingzbeg doekdingh gij cungjdaej baijbouh aen saehnieb sevei cujyi miz gij daegsaek Cungguek dwg “haj yiengh gyoeb baenz cingjdaej”、gij canloz baijbouh aen saehnieb sevei cujyi miz gij daegsaek Cungguek dwg “seiq aen cienzmienh”, giengzdiuh giendingh gag saenq diuzroen bonjfaenh、gag saenq lijlun bonjfaenh、gag saenq cidu bonjfaenh、gag saenq vwnzva bonjfaenh; mingzbeg doekdingh aen muzbyauh goekdaeuz cienzmienh gyalaeg gaijgwz dwg guhndei caeuq fazcanj aen cidu sevei cujyi miz daegsaek Cungguek、doicaenh guekgya ceihleix dijhi caeuq ceihleix naengzlig yendaiva; mingzbeg doekdingh aen muzbyauh goekdaeuz cienzmienh doicaenh ciuqfap ceih guek dwg hwnqguh aen fapceih dijhi sevei cujyi miz daegsaek Cungguek、hwnqbaenz aen guekgya sevei cujyi gangj fapceih; mingzbeg doekdingh aen muzbyauh dangj youq laj hingzseiq moq hawj bingdoih giengzak dwg laebguh aen bingdoih yinzminz dingq dangj cijveih、hoenxciengq ndaej hingz、cozfungh maenhrem ndeu, laebguh aen bingdoih yinzminz baenz aen bingdoih itlouz gwnz seiqgyaiq; mingzbeg doekdingh yiengh vaigyauh guekhung miz daegsaek Cungguek aeu doidoengh laebhwnj cungj gozci gvanhaeh yienghmoq, doidoengh laebhwnj vunzloih minghyinh gungdungzdij; mingzbeg doekdingh yiengh sevei cujyi miz gij daegsaek Cungguek cungj daegcwng ceiq bonjcaet de dwg Cunghgoz Gungcanjdangj lingjdauj, aen cidu sevei cujyi miz gij daegsaek Cungguek aen youhsi ceiq hung de dwg Cunghgoz Gungcanjdangj lingjdauj, dangj dwg gij ligliengh cwngci lingjdauj ceiq sang, daezok gij iugouz goekdaeuz aen dangj gensez seizdaih moq, doedok cwngci gensez youq ndaw aen dangj gensez gij diegvih youqgaenj haenx.

  Aen Swhsiengj Sevei Cujyi Miz Gij Daegsaek Cungguek Seizdaih Moq, dwg ciepswnj caeuq fazcanj Majgwzswh-Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj” Cung’yau Swhsiengj、Gohyoz Fazcanjgvanh, dwg aen cwngzgoj ceiq moq Majgwzswh Cujyi caeuq gij saedsaeh Cungguek dox giethab, dwg gij sizcen gingniemh dangj caeuq yinzminz nem gij dungxcaiz vunzlai gietbaenz, dwg aen bouhfaenh youqgaenj gapbaenz aen lijlun dijhi sevei cujyi miz gij daegsaek Cungguek, dwg gij hengzdoengh ceijnamz daengx dangj daengx guek yinzminz vih saedyienh Cunghvaz Minzcuz fukhwng hungmbwk bae buekguh, bietdingh aeu ciengzgeiz genhciz caemhcaiq mboujduenh fazcanj.

  Daengx dangj aeu laegdaeuq roxyiuj gij cingsaenz saedcaet caeuq neihanz lairaeuh Aen Swhsiengj Sevei Cujyi Miz Gij Daegsaek Cungguek Seizdaih Moq, youq ndaw gak hangh gunghcoz cienzmienh cinjdeng gvancez doeksaed.

 ?。↖t)Genhciz dangj lingjdauj sojmiz gunghcoz. Dangj cwng ginh minz yoz, gak bouhmonz gak lingjyiz gak hangznieb, yienghyiengh aeu dangj lingjdauj. Bietdingh aeu demgiengz gij eiqsik cwngci、eiqsik daihbuenz、 eiqsik haedsim、eiqsik gaenhwnj, gagrox henhoh gij gienzvi caeuq cizcungh doengjit lingjdauj dangj cunghyangh, gagrox youq swhsiengj fuengmienh cwngci fuengmienh hengzdoengh fuengmienh caeuq dangj cunghyangh baujciz doxdoengz liuxliux, caezcienz gij dijci gihci genhciz dangj daeuj lingjdauj, genhciz aen goekdiuh hongsaeh youq ndaw onjdingh gouz baenaj, doengbuenz maeuzveh doicaenh aen cungjdaej baijbouh “haj yiengh gyoeb baenz cingjdaej”, hezdiuz doicaenh aen canloz baijbouh “seiq aen cienzmienh”, daezsang gij naengzlig caeuq rengzmaenh dawz fuengyiengq、maeuz daihbuenz、dingh cwngcwz、coi gaijgwz aen dangj, saedbauj aen dangj itcig doengjlamx daengxbuenz、hezdiuz gak fueng.

 ?。∟geih) Genhciz aeu yinzminz guh cungsim. Yinzminz dwg boux cauh’ok lizsij, dwg gij gaenbonj ligliengh gietdingh roennaj minghyinh dangj caeuq guekgya. Bietdingh aeu genhciz aen diegvih yinzminz guh cawjdaej, genhciz laeb dangj vih vunzlai、gaemgienz vih yinzminz, ciuqhengz aen gaenbonj cunghcij itsim iteiq fugsaeh yinzminz, dawz diuz ginzcung lohsienq aen dangj gvancez daengz sojmiz gij hongsaeh ceih guek guenj guek, dawz yinzminz siengjmuengh gvaq saedceij ndei dangguh muzbyauh bae buekguh, baengh yinzminz bae dajcauh lizsij niebcik hungmbwk.

 ?。⊿am) Genhciz cienzmienh gyalaeg gaijgwz. Cijmiz sevei cujyi cij ndaej gouq Cungguek, cijmiz gaijgwz hailangh cij ndaej fazcanj Cungguek、 fazcanj sevei cujyi、 fazcanj Majgwzswh Cujyi. Bietdingh aeu genhciz caeuq caezcienz aen cidu sevei cujyi miz gij daegsaek Cungguek, mboujduenh doicaenh gij ceihleix dijhi caeuq ceihleix naengzlig guekgya yendaiva, giengiet buqcawz sojmiz gij swhsiengj gvanhnen mbouj habseiz caeuq gij yaezrwix dijci gihci, cungbyoengq gij gazgit dinghmaenh leih’ik, supsou gij cwngzgoj mizik vunzloih vwnzmingz, laebhwnj yiengh cidu dijhi hidungj caezcienz、 gohyoz gveihfan、yinhhengz mizyauq, cungfaen fazveih gij ndeicawq sevei cujyi cidu guek raeuz.

 ?。⊿eiq) Genhciz fazcanj leixniemh moq. Fazcanj dwg aen giekdaej caeuq gyaugvan ndaej gaijgez sojmiz vwndiz guek raeuz, fazcanj bietdingh aeu dwg gohyoz fazcanj, bietdingh aeu giendingh mbouj bienq gvancez yiengh fazcanj leixniemh cauhmoq、 hezdiuz、 loegsaek、 hailangh、 caezyiengj. Bietdingh aeu genhciz caeuq caezcienz gij gihbwnj ginghci cidu caeuq faenboiq cidu sevei cujyi guek raeuz, mbouj doenghngauz saek di bae gyamaenh caeuq fazcanj gij ginghci gunghyoujci, mbouj doenghngauz saek di bae gujli、haeujcoengh、dazyinx gij ginghci mbouj dwg gunghyoujci haenx fazcanj, hawj hawciengz youq ndaw swhyenz boiqceiq miz ok gietdingh cozyung, engq ndei fazveih gij cozyung cwngfuj, doidoengh gunghyezva、 saenqsikvaq、hawsingzvaq、nungzyez yendaiva yienghmoq doengzcaez fazcanj, cawjdoengh caeuqfaenh caeuq doidoengh ginghci cenzgiuzva guh baenaj, fazcanj yiengh ginghci hailangh caengzgaep engq sang, hawj ginghci saedlig caeuq cunghab gueklig guek raeuz mboujduenh hungcoek.

 ?。℉aj)Genhciz yinzminz danggya guhcawj. Genhciz aen dangj lingjdauj、 yinzminz danggya guhcawj、 ciuqfap ceih guek ndeindei doengjit, dwg sevei cujyi cwngci fazcanj gij iugouz bietyienz haenx. Bietdingh aeu genhciz diuz roenloh cwngci fazcanj sevei cujyi miz gij daegsaek Cungguek, genhciz caeuq caezcienz aen cidu yinzminz daibyauj daihhoih、aen cidu lai dangj doxgap caeuq cwngci hezsangh youz Cunghgoz Gungcanjdangj lingjdauj、aen cidu dieg siujsoq minzcuz gagguenj、 aen cidu gyoengq ginzcung gihcwngz gagguenj, gyamaenh caeuq fazcanj aen gyaezguek doengjit cansen ceiq gvangqlangh, fazcanj yiengh hezsangh minzcuj sevei cujyi, laebcienz aen cidu minzcuj, demlai gij hingzsik minzcuj, haigvangq diuz miengloh minzcuj, baujcingq yinzminz danggya guhcawj ndaej doeksaed daengz ndaw cwngci swnghhoz caeuq sevei swnghhoz guekgya.

 ?。≧oek) Genhciz cienzmienh ciuqfap ceih guek. Cienzmienh ciuqfap ceih guek dwg gij bonjcaet iugouz caeuq baujcang youqgaenj yiengh sevei cujyi miz gij daegsaek Cungguek. Bietdingh aeu dawz aen dangj lingjdauj gvancez doeksaed daengz ciuqfap ceih guek daengx aen gocwngz caeuq gak aen fuengmienh, giendingh mbouj bienq byaij diuz roen fapceih sevei cujyi miz gij daegsaek Cungguek, caezcienz aen faplwd dijhi sevei cujyi miz gij daegsaek Cungguek aeu yenfaz guh haedsim haenx, laebguh aen fapceih dijhi sevei cujyi miz gij daegsaek Cungguek, hwnqguh aen guekgya hengz sevei cujyi fapceih, fazcanj gij fapceih lijlun sevei cujyi miz gij daegsaek Cungguek, genhciz doengzcaez doicaenh ciuqfap ceih guek、 ciuqfap gaemgienz、ciuqfap yunghgienz, genhciz itheij hwnqguh aen guekgya fapceih、 aen cwngfuj fapceih、aen biengz fapceih, genhciz ciuqfap ceih guek caeuq yungh daudwz ceih guek dox giethab, ciuq faplwd ceih guek caeuq ciuq fapgvi ceih dangj ndeindei doengjit, gyalaeg gaijgwz swhfaz dijci, daezsang gij fapceih suyangj caeuq daudwz suciz daengx aen minzcuz.

 ?。–aet) Genhciz aen haedsim gyaciz dijhi sevei cujyi. Gag saenq vwnzva bonjfaenh dwg aen guekgya ndeu、aen minzcuz ndeu youq mwh fazcanj gij rengzlig engq gaenbonj、engq laegna、engq naihnanz. Bietdingh aeu genhciz Majgwzswh Cujyi, laeb maenh aen lijsiengj hunggyae gungcanj cujyi caeuq aen lijsiengj caezcaemh sevei cujyi miz daegsaek Cungguek, gungganq caeuq ciuqhengz aen haedsim gyacizgvanh sevei cujyi, mboujduenh demgiengz gij gienz dazyinx caeuq gij gienz ceiboiq aen lingjyiz yisiz hingzdai, doidoengh gij conzdungj vwnzva ndei Cunghvaz rox dajcauh bae cienjvaq、cauhmoq bae fazcanj, ciepswnj gwzming vwnzva, fazcanj sevei cujyi senhcin vwnzva, mbouj lumz gij yienzbonj miz、supsou gij baihrog daeuj、 yiengqcoh daengzcog, engq ndei cauhlaeb gij cingsaenz Cungguek、gij gyaciz Cungguek、gij rengzlig Cungguek, hawj yinzminz daezgung cingsaenz dazyinx.

 ?。˙et) Genhciz youq mwh fazcanj baujcang caeuq gaijndei gij gwndaenj yinzminz. Gyalai fukfaenh hawj yinzminz dwg aen muzdiz fazcanj le bietdingh aeu guhdaengz haenx. Bietdingh aeu lai maeuz gij leih’ik gwndaenj yinzminz、lai gej gij youheiq gwndaenj yinzminz, youq mwh fazcanj boujcaez gij nyieg gwndaenj yinzminz、coicaenh sevei goengbingz cingqngeih, youq nomj miz vunz ganq、hag miz vunz son、guh miz souhaeuj、bingh miz cienz yw、laux miz vunz ciengx、youq miz aen ranz、 nyieg miz vunz bang doengh fuengmienh neix mboujduenh miz cincanj moq, haeujlaeg mbeguh gunggeng duetgungz, baujcingq daengxcungq yinzminz youq ndaw caezguh caezyiengj fazcanj neix roxnyinh ndaej ndeicawq engq lai, mboujduenh coicaenh bouxvunz cienzmienh fazcanj、daengxcungq yinzminz doengzcaez fouqmiz. Hwnqguh aen Cungguek bingzan, gyarem caeuq cauhmoq sevei ceihleix, henhoh sevei huzndei onjdingh, saedbauj guekgya ciengzgeiz andingh、 yinzminz an’onj gvaq saedceij.

 ?。℅ouj) Genhciz vunz caeuq swyenz doxhuz caemhyouq. Gensez swnghdai vwnzmingz dwg gij maeuzveh gyaeraez mizgven Cunghvaz Minzcuz ciengzlwenx lienzdaemh fazcanj. Bietdingh aeu laebhwnj caeuq saedhengz aen leixniemh raemx saw bya heu couh dwg bya gim bya ngaenz, genhciz hangh gihbwnj gozcwz mbaetyungh swhyenz caeuq baujhoh vanzging, lumj doiqdaih diuzmingh ityiengh doiqdaih swnghdai vanzging, doengbuenz suenqveh ceihleix aen hidungj bya raemx ndoeng naz huz nywj, saedhengz hangh cidu baujhoh swnghdai vanzging ceiq yiemzgek, cauxbaenz yiengh fazcanj fuengsik caeuq swnghhoz fuengsik loegsaek, giendingh byaij diuz roenloh vwnzmingz fazcanj hawj swnghcanj hwngfat、 swnghhoz fouqmiz、swnghdai maenhndei, hwnqguh aen Cungguek gyaeundei, vih yinzminz dajcauh aen swnghcanj swnghhoz vanzging ndei, vih daengx seiqgyaiq swnghdai ancienz guh’ok gungyen.

 ?。–ib) Genhciz cungjdaej guekgya anhcenzgvanh. Doengbuenz suenqveh fazcanj caeuq ancienz, lai roxnyinh youheiq, guh daengz youq mwh an’onj ngeix mwh yungyiemj, dwg aen yenzcwz hungnaek dangj raeuz ceihleix guekgya. Bietdingh aeu genhciz gij leih’ik guekgya ceiq sang, aeu yinzminz ancienz guh muzdiz, aeu cwngci ancienz guh gaenbonj, doengbuenz suenqveh baihrog ancienz caeuq baihndaw ancienz、diegguek ancienz caeuq guekminz ancienz、conzdungj ancienz caeuq feihconzdungj ancienz、bonjfaenh ancienz caeuq caezcaemh ancienz, caezcienz aen cidu dijhi guekgya ancienz, gyagiengz hwnqguh guekgya ancienz naengzlig, giengiet henhoh guekgya cawjgienz、ancienz、fazcanj leih’ik.

 ?。–ib’it) Genhciz dangj cieddoiq lingjdauj bingdoih yinzminz. Gensez aen bingdoih yinzminz dingq dangj cijveih、hoenxciengq ndaej hingz、cozfungh maenhrem ndeu, dwg aen canloz cengjdaemx saedyienh gij muzbyauh buekguh “song aen bak bi”、saedyienh Cunghvaz Minzcuz fukhwng hungmbwk haenx. Bietdingh aeu cienzmienh gvancez baenzroix gaenbonj yenzcwz caeuq cidu mizgven dangj lingjdauj bingdoih yinzminz, doekdingh seizdaih moq aen swhsiengj bingdoih giengzak dangj raeuz youq ndaw gensez gozfangz caeuq bingdoih gij diegvih dazyinx haenx, genhciz baengh cwngci laebguh bingdoih、doenggvaq gaijgwz sawj bingdoih giengzak、baengh gohgi saenqhwng bingdoih、ciuqfap guenjleix bingdoih, engqgya yawjnaek caepcawq saedsaeh hoenxciengq, engqgya yawjnaek cauhmoq doidoengh, engqgya yawjnaek dijhi gensez, engqgya yawjnaek caebcomz yauqlwd sang, engqgya yawjnaek ginhminz yungzhab, saedyienh aen muzbyauh youq seizdaih moq bingdoih giengzak dangj raeuz.

 ?。–ibngeih)Genhciz “aen guekgya ndeu song cungj cidu” caeuq doicaenh guekgya doengjit. Baujciz Yanghgangj、Aumwnz ciengzgeiz mwnhoengh onjdingh, saedyienh guekcoj cienzbouh doengjit, dwg gij bietyienz iugouz saedyienh Cunghvaz Minzcuz fukhwng hungmbwk. Bietdingh aeu dawz henhoh gij gienz cunghyangh doiq Yanghgangj Daegbied Hingzcwnggih、Aumwnz Daegbied Hingzcwnggih cienzmienh guenjceih caeuq gij gienz baujcang daegbied hingzcwnggih gagguenj cingzdoh gig sang haenx ndeindei giethab hwnjdaeuj, saedbauj hangh fuengcim “aen guekgya ndeu song cungj cidu” mbouj gaijbienq、 mbouj doenghngauz, saedbauj hengzguh “aen guekgya ndeu song cungj cidu” mbouj mbitmbieng、mbouj bienqyiengh. Bietdingh aeu genhciz diuz yenzcwz aen Cungguek dog, genhciz “gij nyinhrox doxdoengz 1992 nienz”, doidoengh song hamq gvanhaeh hozbingz fazcanj, gyalaeg song hamq ginghci doxgap caeuq vwnzva baedauq, doidoengh song hamq beixnuengx doengzcaez fanjdui sojmiz gij hozdung faenmbek guekgya, doengzcaez vih saedyienh Cunghvaz Minzcuz fukhwng hungmbwk bae haenqrengz buekguh.

 ?。–ibsam) Genhciz doidoengh cauhlaeb vunzloih minghyinh gungdungzdij. Gij loqsiengj Cungguek yinzminz caeuq gij loqsiengj gak guek yinzminz caemh saihoz, yaek saedyienh aen loqsiengj Cungguek liz mbouj ndaej aen gozci vanzging hozbingz caeuq aen gozci cizsi onjdingh. Bietdingh aeu doengjit maeuzveh ndaw guek caeuq gozci song aen daihbuenz, itcig mbouj bienq byaij diuz roen hozbingz fazcanj、ciuqhengz aen hailangh canloz doxleih caez hingz, genhciz gij yili’gvanh cingqdeng, laebhwnj gij anhcenzgvanh moq caezcaemh、 gyoebhab、 doxgap、ndaej lienzdaemh, maeuzgouz yiengh fazcanj baihnaj hailangh cauhmoq、bauyungz doxik, coicaenh guh gij vwnzmingz gyaulouz doxhuz mbouj doxdoengz、giem sou comz aeu, laebguh aen swnghdai dijhi gingqcungh swyenz、loegsaek fazcanj, itcig guh boux gensez seiqgyaiq hozbingz、boux gunghawj seiqgyaiq fazcanj、boux henhoh gozci cizsi.

 ?。–ibseiq) Genhciz cienzmienh coengzyiemz ceih dangj. Gamj daj goekdaej gag gaijbienq bonjfaenh, coengzyiemz guenj dangj ceih dangj, dwg gij binjgwz ceiq sienmingz dangj raeuz. Bietdingh aeu yungh dangjcangh dangguh goekgaen bae ciuqsouj, dawz gij cwngci gensez aen dangj cuengq youq vih daih’it, swhsiengj laeb dangj caeuq cidu ceih dangj coh aen fuengyiengq ndeu fat rengz, doengjit suenqveh doicaenh gak hangh gensez aen dangj, gaemdawz “gvanhgen siujsoq”, genhciz “sam yiemz sam saed”, genhciz minzcuj cizcunghci, yiemzsuk cwngci swnghhoz ndaw dangj, dawzyiemz gijliz aen dangj, gyagiengz ndaw dangj gamduk, fazcanj gij cwngci vwnzva cizgiz cangqheiq ndaw dangj, hawj gij cwngci swnghdai ndaw dangj gizgiz cenghseuq, giengiet niujcingq gak cungj fungheiq mbouj cingq, mbouj yungznyaenx saek di dwk fadceih nduknaeuh, mboujduenh dem’ak dangj raeuz gij naengzlig gag cenghseuq、gag caezcienz、gag gaijmoq、gag daezsang, seizseiz baujciz dangj caeuq yinzminz ginzcung dungxsaej doxriengh.

  Cibseiq diuz baihgwnz neix, gapbaenz gij gihbwnj fanghloz youq seizdaih moq genhciz caeuq fazcanj yiengh sevei cujyi miz gij daegsaek Cungguek. Gyoengq dungzci daengx dangj bietdingh aeu cienzmienh gvancez gij gihbwnj lijlun、gihbwnj lohsienq、gihbwnj fanghloz aen dangj, engq ndei bae dazyinx gij saehnieb dangj caeuq yinzminz fazcanj.

  Sizcen mbouj dingz mbouj duenh, lijlun cauhmoq hix mbouj dingz mbouj duenh. Seiqgyaiq seizseiz cungj bienqvaq mbouj dingz, Cungguek hix seizseiz cungj bienqvaq mbouj dingz, raeuz bietdingh aeu youq lijlun fuengmienh gaenhwnj seizdaih, mboujduenh nyinhrox gvilwd, mboujduenh doicaenh lijlun cauhmoq、sizcen cauhmoq、cidu cauhmoq、vwnzva cauhmoq nem gizyawz gak fuengmienh cauhmoq.

  Gak boux dungzci! Swhsiengj youz seizdaih cauhbaenz, lijlun daj sizcen miz okdaeuj. Cijaeu raeuz rox dingq gij sing seizdaih, gamj bae genhciz caenleix、coihcingq loengloek, gij Majgwzswh Cujyi Cungguek youq ngeihcib it sigij itdingh ndaej yienh’ok gij ligliengh caenleix engq maenh’ak、engq ndaej gangjfug vunz!

  Seiq、Buekrengz Dwkhingz Cienzmienh Hwnqbaenz Aen Biengz Siujgangh, Byaij Hwnj Diuz Roen Moq Cienzmienh Gensez Aen Guekgya Sevei Cujyi Yendaiva

  Gaijgwz hailangh le, dangj raeuz doiq gij sevei cujyi yendaiva gensez guek raeuz guh’ok canloz anbaiz, daezok aen canloz muzbyauh “sam bouh byaij”. Gaijgez gij vwndiz yinzminz gwn imq daenj raeuj、saedceij yinzminz cungjdaej dabdaengz siujgangh suijbingz song aen muzbyauh neix gaenq daezgonq guhbaenz. Guhbaenz bouh neix le, dangj raeuz daezok, daengz mwh laeb dangj it bak bi hwnqbaenz aen biengz siujgangh ginghci engqgya fazcanj、minzcuj engqgya laebcienz、gohgyau engqgya cinbu、vwnzva engqgya hoenghvuengh、ndawbiengz engqgya huzndei、saedceij yinzminz engqgya fouqmiz, yienzhaeuh caiq buekguh samcib bi, daengz mwh Cungguek moq laebbaenz it bak bi, daihdaej saedyienh yendaiva, dawz guek raeuz hwnqbaenz aen guekgya sevei cujyi yendaiva.

  Daj seizneix daengz 2020 nienz, dwg mboengq buekrengz dwkhingz cienzmienh hwnqbaenz aen biengz siujgangh. Aeu ciuq doengh gij iugouz cienzmienh hwnqbaenz aen biengz siujgangh Cibroek Daih、Cibcaet Daih、Cibbet Daih daezok haenx, gaenjgaenj hopheux gij cujyau mauzdun bienqvaq aen biengz guek raeuz, doengjit suenqveh doicaenh ginghci gensez、cwngci gensez、vwnzva gensez、sevei gensez、swnghdai vwnzmingz gensez, giendingh hengzguh aen canloz baengh gohgyau hwng guek、aen canloz baengh vunzcaiz ak guek、aen canloz cauhmoq doidoengh fazcanj、aen canloz saenqhwng lajmbanj、 aen canloz gak rangh dieg dox boiqhab fazcanj、aen canloz ndaej lienzdaemh fazcanj、aen canloz bingdoih caeuq yinzminz yungzhab fazcanj, dawznaek bae ca gij cungdenj、bouj giz mbouj cuk、gyaak hangh mbangnyieg, daegbied dwg aeu giengiet dwkhingz ciengz ciengq gunggeng fuengzre vaqgej fungyiemj hungnaek、dawzcinj duetgungz、fuengzceih uqlah, hawj cienzmienh hwnqbaenz aen biengz siujgangh ndaejdaengz yinzminz nyinhdingh、dingj ndaej gvaq lizsij gienjniemh.

  Daj Cibgouj Daih daengz Ngeihcib Daih, dwg mboengq lizsij doxgap aen muzbyauh buekguh “song aen bak bi”. Raeuz gawq aeu cienzmienh hwnqbaenz aen biengz siujgangh、guhbaenz gij muzbyauh buekguh aen bak bi daih’it, youh aeu swnh seiq doxhwnj byaij hwnj diuz roen moq cienzmienh gensez aen guekgya sevei cujyi yendaiva, yiengq gij muzbyauh buekguh aen bak bi daihngeih roemx baenaj.

  Gyoebhab faensik gij hingzseiq rog guek ndaw guek caeuq gij fazcanj diuzgen guek raeuz, daj 2020 nienz daengz duenhgyang aen sigij neix, ndaej faen song aen gaihdon daeuj anbaiz.

  Aen gaihdon daih’it, daj 2020 nienz daengz 2035 nienz, youq gwnz giekdaej cienzmienh hwnqbaenz aen biengz siujgangh, caiq buekguh cibhaj bi, daihdaej guhbaenz sevei cujyi yendaiva. Daengz mwhhaenx, gij ginghci saedlig、gohgi saedlig guek raeuz yaek bongh sang haujlai, caenxndang haeuj baiz baihnaj yiengh guekgya ak cauhmoq bae; gij gienzleih yinzminz bingzdaengj caeuqfaenh、bingzdaengj fazcanj ndaejdaengz cungfaen baujcang, yiengh guekgya fapceih、yiengh cwngfuj fapceih、yiengh sevei fapceih haenx daihdaej hwnqbaenz, gak fuengmienh cidu engqgya caezcienz, guekgya ceihleix dijhi caeuq ceihleix naengzlig yendaiva daihdaej guhbaenz; sevei vwnzmingz cingzdoh dabdaengz giz sang moq, gij saedlig’unq guekgya vwnzva demgiengz yienhda, Cunghvaz vwnzva yingjyangj engqgya gvangqlangh haeujlaeg; saedceij yinzminz engqgya fouqmiz, gij beijlaeh gyoengq vunz souhaeuj gaepgyang mingzyienj daezsang, gij cengca rangh hawsingz rangh lajmbanj fazcanj caeuq gij cengca gihminz swnghhoz suijbingz daihdaih sukiq, gihbwnj goenggungh fugsaeh daihdaej guhdaengz doxbingz, daengxcungq yinzminz doengzcaez fouqmiz yamqok yamq onjmaenh; gij gwzgiz ceihleix aen biengz ciuhneix daihdaej cauxbaenz, ndawbiengz cungmuenx rengzhoengh youh huzndei mbouj luenh; swnghdai vanzging daj goekgaen bienq ndei, aen muzbyauh Cungguek bienq gyaeundei daihdaej guhdaengz.

  Aen gaihdon daihngeih, daj 2035 nienz daengz duenhgyang aen sigij neix, youq gwnz giekdaej daihdaej guhbaenz yendaiva, caiq buekguh cibhaj bi, dawz guek raeuz hwnqbaenz aen sevei cujyi yendaiva guekak fouqgiengz minzcuj vwnzmingz doxhuz gyaeundei. Daengz mwhhaenx, gij vuzciz vwnzmingz、cwngci vwnzmingz、cingsaenz vwnzmingz、sevei vwnzmingz、swnghdai vwnzmingz guek raeuz yaek cienzmienh daezswng, saedyienh guekgya ceihleix dijhi caeuq ceihleix naengzlig yendaiva, bienqbaenz aen guekgya gyoebhab gueklig caeuq rengz yingjyangj rog guek baiz youq doekgonq, daengxcungq yinzminz doengzcaez fouqmiz daihdaej guhbaenz, yinzminz guek raeuz yaek ndaej miz gij saedceij engqgya vuenyungz an’onj, Cunghvaz Minzcuz yaek aeu cungj yienghsiengq engqgya haenqheiq baenaj haenx daengj sang youq ndaw gyang seiqgyaiq minzcuz.

  Gak boux dungzci! Daj cienzmienh hwnqbaenz aen biengz siujgangh daengz daihdaej guhbaenz yendaiva, caiq daengz cienzmienh hwnqbaenz aen guekak sevei cujyi yendaiva, dwg gij canloz anbaiz fazcanj yiengh sevei cujyi miz gij daegsaek Cungguek seizdaih moq. Raeuz aeu dingjmaenh mbouj doenghngauz、buekguh mbouj dingz, haenqrengz raiz bien faenzcieng gyaeundei duenh loh moq sevei cujyi yendaiva!

  Haj、Gvancez Fazcanj Leixniemh Moq, Gensez Aen Ginghci Dijhi Yendaiva

  Guhbaenz gij muzbyauh buekguh “song aen bak bi”、guhbaenz aen loqsiengj Cungguek Cunghvaz Minzcuz fukhwng hungmbwk, mboujduenh daezsang gij swnghhoz suijbingz yinzminz, bietdingh aeu giendingh mbouj bienq dawz fazcanj dangguh gij yinvu youqgaenj daih’it dangj raeuz gaemgienz hwng guek, genhciz gaijfang caeuq fazcanj sevei swnghcanjliz, genhciz aen gaijgwz fuengyiengq sevei cujyi hawciengz ginghci, doidoengh ginghci lienzdaemh cangqheiq fazcanj.

  Gij ginghci guek raeuz gaenq daj aen gaihdon demmaj riengjvaiq cienj haeuj aen gaihdon fazcanj caetliengh sang, cingq cawqyouq mboengq gunggvan cienjbienq fazcanj fuengsik、gaijndei ginghci gezgou、cienjvuenh demmaj doenghlig, gensez aen ginghci dijhi yendaiva dwg gij iugouz gaenjbik hamjgvaq bakgemh caeuq gij canloz muzbyauh guek raeuz fazcanj. Bietdingh aeu genhciz caetliengh daih’it、yauqik youq gonq, aeu gaijgwz gij gezgou mbiengj gunghawj guh cawjsienq, doidoengh ginghci fazcanj caetliengh bengwz、yauqlwd bengwz、doenghlig bengwz, daezsang gij swnghcanjliz sojmiz yausu, roengzrengz gyavaiq hwnqguh aen canjnieb dijhi saeddaej ginghci、gohgi cauhmoq、yienhdaih ginhyungz、vunzlig swhyenz dox boiqhab fazcanj haenx, roengzrengz cauhlaeb cungj ginghci dijci hawciengz gihci mizyauq、 veizgvanh cawjdaej miz rengzhoengh、hungzgvanh diuzgung habdoh haenx, mboujduenh gyaak gij rengz cauhmoq caeuq gij rengz beijak ginghci guek raeuz.

  (It) Haeujlaeg bae gaijgwz gij gezgou mbiengj gunghawj. Gensez aen ginghci dijhi yendaiva, bietdingh aeu dawz gij rengz dawznaek fazcanj ginghci haenx cuengq youq saeddaej ginghci fuengmienh, dawz daezsang gij caetliengh gunghawj dijhi dangguh aen fuengyiengq yunghrengz hoenxgung, lailai gyaak gij caetliengh youhsi ginghci guek raeuz. Gyavaiq hwnqguh aen guek ak dajcauh, gyavaiq fazcanj hangz cauhguh senhcin, doidoengh hulenzvangj、 soqgawq hung、yinzgungh cinwngz caeuq saeddaej ginghci yungzhab haeuj laeg, youq doengh aen lingjyiz gaepgyang gaepsang siufeiq、cauhmoq dazyinx、loegsaek danq noix、caezyiengj ginghci、diuzlienh gunghawj ciuhneix、vunzlig swhbwnj fugsaeh daengj, gungganq diemj demmaj moq、cauxbaenz doenghnaengz moq. Haeujcoengh gij canjnieb conzdungj bienq ndei swnggaep, gyavaiq fazcanj hangz fugsaeh yienhdaih, yawjcinj gij biucinj gozci bae daezsang suijbingz. Coicaenh canjnieb guek raeuz yamq haeuj gyaeuj cungdaengj gyaeuj sang diuzlienh gyaciz daengx seiqgyaiq, gungganq geij aen hangz cauhguh senhcin seiqgyaiq gaep doxcomz baenz gyoengq haenx. Gyagiengz hwnqguh gij vangjloz suijli、dietloh、goengloh、gwnz raemx daehyinh、hangzgungh、gvanjdau、denvangj、saenqsik、vuzliuz daengj giekdaej sezsih. Genhciz gemj canjnaengz、siu daenzcang、cawz gangganj、gyangq cienzgoek、bouj giz nyieg, hawj gij swhyenz boiqceiq yienhmiz bienq ndei, gyadaih gij ngamq demgya caetliengh ndei de gunghawj, guhbaenz gunghawj caeuq aeuyungh hwnjroengz bingzyaenx. Gikfat caeuq baujhoh gij cingsaenz canghgiyez, gujli gyoengqvunz ndawbiengz engq lai bae guh cauhmoq cauhnieb. Hwnqguh aen doih hung bouxguhhong miz cihsiz、 dinfwngz raeh、ak cauhmoq, hungzyangz gij cingsaenz boux lauzdung mozfan caeuq gij cingsaenz lauxcangh, cauh’ok gij sevei funghsang guhhong miznaj caeuq gij fungheiq gingqnieb ndei le siengj aeu engq ndei.

  (Ngeih) Gyavaiq gensez aen guekgya ak cauhmoq. Cauhmoq dwg gij doenghlig goekdaeuz yinxlingx fazcanj, dwg gij canloz daemxcengj hwnqguh ginghci dijhi yendaiva. Aeu yawjcinj gij gohgi ceiq moq seiqgyaiq, gyaak giekdaej yenzgiu, hawj gij giekdaej yenzgiu yawj bae gonq、 gij cwngzgoj cauhnduj ndaej guh dazyinx de guhbaenz cungbyoengq hungnaek. Gyagiengz doiq dawzyungh fuengmienh guh giekdaej yenzgiu, haigvangq hengzguh gij gohgi hanghmoeg hungnaek guekgya, doedok gij gisuz doxcaemh youqgaenj、gij gisuz youq baihnaj dazyinx、gij gisuz yienhdaih gunghcwngz、gij gisuz ndaej boekbuenz haenx cauhmoq, vih gensez aen guekak gohgi、guekak caetliengh、guekak hangzdenh、guekak vangjloz、guekak gyauhdungh、soqcih Cungguek、aen biengz coengmingz daezhawj daemxcengj rengzrwd. Gyagiengz gensez guekgya cauhmoq dijhi, gyaak gij goengrengz canloz gohgi. Gyalaeg gaijgwz gohgi dijci, laebhwnj aen gisuz cauhmoq dijhi aeu giyez guh cawjdaej、hawciengz guh dazyinx、swnghcanj sonhag gohyenz yungzhab haeuj laeg, gyagiengz bangcoengh giyez iq giyez rauh cauhmoq, coicaenh gohgi cwngzgoj cienjvaq. Daiqdaeuz dizcang cauhmoq vwnzva, giengzvaq dajcauh、baujhoh、 dawzyungh cihsiz canjgenz. Gungganq gyauqok baenz daihbuek vunzcaiz canloz gohgi、vunzcaiz lingxdaeuz gohgi、vunzcaiz bouxcoz gohgi miz gozci suijbingz caeuq gij donzdui cauhmoq suijbingz sang.

 ?。⊿am)Hengzguh aen canloz saenqhwng lajmbanj. Gij vwndiz nungzyez lajmbanj nungzminz dwg gij vwndiz goekgaen gvanhaeh guekgya ginghci beksingq gwndaenj, bietdingh aeu seizseiz dawz gaijgez ndei gij vwndiz nungzyez lajmbanj nungzminz dangguh ndaw gunghcoz daengx dangj gienh ceiq youqgaenj de. Aeu genhciz sien fazcanj nungzyez lajmbanj, ciuq aen daengxbuenz iugouz canjnieb hoenghvuengh、swnghdai hab youq、fungheiq lajmbanj vwnzmingz、ceihleix mizyauq、swnghhoz fouqmiz neix, laebhwnj laebcienz gij dijci gihci caeuq cwngcwz dijhi hawsingz lajmbanj yungzhab fazcanj, gyavaiq doicaenh nungzyez lajmbanj yendaiva. Gyamaenh caeuq caezcienz gij gihbwnj ginghyingz cidu lajmbanj, gyalaeg gaijgwz gij cidu diegdeih lajmbanj, caezcienz gij cidu diegdeih cwngzbauh “sam gienz” faenlaeb. Baujciz gij gvanhaeh diegdeih cwngzbauh onjdingh caiqlij naihnanz mbouj bienq, lwnz diegdeih cwngzbauh daihngeih daengz geiz le caiq gyaraez samcib bi. Gyalaeg gaijgwz gij cidu cizdij canjgenz lajmbanj, baujcang gij caizcanj gienzik nungzminz, guhhung cizdij ginghci. Saedbauj guekgya haeuxgwn ancienz, gaemndaet aen vanjhaeux vunz Cungguek youq ndaw fwngz bonjfaenh. Cauhlaeb aen canjnieb dijhi、 swnghcanj dijhi、 ginghyingz dijhi yienhdaih nungzyez, caezcienz gij cidu bangcoengh baujhoh nungzyez, fazcanj gij ginghyingz lai cungj lai yiengh gveihmoz habdoh, gungganq yiengh nungzyez ginghyingz cawjdaej moq, laebcienz aen dijhi ndawbiengz fugsaeh nungzyez, guhbaenz ranz nungzminz gag guh caeuq yienhdaih nungzyez fazcanj gaenjmaed doxciep. Coicaenh lajmbanj it ngeih sam canjnieb yungzhab fazcanj, haeujcoengh caeuq gikcoi nungzminz couhnieb cauhnieb, haigvangq diuz miengloh demgya souhaeuj. Gyagiengz gij hong giekdaej lajmbanj gihcwngz, laebcienz gij dijhi guenjleix lajmbanj gag guenj、 fap guenj、 daudwz guenj dox giethab. Gungganq gyauqok aen duivuj guh hong nungzyez lajmbanj nungzminz rox nungzyez、maij lajmbanj、gyaez nungzminz ndeu.

 ?。⊿eiq)Hengzguh aen canloz gak rangh dieg dox boiqhab fazcanj. Lai yungh rengz bae bangcoengh diegaeuq gwzming、dieg minzcuz、dieg henzguek、dieg gungzhoj gyavaiq fazcanj, dawzmaenh gij cosih doicaenh baihsae daih haifat cauxbaenz gwzgiz moq, gyalaeg gaijgwz gyavaiq saenqhwng doengbaek doengh aen dieggoek gunghyez gaeuq, fazveih gij ndei gij ak doidoengh dieg cungqgyang hwnghwnj, cauhmoq dazyinx guhbaenz dieg baihdoeng fazcanj bienq ndei gonq, laebhwnj gij gihci moq engq mizyauq bae hawj gak rangh dieg dox boiqhab fazcanj. Aeu gij hawsingz baenz gyoengq haenx guh cawjdaej laebguh yiengh gwzgiz hawsingz singz hung singz rauh singz iq caeuq haw iq dox boiqhab fazcanj, gyavaiq gyoengq vunz daj nungzyez senj okdaeuj haenx bienqbaenz vunz ndaw singz. Gejsoeng Baekging yiengh goengnaengz mbouj dwg soujduh haenx, aeu gijneix guh “ndaeng’vaiz” doidoengh Baekging Denhcinh Hozbwz dox boiqhab fazcanj, daj giz sang bae gveihva、biucinj sang bae gensez Yungzanh Sinhgih. Aeu caez guh daih baujhoh、mbouj gauj daih haifat guh dazyinx, doidoengh rangh ginghci Cangzgyangh fazcanj. Cihciz giz dieg baengh swhyenz haenx guh ginghci cienjhingz fazcanj. Gyavaiq henzguek fazcanj, saedbauj henzguek ndaetmaenh、 henzguek ancienz. Genhciz dieghawq dieghaij doengbuenz maeuzveh, gyavaiq hwnqguh haijyangz guekak.

 ?。℉aj)Gyavaiq laebndei aen dijci sevei cujyi hawciengz ginghci. Ginghci dijci gaijgwz bietdingh aeu dawz caezcienz canjgenz cidu caeuq youz hawciengz boiqceiq yausu dangguh cungdenj, guhbaenz canjgenz mizyauq gikleih、yausu swyouz riuzdoengh、 gyagwz fanjwngq lingzvued、gingcwngh goengbingz miz banjloh、giyez louz ndei vut yaez. Aeu caezcienz gij dijci guenjleix gak loih guekmiz swhcanj, gaijgwz gij dijci hawjgienz ginghyingz guekmiz swhbwnj, gyavaiq guekmiz ginghci gaijndei baijbouh、diuzcingj gezgou、guh yiengh dauqcungz cujhab miz canloz singqcaet, coicaenh guekmiz swhcanj bauj goek fat lai, doidoengh guekmiz swhbwnj guh ak guh ndei guh hung, mizyauq fuengzre guekmiz swhcanj laesaet. Gyalaeg gaijgwz guekmiz giyez, fazcanj gij sojyoujci ginghci doxgyaux, gungganq gij giyez lajmbwn itlouz miz rengz youq daengx seiqgyaiq beijak haenx. Cienzmienh saedhengz aen cidu mbawdan gimqhaed cinjhaeuj hawciengz, cingleix feiqcawz doengh cungj gvidingh caeuq guhfap fuengzngaih doengjit hawciengz caeuq goengbingz gingcwngh, haeujcoengh minzyingz giyez fazcanj, gikfat gij rengzhoengh gak loih hawciengz cawjdaej. Gyalaeg gaijgwz gij cidu saehseng’eiq, dwkbyoengq hingzcwng baqciemq, fuengzre hawciengz baqciemq, gyavaiq gaijgwz hawj gij gyaqcienz yausu youz hawciengz daeuj dingh, cuengqsoeng gij hanhhaed cinjhaeuj hangz fugsaeh, caezcienz gij dijci gamguenj hawciengz. Cauhmoq caeuq caezcienz hungzgvanh diuzgung, hawj guekgya fazcanj gveihva ndaej miz gij cozyung canloz dazyinx, laebcienz gij gihci hezdiuz doengh gij ginghci cwngcwz caizcwng、hobi、 canjnieb、 gvaegdieg daengj. Caezcienz gij dijci gihci coicaenh siufeiq, hawj siufeiq doiq ginghci fazcanj lai miz gij cozyung dajdaej. Gyalaeg gaijgwz gij dijci douzswh yungzswh, hawj douzswh doiq gaijndei gunghawj gezgou miz ok gij cozyung gvanhgen. Gyavaiq laebhwnj yienhdaih caizcwng cidu, laebhwnj cungj caizcwng gvanhaeh cunghyangh caeuq deihfueng gienz cwz cingcuj、caizlig hezdiuz、gak fueng dieg bingzyaenx haenx. Laebhwnj aen cidu yawhsuenq cienzmienh gveihfan ronghcingx、biucinj gohyoz、cughaed miz rengz, cienzmienh saedhengz cikyauq guenjleix. Gyalaeg gaijgwz gij cidu gvaehsuiq, laebcienz gij dijhi cienzgvaeh deihfueng. Gyalaeg gaijgwz gij dijci ginhyungz, lai gyaak gij naengzlig ginhyungz fugsaeh saeddaej ginghci, daezsang gij bijcung cigsoh yungzswh, coicaenh gij swhbwnj hawciengz lai caengz haenx cangqheiq fazcanj. Laebcienz aen gvaenghgaq youz gij cwngcwz hobi caeuq gij cwngcwz hungzgvanh coumaed siujsim song diuz dongh diuzcez gaemhanh haenx, gyalaeg gij gaijgwz hawj liliz caeuq veiliz doenggvaq hawciengz daeuj diuzcez. Laebcienz gij dijhi gamguenj ginhyungz, dawzmaenh diuz daejsienq mbouj mizok hidungjsing ginhyungz fungyiemj.

 ?。≧oek)Doidoengh cauxbaenz yiengh gwzgiz moq cienzmienh hailangh. Hailangh daiq daeuj cinbu, fungsaek cauhbaenz doeklaeng. Aen douhung hailangh Cungguek itdingh mbouj haep, cij yaek yied hai yied gvangq. Aeu hwnqguh “it rangh it loh” guh cungdenj, genhciz yinx haeujdaeuj caeuq byaij okbae caez yawjnaek, ciuq hangh yenzcwz caemh yaeng caemh guh caemh ndaej, gyagiengz cauhmoq naengzlig hailangh doxgap, cauxbaenz yiengh gwzgiz hailangh diegndaw gwnzhaij ndaw rog lienzdoengh、baihdoeng baihsae suengyiengq dox bangbouj. Haigvangq doiq rog mouyiz, gungganq mouyiz ginghyingz hingzsik moq vunqsik moq, doicaenh hwnqguh guekak mouyiz. Saedhengz gij cwngcwz hawj cungj mouyiz caeuq douzswh suijbingz sang haenx bienq swyouz bienq bienhleih, cienzmienh saedhengz gij guenjleix cidu gozminz daiyi mwh caengz cinjhaeuj gya mbawdan gimqhaed, daih fukdoh cuengqsoeng hawciengz cinjhaeuj, gyadaih hangz fugsaeh doiq rog hailangh, baujhoh gij gienzik habfap canghseng’eiq guekrog douzswh. Fanzdwg gij giyez youq ndaw gyaiq guek raeuz cucwz, cungj aeu doengzyiengh doiqdaih、bingzdaengj doiqdaih. Hawj gak rangh dieg hailangh baijbouh bienq ndei, gya rengz bae hailangh baihsae. Hawj dieg sawqguh swyouz mouyiz lai miz gienz gag guhcawj gaijgwz, damqra hwnqguh aen sokruz swyouz mouyiz. Cauhmoq gij fuengsik doiq rog douzswh, coicaenh gij canjnaengz guek caeuq guek ndaej doxgap, cauxbaenz gij vangjloz mouyiz、douzswh yungzswh、swnghcanj、fugsaeh mienhyiengq daengx seiqgyaiq, youq gozci ginghci doxgap caeuq gingcwngh fuengmienh gyavaiq gungganq youhsi moq.

  Gak boux dungzci!Gaijfang caeuq fazcanj sevei swnghcanjliz, dwg gij bonjcaet iugouz sevei cujyi. Raeuz aeu gikfat gij naengzlig cauhguh caeuq rengzhoengh fazcanj daengx biengz, roengzrengz guhbaenz yiengh fazcanj caetliengh engq sang、engq miz yauqlwd、engqgya goengbingz、engq ndaej lienzdaemh!

  Roek、 Laeb Caezcienz Aen Cidu Dijhi Yinzminz Danggya Guhcawj,Fazcanj Yiengh Minzcuj Cwngci Sevei Cujyi

  Guek raeuz dwg aen guekgya sevei cujyi hengz yiengh yinzminz minzcuj conhcwng youz gunghyinz gaihgiz lingjdauj、aeu gungh nungz lenzmungz guh giekdaej, guekgya sojmiz gienzlig gvi yinzminz. Gij minzcuj sevei cujyi guek raeuz dwg gij minzcuj ceiq gvangqlangh、ceiq caensaed、ceiq baenzyungh henhoh gij gaenbonj leih’ik yinzminz. Fazcanj yiengh minzcuj cwngci sevei cujyi couh dwg aeu daejyienh gij eiqceiq yinzminz、baujcang gij gienzik yinzminz、gikfat gij rengzhoengh dajcauh yinzminz, yungh cidu dijhi daeuj baujcingq yinzminz danggya guhcawj.

  Diuzroen cwngci fazcanj yiengh sevei cujyi miz gij daegsaek Cungguek, dwg gij lizsij lozciz、lijlun lozciz、sizcen lozciz ciuhgyawj doxdaeuj Cungguek yinzminz ciengzgeiz buekguh aen gezgoj bietyienz ndaej ok haenx, dwg genhciz gij bonjcaet sugsingq aen dangj、hengzguh gij gaenbonj cunghcij aen dangj aen iugouz bietyienz aeu guh haenx. Gwnz seiqgyaiq mbouj miz yiengh cwngci cidu vunqsik lawz cienzbouh doxdoengz, cwngci cidu mbouj ndaej duetliz sevei cwngci diuzgen daegdingh caeuq lizsij vwnzva conzdungj daeuj couhsieng bingzbuenq, mbouj ndaej hanhdingh yiengh cidu lawz ceiq ak, mbouj ndaej ciuq cwngci cidu vunqsik rog guek gapngangz ciuq guh. Aeu ciengzgeiz genhciz、mboujduenh fazcanj gij minzcuj cwngci sevei cujyi guek raeuz, cizgiz onjdangq doicaenh cwngci dijci gaijgwz, doicaenh yiengh minzcuj cwngci sevei cujyi guh baenz cidu、bienq ndaej gveihfan、bienq baenz cwngzsi, baujcingq yinzminz ciuqfap doenggvaq gak cungj roenloh caeuq hingzsik bae guenjleix hongsaeh guekgya, guenjleix ginghci vwnzva saehnieb, guenjleix hongsaeh ndawbiengz, gyamaenh caeuq fazcanj gij cwngci gizmen sengdoengh hozboz、andingh doxgiet haenx.

 ?。↖t) Genhciz aen dangj lingjdauj、yinzminz danggya guhcawj、ciuqfap ceih guek ndeindei doengjit. Aen dangj lingjdauj cij ndaej coengz gaenbonj bae baujcingq yinzminz danggya guhcawj caeuq ciuqfap ceih guek, yinzminz danggya guhcawj dwg gij bonjcaet daegcwng yiengh minzcuj cwngci sevei cujyi, ciuqfap ceih guek dwg gij gaenbonj fuengsik dangj lingjdauj yinzminz ceihleix guekgya, sam yiengh neix doengjit youq ndaw sizcen hungmbwk yiengh minzcuj cwngci sevei cujyi guek raeuz. Youq ndaw cwngci swnghhoz guek raeuz, dangj dwg cawqyouq lingjdauj diegvih, gyagiengz aen dangj guh cizcungh doengjit lingjdauj, haeujcoengh yinzda、cwngfuj、cwnghez caeuq fazyen、genjcazyen ciuq faplwd ciuq canghcwngz caephengz ciznwngz、mbeguh hongsaeh、fazveih cozyung, song aen fuengmienh neix dwg dox doengjit. Aeu gaijcaenh gij lingjdauj fuengsik caeuq gaemgienz fuengsik aen dangj, baujcingq dangj lingjdauj yinzminz mizyauq bae ceihleix guekgya; gyalai yinzminz miz bouhloh bae camgya cwngci, baujcingq yinzminz ciuqfap saedhengz minzcuj senjgij、minzcuj hezsangh、minzcuj gezcwz、minzcuj guenjleix、minzcuj gamduk; henhoh gij doengjit、viyiemz、gienzvi guekgya fazci, gyagiengz baengh fapceih bae baujcang vunzgienz, baujcingq yinzminz ciuqfap yiengjmiz gienzleih caeuq swyouz gvangqlangh. Gyamaenh gij cwnggenz gihcwngz, caezcienz aen minzcuj cidu gihcwngz, baujcang yinzminz gij gienzleih rox cingzgvang、gienzleih caeuqfaenh、gienzleih biujdab、gienzleih gamduk haenx. Laeb caezcienz aen gihci ciuqfap bae guh gezcwz, cauhlaeb gij gienzlig yinhhengz gihci gezcwz gohyoz、caephengz giengiet、gamduk rengzrwd haenx. Gak gaep lingjdauj ganbu aeu demgiengz minzcuj eiqsik, fatyiengz minzcuj cozfungh, ciepsouh yinzminz gamduk, guhndei boux gunghbuz yinzminz.

 ?。∟geih)Gyagiengz yungh cidu bae baujcang yinzminz danggya guhcawj. Yinzminz daibyauj daihhoih cidu dwg hangh cwngci cidu anbaiz daj goekgaen dawz aen dangj lingjdauj、yinzminz danggya guhcawj、ciuqfap ceih guek ndeindei doengjit haenx, bietdingh aeu ciengzgeiz genhciz、mboujduenh caezcienz. Aeu haeujcoengh caeuq baujcingq yinzminz doenggvaq yinzminz daibyauj daihhoih bae hengzsawj guekgya gienzlig. Youq ndaw hong laebfap fazveih gij cujdauj cozyung yinzda caeuq aen cangzveijvei de, laeb caezcienz aen cujciz cidu caeuq gunghcoz cidu yinzda, haeujcoengh caeuq baujcingq yinzda ciuqfap hengzsawj gij gienz laebfap、gienz gamduk、gienz gietdingh、gienz nyaemhmienx, engq ndei fazveih gij cozyung yinzda daibyauj, sawj gak gaep yinzda caeuq aen cangzveijvei de bienqbaenz aen gunghcoz gihgvanh cienzmienh raphwnj gak hangh cizcwz yenfaz faplwd gyauhawj haenx, bienqbaenz aen daibyauj gihgvanh caeuq yinzminz ginzcung baujciz lienzhaeh gaenjmaed haenx. Ndalaeb caezcienz yinzda cienmonz veijyenzvei, hawj gij yinzyenz gezgou gapbaenz yinzda cangzveijvei caeuq cienmonz veijyenzvei de engq ndei.

 ?。⊿am)Fazveih gij cozyung youqgaenj yiengh hezsangh minzcuj sevei cujyi. Miz saeh ndeindei doxyaeng, gij saehcingz vunzlai youz vunzlai doxyaeng, gijneix cij dwg gij caencingq hamzeiq yinzminz minzcuj. Hezsangh minzcuj dwg gij fuengsik youqgaenj bae saedyienh aen dangj lingjdauj, dwg gij hingzsik daegmiz caeuq youhsi daegbied yiengh minzcuj cwngci sevei cujyi guek raeuz. Aeu doidoengh hezsangh minzcuj fazcanj ndaej engq gvangqlangh、lai caengzsawq、miz cidu, doengjit maeuzveh doicaenh cwngdangj hezsangh、yinzda hezsangh、cwngfuj hezsangh、cwnghez hezsangh、yinzminz donzdij hezsangh、gihcwngz hezsangh nem sevei cujciz hezsangh. Gyagiengz gensez hezsangh minzcuj cidu, cauxbaenz aen cidu bouhloh caeuq caeuqfaenh sizcen caezcingj, baujcingq yinzminz youq ndaw cwngci swnghhoz ngoenznaengz miz gienzleih gvangqlangh lienzdaemh haeujlaeg bae caeuqfaenh.

  Yinzminz cwnghez dwg gij cidu anbaiz miz daegsaek Cungguek, dwg diuz miengloh youqgaenj caeuq aen hezsangh gihgou cienmonz yiengh hezsangh minzcuj sevei cujyi. Gij hong yinzminz cwnghez aeu comzrengz haeuj aen cungsim yinvu dangj caeuq guekgya, hopheux doxgiet caeuq minzcuj song aen cawjdaez hung, dawz hezsangh minzcuj ronzgvaq cwngci hezsangh、minzcuj gamduk、canhcwng yicwng cienzbouh gocwngz, caezcienz gij neiyungz caeuq hingzsik hezsangh yicwng, roengzrengz demlai nyinhrox doxdoengz、coicaenh doxgiet. Gyagiengz gij minzcuj gamduk yinzminz cwnghez, cungdenj gamduk gij fuengcim cwngcwz hungnaek caeuq gezcwz baijbouh youqgaenj dangj caeuq guekgya gvancez doeksaed ndaej baenzlawz. Demgiengz gij daibyaujsing doengh aen gaiqbied yinzminz cwnghez, gyagiengz veijyenz duivuj gensez.

 ?。⊿eiq) Haeujlaeg bae sizcen ciuqfap ceih guek. Cienzmienh ciuqfap ceih guek dwg ciengz gwzming laegdaeuq ceihleix guekgya ndeu, bietdingh aeu genhciz dawzyiemz fapceih, doicaenh gohyoz laebfap、yiemzgek caepfap、goengcingq dawzfap、bouxboux soujfap. Laebhwnj cunghyangh cienzmienh ciuqfap ceih guek lingjdauj siujcuj, gyagiengz doiq gensez aen Cungguek fapceih guh doengjit lingjdauj. Gyagiengz saedhengz caeuq gamduk yenfaz, doicaenh gij hong saemjcaz hab mbouj hab yenfaz, henhoh gij gienzvi yenfaz. Doicaenh gohyoz laebfap、minzcuj laebfap、ciuqfap laebfap, aeu gij faplwd fapgvi ndei bae coicaenh fazcanj、baujcang sevei ceihleix ndaej ndei. Gensez aen cwngfuj fapceih, doicaenh ciuqfap hengzsawj guekgya gienzlig, yiemzgek gveihfan goengcingq vwnzmingz bae hengzfap. Gyalaeg gij cunghab boiqdauq gaijgwz swhfaz dijci, cienzmienh doeksaed swhfaz cwzyinci, roengzrengz hawj yinzminz ginzcung youq moix it aen swhfaz anqgienh ndawde gamjsouh daengz goengbingz cingqngeih. Gya rengz bae guh cienzminz bujfaz, gensez sevei cujyi fapceih vwnzva, laebhwnj cungj fapceih leixniemh yenfaz faplwd ceiq ak、dangqnaj faplwd bouxboux bingzdaengj. Gak gaep dangj cujciz caeuq daengxcungq dangjyenz aeu daiqdaeuz gingq fap hag fap souj fap yungh fap, mboujlwnh aen cujciz lawz caeuq boux vunz lawz cungj mbouj ndaej miz daeggienz mauhhamj yenfaz faplwd, baenzmaz cungj mbouj cinjhawj aeu vah dingj fap、aeu gienz naenx fap、gyaep leih vut fap、vih seicingz uengjfap.

 ?。℉aj) Gyalaeg gaijgwz gihgou caeuq hingzcwng dijci. Doengbuenz ngeixnaemj ndalaeb gak loih gihgou, gohyoz boiqceiq gij gienzlig dangjcwng bouhmonz caeuq doengh aen gihgou anlaeb youq baihndaw de、mingzbeg doekdingh ciznwngz cwzyin. Doengjit suenqveh sawjyungh gak loih bienceiq swhyenz, cauxbaenz gij guenjleix dijci gohyoz hableix, caezcienz aen fap cujciz gihgou guekgya. Cienjbienq gij ciznwngz cwngfuj, gyalaeg gemj cwng cuengq gienz, cauhmoq gamguenj fuengsik, demgiengz gij rengz vunzlai saenq ndaej caeuq gij rengz caephengz cwngfuj, hwnqguh yiengh cwngfuj fugsaeh hawj yinzminz habhoz haenx. Gyau gienz hawj aen cwngfuj sengjgaep caeuq sengjgaep doxroengz lai ndaej gag guhcawj. Youq sengj si yienh doiq doengh aen dangjcwng gihgvanh ciznwngz doxlumj de damqra gyoebhab ndalaeb roxnaeuz gyoeb youq giz ndeu banhgoeng. Gyalaeg swyez danhvei gaijgwz, gyagiengz gij goeng’ik sugsingq de, doicaenh cwngfuj caeuq swyez danhvei faenhai、swyez danhvei caeuq giyez faenhai、guenjleix caeuq haibanh faenliz.

 ?。≧oek)Gyamaenh caeuq fazcanj gyaezguek doengjit cansen. Doengjit cansen dwg gij fapbauj youqgaenj hawj saehnieb dangj raeuz guh ndaej hingz, bietdingh aeu ciengzgeiz genhciz. Aeu yaengxsang mbaw geiz gyaezguek cujyi、sevei cujyi, gaemndaet aen cawjdaez daih doxgiet daih lienzhab, genhciz yiengh itcaez caeuq yiengh lai cungj dox doengjit, raok aen gunghyozsu ceiq hung, veh’ok aen gien doengzsim ceiq hung. Genhciz ciengzgeiz caemhyouq、dox guh gamduk、simsaej doxrox、yungz nyaenq caez dang, haeujcoengh minzcuj dangjbai ciuq gij iugouz yiengh canhcwngdangj sevei cujyi miz daegsaek Cungguek haenx engq ndei hengzguh ciznwngz. Gyalaeg gij gyauyuz minzcuz doxgiet cinbu, couq maenh gij eiqsik caezcaemh aen Cunghvaz Minzcuz ndeu, gyagiengz gak minzcuz dox baedauq dox gyaulouz dox yungzhab, coicaenh gak minzcuz lumj ceh maksiglouz ityiengh doxgot youq itheij ndaetndwtndwt, doengzcaez doxgiet buekguh、doengzcaez hwngfat mwnhoengh. Cienzmienh gvancez gij gihbwnj fuengcim hongsaeh cunghgyau aen dangj, genhciz cunghgyau guek raeuz ciuq aen fuengyiengq habngamj guekcingz Cungguek bae fazcanj, cizgiz dazyinx cunghgyau caeuq aen biengz sevei cujyi dox hab’wngq. Gyagiengz guh gij hong boux cihsiz fwnswj rog dangj, guhndei gij hong boux yinzsw sevei gaihcwngz moq, hawj gyoengqde youq ndaw saehnieb yiengh sevei cujyi miz gij daegsaek Cungguek fazveih cozyung youqgaenj. Cauhlaeb yiengh gvanhaeh moq cwngfuj caeuq canghseng’eiq caengaenh cinghseuq, coicaenh gij ginghci mbouj dwg gunghyoujci cangqheiq fazcanj caeuq doengh boux guh gij ginghci mbouj dwg gunghyoujci de cangqheiq majhung. Gvangqlangh comzgiet lienzhaeh gij beixnuengx vazgyauz rog guek caeuq gij beixnuengx vazgyauz daj rog guek dauqma haenx, doengzcaez vih Cunghvaz Minzcuz fukhwng hungmbwk roengzrengz buekguh.

  Gak boux dungzci!Gij cwngci cidu sevei cujyi miz daegsaek Cungguek dwg yiengh haicauh hungmbwk Cunghgoz Gungcanjdangj caeuq Cungguek yinzminz. Raeuz vanzcienz miz saenqsim、miz naengzlig dawz gij youhsi caeuq daegdiemj sevei cujyi minzcuj cwngci guek raeuz cungfaen fazveih okdaeuj, vih vunzloih cwngci vwnzmingz cinbu gunghawj gij dungxcaiz Cungguek!

  Caet、 Giendingh Gag Saenq Vwnzva Bonjfaenh, Doidoengh Gij Vwnzva Sevei Cujyi Hwnghwnj Hoenghvuengh

  Vwnzva dwg gij hoenzmingh aen guekgya ndeu、aen minzcuz ndeu. Vwnzva hwng guekgya hwng, vwnzva ak minzcuz ak. Mbouj lailai gag saenq gij vwnzva bonjfaenh, mbouj miz vwnzva hwnghwnj hoenghvuengh, couh mbouj miz Cunghvaz Minzcuz fukhwng hungmbwk. Aeu genhciz diuz roenloh vwnzva fazcanj sevei cujyi miz daegsaek Cungguek, gikfat gij rengzhoengh daengx aen minzcuz cauhguh caeuq cauhmoq vwnzva, hwnqguh aen guekak vwnzva sevei cujyi.

  Gij vwnzva sevei cujyi miz daegsaek Cungguek, daj ndaw conzdungj vwnzva maenhndei Cunghvaz duenh vwnzmingz lizsij haj cien lai bi Cunghvaz Minzcuz cauhlaeb haenx doekseng okdaeuj, yungz haeuj yiengh gwzming vwnzva caeuq yiengh vwnzva senhcin sevei cujyi dangj lingjdauj yinzminz youq ndaw gwzming、gensez、gaijgwz cauh okdaeuj, daz rag youq ndaw sizcen hungmbwk yiengh sevei cujyi miz gij daegsaek Cungguek. Fazcanj yiengh vwnzva sevei cujyi miz daegsaek Cungguek, couh dwg aeu Majgwzswh Cujyi daeuj dazyinx, dawzmaenh aen lizcangz Cunghvaz vwnzva, daj gij yienhsaed dangdaih Cungguek hwnjdin, giethab gij seizdaih diuzgen seizneix, fazcanj yiengh vwnzva sevei cujyi yiengqcoh yendaiva、yiengqcoh seiqgyaiq、yiengqcoh daengzcog, youh dwg gij minzcuz、hab gohyoz、 vih daihcungq haenx, doidoengh sevei cujyi cingsaenz vwnzmingz caeuq vuzciz vwnzmingz hezdiuz fazcanj. Aeu genhciz fugsaeh yinzminz、fugsaeh sevei cujyi, genhciz bak va caez hai、bak gya caez lwnh, genhciz doenggvaq dajcauh bae cienjvaq、 cauhmoq bae fazcanj, mboujduenh dizlienh ok yiengh vwnzva Cunghvaz ronghsag moqsak daeuj.

 ?。↖t) Dawzmaenh gij gienzlig lingjdauj hongsaeh yisiz hingzdai. Yisiz hingzdai gietdingh vwnzva aen fuengyiengq baenaj caeuq diuz roenloh fazcanj. Bietdingh aeu doicaenh Majgwzswh Cujyi bienq habngamj guekcingz Cungguek、habngamj seizdaih iugouz、habngamj cungqvunz aeuyungh, gensez yiengh yisiz hingzdai sevei cujyi miz rengz gietcomz caeuq rengz dazyinx maenh’ak, hawj daengxcungq yinzminz youq lijsiengj saenqniemh、gyaciz leixniemh、daudwz gvanhnen fuengmienh gaenjmaenh doxgiet youq itheij. Aeu gyagiengz yungh lijlun cang uk, hawj Aen Swhsiengj Sevei Cujyi Miz Gij Daegsaek Cungguek Seizdaih Moq haeuj laeg daengz ndaw sim cungqvunz. Haeujlaeg yenzgiu caeuq gensez Majgwzswh Cujyi lijlun, gyavaiq laebbaenz gij cezyoz sevei gohyoz miz daegsaek Cungguek, gyagiengz laebguh aen cigu moq miz daegsaek Cungguek. Genhciz yizlun daujyang cingqdeng, cibfaen yawjnaek hwnqguh caeuq cauhmoq cienzboq fuengfap, daezsang gij rengz cienzboq、 rengz dazyinx、rengz yingjyangj、rengz goengsaenq sinhvwnz yizlun. Gyagiengz gensez gij neiyungz hulenzvangj, laebhwnj aen dijhi gyoebhab ceihleix vangjloz, cauh’ok aen hoenggan vangjloz seuqsak. Doeksaed gij cwzyinci ndaw hongsaeh yisiz hingzdai, lai roengzrengz hwnqguh caeuq guenjleix cindi, louzsim faencing gij vwndiz cwngci yenzcwz、 gij vwndiz swhsiengj yinsiz、gij vwndiz yozsuz gvanhdenj, geizhauh sienmingz bae fanjdui caeuq daeqceih gak cungj gvanhdenj loengloek.

 ?。∟geih)Gungganq caeuq hengzguh aen haedsim gyacizgvanh sevei cujyi. Aen haedsim gyacizgvanh sevei cujyi dwg doiq gij cingsaenz dangdaih Cungguek guh gyonjcomz daejyienh, gietcomz miz gij gyaciz gyaepgouz caezcaemh daengxcungq yinzminz. Aeu daj giz ganqok boux vunzmoq seizdaih ndaej raphwnj aen rapnaek minzcuz fukhwng haenx bae ngeixnaemj, gyagiengz gyauyuz dazyinx、sizcen ganqbaenz、cidu baujcang, fazveih aen haedsim gyacizgvanh sevei cujyi gij cozyung dazyinx gozminz gyauyuz、cauhlaeb cingsaenz vwnzmingz、cauhguh swnghcanj cienzboq cingsaenz vwnzva canjbinj, dawz aen haedsim gyacizgvanh sevei cujyi yungzhaeuj sevei fazcanj gak aen fuengmienh bae, cienjvaq baenz gij cingzgamj nyinhdoengz caeuq hingzveiz sibgvenq gyoengqvunz. Genhciz daengxcungq yinzminz bae guh、ganbu daiqdaeuz, daj ndawranz guh hwnj, daj lwgnyez son hwnj. Haeujlaeg vataeu gij swhsiengj gvanhnen、yinzvwnz cingsaenz、daudwz gveihfan ndaw conzdungj vwnzva maenhndei Cunghvaz hamz miz haenx, giethab seizdaih iugouz ciepswnj cauhmoq, hawj Cunghvaz vwnzva mbebaij ok gij yienghndei hawj vunz ciengzlwenx gyaezmaij caeuq gij saeksiengq gyaeundei seizdaih.

 ?。⊿am)Gyagiengz swhsiengj daudwz gensez. Yinzminz miz saenqyiengj, guekgya miz ligliengh, minzcuz miz maqmuengh. Aeu daezsang gij swhsiengj gyozvu、daudwz suijcunj、vwnzmingz suyangj yinzminz, daezsang gij vwnzmingz cingzdoh daengx biengz. Gvangqlangh mbeguh lijsiengj saenqniemh gyauyuz, haeujlaeg bae guh yiengh sevei cujyi miz gij daegsaek Cungguek caeuq aen loqsiengj Cungguek senhconz gyauyuz, hungzyangz gij cingsaenz minzcuz caeuq gij cingsaenz seizdaih, gyagiengz gyaezguek cujyi、cizdij cujyi、sevei cujyi gyauyuz, dazyinx gyoengqvunz laebhwnj lizsijgvanh、minzcuzgvanh、gozgyahgvanh、vwnzva’gvanh cingqdeng. Haeujlaeg hengzguh aen gunghcwngz gunghminz daudwz gensez, doicaenh sevei gunghdwz、cizyez daudwz、gyahdingz meijdwz、bouxvunz binjdwz gensez, gikcoi gyoengqvunz guh ndei guh sienh、maij bouxgeq gyaez bouxcaen、doiq guekcoj cungcig、doiq yinzminz cungcig. Gyagiengz caeuq gaijndei gij hongsaeh swhsiengj cwngci, haeujlaeg bae guh gij hozdung cungqvunz caeuqfaenh cauhlaeb cingsaenz vwnzmingz. Hungzyangz gohyoz cingsaenz, bujgiz gohyoz cihsiz, mbeguh gij hengzdoengh gaijbienq fungsug gaeuq、hungzyangz fungheiq moq ciuhneix, daeqceih gij vwnzva ndukvaih doeklaeng haenx cimqmyaex. Doicaenh lauxsaed soujsaenq gensez caeuq gagnyienh fugsaeh bienqbaenz cidu, lai dawzmaenh sevei cwzyin eiqsik、gveihcwz eiqsik、fungyen eiqsik.

 ?。⊿eiq) Gaujhoengh fazcanj gij vwnzyi sevei cujyi. Gij vwnzyi sevei cujyi dwg gij vwnzyi yinzminz, bietdingh aeu genhciz aen fuengyiengq dajcauh cozbinj aeu yinzminz guh cungsim, youq mwh haeuj daengz ndaw swnghhoz、doekrag ndaw yinzminz dajcauh gij vwnzyi doiq ndaej hwnj seizdaih. Aeu hawj dajcauh vwnzyi mwnhoengh hwnjdaeuj, genhciz swhsiengj ndei laeg、yisuz sang laeg、cauhguh ndei saeq dox doengjit, lai dajcauh gij cozbinj daezcaiz yienhsaed, mboujduenh doiok gij cozbinj ndei haenh dangj、haenh guekcoj、haenh yinzminz、haenh yinghyungz. Fazyangz yozsuz minzcuj、yisuz minzcuj, daezswng gij naengzlig cauhnduj vwnzyi, doidoengh vwnzyi cauhmoq. Dizcang gangj binjvih、gangj gekdiuh、gangj cwzyin, daeqceih gij yaezcouj、yungzsug、maezlienh seiqsug haenx. Lai roengzrengz gensez vwnzyi duivuj, gyauqok baenz daihbuek daihsae mizmingz daudwz yisuz song yiengh cungj maenhndei, gungganq baenz daihbuek vunzcaiz dajcauh cozbinj suijbingz sang.

 ?。℉aj)Doidoengh vwnzva saehnieb caeuq vwnzva canjnieb fazcanj. Muenxcuk gij deqmuengh moq yinzminz siengj gvaq saedceij gyaeundei, bietdingh aeu daezhawj gij haeuxliengz cingsaenz fungcuk. Aeu haeujlaeg bae gaijgwz vwnzva dijci, caezcienz aen dijci guenjleix vwnzva, gyavaiq laebhwnj aen dijci gihci aeu sevei yauqik baiz youq daih’it、sevei yauqik caeuq ginghci yauqik dox doengjit. Caezcienz aen dijhi vwnzva fugsaeh vunzlai, haeujlaeg hengzguh aen gunghcwngz vwnzva ikleih vunzlai, fungfouq gij vwnzva hozdung vunzlai. Gyagiengz baujhoh leihyungh vwnzvuz caeuq baujhoh cienzciep vwnzva yizcanj. Laebcienz aen canjnieb dijhi caeuq aen hawciengz dijhi vwnzva ciuhneix, cauhmoq aen gihci swnghcanj ginghyingz, caezcienz gij cwngcwz vwnzva ginghci, gungganq gij vwnzva yezdai yienghmoq. Gvangqlangh mbeguh gij hozdung bouxboux lienhndang, gyavaiq doicaenh hwnqguh aen guek dijyuz ak, couzbanh ndei Baekging Auyinvei Seizdoeng、 Canzauvei Seizdoeng. Lai caeuq rogguek guh yinzvwnz gyaulouz, aeu gij vwnzva bonjfaenh raeuz guh goek、sourib gij vwnzva ndei rog guek. Doicaenh gensez gij naengzlig youq gwnz gozci cienzboq, gangj ndei gojgaeq Cungguek, mbebaij aen Cungguek caensaed、lizdij、cienzmienh, daezsang gij saedlig’unq vwnzva guekgya.

  Gak boux dungzci! Cunghgoz Gungcanjdangj daj ngoenz laebbaenz hwnj, gawq dwg boux gaenx dazyinx caeuq hengzguh gij senhcin vwnzva Cungguek, youh dwg boux lauxsaed ciepswnj caeuq hungzyangz gij conzdungj vwnzva maenhndei Cunghvaz. Boux Cunghgoz Gungcanjdangj caeuq gij yinzminz Cungguek ciuhneix wnggai caemhcaiq itdingh ndaej rap hwnj vwnzva sawjmingh moq, youq ndaw sizcen dajcauh bae guh vwnzva dajcauh, youq ndaw lizsij cinbu guhbaenz vwnzva cinbu!

  Bet、Daezsang Gij Suijbingz Baujcang Caeuq Gaijndei Gwndaenj Yinzminz, Gyagiengz Caeuq Cauhmoq Sevei Ceihleix

  Daengx dangj bietdingh aeu geiqmaenh, aen vwndiz vih gijmaz vunz, dwg gaiq rin lingzniemh genjniemh gij singqcaet aen cwngdangj ndeu、aen cwnggenz ndeu. Daiqlingx yinzminz cauhguh saedceij gyaeundei, dwg aen muzbyauh dangj raeuz seizseiz mbouj gaijbienq bae buekguh haenx. Bietdingh aeu itcig baij gij leih’ik yinzminz youq giz ceiq sang, hawj gij cwngzgoj gaijgwz fazcanj ndaej engq lai engq goengbingz ndei doh daengxcungq yinzminz, riengz guhbaenz daengxcungq yinzminz doengzcaez fouqmiz mboujduenh yamq baenaj.

  Baujcang caeuq gaijndei gwndaenj yinzminz, aeu gaemdawz aen vwndiz nangq daengz gij leih’ik gwnzndang yinzminz ngoenznaengz ceiq gvansim haenx, gawq aeu caenh rengz guh, youh aeu aenq rengz guh, baez gienh saeh ciep baez gienh saeh bae banh, bi ciep bi bae guh. Genhciz bouxboux caenh cizcwz、bouxboux ndaej yiengjyungh, henmaenh daejsienq、doedok cungdenj、caezcienz cidu、dazyinx yawhgeiz, caezcienz aen dijhi goenggungh fugsaeh, baujcang gij gihbwnj swnghhoz ginzcung, mboujduenh muenxcuk yinzminz gij aeuyungh saedceij gyaeundei ngoenz beij ngoenz demmaj haenx, mboujduenh coicaenh sevei goengbingz cingqngeih, cauxbaenz yiengh sevei ceihleix mizyauq、sevei cizsi ndei haenx, hawj yinzminz cungj roxnyinh ndaej ndeicawq、roxnyinh vuenyungz、roxnyinh ancienz haenx engqgya cungsaed、engq miz baujcang、engq ndaej lienzdaemh.

 ?。↖t)Fazcanj gyauyuz saehnieb baiz youq gonq. Gensez aen guek gyauyuz maenh’ak dwg aen gunghcwngz dajgiek hawj Cunghvaz Minzcuz ndaej daih fukhwng, bietdingh aeu cuengq gyauyuz saehnieb youq giz baihgonq,gyalaeg gyauyuz gaijgwz, gyavaiq gyauyuz yendaiva, banhbaenz yiengh gyauyuz hawj yinzminz habhoz. Aeu cienzmienh gvancez gij gyauyuz fuengcim dangj raeuz, doeksaed aen yinvu goekgaen laeb daudwz ganq vunz, fazcanj suciz gyauyuz, doicaenh gyauyuz goengbingz, gungganq boux gensez caeuq boux ciepban sevei cujyi dwzyuz ciyuz dijyuz meijyuz cienzmienh fazcanj. Doidoengh gij yivu gyauyuz hawsingz lajmbanj gyoeb baenz cingjdaej fazcanj, gig yawjnaek gij yivu gyauyuz lajmbanj, banhndei gij gyauyuz haeuj hag gaxgonq、gij gyauyuz daegbied caeuq gij gyauyuz gwnz vangjloz, bujgiz gij gyauyuz duenh gauhcungh, roengzrengz hawj moix boux lwgnyez cungj yiengjmiz gij gyauyuz goengbingz youh caetliengh ndei. Caezcienz gij dijhi cizyez gyauyuz caeuq beizyin, gyalaeg canjnieb sonhag yungzhab、hagdangz giyez doxgap. Gyavaiq hwnqguh gij daihhag itlouz caeuq gij yozgoh itlouz, guhbaenz gauhdwngj gyauyuz ndaej goengbingz caetliengh sang dwk fazcanj. Laebcienz aen cidu aeu cienz bangcoengh hagseng, hawj daih dingzlai lauzdungliz singz mbanj ngamq gyalai haenx ndaej doeg gauhcungh、miz engq lai vunz ndaej haeuj daihhag doegsaw. Haeujcoengh caeuq gveihfan ligliengh ndawbiengz hwngbanh gyauyuz. Gyagiengz gensez gij cizyez daudwz caeuq cozfungh lauxsae, gungganq aen duivuj lauxsae suciz sang, cangdauj daengx biengz gingqcungh lauxsae yawjnaek gyauyuz. Banhndei laebdaeb gyauyuz, gyavaiq gensez aen biengz maij hagsib, lai roengzrengz daezsang gij suciz gozminz.

 ?。∟geih)Daezsang gij caetliengh couhnieb caeuq gij souhaeuj suijbingz yinzminz. Couhnieb dwg gij saeh ceiq hung ndaw gwndaenj yinzminz. Aeu genhciz aen canloz couhnieb baiz youq doekgonq caeuq aen cwngcwz coicaenh gaenx bae couhnieb, guhbaenz gij couhnieb caetliengh engq sang caeuq engq cungfaen. Daihliengh mbeguh cizyez ginwngz beizyin, yawjnaek gaijgez gij mauzdun couhnieb daj ndaw gezgou mizok, gujli cauhnieb daiqdoengh couhnieb. Daj gak fuengmienh bae fugsaeh goenggungh couhnieb, coicaenh gij hagseng ngamq doeg caez daihhag daengj gyoengq bouxcoz、nungzminzgungh lai roenloh bae couhnieb cauhnieb. Buqcawz gij mbouj ndei ndaw dijci gihci gazngaih lauzdungliz、vunzcaiz youz ndawbiengz riuzdoengh, hawj bouxboux cungj miz gihvei doenggvaq sinhoj guhhong guhbaenz gag ndaej fazcanj. Caezcienz aen gihci cwngfuj、gunghvei、giyez doengzcaez caeuqfaenh doxyaeng doxbang, laebhwnj yiengh lauzdung gvanhaeh huzndei. Genhciz aen yenzcwz ciuq guhhong faenboiq, caezcienz aen dijci gihci ciuq yausu faenboiq, coicaenh souhaeuj faenboiq engq hableix、engq miz cizsi. Gujli gaenxguh soujfap baenzfouq, gyahung gyoengq vunz souhaeuj gaepgyang, demgya gij souhaeuj doengh boux souhaeuj noix, diuzcez gij souhaeuj sang gvaqbouh, gimqcawz gij souhaeuj mbouj habfap. Genhciz youq mwh ginghci demmaj youh ndaej guhbaenz gihminz souhaeuj doengzyamq demmaj、youq mwh lauzdung swnghcanjliz daezsang youh ndaej guhbaenz cienzngaenz guhhong doengzyamq daezsang. Haigvangq diuz roenloh gihminz gij souhaeuj guhhong ndaej daeuj caeuq gij souhaeuj caizcanj cienj baenz. Guh ndei gij ciznwngz cwngfuj guh caiq faenboiq diuzcez, gyavaiq doicaenh gihbwnj goenggungh fugsaeh bienq bingzyaenx, sukiq gij cengca souhaeuj faenboiq.

 ?。⊿am) Gyagiengz gensez aen dijhi sevei baujcang. Ciuq gij iugouz dawzmaenh daejsienq、san maed aen muengx、laebhwnj gihci, cienzmienh laebbaenz aen dijhi sevei baujcang lai caengz ndaej guenj doh daengxcungq yinzminz、singz mbanj doengbuenz suenqveh、gienzleih cwzyin faencing、baujcang habdoh、ndaej lienzdaemh haenx. Cienzmienh hengzguh aen giva bouxboux camgya baujyiemj. Caezcienz aen cidu gihbwnj ciengxlaux baujyiemj cizgungh hawsingz caeuq gihbwnj ciengxlaux baujyiemj gihminz singz mbanj, caenhvaiq guhbaenz ciengxlaux baujyiemj daengx guek doengbuenz suenqveh. Caezcienz aen cidu gihbwnj yihliuz baujyiemj caeuq aen cidu binghhung baujyiemj gihminz singz mbanj doengjit. Caezcienz gij cidu saetnieb、goengsieng baujyiemj. Laebhwnj aen bingzdaiz sevei baujyiemj goenggungh fugsaeh daengx guek doengjit. Doengbuenz suenqveh aen dijhi sevei gouqbang singz mbanj, caezcienz aen cidu baujcang gij gwndaenj ceiq daemq. Genhciz aen gihbwnj gozcwz bouxsai bouxmbwk bingzdaengj, baujcang gij gienzik habfap mehmbwk lwgnyez. Caezcienz gij cidu sevei gouqbang、sevei fukleih、saehnieb swnzsienh、youhfuj anceiq daengj, laebcienz aen dijhi gvansim fugsaeh gyoengq lwgnyez youq lajmbanj dawzranz caeuq gyoengq mehmbwk、bouxgeq. Fazcanj aen saehnieb bouxcanzcaed, lai guh gij fugsaeh hawj bouxcanzcaed hoizfuk ndangcangq. Genhciz yiengh dinghvih aenranz dwg yungh daeuj youq、mbouj dwg yungh daeuj cauj, gyavaiq laebhwnj aen cidu ranzyouq lai cawjdaej gunghawj、lai roenloh baujcang、co cawx caez guh, hawj daengxcungq yinzminz cungj miz ranz youq.

 ?。⊿eiq) Giengiet dwkhingz ciengz ciengq gunggeng duetgungz. Hawj gyoengq vunz gungzhoj caeuq giz dieg gungzhoj caeuq daengx guek caezcaemh haeujdaengz aen biengz cienzmienh siujgangh dwg gij wngqcingz yiemzrwd dangj raeuz. Aeu dungyenz gij ligliengh daengx dangj daengx guek daengx biengz, genhciz dawzcinj banggungz、dawzcinj duetgungz, genhciz yiengh gunghcoz gihci cunghyangh doengjit maeuzveh、 sengj rapdawz sojmiz cwzyin、 si yienh gaemdawz doeksaed, giengzvaq gij cwzyinci bouxdaeuz daih’it dangjcwng rapdawz gij cwzyin lingjdauj, genhciz aen gwzgiz lai guh banggungz, yawjnaek aeu banggungz caeuq bang caengqhwnj ceiqheiq、bang gungganq dungxcaiz dox giethab, haeujlaeg hengzguh baihdoeng baihsae doxgap banggungz, cungdenj gungroengz gij yinvu hawj dieg gig gungzhoj duetgungz, saedbauj daengz 2020 nienz gij vunz gungzhoj lajmbanj ndaej ciuq aen biucinj guek raeuz seizneix guhbaenz duetgungz, gij yienh gungzhoj cienzbouh ndaej duet mauh, gaijgez baenz rangh dieg daengxcungq gungzhoj, guh daengz duet caen gungz、caen duetgungz.

 ?。℉aj)Hengzguh aen canloz Cungguek cangqheiq. Yinzminz cangqheiq dwg gij geiqhauh youqgaenj minzcuz hoenghvuengh caeuq guekgya fouqgiengz. Aeu caezcienz gij cwngcwz guekminz cangqheiq, vih yinzminz ginzcung daezhawj gij fugsaeh cangqheiq gizgiz dohdaengz seizseiz dohdaengz. Gyalaeg gaijgwz gij dijci yihyoz veiswngh, cienzmienh laebhwnj aen cidu gihbwnj yihliuz veiswngh、aen cidu yihliuz baujcang miz daegsaek Cungguek caeuq aen dijhi yihliuz veiswngh fugsaeh caetliengh ndei yauqlwd sang, laebcienz gij cidu guenjleix yienhdaih yihyen. Gyagiengz gensez aen dijhi gihcwngz yihliuz veiswngh fugsaeh caeuq aen duivuj canghyw cenzgoh. Cienzmienh siubae aeu yw ciengx yihyen, laebcienz aen cidu baujcang gijyw gunghawj. Genhciz fuengzre guhcawj, haeujlaeg haiguh gij yindung veiswngh gyaez guek, daiqdaeuz dizcang gij swnghhoz fuengsik cangqheiq vwnzmingz, fuengzre gaemhanh bingh hung bingh naek. Hengzguh aen canloz gijgwn ancienz, hawj yinzminz gwn ndaej cuengqsim. Genhciz cunghyih sihyih caez yawjnaek, cienzciep fazcanj saehnieb cunghyihyoz. Cihciz ndawbiengz banh yihyen, fazcanj gij canjnieb cangqheiq. Coicaenh gij cwngcwz senglwg caeuq gij cwngcwz mizgven ginghci sevei boiqdauq hamzciep, gyagiengz yenzgiu gij canloz gyaeujvunz fazcanj. Cizgiz wngqdoiq gyaeujvunz bouxgeq bienq lai, laebhwnj gij cwngcwz dijhi caeuq sevei vanzging ciengx laux、hauq laux、gingq laux, doicaenh yw ciengx giethab, gyavaiq fazcanj gij saehnieb caeuq canjnieb bouxgeq.

 ?。≧oek) Dajcauh aen sevei ceihleix gwzgiz caemh guh caemh guenj caemh miz. Gyagiengz gensez gij cidu sevei ceihleix, caezcienz aen dijci sevei ceihleix youz dangjveij lingjdauj、cwngfuj fucwz、sevei gapdoengz、 vunzlai caeuqfaenh、fapceih baujcang haenx, daezsang gij suijbingz seveiva、fazciva、cinwngzva、conhyezva sevei ceihleix. Gyagiengz gensez aen gihci fuengzre caeuq vaqgej sevei mauzdun, cingqdeng bae cawqleix gij mauzdun baihndaw yinzminz. Laebhwnj cungj leixniemh ancienz fazcanj, hungzyangz cungj swhsiengj sengmingh hung gvaq mbwn、ancienz daih’it, laebcienz aen dijhi goenggungh ancienz, caezcienz ancienz swnghcanj cwzyinci, giengiet naenxhaed gij ancienz saehhux hungnaek caeuq daegbied hung, daezswng gij naengzlig re cai gemj cai gouq cai. Gyavaiq gensez aen dijhi fuengzre gaemhanh sevei cianh, ciuqfap dwkceih caeuq fadceih ndauq、doj、doeg、 yak、gvaij、yaeuh doengh cungj famhfap famhcoih hozdung neix, baujhoh gij gienz ndangvunz、gienz caizcanj、gienz yinzgwz yinzminz. Gyagiengz gensez aen dijhi fugsaeh sevei simleix, gungganq yiengh sevei simleix gag aeueiq gagsaenq、leixsingq bingzhuz、gaenxguh baenaj. Gyagiengz gensez aen dijhi guenjleix segih, dawz gij rengznaek sevei ceihleix nyoengx daengz gihcwngz bae, fazveih gij cozyung sevei cujciz, guhbaenz cwngfuj ceihleix caeuq sevei diuzcez、gihminz gagguenj haemq ndei bae dox doidoengh.

 ?。–aet)Mizyauq henhoh guekgya ancienz. Guekgya ancienz dwg ndaek ringiek youqgaenj guekgya andingh vunzbiengz an’onj, henhoh guekgya ancienz dwg gij gaenbonj leih’ik daengx guek gak cuz yinzminz. Aeu caezcienz guekgya ancienz canloz caeuq guekgya ancienz cwngcwz, giengiet henhoh guekgya cwngci ancienz, doengbuenz maeuzveh doicaenh gak hangh ancienz gunghcoz. Laebcienz guekgya ancienz dijhi, gyagiengz guekgya ancienz fapceih baujcang, daezsang gij naengzlig fuengzre caeuq dingjdangj ancienz fungyiemj. Yiemzmaed fuengzre caeuq giengiet dwkceih doengh gij hozdung iemqhaeuj byoekfan buqvaih、gij hozdung rengzyak dwglau、gij hozdung minzcuz faenmbek、gij hozdung cunghgyau gizdonh. Gyagiengz guekgya ancienz gyauyuz, gyalai gij eiqsik guekgya ancienz daengx dangj daengx guek yinzminz, doidoengh daengx biengz cauxbaenz yiengh rengzhung doxgap henhoh guekgya ancienz.

  Gak boux dungzci! Sojmiz gij gunghcoz dangj raeuz bietdingh aeu gij gaenbonj leih’ik gyoengq yinzminz ceiq lai guh aen biucinj ceiq sang. Raeuz aeu genhciz dawz gij saeh’iq yinzminz ginzcung dangguh gij saehhung swhgeij, daj gij saehcingz yinzminz ginzcung gvansim haenx guh hwnj, daj gij saehcingz hawj yinzminz ginzcung habhoz haenx guh hwnj, dazyinx yinzminz mboujduenh dajcauh saedceij gyaeundei!

  Gouj、 Gyavaiq Gaijgwz Aen Dijci Swnghdai Vwnzmingz, Gensez Aen Cungguek Gyaeundei

  Vunz caeuq swyenz dwg sengmingh gungdungzdij, vunzloih bietdingh aeu aeueiq swyenz、swnhhab swyenz、baujhoh swyenz. Vunzloih cijmiz ciuqcoengz swyenz gvilwd, cijndaej youq haifat leihyungh swyenz fuengmienh mizyauq bae fuengzre byaij roen ngutngeuj, vunzloih sienghaih daswyenz doeklaeng yaek sieng daengz vunzloih bonjndang, neix dwg gij gvilwd mbouj miz banhfap dingj ndaej.

  Gij yendaiva raeuz yaek gensez de dwg gij yendaiva vunz caeuq swyenz doxhuz caemhyouq, gawq aeu dajcauh vuzciz caizfouq caeuq cingsaenz caizfouq engq lai daeuj muenxcuk yinzminz gij aeuyungh saedceij gyaeundei ngoenz beij ngoenz demmaj haenx, youh aeu gunghawj gij swnghdai canjbinj ndei engq lai daeuj muenxcuk yinzminz gij aeuyungh swnghdai vanzging gyaeundei ngoenz beij ngoenz demmaj haenx. Bietdingh aeu genhciz diuz fuengcim mbaetyungh youq gonq、baujhoh youq gonq、gag ndaej dauqfuk guh goek, cauxbaenz yiengh hoenggan gwzgiz、canjnieb gezgou、swnghcanj fuengsik、swnghhoz fuengsik ndaej mbaetyungh swhyenz caeuq baujhoh vanzging, hawj swyenz dauqcungz bienq ndaej andingh、huzciz、gyaeundei.

 ?。↖t) Doicaenh loegsaek fazcanj. Gyavaiq laebhwnj gij faplwd cidu caeuq cwngcwz dazyinx yiengh swnghcanj caeuq siufeiq mbouj miz uqlah hab vanzbauj haenx, laebhwnj laebcienz gij ginghci dijhi loegsaek danq noix sinzvanz fazcanj. Laebhwnj aen cauhmoq dijhi gisuz loegsaek youz hawciengz dazyinx haenx, fazcanj ginhyungz loegsaek, guhhung gij canjnieb mbaet nwngzyenz hab vanzbauj、gij canjnieb cenghseuq swnghcanj、gij canjnieb cenghseuq nwngzyenz. Doicaenh nwngzyenz swnghcanj caeuq siufeiq gwzming, cauhlaeb aen nwngzyenz dijhi cenghseuq danq noix、ancienz yauqlwd sang. Doicaenh swhyenz cienzmienh mbaetyungh caeuq sinzvanz leihyungh, saedhengz gij hengzdoengh guekgya mbaet raemx, gyangqdaemq nwngzyenz siuyungh、doxgaiq siuyungh, guhbaenz swnghcanj hidungj caeuq swnghhoz hidungj sinzvanz doxciep. Dizcang cungj swnghhoz fuengsik genjdan habdoh、loegsaek danq noix, fanjdui lanhyungh saisaengq caeuq siufeiq mbouj hableix, haiguh doengh gij hengzdoengh cauhlaeb aen gihgvanh gangj mbaetyungh、gyadingz loegsaek、hagdangz loegsaek、segih loegsaek caeuq okrog loegsaek.

 ?。∟geih)Roengzrengz gaijgez gij vanzging vwndiz doedok. Genhciz cungqvunz caemh guenj、daj goekgaen bae fuengzceih, laebdaeb saedhengz gij hengzdoengh fuengzceih daihheiq uqlah, dwkhingz ciengz ciengq henhoh mbwn seuq. Gyavaiq fuengzceih raemx uqlah, gyoebhab ceihleix vanzging ranghdah caeuq giz dieghaij gyawj hamq. Lai bae guenjhaed caeuq coihdauq doemnamh uqlah, gyagiengz fuengzceih gij uqlah giz goek baenz benq nungzyez, haiguh gij hengzdoengh cingjceih vanzging diegyouq lajmbanj. Gyagiengz cawqceq huqfeiq baenzndaek caeuq labsab. Daezsang gij biucinj baizcuengq uqlah, gyalai gij cwzyin boux baizuq, laebcienz doengh gij cidu bingzgyaq vanzbauj saenqyungh、giengzceih biengjloh saenqsik、yiemz ceih naek fad daengj. Cauhlaeb aen dijhi ceihleix vanzging aeu cwngfuj guh cujdauj、giyez guh cawjdaej、sevei cujciz caeuq vunzlai doengzcaez caeuqfaenh. Cizgiz caeuqfaenh ceihleix gij vanzging daengx seiqgyaiq, doeksaed gij wngqcingz gemjbaiz.

 ?。⊿am) Lai yunghrengz bae baujhoh swnghdai hidungj. Hengzguh aen gunghcwngz hungnaek baujhoh caeuq coihdauq gij swnghdai hidungj youqgaenj, hawj aen dijhi hendangj swnghdai ancienz bienq ndei, cauhlaeb roenroq swnghdai caeuq aen vangjloz baujhoh swnghvuz miz lai yiengh, daezswng gij caetliengh swnghdai hidungj caeuq sawj de ndaej onjdingh. Guhbaenz gij hong vehdingh diuz sienqhoengz baujhoh swnghdai、nazgoek ciengzlwenx、henzgyaiq hawsingz haifat sam diuz sienq gaemhanh neix. Haiguh gij hengzdoengh hawj diegguek bienq heu, doicaenh gij dieg bienq fwz bienq diegsa、gij dieg bienq rinsa、raemxnamh laesaet guh gyoebhab ceihleix, lai bae baujhoh caeuq hoizfuk diegcumx, gyagiengz fuengzceih diciz caihaih. Caezcienz aen cidu baujhoh ndoengfaex gag hwnj, gyadaih daengx ndaem reihnaz hoizfuk diegndoeng diegnywj. Yiemzgek baujhoh reihnaz, gyadaih gij dieg sawqguh lwnz ndaem daengx raeq, laebcienz gij cidu hawj reihnaz diegnywj ndoengfaex diuzdah aenhuz yietnaiq dauqfuk, laebhwnj aen gihci doenggvaq hawciengz、lai cungj lai yiengh bae boizbouj swnghdai.

 ?。⊿eiq) Gaijgwz aen dijci gamguenj swnghdai vanzging. Gyagiengz doiq swnghdai vwnzmingz gensez guh daengxbuenz dajveh caeuq cujciz lingjdauj, laebhwnj aen gihgou guenjleix swyenz swhyenz swhcanj guekmiz caeuq gamguenj swyenz swnghdai, caezcienz aen cidu guenjleix swnghdai vanzging, doengzcaemh bae hengzguh gij cizcwz boux ciemqmiz cungj swhcanj swyenz swhyenz dwg daengxcungq yinzminz ciemqmiz haenx, doengzcaemh bae hengzguh gij cizcwz guenjhaed gij yunghcawq sojmiz hoenggan diegguek caeuq baujhoh coihdauq swnghdai, doengzcaemh bae hengzguh gij cizcwz gamguenj singz mbanj gak loih uqlah baizcuengq caeuq hingzcwng caepfap. Cauhlaeb aen cidu haifat baujhoh hoenggan diegguek, caezcienz gij cwngcwz boiqdauq dieg cawjdaej goengnaengz, laebhwnj aen dijhi dieg swyenz baujhoh aeu guekgya gunghyenz guh cawjdaej haenx. Giengiet haeddingz caeuq fadceih gij hingzveiz buqvaih swnghdai vanzging.

  Gak boux dungzci! Swnghdai vwnzmingz gensez goenglauz youq ciuhneix、ndeicawq youq cien bi fanh daih. Raeuz aeu laebmaenh sevei cujyi swnghdai vwnzmingz gvanhnen, doidoengh cauxbaenz aen gwzgiz moq gensez yiengh yendaiva vunz caeuq swyenz huzndei fazcanj, vih baujhoh swnghdai vanzging ok gij goengrengz ciuh vunz raeuz!

  Cib、 Genhciz Byaij Diuz Roen Bingdoih Giengzak Miz Daegsaek Cungguek, Cienzmienh Doicaenh Gozfangz Caeuq Bingdoih Yendaiva

  Gozfangz caeuq bingdoih gensez cingq haeuj daengz giz lizsij haidaeuz moq. Mienhdoiq aen vanzging guekgya ancienz bienqvaq laegdaeuq, mienhdoiq aen seizdaih iugouz sawj guekgya giengzak bingdoih giengzak, bietdingh aeu cienzmienh gvancez aen swhsiengj seizdaih moq bingdoih giengzak dangj raeuz, gvancez gij ginhsw canloz fuengcim ndaw hingzseiq moq, gensez gij luzginh、haijginh、gunghginh、hojcenginh caeuq aen budui canloz bangcoengh yendaiva giengzak, dajcauh aen cijveih gihgou cangih lienzhab hoenxciengq maenh’ak yauqlwd sang, cauhlaeb aen yienhdaih hoenxciengq dijhi miz daegsaek Cungguek, raphwnj gij sawjmingh yinvu seizdaih moq dangj caeuq yinzminz gyauhawj haenx.

  Hab’wngq aen seiqdaeuz seiqgyaiq ginhsw gwzming moq fazcanj caeuq gij aeuyungh guekgya ancienz, daezsang gij caetliengh caeuq yauqik gensez, saedbauj daengz 2020 nienz daihdaej guhbaenz gihgaiva, saenqsikvaq gensez aeundaej cincanj hungnaek, canloz naengzlig ndaej miz daezsang hung. Caeuq guekgya yendaiva vaiqmenh dox habngamj, cienzmienh doicaenh ginhsw lijlun yendaiva、 bingdoih cujciz hingzyiengh yendaiva、ginhsw yinzyenz yendaiva、vujgi canghbei yendaiva, caenhrengz ceng’aeu youq 2035 nienz daihdaej guhbaenz gozfangz caeuq bingdoih yendaiva, daengz duenhgyang aen sigij neix dawz bingdoih yinzminz cienzmienh hwnqbaenz aen bingdoih seiqgyaiq itlouz.

  Gyagiengz bingdoih guh aen dangj gensez, haiguh aen cawjdaez gyauyuz “cienzciep gij gihyinh gwzming、raphwnj diuz rapnaek hawj bingdoih giengzak”, doicaenh laebguh aen dijhi mingzdaeuz bouxbing, ganqok yiengh bouxbing gwzming seizdaih moq miz lingzhoenz、miz bonjsaeh、miz cingqheiq、miz binjdwz, ciengzlwenx baujciz gij singqcaet、cunghcij、bonjsaek bingdoih yinzminz. Laebdaeb gyalaeg gaijgwz gozfangz caeuq bingdoih, gyalaeg gaijgwz aen cidu ginhgvanh cizyezva、aen cidu vwnzciz yinzyenz daengj cwngcwz cidu hungnaek, doicaenh ginhsw guenjleix gwzming, caezcienz caeuq fazcanj aen ginhsw cidu sevei cujyi miz daegsaek Cungguek. Laebhwnj cungj swhsiengj gohgi dwg haedsim candouliz, doicaenh gisuz hungnaek cauhmoq、gag guhcawj cauhmoq, lai roengzrengz hwnqguh aen dijhi gungganq ginhsw vunzcaiz, hwnqguh aen bingdoih yinzminz ak cauhmoq. Cienzmienh coengzyiemz ceihleix bingdoih, doidoengh gij fuengsik guenj bing daj goekgaen bae cienjbienq, daezsang gij suijbingz yungh fap bae guenj gozfangz caeuq bingdoih gensez.

  Bingdoih dwg aeu caepcawq hoenxciengq, sojmiz gunghcoz cungj bietdingh aeu genhciz gij biucinj naengzlig hoenxciengq, comz lwgda youq ndaej hoenxciengq、hoenx ndaej hingz. Maedsaed guhndei gij ginhsw doucwngh caepcawq lai aen canloz fuengyiengq, doengjit suenqveh doicaenh gij ginhsw doucwngh caepcawq aen lingjyiz conzdungj ancienz caeuq aen lingjyiz ancienz yienghmoq, fazcanj gij rengzlig hoenxciengq caeuq gij rengzlig baujcang yienghmoq, haiguh gij ginhsw yinhlienh ciuq caen hoenxciengq bae guh haenx, lai bae yinhyungh ginhsw ligliengh, gyavaiq ginhsw cinwngzva fazcanj, daezsang gij naengzlig lienzhab hoenxciengq、 gij naengzlig daengx aen lingjyiz hoenxciengq gaengawq vangjloz saenqsik dijhi daezhawj haenx, mizyauq bae cauxbaenz seiqdaeuz、guenjhaed veizgih、naenxhaed cancwngh、hoenxhingz cancwngh.

  Genhciz guekgya fouqgiengz caeuq bingdoih giengzak dox doengjit, giengzvaq doengjit lingjdauj、caengzdingj sezgi、gaijgwz cauhmoq caeuq doeksaed hanghmoeg hungnaek, haeujlaeg bae gaijgwz gozfangz gohgi gunghyez, cauxbaenz yiengh gwzgiz bingdoih caeuq yinzminz yungzhab fazcanj haeuj laeg, cauhlaeb yiengh guekgya canloz dijhi caeuq naengzlig doxcaemh baenz cingjdaej. Laeb caezcienz aen dijhi gozfangz dungyenz, hwnqguh gij henzguek、gwnzhaij、gwnzmbwn、gozfangz ciuhneix rem’ak ndaetmaenh. Laebhwnj aen gihgou guenjleix baujcang bouxbing doiq ok bingdoih, henhoh gij gienzik habfap bouxbing caeuq vunz ndawranz de, hawj bouxbing bienqbaenz cungj ciknieb daengx biengz gingqcungh. Gyalaeg gaijgwz vujgingj budui, gensez aen vujcangh gingjcaz budui yendaiva.

  Gak boux dungzci!Bingdoih raeuz dwg aen bingdoih yinzminz, gozfangz raeuz dwg aen gozfangz daengx guek yinzminz. Raeuz aeu lai doiq daengx guek yinzminz guh gozfangz gyauyuz, hawj bingdoih caeuq cwngfuj、bingdoih caeuq yinzminz doxgiet ndaetmaenh, vih saedyienh aen loqsiengj Cungguek aen loqsiengj bingdoih giengzak gietcomz goengrengz hung!

  Cib’it、 Genhciz “Aen Guekgya Ndeu Song Cungj Cidu”, Doicaenh Guekcoj Doengjit

  Yanghgangj、Aumwnz dauqgvi guekcoj doxdaeuj, gij sizcen “aen guekgya ndeu song cungj cidu” aeundaej gij baenzgoeng daengx seiqgyaiq goengnyinh. Saehsaed cingqmingz, “aen guekgya ndeu song cungj cidu” dwg aen fueng’anq ceiq ndei gaijgez gij vwndiz Yanghgangj、Aumwnz lizsij louzce, hix dwg aen cidu ceiq ndei Yanghgangj、Aumwnz dauqgvi le ndaej baujciz ciengzgeiz mwnhoengh onjdingh.

  Baujciz Yanghgangj、Aumwnz ciengzgeiz mwnhoengh onjdingh, bietdingh aeu cienzmienh cinjdeng bae gvancez diuz fuengcim “aen guekgya ndeu song cungj cidu”、“vunz Yanghgangj guenjleix Yanghgangj”、“vunz Aumwnz guenjleix Aumwnz”、 gagguenj cingzdoh gig sang neix, yiemzgek ciuq yenfaz caeuq gihbwnjfaz banhsaeh, guhndei gij cidu nem gihci caeuq saedhengz gihbwnjfaz doxgven haenx. Aeu haeujcoengh daegbied hingzcwnggih cwngfuj caeuq bouxdaeuz hingzcwng de ciuqfap gaemgienz、ndeindei guhsaeh, comzgiet daiqlingx gyoengq vunz gak gyaiq Yanghgangj、Aumwnz caez sim gap rengz bae maeuzaeu fazcanj、coicaenh huzndei, baujcang caeuq gaijndei gij gwndaenj yinzminz, miz bouhloh bae doicaenh minzcuj, henhoh sevei onjdingh, hengzguh gij cwzyin henhoh guekgya cawjgienz、ancienz、fazcanj leih’ik yenfaz caeuq gihbwnjfaz gvidingh haenx.

  Yanghgangj、Aumwnz fazcanj caeuq diegndaw fazcanj gaenjmaed doxlienz. Aeu bangcoengh Yanghgangj、Aumwnz yungzhaeuj aen daihbuenz guekgya fazcanj bae, aeu hwnqguh Yez Gangj Au Davanhgih、Yez Gangj Au gapguh、rangh dieg Cuhgyangh Sanhgozcouh doxgap daengj guh cungdenj, cienzmienh doicaenh diegndaw caeuq Yanghgangj、Aumwnz doxleih gapguh, dingh caezcienz gij cwngcwz cosih fuengbienh vunz Yanghgangj、Aumwnz youq diegndaw fazcanj.

  Raeuz genhciz yiengh “vunz Yanghgangj guenjleix Yanghgangj”、“vunz Aumwnz guenjleix Aumwnz” aeu boux gyaezguek guh goek haenx, fazcanj guhhung gij ligliengh gyaez guek gyaez Gangj gyaez Au, hawj gyoengq beixnuengx Yanghgangj、Aumwnz lai miz gij eiqsik guekgya caeuq gij cingsaenz gyaez guek, hawj gyoengq beixnuengx Yanghgangj、Aumwnz caeuq gyoengq yinzminz guekcoj doengzcaez raphwnj aen lizsij cwzyin fukhwng minzcuz、doengzcaez yiengjsouh gij miznaj hungmbwk guekcoj hwnghoengh fouqgiengz.

  Gaijgez aen vwndiz Daizvanh、saedyienh guekcoj cienzbouh doengjit, dwg aen simmuengh caezcaemh daengxcungq lwglanz Cunghvaz, dwg gij gaenbonj leih’ik Cunghvaz Minzcuz. Bietdingh aeu laebdaeb genhciz diuz fuengcim “hozbingz doengjit、aen guekgya ndeu song cungj cidu”, doidoengh song hamq gvanhaeh hozbingz fazcanj, doicaenh engq vaiq guhbaenz guekcoj hozbingz doengjit.

  Diuz yenzcwz aen Cungguek dog dwg gij cwngci giekdaej song hamq gvanhaeh. “Gij nyinhrox doxdoengz 1992 nienz” daejyienh diuz yenzcwz aen Cungguek dog haenx, mingzbeg gyaiqdingh le gij gaenbonj singqcaet song hamq gvanhaeh, dwg gij ceiq youqgaenj saedbauj song hamq gvanhaeh hozbingz fazcanj. Swngznyinh gij lizsij saehsaed “gij nyinhrox doxdoengz 1992 nienz”, nyinhdoengz song hamq dwg caemh aen Cungguek ndeu, song mbiengj song hamq couh ndaej dox doiqvah, doxyaeng gaijgez gij vwndiz gyoengq beixnuengx song hamq gvansim haenx, Daizvanh aen cwngdangj lawz nem aen donzdij lawz caeuq daluz baedauq caemh mbouj miz gazngaih.

  Gyoengq beixnuengx song hamq dwg gij beixnuengx goetyiet doxlienz、 minghyinh caezcaemh, dwg ranz vunz meglwed doxcaemh ndeu. Raeuz dawzndei aen leixniemh “song hamq caen lumj ranz vunz ndeu”, aeueiq gij sevei cidu Daizvanh seizneix saedhengz caeuq gij swnghhoz fuengsik gyoengq beixnuengx Daizvanh, nyienh sien caeuq gyoengq beixnuengx Daizvanh doxfaen gij seizndei daluz fazcanj. Raeuz yaek lai hawj song hamq guh ginghci vwnzva gyaulouz doxgap, guhbaenz doxleih doxik, cugbouh vih gyoengq beixnuengx Daizvanh youq daluz hagsib、cauhnieb、couhnieb、swnghhoz gunghawj gij dakdaih caeuq gyoengq beixnuengx daluz doxdoengz haenx, gyalai gij fukfaenh gyoengq beixnuengx Daizvanh. Raeuz yaek coihawj gyoengq beixnuengx song hamq doengzcaez hungzyangz gij vwnzva Cunghvaz, coicaenh sim caeuq sim doxhab.

  Raeuz giengiet henhoh gij cawjgienz guekgya caeuq diegguek caezcingj, baenzmaz cungj mbouj yungz ndaej guekgya deng faenmbek yiengh saehrwix neix caiq fatseng. Sojmiz doengh gij hozdung faenmbek guekcoj cungj bietdingh deng daengxcungq vunz Cungguek fanjdui daengzdaej. Raeuz miz ceiqheiq giendingh、 saenqsim cibcuk、naengzlig cukgaeuq bae dwkbaih sojmiz hingzsik“Daizvanh doglaeb” maeuzsuenq faenmbek. Raeuz baenzmaz cungj mbouj cinjhawj boux vunz lawz、aen cujciz lawz、aen cwngdangj lawz、youq seiz lawz、yungh cungj hingzsik lawz、dawz gaiq diegdeih Cungguek lawz daj Cungguek faenmbek okbae!

  Gak boux dungzci!Guhbaenz Cunghvaz Minzcuz fukhwng hungmbwk, dwg aen loqsiengj caezcaemh daengxcungq vunz Cungguek. Raeuz saenq dangqmaz, cijaeu daengxcungq lwglan Cunghvaz baudaengz gyoengq beixnuengx Gangj Au Daiz youq ndaw haenx swnhriengz lizsij daihseiq、caez dawzhwnj dauhleix hung minzcuz, gaemmaenh diuz minghyinh minzcuz raeuz youq ndaw fwngz swhgeij, couh itdingh ndaej doengzcaez cauh’ok gij daengzcog gyaeundei Cunghvaz Minzcuz fukhwng hungmbwk!

  Cibngeih、 Genhciz Diuz Roen Hozbingz Fazcanj, Doidoengh Cauhlaeb Vunzloih Minghyinh Gungdungzdij

  Cunghgoz Gungcanjdangj dwg aen cwngdangj vih Cungguek yinzminz maeuz vuenyungz, hix dwg aen cwngdangj vih gij saehnieb vunzloih cinbu bae buekguh. Cunghgoz Gungcanjdangj seizseiz cungj dawz vih vunzloih caiq ok goengrengz moq engq hung dangguh gij sawjmingh swhgeij.

  Cungguek yaek yaengx sang mbaw geiz hozbingz、fazcanj、gapguh、caez hingz, yiemzgek ciuqsouj aen cunghcij yiengh vaigyauh cwngcwz henhoh seiqgyaiq hozbingz、coicaenh doengzcaez fazcanj, giendingh mbouj bienq youq gwnz giekdaej hozbingz caemhyouq haj hangh yenzcwz bae fazcanj caeuq gak guek doxndei gapguh, doidoengh gensez cungj gozci gvanhaeh yienghmoq dox gingqcungh、goengbingz cingqngeih、doxgap caez hingz.

  Seiqgyaiq cingq cawqyouq duenh seizgeiz daih fazcanj daih bengwz daih diuzcingj, hozbingz caeuq fazcanj vanzlij dwg aen cawjdaez seizdaih. Seiqgyaiq dohgizva、ginghci cenzgiuzva、sevei sinsizva、vwnzva dohyang’va fazcanj haeujlaeg, aen ceihleix dijhi daengx seiqgyaiq caeuq gozci cizsi bengwz gyavaiq doicaenh, guek caeuq guek dox lienzhaeh caeuq doxbaengh ngoenz beij ngoenz gyalaeg, gij ligliengh gwnz seiqgyaiq doxbeij bienq ndaej yied daeuj yied doxdaengh, aen daihseiq hozbingz fazcanj mbouj ndaej cienq dauqlaeng. Doengzseiz, seiqgyaiq bungzdaengz gij mbouj onjdingh gij mbouj doekdingh haenx gig lai, seiqgyaiq ginghci gij rengz doidoengh hwnjsang de mbouj gaeuq, gungz fouq faenvaq ngoenz beij ngoenz youqgaenj, gij vwndiz gizdieg vunzlai cungj dawz haeuj sim haenx gizneix caem gizhaenx hwnj, gungjbu cujyi、vangjloz ancienz、binghlah hungnaek、dienheiq bienqvaq daengj doengh gij haephangz mbouj dwg conzdungj ancienz neix laebdaeb banhraih, vunzloih bungzdaengz haujlai diuhcan doxdoengz.

  Aen seiqgyaiq raeuz swnghhoz neix gig miz maqmuengh, hix gig miz diuhcan. Raeuz mbouj ndaej aenvih yienhsaed fukcab cix vutbae loqsiengj, mbouj ndaej aenvih lijsiengj gyae lai cix mbouj bae gyaepgouz. Mbouj miz aen guekgya lawz ndaej gag bae wngqdoiq doengh gij diuhcan vunzloih bungzdaengz haenx, hix mbouj miz aen guekgya lawz ndaej doiqdauq daengz aen daujfwz gag fungsaek.

  Raeuz hemqheuh, gak guek yinzminz caez sim gap rengz, cauhlaeb vunzloih minghyinh gungdungzdij, gensez aen seiqgyaiq hozbingz naihnanz、gizgiz ancienz、doengzcaez mwnhoengh、hailangh bauyungz、seuqcengh gyaeundei. Aeu dox gingqcungh、bingzdaengj doxyaeng, giengiet vutvak lwngjcan swhveiz caeuq giengzgienz cwngci bae, byaij diuz roen moq guek caeuq guek baedauq doiqvah cix mbouj doiqdingj、guhdoih cix mbouj gapgyoengq haenx. Aeu genhciz doenggvaq doiqvah gaijgez cengnauh、aeu doxyaeng vaqgej gij yigen mbouj doengz, doengbuenz maeuzveh wngqdoiq gij ancienz haephangz conzdungj miz ok caeuq mbouj dwg conzdungj miz ok haenx, fanjdui sojmiz hingzsik gungjbu cujyi. Aeu caez sim comz rengz, coicaenh mouyiz caeuq douzswh bienq ndaej swyouz、fuengbienh, doidoengh ginghci cenzgiuzva coh aen fuengyiengq engqgya hailangh、bauyungz、caez ndei、bingzyaenx、caez hingz bae fazcanj. Aeu swngznyinh seiqgyaiq vwnzmingz miz lai cungj lai yiengh, aeu vwnzmingz gyaulouz hamj gvaq vwnzmingz haekhawz、 vwnzmingz doxhag hamj gvaq vwnzmingz doxdawz、vwnzmingz caez miz hamj gvaq vwnzmingz gag ak. Aeu genhciz vanzging huzndei, doxgap wngqdoiq dienheiq bienqvaq, baujhoh ndei aen ranzmbanj digiuz hawj vunzloih ndaej lixyouq neix.

  Cungguek giendingh ciuqhengz aen hozbingz vaigyauh cwngcwz doglaeb gag guhcawj, aeueiq gak guek yinzminz gij gienzleih gag genjleh diuzroen fazcanj, henhoh gozci goengbingz cingqngeih, fanjdui aeu eiqceiq bonjfaenh nyengh gya hawj bouxwnq, fanjdui capfwngz gij saeh ndaw guek guekwnq, fanjdui baengh ak hangz nyieg. Cungguek nyengh mbouj aeu sienghaih leih’ik guekwnq guh daigya daeuj fazcanj bonjfaenh, hix nyengh mbouj vutndek gij gienzik cingqdangq bonjfaenh, bouxlawz cungj gaej vanqsiengj hawj Cungguek ndwnj roengz aen makhaemz sonjhaih leih’ik bonjfaenh. Cungguek ciuqhengz yiengh gozfangz cwngcwz guh fuengzhen haenx. Cungguek fazcanj mbouj doiq aen guekgya lawz cauxbaenz haephangz. Cungguek mboujlwnh fazcanj daengz yiengh cingzdoh lawz, ciengzlwenx mbouj guhyak, ciengzlwenx mbouj guh hangzciemq.

  Cungguek cizgiz fazcanj gij gvanhaeh daengx seiqgyaiq guhdoih, caeuq gak guek gyahung doengh diemj miz leih’ik doxgap de, doicaenh guekhung hezdiuz caeuq doxgap, ndalaeb aen gvaenghgaq guekhung gvanhaeh cungjdaej onjdingh、bingzyaenx fazcanj, ciuq aen leixniemh caensim doxndei doxik bauyungz nem aen vaigyauh fuengcim caeuq gij guekgya gekleiz doxndei、caeuq gij guekgya gekleiz guhdoih bae caeuq doengh aen guekgya seiqhenz gyalaeg gvanhaeh, dawzdingh gij yili’gvanh cingqdeng caeuq gij leixniemh caensaed caensim bae caeuq doengh aen guekgya cingqcaih fazcanj gyagiengz doxgiet doxgap. Gyagiengz caeuq gak guek cwngdangj nem cwngci cujciz guh gyaulouz doxgap, doicaenh yinzda、cwnghez、 bingdoih、deihfueng、yinzminz donzdij daengj caeuq guekrog dox baedauq.

  Cungguek genhciz hangh gihbwnj gozcwz doiq rog hailangh, genhciz hai douguek guh gensez, cizgiz coicaenh “it rangh it loh” gozci doxgap, roengzrengz saedyienh cwngcwz gaeudoeng、sezsih lienzdoeng、mouyiz swnhdoeng、swhginh yungzdoeng、minzsim doxdoeng, dajcauh aen bingzdaiz moq gozci doxgap, demgya doenghlig moq caezcaemh fazcanj. Lai yunghrengz bae bangcoh gij guekgya cingq fazcanj daegbied dwg gij guekgya ceiq mbouj fatdad de, coicaenh sukiq gij cengca namz baek fazcanj. Cungguek haeujcoengh yiengh dijci lai mbiengj mouyiz, coicaenh hwnqguh dieg swyouz mouyiz, doidoengh hwnqguh yiengh seiqgyaiq ginghci dox hailangh.

  Cungguek dawzdingh gij gvanhnen ceihleix seiqgyaiq caemh yaeng caemh guh caemh yungh, daiqdaeuz dizcang gozci gvanhaeh minzcujva, genhciz guekgya mbouj faen hung iq、ak nyieg、gungz fouq itlwd bingzdaengj, haeujcoengh Lenzhozgoz fazveih cizgiz cozyung, haeujcoengh gij guekgya cingq fazcanj haenx youq ndaw hongsaeh gozci lai miz daibyauj caeuq lai gangj ndaej vah. Cungguek yaek laebdaeb fazveih gij cozyung aen guekhung raphwnj cwzyin, cizgiz caeuqfaenh gaijgwz caeuq hwnqguh aen dijhi ceihleix seiqgyaiq, mboujduenh gunghawj gij dungxcaiz caeuq ligliengh Cungguek.

  Gak boux dungzci!Gij minghyinh seiqgyaiq gaem youq ndaw fwngz gak guek yinzminz, gij cenzduz vunzloih youz gak guek yinzminz bae genjleh. Cungguek yinzminz nyienh caeuq gak guek yinzminz itheij, doidoengh hwnqguh vunzloih minghyinh gungdungzdij, doengzcaez bae dajcauh aen daengzcog gyaeundei vunzloih!

  Cibsam、Giendingh Mbouj Bienq Cienzmienh Coengzyiemz Ceih Dangj, Mboujduenh Daezsang Gij Gaemgienz Naengzlig Caeuq

  Lingjdauj Suijbingz Aen Dangj

  Yiengh sevei cujyi miz gij daegsaek Cungguek haeuj daengz seizdaih moq, dangj raeuz itdingh aeu miz baijdaeuz moq guh ok cingzcik moq. Dajdiet bietdingh aeu bonjfaenh ndongj. Dangj aeu comzgiet daiqlingx yinzminz bae guh doucwngh hungmbwk、doicaenh saehnieb hungmbwk、saedyienh loqsiengj hungmbwk, bietdingh aeu mbouj doenghngauz saek di bae genhciz caeuq caezcienz aen dangj lingjdauj, mbouj doenghngauz saek di bae dawz dangj gensez ndaej engqgya giengiengz miz rengz.

  Cienzmienh coengzyiemz ceih dangj ciengzlwenx youq gwnz roen. Aen cwngdangj ndeu, aen cwnggenz ndeu, gij cenzduz minghyinh de youz simvunz comz sanq daeuj gietdingh. Yinzminz ginzcung fanjdui gijmaz、haemz gijmaz, raeuz couh aeu giengiet fuengzre caeuq niujcingq gijmaz. Daengx dangj aeu singjsag rox daengz, gij vanzging gaemgienz dangj raeuz dangqnaj bungzdaengz haenx dwg fukcab, gij yinhsu yingjyangj aen dangj seuqcengh、hawj gij seuqcengh aen dangj bienq nyieg de hix dwg fukcab, doengh gij vwndiz doedok swhsiengj mbouj seuq、cujciz mbouj seuq、cozfungh mbouj seuq ndaw dangj mizyouq haenx lijcaengz ndaejdaengz gaenbonj gaijgez. Aeu laegdaeuq nyinhrox gij gaujniemh gaemgienz、gij gaujniemh gaijgwz hailangh、gij gaujniemh hawciengz ginghci、 gij gaujniemh vanzging baihrog aen dangj dangqnaj bungzdaengz dwg ciengzgeiz caeuq fukcab, laegdaeuq nyinhrox gij yungyiemj cingsaenz cuengqsoeng、gij yungyiemj naengzlig mbouj gaeuq、gij yungyiemj duetliz ginzcung、gij yungyiemj doeknaiq nduknaeuh aen dangj dangqnaj bungzdaengz haenx dwg soemrem caeuq yiemzhaenq, genhciz vwndiz dazyinx, baujciz rengzmaenh canloz, doidoengh cienzmienh coengzyiemz ceih dangj fazcanj haeuj laeg bae.

  Gij cungj iugouz seizdaih moq aen dangj gensez dwg: Genhciz caeuq gyagiengz aen dangj cienzmienh lingjdauj, genhciz dangj aeu guenj dangj、cienzmienh coengzyiemz ceih dangj, aeu gyagiengz gensez gij naengzlig ciengzgeiz gaemgienz aen dangj、hawj aen dangj engqgya senhcin engqgya seuqcengh guh cawjsienq, aeu aen dangj cwngci gensez guh doengjlingx, aeu giendingh lijsiengj saenqniemh cunghcij guh goekdaej, daj diuhdoengh gij cizgizsing、cujdungsing、cangcausing daengx dangj bae roengzrengz, cienzmienh doicaenh aen dangj cwngci gensez、 swhsiengj gensez、cujciz gensez、cozfungh gensez、gijliz gensez, aeu cidu gensez bae roix gyoengqde hwnjdaeuj, haeujlaeg doicaenh aen doucwngh fanj nduknaeuh, mboujduenh daezsang gij caetliengh aen dangj gensez, dawz dangj raeuz gensez baenz aen dangj gaemgienz Majgwzswh Cujyi itcig byaij youq baihnaj seizdaih、yinzminz caensim yungjhu、gamj gag daj gaenbonj gaijgwz bonjfaenh、dingj ndaej gak cungj rumzlangh gaujniemh、cingsaenz hoenghhwd.

 ?。↖t)Dawz aen dangj cwngci gensez baij youq vih daih’it. Geizhauh sienmingz gangj cwngci dwg gij gaenbonj iugouz dangj raeuz dangguh aen cwngdangj Majgwzswh Cujyi. Gij cwngci gensez aen dangj dwg gij gensez goekgaen dangj raeuz, gietdingh gij fuengyiengq caeuq yaugoj aen dangj gensez. Baujcwng daengx dangj fugcoengz cunghyangh, genhciz gij gienzvi caeuq cizcungh doengjit lingjdauj dangj cunghyangh, dwg gij yinvu ceiq youqgaenj cwngci gensez dangj raeuz. Daengx dangj aeu giendingh caephengz gij cwngci lohsienq aen dangj, yiemzgek ciuqsouj cwngci gijliz caeuq cwngci gvigawj, youq cwngci lizcangz、cwngci fuengyiengq、cwngci yenzcwz、cwngci roenloh fuengmienh caeuq dangj cunghyangh baujciz cibfaen doxdoengz. Aeu gingqcungh dangjcangh, yiemzgek caephengz doengh gij cunjcwz mizgven laj hingzseiq moq cwngci swnghhoz ndaw dangj, dem’ak gij cwngcising、sizdaising、yenzcwzsing、candousing cwngci swnghhoz ndaw dangj, gagrox bae daeqceih gij yenzcwz sanghbinj doxvuenh cimqmyaex ndaw dangj swnghhoz, cauh’ok cungj cwngci swnghdai ndei rumz seuq heiq cingq. Caezcienz caeuq doeksaed minzcuj cizcunghci gak hangh cidu, genhciz yiengh cizcungh aeu minzcuj guh giekdaej caeuq yiengh minzcuj aeu cizcungh bae cijdauj dox giethab, gawq cungfaen fazyangz minzcuj, youh maenhrox cizcungh doengjit. Hungzyangz doengh gij gyacizgvanh cungcig lauxsaed、goengdauh cingqbaiq、saedsaeh gouz dwg、ndang cingq fwngz seuq, giengiet fuengzre caeuq fanjdui goyinz cujyi、faensanq cujyi、swyouz cujyi、bonjvih cujyi、vunzndei cujyi, giengiet fuengzre caeuq fanjdui cunghbai cujyi、yiengh vwnzva aengien、yiengh vwnzva maxdaeuz, giengiet fanjdui guh “ngwz song gyaeuj”、vunz song naj. Daengx dangj dungzci daegbied dwg ganbu gaepsang aeu gyagiengz dizlienh dangjsing, mboujduenh daezsang cwngci gyozvu caeuq cwngci naengzlig, aeu doiq dangj cungcig、bang dangj faen you、vih dangj caenh cizcwz、cauhfuk hawj yinzminz dangguh gij cwngci cwzyin gaenbonj, ciengzlwenx baujciz gij cwngci bonjsaek vunz gungcanjdangj.

 ?。∟geih)Yungh Aen Swhsiengj Sevei Cujyi Miz Gij Daegsaek Cungguek Seizdaih Moq daeuj vujcangh daengx dangj. Swhsiengj gensez dwg gij gensez dajdaej aen dangj. Gwzming lijsiengj sang gvaq mbwn. Aen lijsiengj hunggyae gungcanj cujyi caeuq aen lijsiengj caezcaemh sevei cujyi miz daegsaek Cungguek, dwg diuz dongh cengjdaemx cingsaenz caeuq gij lingzhoenz cwngci vunz Cunghgoz Gungcanjdangj, hix dwg gij swhsiengj giekdaej baujciz aen dangj doxgiet doengjit. Aeu dawz giendingh lijsiengj saenqniemh dangguh gij yinvu ceiq youqgaenj swhsiengj gensez aen dangj, gyauyuz dazyinx daengx dangj geiqmaenh gij cunghcij aen dangj, cengq hwnj diuz ndoksaen cingsaenz vunz gungcanjdangj, gaijgez ndei sigaigvanh、yinzswnghgvanh、gyacizgvanh aen vwndiz “cungj haigven” neix, gagrox guh boux giendingh saenqyiengj caeuq boux lauxsaed sizcen aen lijsiengj hunggyae gungcanj cujyi caeuq aen lijsiengj caezcaemh sevei cujyi miz daegsaek Cungguek. Hungzyangz gij yozfungh Majgwzswh Cujyi, doicaenh aen hagsib gyauyuz “song hag it guh” baenz cingqciengz baenz cidu bae, aeu gij lingjdauj ganbu yienhgaep cuqgaep doxhwnj guh cungdenj, youq daengx dangj guh aen cawjdaez gyauyuz “mbouj lumz cosim、geiqmaenh sawjmingh”,yungh gij lijlun cauhmoq aen dangj daeuj cang ukgyaeuj, doidoengh daengx dangj engqgya gagrox bae vih saedyienh seizdaih moq gij lizsij sawjmingh aen dangj buekguh mbouj dingz.

 ?。⊿am) Gensez aen ganbu duivuj conhyezva suciz sang. Gij ganbu aen dangj dwg gij ligliengh dingjdaeuz saehnieb aen dangj caeuq guekgya. Aeu genhciz aen yenzcwz dangj guenj ganbu, genhciz dwz caiz caez miz、aeu dwz youq gonq, genhciz seiq fueng bet baih、yawj caiz yungh vunz, genhciz saehnieb youq gonq、goengdauh cingqbaiq, dawz gij biucinj ganbu ndei doek daengz diegsaed. Genhciz aen daujyang genj vunz yungh vunz cingqdeng, niujcingq gij fungheiq genj vunz yungh vunz, doedok cwngci biucinj, daezswng sawjyungh gij ganbu laebmaenh “seiq aen eiqsik” caeuq “seiq aen gag saenq”、giengiet henhoh gij gienzvi dangj cunghyangh、cienzmienh gvancez caephengz gij lijlun caeuq lohsienq fuengcim cwngcwz aen dangj、cungcig cinghseuq ndaej rapdawz cwzyin haenx, genj ndei boiq ak gak gaep lingjdauj banhswj. Yawjnaek gungganq ciennieb naengzlig、ciennieb cingsaenz, dem’ak ganbu duivuj gij naengzlig hab’wngq aen fazcanj iugouz yiengh sevei cujyi miz gij daegsaek Cungguek seizdaih moq. Lai roengzrengz bae raaeu bwhcwk ganbu coz, yawjnaek youq gihcwngz itsienq caeuq dieg gunnanz ganhoj gungganq dizlienh ganbu coz, laebdaeb mboujduenh bae genj yungh gij ganbu coz maenhndei ginggvaq sizcen gaujniemh haenx. Dungjcouz guhndei gij hong gungganq genjleh ganbu mehmbwk、ganbu siujsoq minzcuz caeuq ganbu rog dangj. Nyinhcaen guhndei gij hong ganbu lizduiyouh. Genhciz yiemz guenj caeuq lai gyaez dox giethab、gikcoi caeuq hanhhaed caez yawjnaek, caezcienz gij gihci gaujhaed bingzgyaq ganbu, laebhwnj gij gihci gikcoi caeuq gij gihci yungz loek gaij loek, geizhauh sienmingz bae hawj doengh boux ganbu gamj rapdawz cwzyin、lauxsaed guhsaeh、mbouj maeuz seileih haenx cengjhwet gyarengz. Gak gaep dangj cujciz aeu gvansim gyaezhoh gihcwngz ganbu, gag rox bae bang gyoengqde baiz you gej nanz.

  Vunzcaiz dwg gij canloz swhyenz saedyienh minzcuz saenqhwng、hingz ndaej youq gozci gingcwngh ciemq cujdung diegvih. Aeu genhciz aen yenzcwz dangj guenj vunzcaiz, comz vunzcaiz maenh’ak lajmbwn daeuj yungh, gyavaiq hwnqguh aen guekak miz vunzcaiz. Saedhengz gij vunzcaiz cwngcwz engqgya cizgiz、engqgya hailangh、engqgya mizyauq, aeu gij daraeh nyinhrox vunzcaiz、gij caensim in’gyaez vunzcaiz、gij damjliengh sawjyungh vunzcaiz、gij heiqliengh bauyungz vunzcaiz、gij fapndei gietcomz vunzcaiz, hawj gak fuengmienh vunzcaiz maenhndei ndaw dangj rog dangj、 ndaw guek rog guek gyonjcomz daengz aen saehnieb hungmbwk dangj caeuq yinzminz buekguh haenx daeuj, gikcoi dazyinx vunzcaiz yiengq dieg bien’gyae gungzhoj、dieg minzcuz henzguek、dieggaeuq gwzming caeuq gihcwngz itsienq riuzdoengh, roengzrengz cauxbaenz aen gizmen ndei bouxboux maqmuengh baenzcaiz、bouxboux roengzrengz baenzcaiz、bouxboux cungj ndaej baenzcaiz、bouxboux cungj ndaej caenh dungxcaiz, hawj gij rengzhoengh dajcauh gak loih vunzcaiz doxciengj bongh ok、gij dungxcaiz coengmingz gyoengqde nyoenx ok foedfoed.

 ?。⊿eiq)Gyagiengz gihcwngz cujciz gensez. Gij gihcwngz cujciz aen dangj dwg aen giekdaej saedbauj gij lohsienq fuengcim cwngcwz caeuq gezcwz baijbouh aen dangj ndaej gvancez doeksaed. Aeu bae daezswng gij naengzlig cujciz guh cungdenj, doedok gij goengnaengz cwngci, dawz gij dangj cujciz gihcwngz ndaw giyez、lajmbanj、gihgvanh、hagdangz、gohyenz yensoj、segih gwnzgai、sevei cujciz daengj, gensez baenz aen baujleij dwkhoenx maenh’ak senhconz gij cawjcieng aen dangj、gvancez gij gietdingh aen dangj、lingjdauj gihcwngz ceihleix、doxgiet dungyenz ginzcung、doidoengh gaijgwz fazcanj haenx. Dangjcihbu aeu rap ndei gij cizcwz cigciep gyauyuz dangjyenz、guenjleix dangjyenz、gamduk dangjyenz caeuq cujciz ginzcung、senhconz ginzcung、gietcomz ginzcung、fugsaeh ginzcung, dazyinx gyoengq dangjyenz daiqdaeuz guh yienghndei. Genhciz aen cidu “sam aen hoih dangz goq ndeu”, doicaenh gij gihcwngz cujciz aen dangj ndaej ndalaeb caeuq hozdung fuengsik cauhmoq, gyagiengz gensez aen duivuj bouxdaiqdaeuz gihcwngz dangj cujciz, hawj gihcwngz dangj cujciz laeb ndaej engq gvangq engq lai, lai roengzrengz gaijgez gij vwndiz gihcwngz dangj cujciz bienq nyieg、bienq haw、cuengq gvaq henz haenx. Gya’gvangq gij gihcwngz minzcuj ndaw dangj, doicaenh hongsaeh ndaw dangj goenghai, deudoeng diuz miengloh hawj dangjyenz caeuqfaenh hongsaeh ndaw dangj、gamduk gij cujciz caeuq ganbu ndaw dangj、yiengq aen dangj cujciz gaepgwnz daezok yigen caeuq genyi. Yawjnaek daj ndaw canjnieb gunghyinz、gyoengq nungzminz bouxcoz、gyoengq vunz dungxmaeg lai gaepsang caeuq ndaw ginghci cujciz mbouj dwg gunghyoujci、ndaw sevei cujciz fazcanj dangjyenz. Lai youq ndaw dangj guh gikcoi gvansim bangfuz. Lai miz cimdoiq caeuq mizyauq bae gyauyuz guenjleix dangjyenz, onjdangq miz gonqlaeng bae haiguh gij hong cujciz cawqceq doengh boux dangjyenz mbouj habgek.

 ?。℉aj) Ciengzgeiz mbouj dingz bae niujcingq fungheiq yiemzsuk gijliz. Dangj raeuz daj ndaw yinzminz daeuj、roengzrag youq ndaw yinzminz、fugsaeh yinzminz, mbat duetliz ginzcung, couh yaek saetbae sengmingh. Gyagiengz cozfungh gensez, bietdingh aeu gaenjmaenh hopheux baujciz dangj caeuq yinzminz ginzcung cungj lienzhaeh maedcaed haenx, demgiengz ginzcung gvanhnen caeuq ginzcung gamjcingz, mboujduenh dwklaeg gij ginzcung giekdaej aen dangj gaemgienz. Fanzdwg gij vwndiz ginzcung fanjyingj haenqrem cungj aeu yiemzsuk nyinhcaen doiqdaih, fanzdwg gij hingzveiz sonjhaih leih’ik ginzcung cungj aeu giengiet niujcingq. Genhciz aeu baihgwnz daiqlingx baihlaj, gyamaenh haigvangq doeksaed gij cingsaenz cwngzgoj cunghyangh bet hangh gvidingh aeu ndaej haenx, laebdaeb cingjceih gij vwndiz “seiq cungj fungheiq”, giengiet fanjdui gij swhsiengj daeggienz caeuq gij yienghsaeh daeggienz. Cungdenj dawzmaenh cwngci gijliz caeuq cujciz gijliz, daiqdoengh lenzgez gijliz、ginzcung gijliz、gunghcoz gijliz、swnghhoz gijliz yiemz hwnjdaeuj. Genhciz mbeguh baebingz caeuq gag baebingz, genhciz ceih gonq re laeng、yw bingh gouq vunz, yungh “seiq cungj hingzdai” gamduk caephengz gijliz, ca mwh caeux ca gij iq、fuengz saeh iq bienq hung. Gyauhawj doengh aen dangj cujciz miz gienzhanh guenj ganbu haenx miz gij gienzhanh gijliz cawqfaen doxwngq, lai bae cazdawz gij cwzyin gamduk caephengz gijliz. Gyagiengz gijliz gyauyuz, giengzvaq gijliz caephengz, hawj dangjyenz、ganbu rox lau、rox re、souj daejsienq, sibgvenq youq ndaw vanzging deng gamduk caeuq deng hanhhaed gunghcoz swnghhoz.

 ?。≧oek) Duedaeu fanj nduknaeuh doucwngh ndaej hingz daengz daej.Yinzminz ginzcung ceiq haemz gij yienhsiengq nduknaeuh, nduknaeuh dwg gij haephangz ceiq hung dangj raeuz dangqnaj bungzdaengz. Cijmiz ciengzlwenx dingjmaenh caeuq roengzsim bae fanj nduknaeuh, gyalaeg goek byai caez ceih, baujcingq ganbu cingbeg goengcingq、cwngfuj cingcingq lenzgez、cwngci cingmingz habdoh, cijndaej diuq ok aen couhgizliz lizsij, saedbauj dangj caeuq guekgya ndaej ciengzgeiz andingh. Dangqnaj, gij hingzseiq fanj nduknaeuh doucwngh vanzlij yiemzhaenq fukcab, aen gietsim gyamaenh gij seiqdaeuz itdingh ndaej hingz、duedaeu cienzmienh ndaej hingz neix bietdingh aeu ndongj lumj rinranx. Aeu genhciz mbouj miz dieggimq、gizgiz guenj daengz、mbouj yungznyaenx saek di, genhciz dawznaek haeddingz、gaemhnaenx haenqrem、ciengzgeiz haeplau, genhciz oetcienz gwn’oet itheij caz, giengiet fuengzre ndaw dangj cauxbaenz leih’ik cizdonz. Youq gij dangjveij ndaw si ndaw yienh laebhwnj aen cidu liebyawj, gya rengz bae cingjceih gij vwndiz nduknaeuh henzndang ginzcung. Mboujguenj boux gauj nduknaeuh deuz daengz gyawz, cungj aeu gaeb ma saemj、yungh faplwd bae ceihfad. Doicaenh fanj nduknaeuh guekgya laebfap, hwnqguh aen bingzdaiz genjgij gijbau mbedoh aen hidungj gijgenj gamcaz. Lai guh gij haeplau hawj vunz mbouj gamj nduknaeuh, san ndaet aen loengz mbouj ndaej nduknaeuh, lai gagrox mbouj siengj nduknaeuh, doenggvaq mboujduenh roengzrengz vuenh ndaej aen biengz an’onj、lajmbwn ronghsag seuqsak.

 ?。–aet) Laeb caezcienz aen dijhi gamduk dangj caeuq guekgya. Gyaak gij naengzlig aen dangj gag guh seuqcengh, gaenbonj dwg baengh gyagiengz aen dangj gag guh gamduk caeuq ginzcung daeuj gamduk. Aeu gyagiengz doiq gienzlig yinhhengz guh hanhhaed caeuq gamduk, hawj yinzminz gamduk gienzlig, hawj gienzlig youq laj rongh yinhhengz, aeu gienzlig gyaeng haeuj aen loengz cidu bae. Lai gya rengz guh gij cujciz gamduk daj gwnz guh daengz laj, gaijndei gij minzcuj gamduk daj laj guh daengz gwnz, fazveih gij cozyung doengzgaep dox guh gamduk, gyagiengz gamduk guenjleix gij hongsaeh ngoenznaengz dangjyenz lingjdauj ganbu. Gyalaeg cwngci liebyawj, genhciz yawjraen vwndiz、cauxbaenz haeplau mbouj doenghngauz, laebbaenz aen muengx gamduk liebyawj liebcaz gwnz laj lienzdoengh. Gyalaeg gaijgwz aen dijci guekgya gamcaz, dawz hong sawqdiemj doihai daengz daengx guek, cauhlaeb aen gamcaz veijyenzvei guekgya、sengj、si、yienh, caeuq gij gijliz genjcaz gihgvanh aen dangj gyoeb youq giz ndeu banhgoeng, guhbaenz doiq sojmiz doengh boux guh hongsaeh goenggya hengzsawj goenggienz haenx cienzbouh gamcaz daengz. Ceiqdingh aen fap guekgya gamcaz, ciuqfap gyau cizcwz gienzhanh caeuq diucaz soujduenh hawj gamcaz veijyenzvei, yungh gij banhfap ceyouq dingjlawh “song yiengh gvidingh”. Gaijgwz aen dijci guenjleix saemjgeiq, caezcienz aen dijci doengjgeiq. Cauhlaeb aen gamduk dijhi youz dangj doengjit cijveih、 cienzmienh goq daengz、gienzvi yauqlwd sang haenx, dawz ndaw dangj gamduk caeuq guekgya gihgvanh gamduk、minzcuj gamduk、swhfaz gamduk、ginzcung gamduk、yizlun gamduk doxronz hwnjdaeuj, gyaak gij rengz doxgap gamduk.

  (Bet) Cienzmienh gyaak gij bonjsaeh gaemgienz. Lingjdauj aen guekhung sevei cujyi miz cibsam ik lai vunz, dangj raeuz gawq aeu cwngci maenhrem, hix aeu bonjsaeh maenh’ak. Aeu gyaak gij bonjsaeh hagsib, youq daengx dangj cauh’ok yiengh heiqfaenh naekna rox hagsib、gamj bae sizcen, gensez aen cwngdangj Majgwzswh Cujyi ak hagsib, doidoengh gensez aen guekhung maij hagsib. Gyaak gij bonjsaeh cwngci lingjdauj, genhciz canloz swhveiz、cauhmoq swhveiz、bencwng swhveiz、fapceih swhveiz、daejsienq swhveiz, gohyoz ceiqdingh caeuq giengiet caephengz gij lohsienq fuengcim cwngcwz aen dangj, dawz dangj doengjlamx daengxbuenz、hezdiuz gak fueng doek daengz giz saed. Gyaak gij bonjsaeh gaijgwz cauhmoq, baujciz cungj cingsaenz yienghsiengq laebsim guh baenaj, lai rox giethab saedsaeh miz haicauh bae doidoengh gunghcoz, lai rox yungh gij gisuz hulenzvangj caeuq gij soujduenh saenqsikvaq daeuj guh gunghcoz. Gyaak gij bonjsaeh gohyoz fazcanj, lai rox gvancez fazcanj leixniemh moq, mboujduenh haiok fazcanj gizmen moq. Gyaak gij bonjsaeh ciuqfap gaemgienz, gyavaiq cauxbaenz aen dijhi fapgvi cidu ndaw dangj guenj doh aen dangj lingjdauj caeuq aen dangj gensez gak aen fuengmienh, gyagiengz caeuq gaijndei doiq guekgya cwnggenz gihgvanh gij lingjdauj haenx. Gyaak gij bonjsaeh guh ginzcung gunghcoz, cauhmoq gij dijci gihci caeuq fuengsik fuengfap ginzcung gunghcoz, doidoengh gunghvei、gungcinghdonz、fulenz doengh gij ginzcung donzdij cujciz neix demgiengz cwngcising、senhcinsing、ginzcungsing, fazveih gij cozyung lumj diuzgiuz diuzsai lienzhaeh ginzcung, cujciz dungyenz gyoengq yinzminz ginzcung giendingh mbouj bienq riengz dangj byaij. Gyaak gij bonjsaeh haenq ca doeksaed, genhciz gangj vahsaed、maeuz saedsaeh、ok saedciu、gouz saedyauq, dawz riengjret coemj guh caeuq baez di guh ndei gaenjmaed giethab hwnjdaeuj, gamj gunghoenx haekfug gunnanz, aeu yiengh cingsaenz dok ding daeuj guhsaed guhsaeq guhndei gak hangh hongsaeh. Gyaak gij bonjsaeh gaemhanh fungyiemj, laeb caezcienz aen gihci fuengzre gaemhanh gak cungj fungyiemj, rox bae cawqleix gak cungj mauzdun fukcab, gamj bae dwkhingz gak cungj gannanz yungyiemj laengzgaz gwnz roen baihnaj haenx, gaemndaet gunghcoz cujdunggenz.

  Gak boux dungzci!Aen saehnieb hungmbwk bietdingh aeu miz aen dangj giengiengz daeuj lingjdauj. Cijaeu dangj raeuz gensez ndei、gensez ak bonjfaenh, saedbauj dangj seizseiz caeuq yinzminz naemj youq itheij、guh youq itheij, couh itdingh ndaej dazyinx aen ruz coux miz loqsiengj hungmbwk Cungguek yinzminz neix buq langh baenaj, onjdupdup hai daengz hamq baihnaj ronghsag bae!

  Gak boux dungzci!Cunghvaz Minzcuz dwg aen minzcuz hungmbwk ginggvaq cien haemz fanh hoj、mbouj hingz mbouj fug, Cungguek yinzminz dwg gyoengq yinzminz hungmbwk gaenxguh mbeihung、gag ak mbouj dingz, Cunghgoz Gungcanjdangj dwg aen cwngdangj hungmbwk gamj doucwngh、gamj hoenxhingz. Loekci lizsij ringx bae humhum, cauzliuz seizdaih nyoengx bae foedfoed. Lizsij dan rox goqdaengz boux giendingh、boux coemj guh、boux buekhoenx, cix mbouj deq boux yaemhywx、boux laihgik、boux lau dwgrengz. Daengx dangj itdingh aeu baujciz gij cozfungh ganhoj buekguh、mbouj ndaengndiengq mbouj simgip, aeu cungj cingsaenz seizgan mbouj deq raeuz、ciengj haet ciengj haemh, haenqrengz byaij ndei diuzroen cangzcwngh seizdaih moq. Daengx dangj itdingh aeu gagrox bae henhoh gij doxgiet doengjit aen dangj, baujciz dangj caeuq yinzminz ginzcung yiengh lienzhaeh naengnoh doxrangh, gyamaenh yiengh daih doxgiet daengx guek gak cuz yinzminz, lai guh yiengh daih doxgiet gyoengq lwglan Cunghvaz ndaw guek rog guek, comzgiet sojmiz gij ligliengh ndaej comzgiet, caez sim gap rengz byaij coh diuz roen ronghsag Cunghvaz Minzcuz fukhwng hungmbwk.

  Bouxcoz hwng guekgya couh hwng, bouxcoz ak guekgya couh ak. Gyoengq bouxcoz miz lijsiengj、miz bonjsaeh、gamj dangrap, guekgya couh miz cenzduz, minzcuz couh miz maqmuengh. Aen loqsiengj Cungguek dwg gij lizsij、yienhsaed, hix dwg gij daengzcog; dwg gij raeuz ciuh neix, engq dwg gij ciuh bouxcoz. Aen loqsiengj Cungguek Cunghvaz Minzcuz fukhwng hungmbwk yaek youq ciuh dam ciuh bouxcoz doxciep buekguh cij guh ndaej baenz. Daengx dangj aeu gvansim caeuq gyaezhoh bouxcoz, dap aen daizheiq hawj gyoengqde yienjok gij heiq gig ndei ciuhvunz. Gyoengq bouxcoz aeu giendingh lijsiengj saenqniemh, simhoengz ceiqheiq sang, lauxsaed nyinhcaen, gamj guh boux buekhoenx seizdaih, youq ndaw sizcen sengdoengh guhbaenz aen loqsiengj Cungguek langh’ok gij loqsiengj hauxseng, youq mwh vih leih’ik yinzminz buekguh mbouj dingz sij ok bien saw gyaeundei ciuhvunz!

  Aen biengz gyaeundei, lajmbwn caezcaemh. Ndwn youq gwnz diegdeih gvangqvidvid gouj bak roekcib lai fanh bingzfueng goengleix, ndoetgwn gij vwnzva yangjfwn haj cien lai bi Cunghvaz Minzcuz ginggvaq ciengzgeiz buekguh rom ndaej haenx, miz gij rengz hungloet hoenghhwd cibsam ik lai vunz Cungguek doxcomz baenz haenx, raeuz byaij diuzroen yiengh sevei cujyi miz gij daegsaek Cungguek, miz aen daizheiq seizdaih gvangqlangh dangqmaz, miz gij lizsij goekdaej nalaeg dangqmaz, miz gij rengzmaenh ndaej baenaj hung’ak dangqmaz. Daengx dangj daengx guek gak cuz yinzminz aeu gaenjmaed doxgiet youq seiqhenz dangj cunghyangh, yaengx sang mbaw geiz hungmbwk yiengh sevei cujyi miz gij daegsaek Cungguek, laebsim baenaj, ngaemgyaeuj buekguh, vih saedyienh doicaenh yendaiva gensez、guhbaenz guekcoj doengjit、henhoh seiqgyaiq hozbingz caeuq coicaenh doengzcaez fazcanj sam daih lizsij yinvu, vih buekrengz dwkhingz cienzmienh laebbaenz aen biengz siujgangh、duedaeu yiengh sevei cujyi miz gij daegsaek Cungguek seizdaih moq ndaej hingz hungmbwk、guhbaenz aen loqsiengj Cungguek Cunghvaz Minzcuz fukhwng hungmbwk、guhbaenz yiengh saedceij gyaeundei yinzminz muengh gvaq haenx laebdaeb buekguh!
Dozsiengq
自拍偷窥亚洲图片wap19uuuucom